شينجياڭ گازەتىنىڭ جالپىلىق اقپارات قۇرالدارى ءتىلشىسى چاۋ جين
ىندەت تۋىلعاننان بەرى، جاڭا تيپتى ايدارشا ۆيرۋس وكپە قابىنۋى بويىنشا مەديتسينالىق قۇتقارۋ - ەمدەۋگە بەلگىلەگەن شيپاحانانىڭ كۇتىمدەۋ قىزمەتىنە جاۋاپتى كاسىپتىك ورىنباسار شيپاحانا باستىعى سۇڭ يۇيشيا قاربالاستىقتان تىنىم تاپپادى.
”ناۋقاسقا ساۋىقتىرۋ جاتتىعۋى جاسالدى ما، جوق پا؟ ناۋقاسقا بەرىلگەن دارىگەرلىك كەڭەسپەن تاپتەشتەي سالىستىرۋ، ناۋقاس كەتكەننەن كەيىن سوڭىندا قاتاڭ زارارسىزداندىرۋ كەرەك... ناۋقاستار ازايدى دەپ شيپاحانادا جۇعىمدالۋ جانە كۇتىمدەۋ قىزمەتىمىزدى بوساڭسىتۋعا استە بولمايدى...“ وسى كۇندەرى كوپ ساندى ناۋقاستار ساۋىعىپ شيپاحانادان شىققان بولسا دا سۇڭ يۇيشيا ءار كۇنى ناۋقاستار اۋماعىنا بارىپ، شيپاحانادان شىقپاعان ناۋقاستاردىڭ ساۋىعۋ جاعدايىن، كۇتىمدەۋ قىزمەتىن تاپتەشتەي ۇعىسىپ وتىردى.
”بۇل جولى بەلگىلەگەن شيپاحانادا مەديتسينالىق قۇتقارۋ - ەمدەۋ قىزمەتىنە ات سالىسقان كۇتىمدەۋ توبىندا 1260 ادام بار، ولار بۇكىل شينجياڭداعى 24 ەمدەۋ قۇرىلىمىنان، 33 ەمدەۋ اترەتىنەن كەلگەن، قايتكەندە جەر - جەردەن كەلگەن كوپ ءتۇرلى پاندەگى، ءتۇرلى ساتىداعى كۇتىمدەۋ قىزمەتكەرلەرىن تىعىز ۇيىستىرىپ، كۇتىمدەۋ ارەكەتىن ارناعا ءتۇسىرىپ، كۇتىمدەۋ ساپاسىن جوعارىلاتۋعا بولادى دەگەن ماڭداي الدى ماسەلە بولىپ وتىر“. سۇڭ يۇيشيا مۇنان العاشىنداعى قىزمەت قيىندىعىن ايقىن بىلۋگە بولاتىندىعىن بۇكپەسىز ايتتى.
كۇتىمدەۋ قىزمەتىن جوعارى ونىمدىلىكپەن ورىستەتۋ ءۇشىن، بەلگىلەگەن شيپاحانا بىرلەسكەن كۇتىمدەۋ ءبولىمىنىڭ 3 دارەجەلى تىكە باسقارۋ قۇرىلىمىن ورناتىپ، سۇڭ يۇيشيا بىرلەسكەن كۇتىمدەۋ ءبولىمىنىڭ مەڭگەرۋشىسى جاڭ شيۋمين سياقتى كۇتىمدەۋ - باسقارۋ تاجىريبەسى مول قىزمەتكەرلەرمەن بىرگە ەرەجە - ءتۇزىم ورناتىپ، ءتارتىپتى ساپالىلاندىرىپ، جاۋاپكەرشىلىكتى ايقىنداپ، سوعىستىق كۇي قىزمەت مەحانيزمىمەن ناۋقاستار اۋماعىنىڭ كۇتىمدەۋ بايلىعىن قايتا ۇيىمداستىرۋدى، رەتتەۋدى جانە باۋلۋدى قاتار جۇرگىزدى.
”ءبىز، ءبىر جاعىنان، ناۋقاستار اۋماعىن ورنالاستىرىپ، جاڭالاپ، ءبىر جاعىنان، ەمدەۋ قىزمەتكەرلەرىن جەكە قورعانۋ بويىنشا باۋلىپ، ەندى ءبىر جاعىنان، ناۋقاستاردى قابىلداپ، تۇتاس قامتۋدى، قالتارىس قالدىرماۋدى، بىردە - ءبىرىنىڭ قالىپ قالماۋىن ورىنداپ، بۇكىل شيپاحاناداعى ەمدەۋ ىستەرى قىزمەتكەرلەرىنىڭ باس اماندىعىن قامتاماسىز ەتۋگە مىعىم نەگىز قالادىق“. ءاربىر بۋىندا سۇڭ يۇيشيا تۇگەلدەي جۇمىستى باسى - قاسىندا ءتارتىپتى جۇرگىزۋگە، ولقىلىقتاردى تەكسەرۋگە، دەن قويا وي جۇگىرتۋگە تاباندى بولدى.
