تيانشان تورى
تيانشان تورى   ›   جاڭالىقتار   ›   ماڭىزدى حابارلار

شي جينپيڭ 75 - كەزەكتى بىرلەسكەن مەملەكەتتەر ۇيىمى جينالىسىنىڭ جاي تالقىسىندا ماڭىزدى ءسوز سويلەدى

تاعدىرلاس ورتاق تۇلعا تانىمى مەن سەلبەسىپ بىرگە يگىلىككە كەنەلۋ ۇستانىمىن ورناتىپ، اشىق دۇنيە ءجۇزى ەكونوميكاسىن بۇلجىماستان قۇرىپ، جاڭا دامۋ ۇستانىمىن ورناتىپ، كوپ جاقتىلىق جولىمەن جۇرۋگە تاباندى بولىپ، الەمدىك جونگە سالۋ جۇيەسىنە رەفورما جاساۋ جانە ونى كەمەلدەندىرۋ كەرەكتىگىن باسا دارىپتەدى، جۇڭگونىڭ بىرلەسكەن مەملەكەتتەر ۇيىمىنىڭ وزەكتى رولىن ساۋلەلەندىرۋدى قولداۋداعى كەلەلى شارالارىن جاريالادى

   9 - ايدىڭ 22 - كۇنى مەملەكەت ءتوراعاسى شي جينپيڭ 75 - كەزەكتى بىرلەسكەن مەملەكەتتەر ۇيىمى جينالىسىنىڭ جاي تالقىسىندا ماڭىزدى ءسوز سويلەدى. سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن

  شينحۋا اگەنتتىگىنىڭ 9 - ايدىڭ 22 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 9 - ايدىڭ 22 - كۇنى 75 - كەزەكتى بىرلەسكەن مەملەكەتتەر ۇيىمى جينالىسىنىڭ جاي تالقىسىندا ماڭىزدى ءسوز سويلەپ، بىلاي دەپ اتاپ كورسەتتى: جاڭا تيپتى ايدارشا ۆيرۋس وكپە قابىنۋ ىندەتى الدىندا، ءار ەل حالىقتى بارىنەن جوعارى قويۋ، ءومىردى بارىنەن جوعارى قويۋ ۇستانىمىن امالياتتا ايگىلەپ، ىنتىماقتى كۇشەيتىپ، قيىندىقتاردى بىلەك بىرىكتىرە جەڭۋى كەرەك. تاعدىرلاس ورتاق تۇلعا تانىمى مەن سەلبەسىپ بىرگە يگىلىككە كەنەلۋ ۇستانىمىن ورناتىپ، ءار ەلدىڭ ءوزى تاڭداعان دامۋ جولى مەن ۇلگىسىنە ءوزارا قۇرمەت ەتىپ، اشىق، سيىسىمدى بولۋ ۇستانىمىنان جازباي، اشىق دۇنيە ءجۇزى ەكونوميكاسىن بۇلجىماستان قۇرىپ، جاڭالىق اشا دامۋ، سايكەستى دامۋ، جاسىل دامۋ، اشىق دامۋ، بىرگە يگىلىككە كەنەلىپ دامۋ سىندى جاڭا دامۋ ۇستانىمىن ورناتىپ، ىندەتتەن كەيىنگى دۇنيە ءجۇزى ەكونوميكاسىنىڭ ”جاسىل قالپىنا كەلۋىن“ ىلگەرىلەتىپ، كوپ جاقتىلىق جولىمەن جۇرۋگە تاباندى بولىپ، بىرلەسكەن مەملەكەتتەر ۇيىمىن وزەك ەتكەن حالىقارالىق جۇيەنى قورعاۋ كەرەك. جۇڭگو بەيبىت دامۋ، اشىق دامۋ، سەلبەسىپ دامۋ، بىرگە دامۋ جولىمەن بۇلجىماي ءجۇرىپ، دۇنيە ءجۇزى بەيبىتشىلىگىنىڭ قۇرۋشىسى، الەمدىك دامۋدىڭ ۇلەس قوسۋشىسى، حالىقارالىق ءتارتىپتىڭ قورعاۋشىسى بولا بەرەدى.

