− باس شۋجي شي جينپيڭنىڭ وقۋ - اعارتۋ، مادەنيەت، دەنساۋلىق ساقتاۋ، دەنە تاربيە سالالارىنىڭ ماماندارى، ۋاكىلدەرى اڭگىمە ماجىلىسىندەگى ماڭىزدى ءسوزىن ۇيرەنۋ، دايەكتىلەندىرۋ جونىندە
حالىق گازەتىنىڭ شولۋشىسى
وقۋ - اعارتۋ، مادەنيەت، دەنساۋلىق ساقتاۋ، دەنە تاربيە ىستەرى حالىق تۇرمىسىمەن تىعىز قاتىستى، حالىقتىڭ تاماشا تۇرمىسقا تالپىنىسى − پارتيامىزدىڭ كۇرەس نىساناسى.
9 - ايدىڭ 22 - كۇنى تۇستەن كەيىن، باس شۋجي شي جينپيڭ وقۋ - اعارتۋ، مادەنيەت، دەنساۋلىق ساقتاۋ، دەنە تاربيە سالالارىنىڭ ماماندارى، ۋاكىلدەرى اڭگىمە ءماجىلىسىن باسقارىپ اشىپ ءارى ماڭىزدى ءسوز سويلەپ، ”14 - بەسجىلدىق“ مەزگىلىندەگى ەكونوميكالىق، قوعامدىق دامۋ جونىندە پىكىر جانە ۇسىنىس تىڭدادى. باس شۋجي شي جينپيڭ بىلاي دەپ باسا دارىپتەدى: پارتيا مەن مەملەكەت وقۋ - اعارتۋ، مادەنيەت، دەنساۋلىق ساقتاۋ، دەنە تاربيە ىستەرىنىڭ دامۋىنا ايرىقشا ءمان بەرىپ كەلەدى، پارتيانىڭ 18 - قۇرىلتايىنان بەرى پارتيا ورتالىق كوميتەتى بۇل جونىندە ءبىر قىدىرۋ ستراتەگيالىق ورنالاستىرۋ جاسادى، ءار دارەجەلى پارتكومدار مەن ۇكىمەتتەر تياناقتاندىرۋ قىزمەتىن ويداعىداي يگەرىپ، ۇلتتى گۇلدەندىرۋدىڭ ۇلى مىندەتىن ارقالايتىن ءداۋىردىڭ جاڭا ادامدارىن باۋلۋعا قۇلشىنىپ، سوتسياليستىك مادەنيەت قۇرىلىسىن تىڭعىلىقتى ىلگەرىلەتىپ، دەنساۋلىق ساقتاۋ، سالاماتتىق ىستەرىن زور كۇشپەن دامىتىپ، دەنە تاربيەدە قۋاتتى مەملەكەت قۇرۋدى جەدەلدەتىپ، ءتۇرلى قوعامدىق ىستەرگە تىڭ قوزعاۋشى كۇش ۇستەۋدى جانە وندا جاڭا جاعداي اشۋدى ىلگەرىلەتىپ، حالىق بۇقاراسىنىڭ تابىس سەزىمىن، باقىت سەزىمىن، حاۋىپسىزدىك سەزىمىن ۇزدىكسىز كۇشەيتۋ كەرەك.
وقۋ - اعارتۋ مەملەكەتتىڭ ۇلى جوسپارى، پارتيانىڭ ۇلى جوسپارى. باس شۋجي شي جينپيڭ بىلاي دەپ تەرەڭ اتاپ كورسەتتى: ”14 - بەسجىلدىق“ مەزگىلىندە، ءبىز پارتيا مەن مەملەكەت ىستەرى دامۋىنىڭ جالپى جاعدايى تۇرعىسىنان پارتيانىڭ وقۋ - اعارتۋ باعىتىن جالپى بەتتىك دايەكتىلەندىرىپ، وقۋ - اعارتۋ ىستەرىن الدىمەن دامىتۋعا تاباندى بولىپ، پارتيا ءۇشىن ادام تاربيەلەۋگە، مەملەكەت ءۇشىن دارىندى تاربيەلەۋگە تاباندى بولىپ، حالىق رازى بولاتىن وقۋ - اعارتۋدى ويداعىداي جۇرگىزۋگە قۇلشىنىپ، وقۋ - اعارتۋدى وسىزامانداندىرۋدى جەدەل ىلگەرىلەتۋدىڭ جاڭا ساپارىندا ۇلتتى گۇلدەندىرۋدىڭ ۇلى مىندەتىن ارقالايتىن ءداۋىردىڭ جاڭا ادامدارىن باۋلۋىمىز كەرەك. باس شۋجي شي جينپيڭنىڭ ماڭىزدى ءسوزى وقۋ - اعارتۋ ىستەرىن دامىتۋدى پارتيا مەن مەملەكەتتىڭ ءتۇرلى ىستەرىنىڭ دامۋىن ىلگەرىلەتۋدەگى الدىمەن جۇرگىزىلەتىن ءىس ەتىپ، احىلاق، اقىل - وي، دەنە، ەستەتيكا، ەڭبەك جاقتارىنان جان - جاقتى دامىعان سوتسياليستىك قۇرىلىسشىلار مەن ءىزباسارلاردى باۋلىپ جەتىلدىرۋدە توتەنشە ماڭىزدى جەتەكشى ءمان الادى.
