ولكە اتتاپ ساياحاتتاۋ قالپىنا كەلدى
9 - ايدىڭ 2 - كۇنى ساياحاتشىلار قاناس كورىنىس وڭىرىندە سەيىلدەۋدە. سۋرەتتى شۇي گۋاڭجيان تۇسىرگەن
شينجياڭ گازەتىنىڭ جيناق حابارى. 9 - ايدىڭ 2 - كۇنى التاي قالاسى گەنەرال تاۋى شاڭعى الاڭىندا قالا تۇرعىنى جاڭ يۇيلين مەن شاڭعى تەبۋ اۋەسكەرلەرى جاساندى سىرعىما جولدا ”قۇيعىتىپ“، جاساندى سىرعىما جولدا زىرعاناۋدىڭ جىلدام قارقىنىنان ءلاززات الىپ، قۇمارلارىنان شىقتى. 9 - ايدىڭ 2 - كۇنىنەن باستاپ، بۇكىل شينجياڭداعى بارلىق دالالىق ساياحات كورىنىس وڭىرلەرى ساياحاتشىلارعا اشىلدى، سونىمەن بىرگە ولكە اتتاپ (اۆتونوميالى رايون، قالا) ساياحاتتاۋ قالپىنا كەلدى.
9 - ايدىڭ 2 - كۇنى اۆتونوميالى رايوندىق مادەنيەت جانە ساياحات مەڭگەرمەسى «شينجياڭ ۇيعۇر اۆتونوميالى رايونىنىڭ دالالىق كورىنىس وڭىرلەرىن ساياحاتشىلارعا جالپى بەتتىك اشۋ جانە ولكە اتتاپ (اۆتونوميالى رايون، قالا) ساياحاتتاۋدى قالپىنا كەلتىرۋ جونىندەگى حابارلاندىرۋدى» جاريالادى، بۇكىل شينجياڭداعى كورىنىس وڭىرلەرى، ساياحات سەرىكتەستىكتەرى سياقتى ساياحاتقا قاتىستى كاسىپورىندار قاتىستى تالاپتارعا قاتاڭ نەگىزدەلىپ، كورىنىس وڭىرلەرىندە سەيىل - سەرۋەن قۇرۋدى باسقارۋدى كۇشەيتىپ، الەۋمەتتىك تازالىق جانە ىندەتتەن ساقتانۋ قىزمەتىن جاقسى ىستەپ، ساياحات كورىنىس وڭىرلەرىنىڭ حاۋىپسىز، ءتارتىپتى اشىلۋىنا شىنايى كەپىلدىك ەتەدى.
ىندەتتەن ساقتانۋ - تىزگىندەۋدى ۇدايىلاندىرۋ العى شارتىندا، جەر - جەردەگى كورىنىس وڭىرلەرى، كورىنىس تۇيىندەرى، ساياحات كاسىپورىندارى ”ادام سانىن شەكتەۋ، الدىن الا ۋادەلەسۋ، قاۋىرت كەزگە سوقپاۋ“ تالابىن تياناقتاندىرىپ، دەنە تەمپەراتۋراسىن ولشەۋ سياقتى ءتۇرلى شارالاردى قاتاڭ تياناقتاندىرىپ، الەۋمەتتىك اۋماقتى زارارسىزداندىرۋدى جاقسى ىستەپ، الەۋمەتتىك ورىنداردا ۇزبەي اۋا الماستىرىپ، زەردەلى ساياحاتقا سۇيەنىپ، ساياحات وڭىرلەرىندەگى ادام، كولىك ساندى مالىمەتتەرىن دەر كەزىندە جاريالاپ، ساياحاتشىلاردى، كولىكتەردى تارتىپكە شاقىرىپ، ساياحاتشىلارعا ماسكى، سپيريت سياقتى ىندەتتەن ساقتانۋ - تىزگىندەۋگە قاجەتتى زاتتىق ماتەريالدار ازىرلەيدى، سونىمەن بىرگە ءوندىرىس حاۋىپسىزدىگى سياقتى قىزمەتتەردى جاقسى ىستەپ، ساياحاتشىلاردى ساپالى قىزمەت وتەۋمەن قامدايدى.