  شي جينپيڭ بىلاي دەپ اتاپ كورسەتتى: بيىل دۇنيە جۇزىلىك فاشيزمگە قارسى سوعىس جەڭىسىنىڭ 75 جىلدىعى، سونداي - اق بىرلەسكەن مەملەكەتتەر ۇيىمى قۇرىلعاندىعىنىڭ 75 جىلدىعى. بىرلەسكەن مەملەكەتتەر ۇيىمى ەسكە الۋ باسشىلار باس قوسۋىن سالتاناتپەن وتكىزدى، بۇل دۇنيە جۇزىلىك فاشيزمگە قارسى سوعىستىڭ تاريحي تاجىريبەلەرى مەن ساباقتارىن ەستە ساقتاۋدا، بىرلەسكەن مەملەكەتتەر ۇيىمى ۋستاۆىنىڭ باستى ماقساتى مەن پرينسيبى جونىندەگى مىزعىماس سەرتتى قايتالاي دارىپتەۋدە كەلەلى ماڭىز الادى.

  شي جينپيڭ بىلاي دەپ اتاپ كورسەتتى: ادامزات جاڭا تيپتى ايدارشا ۆيرۋس وكپە قابىنۋ ىندەتىمەن كۇرەس جۇرگىزۋدە. ءار ەل حالقى ءوزارا قارايلاسىپ، ادامزاتتىڭ ەلەۋلى اپات الدىنداعى باتىلدىعىن، بەكىمىن، باۋىرمالدىعىن ايگىلەپ، قاراڭعى ساتتەرگە ساۋلەلى جارىق ءتۇسىردى. ادامزات تۇبىندە ىندەتتى جەڭەدى، جەڭىس، ءسوز جوق، دۇنيە ءجۇزى حالقىنا ءتان بولادى!

  شي جينپيڭ بىلاي دەپ باسا دارىپتەدى: ىندەت الدىندا، ءبىز حالىقتى بارىنەن جوعارى قويۋ، ءومىردى بارىنەن جوعارى قويۋ ۇستانىمىن امالياتتا ايگىلەپ، بارلىق بايلىقتى توپتاپ، عىلمي تۇردە ساقتانىپ - ەمدەپ، دالمە - ءدال شارا قولدانىپ، بىردە - ءبىر جۇعىمدالۋشىنى قاعىس قالدىرماي، بىردە - ءبىر ناۋقاستان باز كەشپەي، ىندەتتىڭ ءورشۋىن باتىل تەجەۋىمىز كەرەك. ىنتىماقتى كۇشەيتىپ، قيىندىقتاردى بىلەك بىرىكتىرە جەڭىپ، عىلمي رۋح ۇستانىپ، دۇنيە جۇزىلىك دەنساۋلىق ساقتاۋ ۇيىمىنىڭ شەشۋشى باسشىلىق رولىن تولىق ساۋلەلەندىرىپ، حالىقارالىق بىرلەسىپ ساقتانۋ، بىرلەسىپ تىزگىندەۋدى ىلگەرىلەتىپ، الەمدىك ىندەت توسقاۋىل شايقاسىنىڭ جەڭىسىنە باتىل قول جەتكىزىپ، ساياسيلاندىرۋعا، داتتاۋعا قارسى تۇرۋ كەرەك. جالپى بەتتىك جانە ۇدايىلاندىرىلعان ساقتانۋ - تىزگىندەۋ شارالارىن بەلگىلەپ، ساۋدانى، بازاردى، جۇمىستى، وقۋدى قالپىنا كەلتىرۋدى تارتىپپەن ىلگەرىلەتىپ، جۇمىس ورىندارىن اشىپ، ەكونوميكانى كوركەيتىپ، ەكونوميكالىق، قوعامدىق ءتارتىپ پەن ومىرشەڭدىكتى قالپىنا كەلتىرۋ، نەگىزگى ەكونوميكالىق تۇلعالار ماكرولىق ساياساتتى سايكەستىرۋدى كۇشەيتۋ، ءوز ەلىنىڭ ەكونوميكاسىن قايتا جانداندىرىپ قالماستان، دۇنيە ءجۇزى ەكونوميكاسىنىڭ قالپىنا كەلۋىنە ۇلەس قوسۋ كەرەك. وركەندەپ كەلە جاتقان ەلدەرگە، اسىرەسە، افريكا ەلدەرىنە قامقورلىق جاساپ جانە قارايلاسىپ، قارىزدى ازايتۋ، كەشەۋىلدەتۋ، كومەك بەرۋ سياقتى جاقتاردا دەر كەزىندە جانە پارمەندى شارا قولدانىپ، «بىرلەسكەن مەملەكەتتەر ۇيىمىنىڭ 2030 - جىلعا دەيىنگى باياندى دامۋ كەڭەستىك ءتارتىبىن» ويداعىداي تياناقتاندىرۋعا شىنايى كەپىلدىك ەتىپ، ولاردىڭ قيىندىقتاردى جەڭۋىنە كومەكتەسۋ كەرەك.

