شينجياڭ گازەتىنىڭ جالپىلىق اقپارات قۇرالدارى تىلشىلەرى سۋ لۋپيڭ، رىن حۋا
9 - ايدىڭ 10 - كۇنى تۇستەن بۇرىن اۆتونوميالى رايوننىڭ جاڭا تيپتى ايدارشا ۆيرۋس وكپە قابىنۋ ىندەتى بويىنشا مەديتسينالىق قۇتقارۋ - ەمدەۋگە بەلگىلەگەن شيپاحاناعا كومەكتەسىپ كۇتىمدەۋ مىندەتىن ورىنداپ، تىنىعىپ، رەتتەلىپ بولعاننان كەيىن، حوتان ايماقتىق جۇقپالى اۋرۋلار ارناۋلى شيپاحاناسىنىڭ سەستراسى كامىلجان الىم جاۋىنگەر سەرىكتەرىمەن بىرگە اۋىلعا قايتاتىن كەزەكشى ۇشاققا شىقتى. 2 رەتكى ىندەتكە قارسى اتتانۋدىڭ ءبىرىنشى شەبىندە قۇتقارۋ - ەمدەۋگە قاتىناسقان كەشىرمەسىن ەسكە العان 23 جاستاعى كامىلجان بەكەم تۇردە: ”پارتيا مەن حالىق قاجەت ەتكەن كەزدە، ءسوز جوق، بار قايراتىمدى سالامىن“، - دەدى.
”مەن تىزىمدەلەمىن! 2 - ايدىڭ 4 - كۇنى تاڭ سارىدە حوتان ايماقتىق جۇقپالى اۋرۋلار ارناۋلى شيپاحاناسى حۋبەيعا كومەكتەسۋ جونىندە اتتانىسقا كەلتىرۋ ءماجىلىسىن اشقاندا، كامىلجان ءبىرىنشى بولىپ وسى ءسوزدى ايتتى. نەبارى ءبىر جىلدىق كۇتىمدەۋ تاجىريبەسى بار بولعانىمەن، ءبىراق بۇل ونىڭ ”شاقىرعاندا شايقاسا الاتىن“ سەنىمىنە بوگەت بولا العان جوق. اترەتتەگى جاسى ەڭ كىشكەنە سەسترا بولعان ول وزىندەگى جەتەرسىزدىكتەرگە دۇرىس قاراپ، ناقتى شايقاستا بەلسەنە ۇيرەنىپ، ءوزىن كەمەلدەندىردى.
ۋحانداعى قوناق بولمە فاڭساڭ شيپاحاناسىندا كامىلجان ءار كۇنى ءاربىر ناۋقاستىڭ اۋرۋ جاعدايىن مۇقيات باقىلاپ، ەستەلىككە الىپ، ناۋقاستاردى ەمدەۋگە پايدالانىلاتىن دارىلەردى تەكسەرىپ، ولارعا تۇرمىستىق بۇيىمدار تاراتاتىن. بۇل عانا ەمەس، ەر سەسترا بولعان ول زاتتىق ماتەريالداردى، جابدىقتاردى تاسۋ، تازالىق ىستەۋ، تازا اۋىز سۋ اۋىستىرۋ سياقتى دەنە ەڭبەك جۇمىستارىن دا ىرىقتى تۇردە ارقالادى. كامىلجان تىنىم تاپپاي زىر شاپقىلاپ جۇرگەندىكتەن، كوپشىلىكتىڭ ءبارى ونى ىستىق ىقىلاسپەن ”زىر جۇگىرگەن اق حالات“ دەپ اتادى.
بەينەسى كورنەكتى بولعاندىقتان، كامىلجان حۋبەيعا كومەكتەسۋدىڭ ءبىرىنشى شەبىندە پارتياعا مۇشە بولدى. 7 - ايدىڭ ورتا شەنىندە ۇرىمجىدە توسىننان ىندەت تۋىلعاندا، ول تاعى دا شايقاسقا قاتىناسۋدى ءوتىنىپ، بەلگىلەگەن شيپاحانانىڭ ICU ناۋقاستار اۋماعىنا بارىپ، كۇتىمدەۋگە ات سالىستى.