”ءتۇرلى دارەجەدەگى كۇتىمدەۋ قىزمەتكەرلەرىنىڭ جۇمىس ورنى قىزمەت جاۋاپكەرشىلىگى ايقىن، ءار كەزەكتەگىلەردىڭ ورنالاستىرىلۋى ۇيلەسىمدى بولدى، ناۋقاستارعا قاتىستى كوڭىل بولەتىن ىستەردى، سونداي - اق ەمدەۋ تالاپتارىن تەز ارادا ناقتاپ تياناقتاندىردى“. سۇڭ يۇيشيانى ەرەكشە اسەرلەندىرگەنى ”كۇتىمدەۋ توبىنداعى مۇشەلەردىڭ كەيبىرەۋىنىڭ جاسى 50دەن اسقان، كەيبىرەۋى ’2000 - جىلداردىڭ تۇلەگى بولسا دا بىردە - بىرەۋى جاپا شەكتىم، شارشاپ - شالدىقتىم دەمەي، كوپشىلىكتىڭ ءار كۇنى كوتەرىڭكى كوڭىل كۇيمەن ناۋقاستار اۋماعىنا بارىپ، ناۋقاستاردىڭ قاسىندا بولعاندىعى“ بولدى.
ءبىر جولى سۇڭ يۇيشيا ناۋقاستار بولمەسىن ارالاپ تەكسەرمەكشى بولىپ جاتقاندا، كەنەتتەن ءبىر سەسترا جۇگىرىپ شىعىپ، ءتارتىپ بويىنشا قورعانۋ كيىمىن شەشەدى، ”ونىڭ كيىمى شىلقىلداپ سۋ بولىپ كەتىپتى، شاشتارىنان تەر سورعالاپ تۇر، ول جىعىلۋعا تاياعاندا ونى سۇيەپ قالدىم“. مۇنى ايتقاندا، سۇڭ يۇيشيانىڭ كوزىنە جاس ىركىلدى.
سۇڭ يۇيشيا قىزمەت بارىسىندا بايقاۋسىزدا اياعىن قايىرىپ الىپ، وڭ جاق تىزەسىنە سارسۋ جينالادى. ول سارسۋىن الىپ، تۇيىقتاۋ ۋكولىن قۇيىپ، قىزمەتتى ۇزدىكسىز جالعاستىرادى. ”مۇنداي كەزدە سىرقاتتانىپ قالسام بولمايدى عوي“. ول، ءتىپتى، ىڭعايسىزدانعانداي بولدى.
بيىل جىل باسىندا تۋىلعان ىندەتتە اۆتونوميالى رايوننىڭ جاڭا تيپتى ايدارشا ۆيرۋس وكپە قابىنۋ ىندەتىنەن ساقتانۋ - تىزگىندەۋ قولباسشىلىق شتابى مەديتسينالىق قۇتقارۋ - ەمدەۋ ماماندار گرۋپپاسىنىڭ باستىعى بولعان سۇڭ يۇيشيا قابىلداپ ەمدەگەن جاڭا تيپتى ايدارشا ۆيرۋس وكپە قابىنۋ ىندەتىنە شالدىققان تۇڭعىش ناۋقاستان باستاپ كىرىسىپ، كلينيكادا ”توڭدى بۇزۋدان“ قامال الۋدى ۇيىمداستىرىپ ورىستەتىپ، الدىن الا تەكسەرىپ، ءبولىپ دياگنوز قويۋ، ەمدەۋ، تىعىز جاناسقانداردى ءبىر جاقتى ەتۋ، وكپە قابىنۋ ىندەتى تارالۋى مۇمكىن جەرلەردى زارارسىزداندىرۋ سياقتى 16 ولشەمدى جۇمىس تارتىبىنە ىزدەنىس جاساپ، ونى قورىتىندىلادى، بۇل جاڭا تيپتى ايدارشا ۆيرۋس وكپە قابىنۋ ىندەتى بويىنشا قۇتقارۋ - ەمدەۋدىڭ ”شينجياڭ تاجىريبەسىنە“ اينالدى؛ الىس ارالىقتى ينتەرنەت تۇعىرىنا سۇيەنىپ، 24 ساعات بويى ۋاقىت شەكتەمەسى جوق بىرلەسىپ دياگنوز قويۋ قىزمەت مەحانيزمىن اتقارىپ، ”نازاريالىق تۇسىنىك جاساۋ + امالياتتىق وقىتۋ“ ءادىسىن قولدانىپ، بۇكىل شينجياڭداعى 1012 ەمدەۋ قۇرىلىمىنا ينتەرنەت جەلىسىندە ۇستىنەن تاراتتى؛ اۋرۋ بەلگىسى جوق جۇعىمدالۋشىلاردىڭ وڭاي - وسپاق بايقالماۋىنداي قيىن ماسەلەدەن قامال الۋ ءۇشىن، اۋرۋ بەلگىسى جوق جۇعىمدالۋشىلارعا دياگنوز قويۋ، ەمدەۋ، سونداي - اق اۋاشالاۋ ءتارتىبىن اقىلداسىپ بەلگىلەدى. بۇل جولى ول تاعى دا كۇتىمدەۋ توبىن باستاپ، «جاڭا تيپتى ايدارشا ۆيرۋس وكپە قابىنۋ ىندەتى كەزىندە كۇتىمدەۋ - باسقارۋ قىزمەتى قولدانباسىن» دايىندادى.
سۇڭ يۇيشيا باتىلدىقپەن الدا ءجۇرىپ، جاۋاپكەرشىلىك ارقالاپ، باستان - اياق ساق بولۋ رۋحىمەن جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋداعى مەملەكەتتىك وزات جەكە داڭقىنا يە بولدى. ”ءبىز مەيىرىمىزبەن ناۋقاستاردىڭ ءومىرىن قورعاپ جانە ولارعا قۇرمەت ەتىپ، ءومىرىمىز ارقىلى ءومىردى قورعايمىز“. سۇڭ يۇيشيانىڭ تەرەڭ سۇيىسپەنشىلىككە تولى سوزدەرى جاندى جادىراتار ساۋلە شاشىپ تۇر.