  شي جينپيڭ بىلاي دەپ اتاپ كورسەتتى: 75 جىلدىڭ الدىندا، جۇڭگو دۇنيە جۇزىلىك فاشيزمگە قارسى سوعىستىڭ جەڭىسىنە قول جەتكىزۋگە تاريحي ۇلەس قوسىپ، بىرلەسكەن مەملەكەتتەر ۇيىمىن قۇرۋعا قولداۋ كورسەتتى. بۇگىنگى تاڭدا، سونداي جاۋاپكەرشىلىك ارقالاۋ رۋحىن ۇستانعان جۇڭگو حالىقارالىق ىندەتكە قارسى اتتانۋ سەلبەستىگىنە بەلسەنە ات سالىسىپ، الەمدىك الەۋمەتتىك دەنساۋلىق ساقتاۋ حاۋىپسىزدىگىن قورعاۋعا جۇڭگونىڭ كۇش - قۋاتىن قوستى. جۇڭگو ءار ەلمەن ىندەتكە قارسى اتتانۋ تاجىريبەسىنەن جانە دياگنوز قويۋ - ەمدەۋ تەحنيكاسىنان ورتاق پايدالانۋدى، قاجەت ەتكەن ەلدەرگە قولداۋ جانە كومەك كورسەتۋدى جالعاستىرىپ، الەمدىك ىندەتكە قارسى اتتانۋ زاتتىق ماتەريالدارىمەن قامداۋ تىزبەگىنىڭ ورنىقتىلىعىنا شىنايى كەپىلدىك ەتەدى ءارى ۆيرۋستىڭ تەگىن انىقتاۋعا جانە تارالۋ جولىن بۇكىل الەم بويىنشا عىلمي زەرتتەۋگە بەلسەنە ات سالىسادى. جۇڭگونىڭ كوپتەگەن ۆاكسينالارىⅢمەرزىمدىك كلينيكالىق تاجىريبە كەزەڭىنە ءوتتى، زەرتتەۋ - اشۋ اياقتالعاننان ءارى پايدالانۋعا بەرىلگەننەن كەيىن، الەمدىك الەۋمەتتىك ءونىم ساناتىندا، ەڭ الدىمەن، وركەندەپ كەلە جاتقان ەلدەرگە بەرىلەدى. جۇڭگو 2 جىلدا 2 ميلليارد دوللارلىق حالىقارالىق كومەكپەن قامداۋ ۋادەسىن ويداعىداي تياناقتاندىرىپ، اۋىل شارۋاشىلىعى، كەدەيلىكتى ازايتۋ، وقۋ - اعارتۋ، ايەلدەر مەن بالالار، كليمات وزگەرىسى سياقتى سالالارداعى حالىقارالىق سەلبەستىكتى تەرەڭدەتىپ، ءار ەلدىڭ ەكونوميكاسىنىڭ، قوعامىنىڭ قالپىنا كەلىپ دامۋىنا دەم بەرەدى.

  شي جينپيڭ بىلاي دەپ اتاپ كورسەتتى: ادامزات قوعامىنىڭ دامۋ تاريحى − ءتۇرلى سىن - سايىستار مەن قيىندىقتاردى ۇزدىكسىز جەڭگەن تاريح. جاڭا تيپتى ايدارشا ۆيرۋس وكپە قابىنۋ ىندەتىنىڭ الەمدە كەڭ كولەمدە تارالۋى مەن دۇنيە جۇزىندە ءجۇز جىلدا بولماعان زور وزگەرىستەر ءوزارا ىقپال جاسادى، الايدا بەيبىتشىلىك پەن دامۋ سىندى داۋىرلىك باس تاقىرىپ وزگەرگەن جوق، ءار ەل حالقىنىڭ بەيبىت دامۋ، سەلبەسىپ بىرگە يگىلىككە كەنەلۋ تىلەگى ونان ارى كۇشەيدى. جاڭا تيپتى ايدارشا ۆيرۋس وكپە قابىنۋ ىندەتى ادامزات ءدوپ كەلگەن ەڭ سوڭعى ءبىر رەتكى داعدارىس ەمەس، ءبىز، ءسوز جوق، اناعۇرلىم كوپ الەمدىك سىن - سايىستارعا قول ۇستاسا سايلانۋدىڭ دايىندىعىن ويداعىداي ىستەۋىمىز كەرەك.

