شينحۋا اگەنتتىگىنىڭ 8 - ايدىڭ 31 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 8 - ايدىڭ 31 - كۇنى كەشتە يندونەزيانىڭ زۇڭتۇڭى جوكومەن تەلەفوندا سويلەستى.
شي جينپيڭ مىنالاردى اتاپ كورسەتتى: جۇڭگو مەن يندونەزيانىڭ حالىق سانى كوپ، جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋ مىندەتى توتەنشە جاپالى. ەكى ەل دە حالىقتى بارىنەن جوعارى قويۋ، ءومىردى بارىنەن جوعارى قويۋ پرينسيبى بويىنشا قاتىستى قىزمەتتەردى بار كۇشپەن ورىستەتتى. جۇڭگو جاق يندونەزيانىڭ ەڭ سوڭىندا ىندەتتى جەڭەتىندىگىنە كامىل سەنىمدى، يندونەزياعا ۇزدىكسىز باتىل قولداۋ كورسەتىپ، يندونەزياعا قولىنان كەلگەنشە زاتتىق ماتەريال جانە تەحنيكا جاقتان كومەكتەسىپ، ساقتانۋ - تىزگىندەۋ جانە دياگنوز قويۋ - ەمدەۋ تاجىريبەلەرىن ورتاق پايدالانادى.
شي جينپيڭ بىلاي دەپ باسا دارىپتەدى: يندونەزيا جۇڭگونىڭ دوس كورشىسى جانە ماڭىزدى سەرىگى، جۇڭگو جاق يندونەزيانىڭ ۆاكسينا سەلبەستىگى جاعىنداعى ءجىتى قاداعالاپ وتىرعان ىستەرى مەن قاجەتىنە بارىنشا ءمان بەرەدى. كەزەكتە جۇڭگو مەن يندونەزيانىڭ ۆاكسينا سەلبەستىگىن بەلسەنە ورىستەتۋى ەكى ەلدىڭ ىندەتكە قارسى اتتانۋ سەلبەستىگىنىڭ جاڭا جارقىن تۇيىنىنە اينالدى. جۇڭگو جاق ەكى ەل كاسىپورىندارىنىڭ ۆاكسينا زەرتتەۋ - اشۋ، ساتىپ الۋ، ءوندىرۋ سياقتى سەلبەستىكتەردى ورىستەتۋىن، ۆاكسينانىڭ ەكى ەلگە جانە الەمگە تولىق جەتۋى مەن قول جەتىمدى بولۋى ءۇشىن ۇلەس قوسۋىن قولدايدى. ەكى جاق ۇزدىكسىز ىندەتكە ىنتىماقتاسا قارسى اتتانىپ، ادامزاتتىڭ دەنساۋلىق ساقتاۋ، سالاماتتىق ورتاق تۇلعاسىن قۇرۋدى بىرگە ىلگەرىلەتۋى كەرەك.
شي جينپيڭ بىلاي دەپ باسا دارىپتەدى: ىندەت ۇزاققا سوزىلعان، ساقتانۋ - تىزگىندەۋ ۇدايىلانعان جاعدايدا ەكونوميكانىڭ جاندانىپ ارتۋىن ىلگەرىلەتۋ ءارقايسى ەلدەر ءۇشىن ءبىر كەلەلى تاقىرىپ. جۇڭگو رەفورمانى ۇزدىكسىز تەرەڭدەتىپ، سىرتقا ەسىك اشۋ ورەسىن جالپى بەتتىك جوعارىلاتىپ، ەل ءىشى مەن حالىقارا سىندى قوس اينالىم ءبىرىن - ءبىرى جەبەيتىن جاڭا دامۋ ارناسىن قالىپتاستىرۋدى ىلگەرىلەتەدى. بۇل دۇنيە جۇزىندەگى ءارقايسى ەلدەرگە اناعۇرلىم كەڭ بازار ورايىن ازىرلەيدى. بيىل الدىڭعى جارتى جىلدا جۇڭگونىڭ يندونەزياعا قارجى قوسۋى، يندونەزيانىڭ جۇڭگوعا ەكسپورت ەتۋى قوس - قوستان قيىن جاعدايدا ارتىپ، ەكى ەل سەلبەستىگىنىڭ نەگىزى تەرەڭ، تەبىنى كۇشتى ەكەنىن تولىق دالەلدەدى. جۇڭگو جاق يندونەزيامەن بىرگە ”ءبىر بەلدەۋ، ءبىر جولدى“ بىرگە قۇرۋ باستاماسى مەن ”الەمدىك تەڭىز - مۇحيت تياناعى“ ويىن ىشكەرىلەي ۇشتاستىرىپ، جاكارتا - باندۇڭ جوعارى قارقىندى تەمىر جولى، وڭىرلىك امبەباپ ەكونوميكالىق ءدالىز سياقتى ءتۇيىندى نىسانداردى اتقارىپ، ادامدار بارىس - كەلىسىنىڭ ”قولايلى وتكەلىن“ ويداعىداي، جەتكىلىكتى پايدالانىپ، ەكى ەلدىڭ جۇمىستى، ءوندىرىستى قالپىنا كەلتىرۋىن تەزدەتۋدى قالايدى. ەكى جاق ىندەت جارىققا شىعارعان جاڭا كاسىپ سالاسىنىڭ جاڭا ۇلگىسىن يگەرىپ، جاڭا سەلبەستىك سالاسىن اشىپ، ەكى ەلدىڭ ءوز - ءوزىنىڭ دامۋىنا دەم بەرۋى، سونداي - اق ءوڭىردىڭ، ءتىپتى، دۇنيە ءجۇزىنىڭ ەكونوميكاسىنا جاڭا قوزعاۋشى قۋات ۇستەۋ كەرەك. جۇڭگو جاق يندونەزيانىڭ حالىقارالىق جانە وڭىرلىك ىستەردەگى ورنى مەن رولىنا ءمان بەرىپ، يندونەزيامەن بىرگە قۇلشىنىپ، بىرلەسكەن مەملەكەتتەر ۇيىمىن ۇيتقى ەتكەن حالىقارالىق جۇيەنى قورعاپ، الەمدىك جونگە سالۋدى ىلگەرىلەتىپ، كەمەلدەندىرىپ، حالىقارالىق ادىلدىكتى، تۋراشىلدىقتى قورعاپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.