سايرام كولى كورىنىس ءوڭىرى ساياحاتشىلاردىڭ ايرىقشا شوعىرلانۋىنان ساقتانۋ ءۇشىن، ينتەرنەت جەلىسىندە ۋادەلەسىپ بەلەت ساتىپ الۋدى، ۇستىندە دەنە تەمپەراتۋرا ولشەگەننەن كەيىن ساياحات وڭىرىنە ءتارتىپتى كىرۋدى جولعا قويدى. 9 - ايدىڭ 2 - كۇنى تاڭەرتەڭ، اقسۋ ايماعىنا ورنالاسقان تيانشان تەمىر ۇلكەن اڭعارى كورىنىس وڭىرىندە قىزمەتكەرلەر تازالىق ىستەپ، زارارسىزداندىرۋ جۇرگىزىپ، ەش قالتارىس قالدىرمادى. ”جۋىقتا ءبىز كورىنىس ءوڭىرى مەن ساياحاتشىلاردى قابىلداۋ ورتالىعىنا ۇزبەي زارارسىزداندىرۋ جۇرگىزىپ، ساياحاتشىلاردى قارسى الۋعا تولىق دايىندىق جاسادىق“، - دەدى تيانشان تەمىر ۇلكەن اڭعارى كورىنىس ءوڭىرىنىڭ باس ديرەكتورى چىن رۇيبو.
اۆتونوميالى رايوندىق مادەنيەت - ساياحات مەڭگەرمەسى مادەنيەت - ساياحات قيمىلدارىن وتكىزۋ ارقىلى جەر - جەردەگى كورىنىس وڭىرلەرىن، كورىنىس تۇيىندەرىن ەسىك بەلەتىن كەشىرۋ، مادەنيەت - ساياحات بويىنشا تۇتىنۋ بەلەتىن تاراتۋ سياقتىلارعا شابىتتاندىرىپ، بازاردىڭ ومىرشەڭدىك قۋاتىن اناعۇرلىم قاۋلاتىپ، ساياحات كاسىبىنىڭ قالپىنا كەلۋىن جەبەدى. تولىقسىز ساناققا قاراعاندا، بۇكىل شينجياڭنىڭ جەر - جەرى ”جۇڭگو شارۋالار مول ءونىم مەرەكەسى“، ”جۇڭچيۋ مەرەكەسى“، ”1 - قازان“ سياقتى مەرەكە - مەيرام كۇندەرىمەن بىرلەستىرىپ، 100دەن اسا باي مازمۇندى مادەنيەت - ساياحات قيمىلدارىن دايىندايدى ەكەن.
ولكە اتتاپ ساياحاتتاۋدى قالپىنا كەلتىرىپ، شينجياڭنىڭ ساياحات كاسىپورىندارىنا ومىرشەڭدىك كۇش ۇستەدى. ”شينجياڭداعى ءارقايسى ۇلكەن ساياحات كاسىپورىندارى، اسىرەسە، ءارقايسى ساياحات سەرىكتەستىكتەرى بەلسەنە ارەكەتكە كەلىپ، ورايدى ۇتا يگەرۋدە“. اۆتونوميالى رايوندىق ساياحات سەرىكتەستىكتەرى قوعامىنىڭ باستىعى ۋ فىڭ: قازىر كەيبىر ساياحات سەرىكتەستىكتەرى شينجياڭعا كىرىپ - شىعاتىن ساياحات جەلىسى ونىمدەرىن دايىنداپ بولدى، - دەپ تانىستىردى.