  ءبىرىنشى، وسى جولعى ىندەت بىزگە مىناداي وي سالدى: ءبىز ءوزارا ۇلاسقان، تۇتاسقان، بەينەت پەن زەينەتتى بىرگە وتكەرەتىن جەر شارى قىستاعىندا تۇرمىس كەشىرىپ جاتىرمىز. ءار ەل بىتە قايناسقان، ادامزات تاعدىرى ءبىر. ءارقانداي ەلدىڭ وزگە ەلدىڭ قيىنشىلىعىنان مۇددە قاراستىرۋىنا، باسقا ەلدىڭ الاساپىراندىعىنان ورنىقتىلىققا يە بولۋىنا بولمايدى. ەگەر كورشىسىنە زيان جەتكىزىپ، قىزىقتاپ قاراپ وتىرسا، وزگە ەلدىڭ قاتەرى ەرتە مە، كەش پە وزىنە تونگەن سىن - سايىسقا اينالارى داۋسىز. ءبىر - بىرىمەن بىتە قايناسقان تاعدىرلاس ورتاق تۇلعا تانىمىن ورناتىپ، شاعىن شەڭبەردەن جانە نولدىك جيىنتىق ويىنى ويىنان ارىلىپ، ۇلكەن شاڭىراق جانە سەلبەسىپ بىرگە يگىلىككە كەنەلۋ ۇستانىمىن ورناتىپ، يدەولوگياداعى تالاس - تارتىستى دوعارىپ، وركەنيەتتەر قاقتىعىسى شىرعاسىنان اتتاپ ءوتىپ، ءار ەلدىڭ ءوزى تاڭداعان دامۋ جولى مەن ۇلگىسىنە قۇرمەت ەتىپ، دۇنيە ءجۇزىنىڭ الۋان تۇرلىلىگىن ادامزات قوعامىنىڭ العا باسۋىنداعى سارقىلماس قوزعاۋشى كۇشكە، ادامزات وركەنيەتىنىڭ الۋان ءتۇرلى تابيعي فورماتسياسىنا اينالدىرۋ كەرەك.

  ەكىنشى، وسى جولعى ىندەت بىزگە مىناداي وي سالدى: ەكونوميكانىڭ جاھاندانۋى − وبيەكتيۆتىك شىندىق جانە تاريحي اعىم. ەكونوميكانىڭ جاھاندانۋ ۇلكەن اۋقىمى الدىندا، بەينە تۇيە قۇس سەكىلدى باسىن قۇمعا تىعىپ الىپ، كورسە دە كورمەسكە سالىنۋ نەمەسە بەينە دونكيحوت سەكىلدى ۇزىن نايزا سىلتەپ، ورشەلەنە تەجەۋ سياقتىلاردىڭ ءبارى - ءبارى تاريح زاڭدىلىعىنا قايشى. دۇنيە ءوزارا توماعا - تۇيىق، وقشاۋ كۇيگە قايتا ورالمايدى، بولەكتەنۋى تىپتەن مۇمكىن ەمەس. ءبىز ەكونوميكانىڭ جاھاندانۋى اكەلگەن سايىستاردان جالتارا المايمىز، ءسوز جوق، كەدەي مەن باي پارقى، دامۋ بوگەتتەرى سياقتى ەلەۋلى ماسەلەلەرمەن بەتپە - بەت كەلۋىمىز كەرەك. ۇكىمەت پەن بازاردىڭ، ادىلدىك پەن ونىمدىلىكتىڭ، ارتۋ مەن ءبولىسۋدىڭ، تەحنيكا مەن جۇمىستاندىرۋدىڭ بايلانىسىن ويداعىداي ءبىر جاقتى ەتىپ، دامۋدىڭ ءارى بىركەلكى، ءارى تولىق بولۋىنا، دامۋ تابىستارىنىڭ تۇرلىشە ەلدەرگە، تۇرلىشە جىكتەرگە، تۇرلىشە قاۋىمعا ادىلدىكپەن تيىمدىلىك جەتكىزۋىنە مۇمكىندىك جاساۋ كەرەك. اشىق، سيىسىمدى بولۋ ۇستانىمىنان جازباي، اشىق دۇنيە ءجۇزى ەكونوميكاسىن بۇلجىماستان قۇرىپ، دۇنيە جۇزىلىك ساۋدا ۇيىمىن تاعان ەتكەن كوپ جاقتى ساۋدا ءتۇزىلىسىن قورعاپ، سىڭار جاقتىلىققا، قورعامپازدىققا تۋى ايقىن تۇردە قارسى تۇرىپ، الەمدىك كاسىپ سالاسى تىزبەگىنىڭ، قامداۋ تىزبەگىنىڭ ورنىقتىلىعىن، ىركىلسىسىزدىگىن قورعاۋ كەرەك.