پارتيانىڭ 18 - قۇرىلتايىنان بەرى، شي جينپيڭ جولداستى ۇيتقى ەتكەن پارتيا ورتالىق كوميتەتى قانداي ادام تاربيەلەۋ، ادامدى قالاي تاربيەلەۋ، ادامدى كىم ءۇشىن تاربيەلەۋ سىندى ءتۇبىرلى ماسەلەنى ارقاۋ ەتە وتىرىپ، پارتيانىڭ وقۋ - اعارتۋ ىستەرىنە جالپى بەتتىك باسشىلىعىنا تاباندى بولىپ، ءار دارەجەلى ءار ءتۇرلى مەكتەپتەردىڭ يدەيا - ساياسي قىزمەتىن جاپپاي كۇشەيتىپ، وقۋ - اعارتۋ سالاسىنداعى جالپىلىق رەفورمانى ىلگەرىلەتىپ، وقۋلىق قۇرىلىسىنىڭ مەملەكەتتىڭ ءىس بيلىگىندەگى ورنىن كۇشەيتتى، وقۋ - اعارتۋدىڭ بەت - بەينەسىندە جۇيەلىك وزگەرىستەر جارىققا شىعۋدا. ”14 - بەسجىلدىق“ مەزگىلىندەگى ەكونوميكالىق، قوعامدىق دامۋدى ىلگەرىلەتۋدىڭ ايرىقشا ءبىر ماڭىزدى جاعى − رەفورما جاساۋ، ەسىك اشۋ جانە سوتسياليستىك وسىزامانداندىرۋ قۇرىلىسىنىڭ، ادامنىڭ جان - جاقتى دامۋى مەن قوعامنىڭ جاپپاي العا باسۋىن جەبەۋدىڭ وقۋ - اعارتۋ مەن ۇيرەنۋگە قويعان جاڭا ءارى ءتىپتى جوعارى تالابىن يگەرىپ، اناعۇرلىم بيىك تاريحي دەڭگەيمەن، اناعۇرلىم كەڭ حالىقارالىق كوز ايامەن، اناعۇرلىم تەرەڭ ستراتەگيالىق كوزقاراسپەن وقۋ - اعارتۋدىڭ وسىزاماندانۋىن جەدەل ىلگەرىلەتۋ، وقۋ - اعارتۋدا قۋاتتى مەملەكەت قۇرۋ جونىندە جوبا، ورنالاستىرۋ جاساپ، وقۋ - اعارتۋدىڭ پارتيا مەن مەملەكەت ىستەرىنىڭ دامۋ تالابىنا ۇيلەسۋىنە، حالىق بۇقاراسىنىڭ ارمان - تىلەگىنە سايما - ساي كەلۋىنە، ەلىمىزدىڭ جالپىلىق مەملەكەت قۋاتىنا جانە حالىقاراداعى ورنىنا سايكەس كەلۋىنە ۇزدىكسىز مۇمكىندىك جاساۋ.
وقۋ - اعارتۋ مەملەكەتتىڭ دامۋىنا، ۇلتتىڭ بولاشاعىنا سايادى. وقۋ - اعارتۋ سياقتى ءىزباسار ماسەلەسىنە ىقپال جاسايتىن، ءتىپتى، ونى بەلگىلەيتىن، مەملەكەتتىڭ باياندى تىنىشتىعىنا ىقپال جاسايتىن، ءتىپتى، ونى بەلگىلەيتىن، جۇڭحۋا ۇلتىنىڭ ۇلى گۇلدەنۋىنە ىقپال جاسايتىن، ءتىپتى، ونى بەلگىلەيتىن ەشقانداي ءىس جوق. سوتسياليستىك مەكتەپ باسقارۋ بەتالىسىنان جازباي، ونەگە كورسەتىپ ادام تاربيەلەۋدى وقۋ - اعارتۋدىڭ ءتۇبىرلى مىندەتى ەتىپ، وقۋ - اعارتۋدىڭ سوتسياليستىك وزەكتى قۇن كوزقاراسىن جەتىلدىرۋدەگى جانە امالياتتا ايگىلەۋدەگى ماڭىزدى رولىن ساۋلەلەندىرىپ، مەكتەپتەردىڭ يدەيالىق - ساياسي نازاريالىق ساباقتارىنا رەفورما جاساۋدى جانە جاڭالىق اشۋدى تەرەڭدەتىپ، مەكتەپتەردەگى دەنە تاربيەنى، ەستەتيكا تاربيەسىن كۇشەيتىپ جانە جاقسارتىپ، ەڭبەك تاربيەسىن كەڭىنەن ورىستەتىپ، ساپا وقۋ - اعارتۋىن