جوكو مىنالاردى ءبىلدىردى: بيىل يندونەزيانىڭ جۇڭگومەن ديپلوماتيالىق قارىم - قاتىناس ورناتقاندىعىنىڭ 70 جىلدىعى. ىندەت جاعدايىندا ەكى ەل تىعىز بارىس - كەلىستى ساقتادى. جۇڭگو جاقتىڭ يندونەزيانىڭ جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋىنا قولداۋ كورسەتكەندىگىنە، اسىرەسە، يندونەزيامەن ۆاكسينا سەلبەستىگىن ورىستەتكەندىگىنە العىس ايتامىن. يندونەزيا جۇڭگو جاقپەن ساۋدا، قارجى قوسۋ، گۋمانيتارلىق سياقتى سالالارداعى اۋىس - كۇيىستى، سەلبەستىكتى كۇشەيتۋدى ءۇمىت ەتەدى، جاكارتا - باندۇڭ جوعارى قارقىندى تەمىر جولى قۇرىلىسىن ۇزدىكسىز بەلسەنە ىلگەرىلەتەدى. يندونەزيا جۇڭگو جاقپەن بىرگە قۇلشىنىپ، حالىقارالىق قارىم - قاتىناستاردىڭ نەگىزگى ولشەمى مەن ءوڭىردىڭ بەيبىتشىلىگىن، ورنىقتىلىعىن قورعاپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.
شينحۋا اگەنتتىگىنىڭ 8 - ايدىڭ 31 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 8 - ايدىڭ 31 - كۇنى كەشتە ماروككونىڭ پاتشاسى مۇحاممەد Ⅵمەن تەلەفوندا سويلەستى.
شي جينپيڭ جۇڭگو ۇكىمەتى جانە جۇڭگو حالقى اتىنان ماروككو ۇكىمەتى مەن حالقىنىڭ جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانعاندىعىنان شىنايى حال سۇرايتىندىعىن جانە وعان باتىل قولداۋ كورسەتەتىندىگىن ءبىلدىردى. شي جينپيڭ بىلاي دەپ اتاپ كورسەتتى: جاڭا تيپتى ايدارشا ۆيرۋس وكپە قابىنۋ ىندەتى بۇكىل دۇنيە ءجۇزى جونىنەن ءبىر رەتكى قاتاڭ دا ۇلكەن سىناق. جۇڭگو مەن ماروككو ىندەت الدىندا قيىندىقتاردى بىلەك بىرىكتىرە جەڭدى، مەن سىزبەن كوپ رەت حات الىستىم. جۇڭگو ىندەتكە قارسى اتتانعان باستاپقى مەزگىلدە ماروككو جۇڭگو جاققا قىمباتتى قولداۋ جانە كومەك كورسەتتى ءارى ماروككودا توسىلىپ قالعان جۇڭگو ازاماتتارىنا قارايلاستى. سول سياقتى ماروككودا ىندەت تۋىلعاننان كەيىن، جۇڭگو جاق ىندەتكە قارسى اتتانۋ بويىنشا بەلسەنە زاتتىق ماتەريال كومەگىن ازىرلەدى. قازىر جاڭا تيپتى ايدارشا ۆيرۋس وكپە قابىنۋ ىندەتى ءالى دە جاپپاي تارالۋ كەزەڭىندە تۇر، ۆاكسينا ادامزاتتىڭ ەڭ سوڭىندا ىندەتتى جەڭۋىندە شەشۋشى رول اتقارادى. مەن تالاي رەت جۇڭگو ۆاكسينانى زەرتتەپ اشقان سوڭ ءارى قولدانىسقا بەرگەننەن كەيىن، كۇللى الەمنىڭ الەۋمەتتىك ءونىمى ەتىپ، ەڭ الدىمەن وركەندەپ كەلە جاتقان ەلدەرگە، اسىرەسە، افريكا ەلدەرىنە تيىمدىلىك جەتكىزۋدى قالايتىندىعىن اشىق بىلدىرگەن ەدىم. جۇڭگو جاق ماروككو جاقپەن ۆاكسينانى زەرتتەپ اشۋ جانە ءوندىرۋ سەلبەستىگىن بەلسەنە ىلگەرىلەتۋدى قالايدى. ەكى جاق ءار ەلمەن بىرگە كوپ جاقتىلىقتى قورعاپ، دۇنيە جۇزىلىك دەنساۋلىق ساقتاۋ ۇيىمىنىڭ باسشىلىق رولىن ساۋلەلەندىرۋىن قولداپ، ءار ەل حالقىنىڭ ءومىرىنىڭ حاۋىپسىزدىگى مەن دەنساۋلىعىن بىرگە قورعاۋى كەرەك.