  ءۇشىنشى، وسى جولعى ىندەت بىزگە مىناداي وي سالدى: ادامزات ءبىر رەت وزىنە - ءوزى توڭكەرىس جاساپ، جاسىل دامۋ ءتاسىلى مەن تۇرمىس ءتاسىلىن جەدەل قالىپتاستىرىپ، ەكولوگيالىق وركەنيەت پەن كورىكتى جەر شارىن قۇرۋدى قاجەت ەتەدى. ادامزاتتىڭ ۇلى تابيعاتتىڭ قايتا - قايتا جاساعان ەسكەرتۋىنە نەمقۇرايدى قاراۋىنا، الۋدى عانا دارىپتەپ، بەرۋدى دارىپتەمەيتىن، دامۋدى عانا دارىپتەپ، قورعاۋدى دارىپتەمەيتىن، پايدالانۋدى عانا دارىپتەپ، قالپىنا كەلتىرۋدى دارىپتەمەيتىن كونە سۇردەكپەن جۇرۋىنە ەندىگارى بولماي قالدى. كليمات وزگەرىسىنە توتەپ بەرۋدىڭ «پاريج كەلىسىمى» الەمدىك جاسىل تومەن كومىرتەكتى بولۋعا قاراي ويىسۋداي ۇلكەن بەتالىسقا ۋاكىلدىك ەتەدى، ول جەر شارى سىندى مەكەندى قورعاۋدا قولدانۋ قاجەت بولعان ەڭ تومەنگى شەكتەگى ارەكەت، ءار ەل بۇعان، ءسوز جوق، شەشۋشى قادام تاستاۋى كەرەك. جۇڭگو مەملەكەتتىڭ دەربەس ۇلەس قوسۋ سەرپىنىن ارتتىرىپ، اناعۇرلىم پارمەندى ساياسات جانە شارا قولدانىپ، كومىرتەگى قوس توتىعىن ىعىستىرۋدى 2030 - جىلدان بۇرىن جوعارعى شەككە جەتكىزۋگە كۇش سالىپ، 2060 - جىلدان بۇرىن كومىرتەگىن بەيتاراپتاندىرۋعا قول جەتكىزۋگە قۇلشىنادى.

  ءار ەل جاڭالىق اشا دامۋ، سايكەستى دامۋ، جاسىل دامۋ، اشىق دامۋ، بىرگە يگىلىككە كەنەلەتىن دامۋ سىندى جاڭا دامۋ ۇستانىمىن ورناتىپ، جاڭا ءبىر كەزەك عىلىم - تەحنيكا توڭكەرىسى مەن كاسىپ سالاسى وزگەرىسىنىڭ تاريحي ورايىن يگەرىپ، ىندەتتەن كەيىنگى دۇنيە ءجۇزى ەكونوميكاسىنىڭ ”جاسىل قالپىنا كەلۋىن“ ىلگەرىلەتىپ، باياندى دامۋدىڭ قۇدىرەتتى بىرىككەن كۇشىن ۇيىستىرۋ كەرەك.