ساياحاتشىلاردى باۋراۋ ءۇشىن جەر - جەر ەرەكشە ساياحات - مادەنيەت بويىنشا ءبىرسىپىرا مادەنيەتتىك سەزىنۋ جەلىسىن مۇقيات تۇلعالادى. سۋ ۇستىندە پاراشوتپەن ۇشۋ، ساياحات قايىعى، ساياحات كەمەسى، قالقىما قايىق، موتورلى قايىق، قارماق سالۋ... باعراش كولى داحىكوۋ كورىنىس وڭىرىندە كوڭىل اشۋدىڭ 20 نەشە ءتۇرلى نىسانى جالپى بەتتىك ىسكە قوسىلدى، كورىنىس وڭىرلەرى قۇم قايراڭدا ەت قاقتاۋ، قامىس - قۇراقتاردى تاماشالاۋ سياقتى ەرەكشە قيمىلداردى دايىندادى. كوكتوعاي اۋدانى بەيزاتتىق مادەنيەت مۇراسى جانە مادەني ەسكەرتكىش بايلىعىمەن ۇشتاستىرىپ، ”بەيزاتتىق مادەنيەت مۇراسى + مادەني ەسكەرتكىش + ساياحات“ سىندى مادەنيەت - ساياحاتتىق سەزىنۋ جەلىسىن كۇش سالا تۇلعالاپ، قىزىل مادەنيەت ساياحاتى سياقتى ءبىر توپ ەرەكشە مادەنيەتتىك سەزىنۋ تۇرىندەگى ساياحات ونىمدەرى مەن ساياحات جەلىسىن ازىرلەدى.
وتكەن 2 ايعا جۋىق ۋاقىت ىشىندە رايونىمىزداعى ءارقايسى كورىنىس وڭىرلەرى، كورىنىس تۇيىندەرى ىركەس - تىركەس جاڭالاۋ جۇرگىزىپ، دارەجەسىن ءوسىرىپ، ساياحات ساپاسىن ۇزدىكسىز جوعارىلاتتى.
9 - ايدىڭ 2 - كۇنى فۋكاڭ قالالىق پارتكومنىڭ ورىنباسار شۋجيى، بوعدا كولى باسقارۋ كوميتەتى پارتكومىنىڭ شۋجيى چىڭ شياۋفىڭ بىلاي دەپ تانىستىردى: بوعدا كولى كورىنىس ءوڭىرى ىندەتتەن ساقتانۋ - تىزگىندەۋدى ۇدايىلاندىرۋدى مىقتاپ يگەرۋمەن بىرگە، نىسان قۇرىلىسى مەن تيجارات قىزمەتىن بەلسەندىلىكپەن جاقسى يگەردى، كورىنىس ءوڭىرىنىڭ بيىل تۇراقتاندىرعان ءتۇيىندى قۇرىلىس نىسانىنا قازىر 120 ميلليون يۋان قارجى قوسىلدى، مۇنىڭ ىشىندە بوعدا كولى نەگىزدىك قۇرىلعىسىنىڭ 1 - مەرزىمدىك ينجەنەرياسى مەن ۋجياڭ اسپالى اينەك كوپىر قۇرىلىسى نىسانى نەگىزىنەن اياقتادى. قارامايلى دۇنيە جۇزىلىك سايتان كەرىش كورىنىس ءوڭىرى ساياحاتشىلاردىڭ ساياحاتتىق سەزىنۋىن جوعارىلاتۋ ءۇشىن، بيىل قارجى قوسىپ، ساياحات جەلىسىن تىڭنان 5 كيلومەتر ۇزارتتى، كورىنىس ءوڭىرى ساياحات جەلىسىنىڭ جالپى ۇزىندىعى 15 كيلومەترگە جەتتى. جاڭا جەلى مۇناي ءوندىرۋ بازاسىنا تۇتاسادى، ساياحاتشىلار مۇناي مادەنيەتىنىڭ تاڭعاجايىپ كۇشىن تاماشالاي الادى.
(تىلشىلەر ياۋ گاڭ، رىن جياڭ، قاتىناسقان تىلشىلەر جاڭ تيڭ، گى يوۋجۇن، سۇڭ يا - ۋىن، بايىنعولين تىلشىلەر پۋنكتىنەن جوۋ حايشيا، ەرىكتى ءتىلشى دۇڭ شىجۇي، لۇي نا)
