شينجياڭ گازەتىنىڭ جالپىلىق اقپارات قۇرالدارى ءتىلشىسى يۇي مىڭران
”توسىن تۋىلعان ىندەت كوپشىلىكتىڭ پسيحيكالىق ساپاسىن جانە كاسىپتىك قابىلەتىن بىردەي سىننان وتكىزدى، مۇنداي كەشىرمە ماعان ەمدەۋ قىزمەتكەرلەرىنىڭ بورىشى مەن جاۋاپكەرشىلىگىن تەرەڭ سەزىندىردى. مەنىڭشە، تاپجىلماي قورعاپ، ىندەت جويىلمايىنشا، ساۋىتتى شەشپەۋ كەرەك“. 9 - ايدىڭ 4 - كۇنى اۆتونوميالى رايوندىق حالىق شيپاحاناسى تىنىس جانە قاتەرلى، سالماقتى اۋرۋلار مەديتسيناسى ءبولىمىنىڭ اعا شيپاگەرى لۋ دۇڭمەيدىڭ قىزمەت ورنىندا تاپجىلماي ۇزدىكسىز قىزمەت ىستەگەنىنە 51 كۇن بولدى، ول بىلاي دەدى: ”كوپتەگەن كاسىپتەسىم ءبىرىنشى شەپتە ەرلىكپەن كۇرەس جۇرگىزۋدە، ەرەكشە جاپالى، ءبىز سياقتى شيپاحانادا قالعان ەمدەۋ قىزمەتكەرلەرى دە شەپتى، ءسوز جوق، ويداعىداي قورعايمىز“.
7 - ايدىڭ 16 - كۇنىنەن بەرى، لۋ دۇڭمەي اۆتونوميالى رايوندىق حالىق شيپاحاناسىنىڭ تىنىس جانە قاتەرلى، سالماقتى اۋرۋلار مەديتسيناسى بولىمىندە تاباندىلىقپەن كەزەكشىلىك ىستەپ كەلەدى، بولىمدەگى كۇندەلىكتى قىزمەتتەن سىرت، لۋ دۇڭمەي اۆتونوميالى رايوندىق حالىق شيپاحاناسىنىڭ ىندەت كەزىندە ۋاقىتشا قۇرعان ىندەت جاعدايىن اقىلداسۋ - تۇجىرىمداۋ ماماندار گرۋپپاسىنا دا قاتىناسىپ، شيپاحانادا جاتقان ناۋقاستار مەن قىزۋ امبولاتورياسىنداعى ناۋقاستارعا ەپيدەومولوگيالىق تالداۋ جاساۋ، تۇجىرىم جاساۋ قىزمەتىن ورىستەتىپ، قاس قاعىم ۋاقىتتى زايا جىبەرمەي ناۋقاستاردىڭ اۋرۋ جاعدايىن باعالاپ، شۇعىل ناۋقاستار ءۇشىن ”جاسىل ارنا“ اشتى.
بىرنەشە قاراپايىم بالنيتسا شيپاگەرلەرى مەن سەسترالاردىڭ جاتاعى ەتىپ ۋاقىتشا وزگەرتىلىپ، لۋ دۇڭمەي مەن كاسىپتەستەرى وسىندا جاتىپ، كۇندىز - ءتۇنى ساقاداي ساي تۇردى.
”كۇندىز قالىپتى قىزمەت ىستەيمىز، بىرلەسىپ دياگنوز قويامىز، بالنيتسالاردى تەكسەرەمىز، اۋرۋ جاعدايىن تالقىلايمىز، كەيدە كەشتە دە تۇتقيىل جاعدايعا جولىعامىز“. لۋ دۇڭمەي 8 - ايدىڭ اياق شەنىندەگى ءبىر كۇنى تاڭعى ساعات 3 مولشەرىندە ءبىر جۇكتى ايەلدىڭ بوسانارعا تاياعانى جونىندە شۇعىل تەلەفون قابىلداعانىن ەسكە الدى.
لۋ دۇڭمەي مەن ماماندار گرۋپپاسىنىڭ مۇشەلەرى بوساندىرۋ بولىمىنە وپەراتسياعا دايىندالۋدى حابارلاۋمەن قاتار، جۇكتى ايەلدەن كلينيكالىق سۇراۋ سۇرايدى، جۇرگەن - تۇرعان جەرىن ۇعىسادى، اۋرۋ جاعدايىن باعالايدى.
نۋكلەين قىشقىلىن تەكسەرۋ ناتيجەسىن توسۋعا ۇلگىرمەگەن جاعدايدا، ماماندار گرۋپپاسىنىڭ مۇشەلەرى بارلىق قىزمەتتى جارتى ساعاتتا ءبىتىرىپ، وسى جۇكتى ايەل ءۇشىن دەر كەزىندە جاسىل ارنا اشىپ، ونى بوساندىرۋ بولمەسىنە ءساتتى كىرگىزەدى.
قاربالاستىق اياقتاعاننان كەيىن، لۋ دۇڭمەي توسەكتە جاتسادا كوز ىلە المادى، ايتسە دە كوڭىلى ەرەكشە جاي تاپتى .
لۋ دۇڭمەي ءوزىنىڭ كەرەمەت ىستەردى ىستەمەگەندىگىن، تەك تالاي جىلدى ءبىر كۇندەي تاباندىلىقپەن وتكىزگەندىگىن اشىق ايتتى. ونىڭ نازارىندا، دياگنوز قويۋ، ەمدەۋ دەڭگەيى مەن مەديتسينالىق قىزمەت وتەۋ ساپاسىن ءوسىرۋ، ناۋقاستىڭ اماندىعىن كوكەيىنەن شىعارماۋ ەمدەۋ قىزمەتكەرلەرىنىڭ بورىشى مەن جاۋاپكەرشىلىگى.
بيىل 43 جاستاعى لۋ دۇڭمەيدىڭ 20 جىلدىق قىزمەت تاجىريبەسى بار، ول كەزىندە امەريكادا پوسدوكتور تاربيەسىن العان جانە زەرتتەۋ جۇرگىزگەن، تىنىس الۋ جۇيەسىندە كوپ كەزىكپەيتىن اۋرۋلار، كۇردەلى اۋرۋلار جانە تىنىس الۋ قاتەرلى، سالماقتى اۋرۋلار جونىندە ەرەكشە كوزقاراسى مەن ويى بار.
”ىندەت كەزىندە مەن بالامدى اكە - شەشەمە تاپسىرىپ، شايقاسقا قاتىناسۋ ءوتىنىش حاتىن جازىپ، ءبىرىنشى شەپكە بارۋدى ءۇمىت ەتتىم“. لۋ دۇڭمەي بىلاي دەدى: بيىل 3 - ايدا، مەن شەتەلگە كومەكتەسەتىن مەديتسينالىق ماماندار گرۋپپاسىنىڭ مۇشەسى رەتىندە، پاكيستانعا كومەككە بارعانمىن.
”شەتەلدە ءبىز جۇڭگونىڭ ەمدەۋ قىزمەتكەرلەرىنىڭ وبرازىنا ۋاكىلدىك ەتەمىز، ەل ىشىندە ءبىز بۇقارانىڭ سالاماتتىعىن قورعاۋشىمىز، مەن جاۋاپكەرشىلىگىمنىڭ اۋىر ەكەندىگىن تەرەڭ سەزىندىم، الداعى قىزمەت بارىسىندا مەن، ءسوز جوق، اۋەلگى ماقساتتى ۇمىتپاي، باستان - اياق ساق بولامىن“، - دەدى لۋ دۇڭمەي.