  ءتورتىنشى، وسى جولعى ىندەت بىزگە مىناداي وي سالدى: الەمدىك جونگە سالۋ جۇيەسى رەفورمالاۋعا جانە كەمەلدەندىرۋگە مۇقتاج بولىپ وتىر. ىندەت ءار ەلدىڭ بيلىك جۇرگىزۋ قابىلەتى جونىنەن ۇلكەن سىناۋ ءارى الەمدىك جونگە سالۋ جۇيەسى جونىنەن سىن بولدى. ءبىز كوپ جاقتىلىق جولىمەن جۇرۋگە تاباندى بولىپ، بىرلەسكەن مەملەكەتتەر ۇيىمىن وزەك ەتكەن حالىقارالىق جۇيەنى قورعاۋىمىز كەرەك. الەمدىك جونگە سالۋدا بىرگە اقىلداسىپ، بىرگە قۇرىپ، بىرگە يگىلىككە كەنەلۋ پرينسيبىنەن جازباي، ءار ەلدىڭ ۇقىق تەڭدىگىن، وراي تەڭدىگىن، قاعيدا تەڭدىگىن ىلگەرىلەتىپ، الەمدىك جونگە سالۋ جۇيەسىنىڭ وزگەرگەن دۇنيە جۇزىلىك ساياسي ەكونوميكاعا ۇيلەسۋىنە مۇمكىندىك جاساپ، الەمدىك سىن - سايىسقا توتەپ بەرۋدىڭ ءىس جۇزىندىك قاجەتىن قاناعاتتاندىرىپ، بەيبىت دامۋدىڭ، سەلبەسىپ تەڭ پايداعا كەنەلۋدىڭ تاريحي اۋقىمىنا ۇيلەسۋ كەرەك. مەملەكەت اراسىندا الاۋىزدىقتىڭ بولۋى قالىپتى ءىس، تىلدەسۋ، كەڭەسۋ ارقىلى لايىقتى شەشۋ قاجەت. مەملەكەت اراسىندا باسەكە بولۋىنا بولادى، الايدا ول، ءسوز جوق، بەلسەندى جانە زالالسىز بولۋى، ءمورالدىق تومەنگى شەك پەن حالىقارالىق ولشەمدى ساقتاۋ كەرەك. ءىرى ەلدە ءىرى ەلدىك بەينە بولۋى، اناعۇرلىم كوپ الەمدىك الەۋمەتتىك ءونىم ازىرلەپ، ءىرى ەلدىك جاۋاپكەرشىلىك ارقالاپ، ءىرى ەلدىڭ جاۋاپكەرشىلىك ارقالاۋىن ايگىلەۋ كەرەك.شي جينپيڭ بىلاي دەپ باسا دارىپتەدى: بيىل جىل باسىنان بەرى، ءبىر ميلليارد 400 ميلليون جۇڭگو حالقى قيىندىقتاردان تايسالماي، جوعارى مەن تومەن ءبىر نيەتتە بولىپ، ىندەتتىڭ ىقپالىن بار كۇشپەن جەڭىپ، ءوندىرىس، تۇرمىس ءتارتىبىن جەدەل قالپىنا كەلتىردى. ءبىز دەر كەزىندە جاپپاي دوڭگەلەك داۋلەتتى قوعام ورناتۋعا، دەر كەزىندە قازىر اتقارىلىپ وتىرعان ولشەمنەن تومەنگى اۋىل - قىستاق كەدەي حالقىنىڭ تۇگەلدەي كەدەيلىكتەن ارىلۋىن جۇزەگە اسىرۋعا، «بىرلەسكەن مەملەكەتتەر ۇيىمىنىڭ 2030 - جىلعى باياندى دامۋ كەڭەستىك تارتىبىندەگى» كەدەيلىكتى ازايتۋ نىساناسىن 10 جىل بۇرىن جۇزەگە اسىرۋعا سەنىمىمىز بار. شي جينپيڭ بىلاي دەپ باسا دارىپتەدى: جۇڭگو − دۇنيە جۇزىندەگى ەڭ ۇلكەن وركەندەپ كەلە جاتقان ەل، بەيبىت دامۋ، اشىق دامۋ، سەلبەسىپ دامۋ، بىرگە دامۋ سىندى جولمەن ءجۇرىپ كەلەدى. جۇڭگو ماڭگى زورەكەر بولمايدى، ىرگە كەڭەيتپەيدى، ىقپال كۇش كولەمىنە بوي ۇرمايدى، ءارقانداي ەلمەن قىرعي قاباقتىق سوعىس، قارۋلى سوعىس جۇرگىزۋدى قالامايدى، تىلدەسۋ ارقىلى الاۋىزدىقتى جويۋعا، كەلىسسوز ارقىلى داۋ - شاردى شەشۋگە تاباندى بولادى. جۇڭگو ەلدەن وزگەشە بولۋعا بوي ۇرمايدى، سەن جەڭىل، مەن جەڭەم دەگەندەرمەن اينالىسپايدى، ەسىگىن تارس جاۋىپ، جابىق كۇيدە جۇمىس تا جۇرگىزبەيدى، ەل ءىشى ۇلكەن اينالىمىن نەگىزگى تۇلعا ەتكەن، ەل ءىشى جانە حالىقارا سىندى قوس اينالىم ءبىرىن - ءبىرى جەبەيتىن جاڭا دامۋ ارناسىن بىرتىندەپ قالىپتاستىرىپ، جۇڭگو ەكونوميكاسىنىڭ دامۋىنا ءورىس اشىپ، دۇنيە ءجۇزى ەكونوميكاسىنىڭ قالپىنا كەلۋى مەن ارتۋىنا قوزعاۋشى كۇش ۇستەيدى. جۇڭگو دۇنيە ءجۇزى بەيبىتشىلىگىنىڭ قۇرۋشىسى، الەمدىك دامۋدىڭ ۇلەس قوسۋشىسى، حالىقارالىق ءتارتىپتىڭ قورعاۋشىسى بولا بەرەدى.

