تيانشان تورى   ›   جاڭالىقتار   ›   شينجياڭ حابارلارى

جوعارى جىلدامدىقتى پويەز جاڭا جىبەك جولىندا زىمىرادى

 − ۇرىمجىدەن شي - انعا باراتىن موتورلى ۆاگوندار قۇراماسىنىڭ العاشقى ساپارىنان كورگەن - بىلگەنىمىز

شينجياڭ گازەتىنىڭ جالپىلىق اقپارات قۇرالدارى ءتىلشىسى لۋ فىڭباۋ

 10 - ايدىڭ 11 - كۇنى تۇستەن بۇرىن شي - ان سولتۇستىك ۆوكزالىنا باراتىن العاشقى كەزەك موتورلى ۆاگوندار قۇراماسى ءۇرىمجى ۆوكزالىندا جولعا شىعۋ الدىندا تۇر. شينجياڭ گازەتىنىڭ جالپىلىق اقپارات قۇرالدارى ءتىلشىسى ساي زىڭلى تۇسىرگەن

  باياۋ كوتەرىلگەن كۇن شۋاعىمەن ءۇرىمجىنىڭ دۋماندى تىرشىلىگى دە باستالدى. تاڭ ساز بەرە، شي - انعا توتە باراتىن D2708 موتورلى ۆاگوندار قۇراماسى ءۇرىمجى ۆوكزالىنا كەلىپ توقتادى. قىزمەتكەرلەردىڭ ءبىر كۇندىك قاربالاس جۇمىسى باستالۋ الدىندا تۇر. 10 - ايدىڭ 11 - كۇنى ساعات 9دان 58 مينۋت وتكەندە، موتورلى ۆاگوندار قۇراماسى ءۇرىمجى ۆوكزالىنان باياۋ قوزعالىپ، ەجەلگى استانا شي - اندى بەتكە الىپ زىمىراي جونەلدى.

  بۇل ەرەكشە ماعىنالى ءسات ەدى. لانجوۋ - شينجياڭ جوعارى جىلدامدىقتى پويەزى ىسكە قوسىلعان 6 جىلدان كەيىن، شينجياڭنان 2 - موتورلى ۆاگوندار قۇراماسى رەسمي جولعا شىقتى.

  كابينكادا شوفەر ءادىل تۇردى جۇمىس تەكشەسىنىڭ الدىندا وتىرىپ، موتورلى ۆاگوندار قۇراماسىن شىعىسقا قاراي جۇرگىزۋدە.

  موتورلى ۆاگوندار قۇراماسى زىمىرادى. اسقار تاۋلار، ءشول - جازيرالار، قالالار ارتتا قالىپ جاتىر، ورنىقتىلىعى سونداي، ستاكانداعى سۋ دا شايقالمايدى.

  6 جىلدىڭ الدىندا اق ءتۇستى نايزاعايعا ۇقساعان، ۇشقان قۇستاي زۋلاعان حىشيە اتتى موتورلى ۆاگوندار قۇراماسى شينجياڭدا جوعارى جىلدامدىقتى پويەز بولماۋ تاريحىن اياقتاتىپ، كەڭ - بايتاق شينجياڭ دالاسىنا جاڭا ومىرشەڭ كۇش اكەلىپ، شينجياڭنىڭ ەكونوميكالىق، قوعامدىق دامۋىنا جاڭا ەنەرگيا ۇستەدى.

  تاعى دا سول 6 جىلدىڭ الدىندا، ادىل تۇردى شينجياڭنىڭ موتورلى ۆاگوندار قۇراماسىنىڭ العاشقى بۋىن شوفەرىنە اينالدى. ”بۇرىن ۇرىمجىدەن قۇمىلعا قاتىنايتىن موتورلى ۆاگوندار قۇراماسىن جۇرگىزگەنمىن، بۇگىن مىنە شي - انعا العاشقى قاتىناعان موتورلى ۆاگوندار قۇراماسىن جۇرگىزگەنىمدى ەرەكشە ماقتانىش ەتەمىن“، - دەدى ول.

  جولاۋشى جوۋ يان سىرتتاعى كورىنىستەرگە ءالسىن - ءالى قاراپ وتىر، ول ەكى كاسىپتەسىمەن بىرگە شي - اندا جاڭا اس - سۋ بازارىن اشۋعا بارا جاتىر ەكەن، ”وسى موتورلى ۆاگوندار قۇراماسى قاتىناعاننان كەيىن، ەكى جەردىڭ بارىس - كەلىسى، ءسوز جوق، ونان ارى جيىلەي تۇسەدى، مەنشە، ساۋدامىز دا كۇسەتتەنەدى“، - دەدى ول.

  ءۇرىمجى − جىبەك جولى ەكونوميكالىق بەلدەۋىنىڭ وزەكتى رايونى شينجياڭنىڭ ورتالىق قالاسى، شي - ان جىبەك جولىنىڭ باستالعان جەرى. موتورلى ۆاگوندار قۇراماسىنىڭ قاتىناۋى جىبەك جولىنىڭ بويىنداعى اراسى 2000 نەشە كيلومەتر كەلەتىن ەكى ماڭىزدى قالانىڭ اراسىن ونان ارى جاقىنداتادى، شينجياڭ مەن ىشكى وڭىرلەردىڭ قارىم - قاتىناسىن ءتىپتى نىعايتا تۇسەدى.

  جولاۋشى ۋاڭ سۇڭسۇڭ تەبىرەنە بىلاي دەدى: ”بۇرىن شي - اننان ۇرىمجىگە پويەزبەن 30 ساعات شاماسىندا جەتەتىنبىز. قازىر موتورلى ۆاگون قۇراماسىمەن كۇنبە - كۇن جەتەتىن بولدىق، قولايلى ءارى جايلى“.

  ۇرىمجىدەن شي - ان سولتۇستىك ۆوكزالىنا دەيىن 2354 كيلومەتر كەلەدى، 13 ساعات 22 مينۋتتان كەيىن، D2708 رەتكى پويەز شي - ان سولتۇستىك ۆوكزالىنا جەتەدى، شينجياڭنان جولعا شىققان موتورلى ۆاگوندار قۇراماسى دا مىڭ جىلدىق ەجەلگى استانا شي - انعا تۇڭعىش قادام تاستايدى.

  موتورلى ۆاگوندار قۇراماسى زىمىراپ كەلەدى، الىس جەرلەر راسىندا الىس بولۋدان قالدى...

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.