شينجياڭ گازەتىنىڭ جالپىلىق اقپارات قۇرالدارى ءتىلشىسى شى شين 9 - ايدىڭ 28 - كۇنى ۇرىمجىدەن حابارلايدى. ”13 - بەسجىلدىق“ مەزگىلىندە، شينجياڭنىڭ قىزمەت وتەۋ كاسىبى جىلدام دامىپ، قىزمەت وتەۋدىڭ جاڭا كاسىپ كۇيى، جاڭا ۇلگىسى ۇزدىكسىز جارىققا شىعىپ، ەكونوميكاعا قوسقان ۇلەس مولشەرى 1 -، 2 - كاسىپتەن اسىپ ءتۇسىپ، ەكونوميكانىڭ ارتۋىن ىلگەرىلەتۋدىڭ ءبىرىنشى قوزعاۋشى كۇشىنە اينالدى.
بيىل توسىن تۋىلعان جاڭا تيپتى ايدارشا ۆيرۋس وكپە قابىنۋ ىندەتىنىڭ ىقپالى الدىندا، ءداستۇرلى اس - سۋ، بولشەك ساتۋ، ءۇي شارۋاسى سياقتى كاسىپتەر بار قايراتىن سالىپ، قىزمەت وتەۋ ۇلگىسىندە جاڭالىق اشۋدى، ساۋدا - تيجارات كاسىپ كۇيىن قايتا تۇلەتۋدى ينتەرنەت جەلىسىندە جانە جەلىدەن تىس ءوزارا بىرلەستىردى. ىندەتتەن ساقتانۋ - تىزگىندەۋدىڭ ۇدايىلانۋىنا ىلەسە، ينتەرنەتتى، ينفورماتسيا تەحنيكاسىن ۋاكىل ەتكەن جاڭادان گۇلدەنگەن كاسىپتەردىڭ ارتۋى جىلدامداپ، ينتەرنەت جەلىسىندە كوڭىل اشۋ، ينتەرنەت جەلىسىندە باۋلۋ، ينتەرنەت جەلىسىندە ەمدەلۋ سياقتى ينتەرنەت جەلىسىندە تۇتىنۋدىڭ جەتەكشىلىگىندە قاتىستى قىزمەت وتەۋدىڭ دامۋى ءبىرشاما جىلدام بولدى.
ەكونوميكانىڭ ارتۋىن ىلگەرىلەتكەن نەگىزگى قوزعالتقىش رەتىندە، قىزمەت وتەۋ كاسىبىنىڭ قايتا جاندانۋى شينجياڭ ەكونوميكاسىنىڭ قايتا ورلەۋىندە ماڭىزدى رول اتقاردى.
”13 - بەسجىلدىققا“ قايىرىلا قاراعانىمىزدا، قىزمەت وتەۋ كاسىبىنىڭ شينجياڭنىڭ وڭىرلىك ءوندىرىس جالپى ءونىم قۇنىنداعى سالىستىرماسىندا جىل سايىن ۇدەمەلى ارتۋ جاعدايى جارىققا شىقتى.
2016 - جىلى شينجياڭنىڭ قىزمەت وتەۋ كاسىبىنىڭ ارتقان قۇنى 471 ميلليارد 156 ميلليون يۋان بولىپ، وڭىرلىك ءوندىرىس جالپى ءونىم قۇنىنداعى ارا سالماعى ％48.9تى يەلەپ، 2 - كاسىپتەن 13.1 پايىز جوعارى بولدى، 3 كاسىپتىڭ سالىستىرماسى 48.9: 35.8: 15.3 بولدى.
شينجياڭنىڭ GDPى تۇڭعىش رەت تريلليون يۋاننان اسقان 2017 - جىلى قىزمەت وتەۋ كاسىبىنىڭ ارتقان قۇنى 551 ميلليارد 185 ميلليون يۋانعا جەتىپ، وڭىرلىك ءوندىرىستىڭ جالپى ءونىم قۇنىنداعى ارا سالماعى ％49.4كە جەتىپ، 2 - كاسىپتەن 12.7 پايىز جوعارى بولىپ، 3 كاسىپتىڭ سالىستىرماسى 49.4: 36.7: 13.9 بولدى.
2018 - جىلى شينجياڭنىڭ قىزمەت وتەۋ كاسىبىنىڭ ارتقان قۇنى 646 ميلليارد 14 ميلليون يۋانعا جەتىپ، وڭىرلىك ءوندىرىس جالپى ءونىم قۇنىنداعى ارا سالماعى تۇڭعىش رەت ％50تەن اسىپ، ％50.4كە جەتىپ، شينجياڭ ەكونوميكاسى دامۋىنىڭ تەڭ جارتىسىنا تىرەك بولىپ، 3 كاسىپتىڭ سالىستىرماسى 50.4: 36.4: 13.2 بولدى.
2019 - جىلى شينجياڭنىڭ كاسىپ قۇرىلىمى ۇزدىكسىز جاقسى بەتالىسقا قاراي دامىپ، ”ءۇشتى ازايتۋ، ءبىردى تومەندەتۋ، ءبىردى تولىقتاۋ“ تابىستارى بەكەمدەلدى. شينجياڭنىڭ قىزمەت وتەۋ كاسىبىنىڭ ارتقان قۇنى 701 ميلليارد 986 ميلليون يۋانعا جەتىپ، وڭىرلىك ءوندىرىس جالپى ءونىم قۇنىنداعى ارا سالماعى ％51.6كە جەتىپ، 2 - كاسىپتەن 16.3 پايىز جوعارى بولىپ، 3 كاسىپتىڭ سالىستىرماسى 51.6: 35.3: 13.1 بولدى.
قىزمەت وتەۋ كاسىبىنىڭ جۇمىستاندىرۋدىڭ نەگىزگى ارناسىنا اينالۋ رولى كۇن سايىن كورنەكتىلەندى. 4 - رەتكى مەملەكەتتىك ەكونوميكالىق جالپى ساناق جۇرگىزۋدەگى ساندى مالىمەتتەرگە نەگىزدەلگەندە، 2018 - جىلى شينجياڭنىڭ 2 - كاسىپتەگى جانە قىزمەت وتەۋ كاسىبىندەگى زاڭدىق يە ورنىنداعى قىزمەتكەر 4 ميلليون 654 مىڭ 800 ادام بولىپ، مۇنىڭ اراسىنداعى قىزمەت وتەۋ كاسىبىمەن شۇعىلداناتىن قىزمەتكەر 3 ميلليون 927 مىڭ ادامعا جەتىپ، مۇلدە كوپ ساندى يەلەگەن. ورىن سانى، جۇمىسقا ورنالاسقان قىزمەتكەرلەر، مال - مۇلىك سياقتى جاقتاردان قاراعاندا، قىزمەت وتەۋ كاسىبىنىڭ سالىستىرماسى كورنەكتى جوعارىلاپ، اتى زاتىنا ساي شينجياڭ ەكونوميكاسىنداعى 1 - ءىرى كاسىپكە اينالعان.