دامىتىپ، وقۋ - اعارتۋدىڭ ادىلدىگىن ىلگەرىلەتىپ، وقۋشىلاردىڭ احىلاق، اقىل - وي، دەنە، ەستەتيكا، ەڭبەك جاعىنان جان - جاقتى دامۋىن جەبەپ، وقۋشىلاردىڭ وتانشىلدىق سۇيىسپەنشىلىگىن، قوعامدىق جاۋاپكەرشىلىك سەزىمىن، جاڭالىق اشۋ رۋحىن، امالياتتىق قابىلەتىن جەتىلدىرۋ كەرەك. جاڭا دامۋ ارناسىنا ۇيلەسەتىن وقۋ - اعارتۋ قۇرىلىمىن، ءپان - ماماندىق قۇرىلىمىن، دارىندى تاربيەلەۋ قۇرىلىمىن ساپالىلاندىرىپ، جالپى حالىقتىڭ ءومىر بويى ۇيرەنۋىن ىلگەرىلەتۋ مەحانيزمىن كەمەلدەندىرۋ كەرەك. دەربەس جاڭالىق اشۋ قابىلەتىن جوعارىلاتىپ، شەشۋشى، وزەكتى تەحنيكالاردان تەزىرەك قامال الۋ − جاڭا دامۋ ارناسىن قۇرۋداعى شەشۋشى ماسەلە. ەلىمىزدىڭ جوعارى مەكتەپتەرى ماڭىزدى مىندەتتى جۇرەكتىلىكپەن ارقالاپ، نازاردى مەملەكەتتىڭ ستراتەگيالىق قاجەتىنە شوعىرلاندىرىپ، تەحنيكالىق قامال الۋدى تەزدەتۋى، اسىرەسە، نەگىزدىك زەرتتەۋدىڭ عىلىم - تەحنيكادا جاڭالىق اشۋدى ىلگەرىلەتۋدەگى قاينار كوزدىك رولىن ساۋلەلەندىرۋى كەرەك. مەملەكەتتىڭ وڭىرلىك دامۋ ستراتەگياسىنا قىزمەت وتەۋدى تياناق ەتىپ، وڭىرلەردەگى وقۋ - اعارتۋ بايلىقتارىنىڭ سەپتەلۋىن ساپالىلاندىرىپ، ءتۇيىن مەن اۋماق بىرلەستىرىلگەن، شىعىس، ورتا، باتىس بولىكتەر ءوزارا ۇندەسەتىن وقۋ - اعارتۋدى دامىتۋدىڭ كەڭىستىكتىك ارناسىن جەدەل قالىپتاستىرىپ، وقۋ - اعارتۋدىڭ وڭىرلىك دامۋ ستراتەگياسىنا قىزمەت وتەۋ دەڭگەيىن جوعارىلاتۋ كەرەك. وقۋ - اعارتۋ سالاسىنداعى كەشەندى رەفورمانى جالپى بەتتىك تەرەڭدەتىپ، وقۋ - اعارتۋ رەفورماسىنىڭ جۇيەلىلىگىن، تۇتاس تۇلعالىلىعىن، سايكەسىمدىلىگىن كۇشەيتۋ كەرەك.
وقۋ - اعارتۋ گۇلدەنسە، مەملەكەت گۇلدەنەدى، وقۋ - اعارتۋ قۋاتتانسا، مەملەكەت قۋاتتانادى. بۇگىنگى تاڭدا، پارتيا مەن مەملەكەت ىستەرىنىڭ دامۋىنىڭ وقۋ - اعارتۋعا، عىلىم بىلىمدەرى مەن تاڭداۋلى دارىندىلارعا سۇرانىسى بۇرىنعى ءارقانداي ۋاقىتتاعىدان دا كوكەي تەستى بولىپ وتىر. جۇڭحۋا ۇلتىنىڭ ۇلى گۇلدەنۋىنە قىزمەت وتەۋدى وقۋ - اعارتۋدىڭ ماڭىزدى بورىشى ەتۋگە تاباندى بولىپ، وقۋ - اعارتۋ ىستەرىن الدىمەن دامىتىپ، وقۋ - اعارتۋدىڭ جوعارى ساپالى دامۋىن ىلگەرىلەتسەك، ءبىز، ءسوز جوق، ۇلتتى گۇلدەندىرۋدىڭ ۇلى مىندەتىن ارقالايتىن ءداۋىردىڭ جاڭا ادامدارىن باۋلىپ، ۇلى ارماندى جۇزەگە اسىرۋعا بەرىك نەگىز قالاپ، پارمەندى تىرەك ازىرلەي الامىز.
(شينحۋا اگەنتتىگىنىڭ 9 - ايدىڭ 23 - كۇنى بەيجيڭنەن بەرگەن حابارى)
