رايونىمىزدا ”وتانشىلدىق قيمىل اپتالىعى“ بارعان سايىن تاماشا كۇيگە ەندى
شينجياڭ گازەتىنىڭ جالپىلىق اقپارات قۇرالدارى تىلشىلەرى جيا چۇنشيا، جىڭ ييۋان
جۋىقتا جۇڭگو كوممۋنيستىك پارتياسى ورتالىق كوميتەتىنىڭ ۇگىت ءبولىمى بۇكىل ەلدىڭ قالا، اۋىلدارىندا ”مەملەكەت مەرەكەسىن تويلاۋدا جاڭا سالت - سانانى دارىپتەپ، وتانشىلدىق قيمىل اپتالىعىن تۇلعالاۋ“ قيمىلىن جالپى بەتتىك ىشكەرىلەي ورىستەتۋ جونىندە ورنالاستىرۋ جاسادى. قوس مەرەكە كەزىندە، رايونىمىزدىڭ جەر - جەرى ساياحاتتىڭ قاۋىرت كەزىن قارسى الۋمەن بىرگە، الەۋمەتتىك مادەنيەت قۇرىلىمدارى مەن الەۋمەتتىك قيمىل كەڭىستىگى دە قىزۋ ورلەۋگە كوتەرىلدى. شينجياڭ كىتاپحاناسى ”اي تولعانداعى مەرەكە، وتباسى مەن وتانعا سۇيىسپەنشىلىك“ تاقىرىبىنداعى مانەرلەپ وقۋ قيمىلىن ۇسىندى، تۇرپان مۇراجايى ”كىشكەنتاي ەرىكتىلەردىڭ ءتۇسىندىرۋ جارىسى“ تاقىرىبىندا جەلىلەس قيمىل وتكىزدى، قۇمىل قالالىق مادەنيەت مۇراجايى ”جۇڭچيۋ مەن مەملەكەت مەرەكەسىن بىلەمىن“ سياقتى قيمىلداردى ۇسىندى... فورماسى الۋان ءتۇرلى قيمىلداردا، مەملەكەت مەرەكەسىن تويلاۋدىڭ جاڭا سالتى ومىرشەڭدىگىن قاۋلاتتى، ادامدار جۇڭحۋا مادەنيەتىنىڭ باي مازمۇنى مەن ماڭگىلىك تارتىمدىلىعىن شىن مانىندە سەزىنىپ، ”وتانشىلدىق قيمىل اپتالىعى“ بارعان سايىن تاماشا كۇيگە ەندى.
بۇقارانى ساحناعا شىعاردى، مادەنيەت باستى رول اتقاردى. تيانشان بوعدا كورىنىس اۋماعى ”ەجەلگى سالت - سانا ساياحاتى − ەل جاۋھارى بوعدا كولى“ نەگىزگى تاقىرىبىندا جۇڭچيۋ ولەڭ - جىر جينالىسىن وتكىزىپ، ”تولعان اي تيانشاندا“ جەلىلەس قيمىلدارىنىڭ شىمىلدىعىن اشتى، مارافوندىق باسەكە جارىسى، تايجي قىلىشپازدىعى، تايجي جەلپۋىشى سياقتى كوپتەگەن مادەنيەت جانە دەنە تاربيە قيمىلدارىندا ساياحاتشىلار قۋانا كەلىپ، شاتتانا قايتتى. قۇلجا قالالىق 8 - كەزەكتى حالىق سالت - ساناسى، مادەنيەت، ساياحات مەرەكەسى كەزىندە، جۇرت ۇناتا تىڭداپ، قۇمارتا كورەتىن كوپتەگەن مادەنيەت، ساياحات قيمىلدارى بۇقارانىڭ مادەني تۇرمىسىن بايىتىپ قالماستان، ونان دا ماڭىزدىسى، ادامداردىڭ وتانعا باقىت تىلەگەن قويۋ سۇيىسپەنشىلىگىن ارتتىرا ءتۇستى. قاشقار قالاسى ”تولىقسىعان تولعان اي. سۇيىسپەنشىلىككە تولى جۇڭچيۋ“ باقشا سەيىلى قيمىلىن ورىستەتتى، قالا تۇرعىندارى گۇلدى شام تاماشالاۋ، شام جۇمباق شەشۋ، اي تاماشالاپ تىلەك ءبىلدىرۋ بارىسىندا، وتاننىڭ گۇلدەنىپ - كوركەيۋىن، ەلدىڭ امان، حالىقتىڭ تىنىش بولۋىن تىلەدى.
قۋانىشتى مەرەكەنى تويلاپ، ىنتىماقتى بىرگە تىلگە تيەك ەتتى. شاۋەشەك قالاسى دۋبەك ءمالىسى حۇڭتۋ الەۋمەتتىك اۋماعى ”مەملەكەت مەرەكەسىندە كەسپە كوجە ىشەمىز، ەل امان، حالىق تىنىش بولسىن“ قيمىلىن وتكىزدى، ”مەيىرىمدى انا“ ايشا سىماق ءجۇرىپ - تۇرۋى قولايسىز كورشىلەرىنە كەسپە كوجە جانە انار اپارىپ بەردى. كۇنەس اۋدانى ”نان مەن ايكۇلشەنىڭ كەزدەسۋى“ قيمىلىن وتكىزدى، ساياحاتشى يان مەي بىلاي دەدى: ”اق شاي ىشە وتىرىپ، ايكۇلشەگە نان قوسىپ جەدىم، بۇل جولعى جۇڭچيۋ مەرەكەسى شينجياڭدىق ەرەكشەلىككە باي بولدى“.
مادەنيەت پەن ساياحات توعىستىرىلىپ، جاقسى ويىندار ىركەس - تىركەس قويىلدى. ريتىمى جاتىمدى قول بارابان جۇرت نازارىن باۋرادى، قويۋ شينجياڭدىق ستيلگە يە ءبي ادامداردى ريتىممەن بيگە باسۋعا جەتەكتەدى، ”شينجياڭ نانى“ جانە ”ورنەكتى فارفور“ سياقتى اندەر كورەرمەندى بىرگە شىرقاۋعا باستادى ... 10 - ايدىڭ 2 - كۇنى ءۇرىمجى قالاسى نان مادەنيەتى كاسىپ سالاسى باقشاسىندا، قىزىقتى دا ءار الۋان ادەبيەت - كوركەمونەر نومىرلەرىن كورگەن كورەرمەندەردىڭ كەتكىسى كەلمەدى. گانسۋدىڭ لۇڭنانىنان كەلگەن ساياحاتشى بان ۋىنبياۋ بىلاي دەدى: ”شينجياڭنىڭ كورىنىسى كوركەم بولىپ قالماستان، مادەني ءمانى دە تەرەڭ ەكەن. ادەبيەت - كوركەمونەر قىزمەتكەرى رەتىندە وسىنشاما تارتىمدى شينجياڭ ءان - ءبيىن تاماشالاي العانىما ەرەكشە قۋانىشتامىن، بەينە’ كەشىككەن كوكتەم مەرەكەسىن‘ وتكىزگەندەي بولدىم!“.