  شي جينپيڭ بىلاي دەپ جاريالادى: بىرلەسكەن مەملەكەتتەر ۇيىمىنىڭ حالىقارالىق ىستەردە وزەكتى رولىن ساۋلەلەندىرۋىن قولداۋ ءۇشىن، جۇڭگو بىرلەسكەن مەملەكەتتەر ۇيىمىنىڭ جاڭا تيپتى ايدارشا ۆيرۋس وكپە قابىنۋ ىندەتىنە الەمدىك ادامگەرشىلىك بويىنشا توتەپ بەرۋ جوسپارىنا تاعى 50 ميلليون دوللار قولداۋ كورسەتەدى؛ جۇڭگو كولەمى 50 ميلليون دوللارلىق ءۇشىنشى مەرزىمدىك جۇڭگو - بىرلەسكەن مەملەكەتتەر ۇيىمى استىق - اۋىل شارۋاشىلىعى ۇيىمى تۇستىك ەلدەر سەلبەستىگى امانات قورىن قۇرادى؛ جۇڭگو - بىرلەسكەن مەملەكەتتەر ۇيىمى بەيبىتشىلىك جانە دامۋ قورى 2025 - جىلى ۋاقىتى تولعان سوڭ 5 جىلعا ۇزارتىلادى؛ جۇڭگو بىرلەسكەن مەملەكەتتەر ۇيىمى الەمدىك جاعراپيا ينفورماتسيا ءبىلىم جانە جاسامپازدىق ورتالىعىن، باياندى دامۋ ۇلكەن ساندى مالىمەت حالىقارالىق زەرتتەۋ ورتالىعىن قۇرىپ، «بىرلەسكەن مەملەكەتتەر ۇيىمىنىڭ 2030 - جىلعى باياندى دامۋ كەڭەستىك ءتارتىبىن» تياناقتاندىرۋ ءۇشىن جاڭا جاردەم ازىرلەيدى.

  شي جينپيڭ ەڭ سوڭىندا بىلاي دەپ باسا دارىپتەدى: تاريحتىڭ ۇتىلاما تاياقشاسى ءبىزدىڭ وسى بۋىننىڭ قولىنا جەتكىزىلدى، ءبىز، ءسوز جوق، حالىقتىڭ قالاۋىنان شىعاتىن، تاريحتىڭ قالاۋىنان شىعاتىن تالعام جاساۋىمىز كەرەك. ءبىز بەرەكە - بىرلىككە كەلىپ، بەيبىتشىلىك، دامۋ، ادىلدىك، ادىلەتتىلىك، دەموكراتيا، ەركىندىك سىندى تۇتاس ادامزاتتىڭ ورتاق قۇنىنان بۇلجىماي، جاڭاشا حالىقارالىق قارىم - قاتىناس ورناتۋدى ىلگەرىلەتىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتىپ، دۇنيە ءجۇزىنىڭ اناعۇرلىم كوركەم بولاشاعىن بىرگە جاراتايىق!

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.