شي جينپيڭ بىلاي دەپ باسا دارىپتەدى: جۇڭگو مەن ماروككونىڭ ءداستۇرلى دوستىعى تەرەڭ، ەكى ەل باستان - اياق ءوزارا ءتۇسىنىسىپ، ءوزارا سەنىم ارتىپ، ءبىر - ءبىرىنىڭ وزەكتى مۇددەلەرىنە ساياتىن جانە ءجىتى قاداعالاپ وتىرعان كەلەلى ماسەلەلەرىنە باتىلدىقپەن قولداۋ كورسەتتى. جۇڭگو جاق قۋاتتى جۇڭگو كاسىپورىندارىن ماروككوعا بارىپ، قارجى قوسىپ، كاسىپ سالاسىن كوركەيتۋگە ىنتالاندىرادى، ماروككو جاقپەن بىرگە ەكى ەلدىڭ ”ءبىر بەلدەۋ، ءبىر جولدى“ بىرگە قۇرۋ جانە جۇڭگو - افريكا، جۇڭگو - اراب ەلدەرى سەلبەستىك تالقى مىنبەرى سياقتى جۇلگەلەر اياسىنداعى ءارقايسى سالالارداعى سەلبەستىكتى ىلگەرىلەتىپ، ىندەتتەن كەيىنگى گۋمانيتارلىق اۋىس - كۇيىستىڭ، سەلبەستىكتىڭ جاڭا جوباسىن بىرگە جاساپ، جۇڭگو - ماروككو ستراتەگيالىق سەرىكتەستىك قارىم - قاتىناسىنىڭ تىڭ تابىستارعا جەتۋىن ىلگەرىلەتۋدى قالايدى.
مۇحاممەد Ⅵمىنالاردى ءبىلدىردى: مەنىڭ 2016 - جىلى جۇڭگوعا ساپارلاي بارىپ، ءتوراعا شي جينپيڭمەن بىرگە ماروككو مەن جۇڭگونىڭ ستراتەگيالىق سەرىكتەستىك قارىم - قاتىناس ورناتقاندىعىن جاريالاعانىمىز ءالى ەسىمدە. ماروككو جاق جۇڭگو سىندى ستراتەگيالىق سەرىكتىڭ بولعانىنا قاباعات قۋانادى. جۇڭگومەن ستراتەگيالىق سەلبەستىكتىڭ ارقاسىندا ماروككو جاق سوڭعى جىلدارى تاماشا دامۋدى جۇزەگە اسىردى. ماروككو جاق جۇڭگونى ەڭ الدىمەن سەلبەسۋدىڭ بەتالىسى ەتەدى، ەكى جاقتىڭ ەكونوميكا - ساۋدا، عىلىم - تەحنيكا سياقتى سالالارداعى سەلبەستىگىن تەرەڭدەتىپ، ەكى ەل قارىم - قاتىناسىنىڭ اناعۇرلىم باي ومىرشەڭدىككە يە بولۋىنا مۇمكىندىك جاساۋىن ءۇمىت ەتەدى. ماروككو جاق جۇڭگو جاقتىڭ ءوز يەلىك ۇقىعى، حاۋىپسىزدىگى سياقتى وزەكتى مۇددەسىن قورعاۋداعى ورىندى تۇرعىسىن باتىل قولدايدى. جۇڭگو جاقتىڭ ماروككو جاقتىڭ ىندەتكە قارسى اتتانۋىنا قىمباتتى قولداۋ كورسەتكەندىگىنە العىس ايتادى، جۇڭگو جاقپەن ۆاكسينا زەرتتەۋ - اشۋ، ساتىپ الۋ جانە ءوندىرۋ سەلبەستىگىن كۇشەيتۋدى ءۇمىت ەتەدى.
