شينجياڭ گازەتىنىڭ جالپىلىق اقپارات قۇرالدارى ءتىلشىسى ياۋ گاڭ 9 - ايدىڭ 5 - كۇنى فۋكاڭنان حابارلايدى. ”كوز ۇشىندا كۇمىستەي جىلتىلداعان اپپاق قار، كوز الدىڭدا جاپ - جاسىل قاراعايلار ايشىقتى جاراسىم تاۋىپ تۇر، كول بەتىندە كوگىلجىم تولقىندار بۇيرالانا تولقيدى، كۇزدى كۇنگى بوعدا كولى كوركەم سۋرەتتەي كوز الدىڭدا كولدەنەڭ تارتىلادى!“ 9 - ايدىڭ 5 - كۇنى تۇستەن بۇرىن بوعدا كولىنىڭ كوركەم كورىنىسىن قانعانشا تاماشالاعاننان كەيىن، سىچۋاننىڭ ميانياڭىنان كەلگەن ساياحاتشى ليۋ رۇڭ تاڭدانىسىن جاسىرا المادى.
سول كۇنى سىچۋاندىق جانە جىجياڭدىق ساياحاتشىلار ساياحات كووپەراتيۆىنە ەرىپ تيانشانداعى بوعدا كولى كورىنىس رايونىنا ساياحاتتاي كەلدى. اۆتونوميالى رايوندىق مادەنيەت جانە ساياحات مەڭگەرمەسىنىڭ بازار باسقارۋ باسقارماسىنىڭ قاتىستى جاۋاپتىسىنىڭ تانىستىرۋىنشا، بۇل رايونىمىز ولكە اتتاپ ساياحاتتاۋدى قالپىنا كەلتىرگەننەن كەيىن شينجياڭنىڭ سىرتىنان قابىلداعان تۇڭعىش ساياحات ۇيىرمەسى ەكەن.
9 - ايدىڭ 2 - كۇنى ساياحات كووپەراتيۆى ليۋ رۇڭعا شينجياڭدا ولكە اتتاپ ساياحاتتاۋ قالپىنا كەلتىرىلگەندىگىن ۇقتىردى، ليۋ رۇڭ جانە ونىڭ وتباسىنداعىلار 9 - ايدىڭ 4 - كۇنى ۇشاقپەن ۇرىمجىگە جەتتى. ليۋ رۇڭ تىلشىگە ءوزىنىڭ 80 نەشە جاستاعى شەشەسى مەن 4 جاستاعى جيەن قىزىن ەرتىپ كەلگەندىگىن، جول بويى قىزمەتكەرلەردىڭ ولارعا وتە جاقسى قارايلاسقاندىعىن، قىزمەت وتەۋ پوزيتسيالارى توتەنشە جاقسى بولعاندىعىن ايتتى. شينجياڭ جاقسى جەر ەكەن، شينجياڭدا كوبىرەك ايالداعىمىز كەلدى، - دەدى.
”ءبىز ساياحاتشىلارعا ماسكى، قول جۋۋ سۇيىقتىعىن دايىندادىق؛ اس - تاعام جاعىندا پالاۋ، لاعىمان سياقتى شينجياڭنىڭ ەرەكشە ءدامدى تاعامدارىن دايىنداپ، بولەك تاماقتاندىردىق“. شينجياڭ كاڭحۇي ۇلى تابيعات حالىقارالىق ساياحات كووپەراتيۆىنىڭ قىزمەتكەرى جاڭ شيۋليان: سول كۇنى ساياحات كووپەراتيۆى ساياحاتشىلاردى بوعدا كولى قاتارلى كورىنىس تۇيىندەرىن ساياحاتتاۋعا ورنالاستىردى، وسىدان كەيىن قاناس سياقتى كورىنىس رايوندارىنا بارامىز، - دەدى.
ۇعىسۋعا قاراعاندا، 9 - ايدىڭ 5 - كۇنى تيانشان بوعدا كولى كورىنىس رايونى شينجياڭنىڭ ءىشى - سىرتىنان 2881 ادامدى قابىلداعان.
فۋكاڭ قالالىق پارتكومنىڭ ورىنباسار شۋجيى، تيانشان بوعدا كولى باسقارۋ كوميتەتى پارتكومىنىڭ شۋجيى، مەڭگەرۋشىسى چىڭ شياۋفىڭ تانىستىرىپ بىلاي دەدى: تيانشان بوعدا كولى كورىنىس رايونى ساياحات ارقىلى حالىققا تيىمدىلىك جاساۋ ساياساتىن اتقارىپ، ادامداردىڭ ىندەت اقىرلاسقاننان كەيىن سىرت جەرلەرگە شىعىپ ساياحاتتاۋ سىندى جاڭا قاجەتىنە قاراتا ارنايى قىزمەت وتەۋدى ورتاعا قويىپ، عىلىم جالپىلاستىرۋ، دەنە شىنىقتىرۋ، تىنىعۋ ساياحات جەلىسىن اشىپ، ساياحات ورلەۋىن جىلدامداتتى.