”حۋبەيعا كومەككە بارعان سول كۇندەردە قۇندى تاجىريبەلەر توپتاعاندىعىم سەبەپتى بۇل جولى ICUعا بارعاندا اسىپ - ساسپادىم“. كامىلجان الىم بىلاي دەدى: ءجۇرىپ - تۇرا الاتىن، تاماعىن ءوزى جەي الاتىن جەڭىل ناۋقاستارمەن ۇقسامايتىنى، سالماقتى ناۋقاستاردىڭ كوپ ساندىسى ءوز قاجەتىنەن شىعا المايدى. ونىڭ ءار كۇنگى نەگىزگى مىندەتى ناۋقاستاردى اۋناتۋ، ارقاسىن ءسۇرتۋ، تاماق ىشكىزۋ، ۇلكەن - كىشى دارەتكە وتىرعىزۋ بولاتىن. شارشاعانىمەن ناۋقاستاردىڭ ەسىن جيىپ، جەرگە ءتۇسىپ ءجۇرىپ - تۇرا العانىن كورگەندە كامىلجاننىڭ كوڭىلى شاتتىققا شوماتىن.
كامىلجان كۇتىمدەگەن ناۋقاستاردىڭ اراسىندا جاسى 70تەن اسقان ءبىر ناۋقاس ونىڭ نازارىن ەرەكشە اۋداردى. ”اقساقال شيپاحاناعا جاڭا جاتقان كەزىندە ەشكىمگە دە قارامايتىن، توسەكتەن ءوزى تۇسە المايتىن، ەمدەۋگە سايكەسپەيتىن - دى“. سونىمەن كامىلجان بالاسى ىسپەتتى سالاۋاتىمەن ونىمەن اڭگىمەلەستى. اسىلىندە، كاريا جاڭا تيپتى ايدارشا ۆيرۋس وكپە قابىنۋ ىندەتىن تۇسىنبەگەندىكتەن ىشتەي قورىققان كورىنەدى، وعان قوسا ەمدەۋ قىزمەتكەرلەرى تۇگەلدەي قالىڭ قورعانۋ كيىمىن كيگەندىكتەن، ولاردىڭ بەت - ءجۇزىن انىق كورە الماي، ءتىپتى دە شوشىعان.
كامىلجان سىرقاتىنا قاراي ەم جاساپ الدىمەن ناۋقاسقا جاڭا تيپتى ايدارشا ۆيرۋس وكپە قابىنۋ ىندەتى بىلىمدەرىن جالپىلاستىرىپ، ءبىرسىپىرا سالماقتى ناۋقاستاردىڭ ەمدەۋگە بەلسەنە سايكەسكەندىكتەن تۇگەلدەي ساۋىعىپ شيپاحانادان شىققاندىعىن ايتادى، ونان سوڭ قورعانۋ كيىمىنىڭ رولىن تۇسىندىرەدى. كامىلجاننىڭ ۇيىندەگىلەردەي كوڭىل بولۋىندە ناۋقاس ويىن اقتارىپ، ەمدەۋ قىزمەتكەرلەرىنىڭ ەمدەۋىنە بەلسەنە سايكەسەدى. كامىلجان ناۋقاستاردى كۇتىمدەۋدە كاسىپتىك دەڭگەي توتەنشە ماڭىزدى، ناۋقاستارمەن اڭگىمەلەسە ءبىلۋ دە توتەنشە ماڭىزدى دەپ قارايدى، ”ناۋقاستاردىڭ كوڭىل كۇيى جاقسى بولسا سايكەسۋى سولعۇرلىم جوعارى، ەمدەۋ ونىمدىلىگى دە سولعۇرلىم جاقسى بولادى“.
”90 - جىلداردىڭ تۇلەگى“ بولعان كامىلجان ءىس جۇزىندىك ارەكەتى ارقىلى جاستاردىڭ ماشاقاتتان قورىقپايتىن، قيىنشىلىقتان جاسقانبايتىن، قۇربان بەرۋدەن تايسالمايتىن جاۋاپكەرشىلىگىن ايگىلەپ، جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋداعى مەملەكەتتىك وزات جەكە بولىپ باعالاندى.
”بۇل سيلىق قاجىرلىلىقپەن ەڭبەك سىڭىرگەن ءاربىر ادامعا ءتان، مەن ەمدەۋ قىزمەتكەرلەرى ىستەۋگە ءتيىستى ىستەردى عانا ىستەدىم. ۇزدىكسىز قۇلشىنىپ، اۋەلگى ماقساتتى جانە بورىشتى ەستە بەرىك ساقتاپ، مۇنان دا كوپ ناۋقاستارعا ويداعىداي قىزمەت ەتەمىن“، - دەدى كامىلجان.
