”شىرعاناق شىرىنى مەن بال ىشكى ولكەلەردەگى الارمانداردىڭ قارسى الۋىنا يە بولدى، بۇل ەكەۋى ٴبىزدىڭ دۇكەنىمىزدەگى ەڭ ٴوتىمدى زات سانالادى“. 9 ـ ايدىڭ 28 ـ كۇنى تۇستەن كەيىن، تەلەفوننىڭ انا باسىنان شىققان سىڭعىرلاعان ءۇن بۋىرشىن اۋدانىنداعى 90 - جىلداردىڭ تۇلەگى پىڭ حايياننىڭ داۋىسى ەدى.
پىڭ حاييان 2017 ـ جىلى سانشي اۋىل شارۋاشىلىق داشۋەسىنەن وقۋ تاۋىسقان، ءبىر جىل قىزمەت ىستەگەن سوڭ، ول دەربەس شارۋاشىلىق قۇرۋ ويىنا كەلەدى. ويتكەنى اكە - شەشەسى بۋىرشىن اۋدانى دۋلايتى اۋىلى جايلىم 2 - قىستاعىندا 30 نەشە جىلدىق ارا باعۋ تاجىريبەسىنە يە ومارتاشىلار ەدى، پىڭ حاييان اكە - شەشەسىنە كومەكتەسىپ، ءوز ءۇيىنىڭ ونىمدەرىن ساتۋعا بەكيدى.
اۋىلعا قايتقان وسى ستۋدەنتتىڭ كاسىپ جاراتۋ ويىن بىلگەننەن كەيىن، بۋىرشىن اۋداندىق پارتكوم ۇگىت ٴبولىمىنىڭ ”ۇعىسۋ، تيىمدىلىك جاساۋ، توعىستىرۋ“ قيمىلى بويىنشا قىستاقتا تۇراتىن قىزمەت اترەتى ونى ءوز ۇيىندە باعىلعان ارانىڭ ابزالدىلىعىنان پايدالانىپ، ”پىڭ اۋلەتى بالى“ ماركاسىن قالىپتاستىرۋعا شابىتتاندىردى. 2018 ـ جىلى قىزمەت اترەتىنىڭ كومەگىندە پىڭ حاييان قىستاقتاعى تۇڭعىش ينتەرنەت دۇكەنىن اشتى.
جايشىلىقتا، پىڭ حاييان ينتەرنەتتەگى تىكە تاراتۋ ارقىلى ”پىڭ اۋلەتىنىڭ بالىن“ تانىستىرىپ ساتادى. جانكۇيەرلەرى ونى ”ومارتاشى اپكە“ دەپ اتاپ كەتكەن. العاشقى ينتەرنەت دۇكەنى جۇمىس باستاپ قىسقا عانا 3 اي ىشىندە جەلىدەگى ساۋدادان 583 ىن ىستەپ، ساۋدا سوماسى 200 مىڭ يۋانعا تايايدى، بۇل ونىڭ بولاشاقتاعى دامۋعا دەگەن سەنىمىن ارتتىرادى.
تەك ٴبىر ادامنىڭ بايۋى بايلىق ەمەس، كوپشىلىك ورتاق اۋقاتتانعاندا عانا ناعىز بايلىق ەسەپتەلەدى. 2019 - جىلى قىزمەت اترەتى مەن قىستاق ”ەكى كوميتەتىنىڭ“ كومەگىندە پىڭ حاييان قىستاقتا ىلگەرىندى - كەيىندى قومقاناس بال اراسى باعىمشىلىق سەلبەستىك كووپەراتيۆىن، قوم قارا ارا باعىمشىلىق سەلبەستىك كووپەراتيۆىن قۇردى. سونىمەن ول قىزمەت اترەتىنىڭ مۇشەلەرىمەن بىرگە ارا باعاتىن وتباسىلار اراسىندا شاپقىلاپ، كوپشىلىكتىڭ تىكە تاراتىلىمدا زات ساتۋىنا كومەكتەسىپ، جايلىم 2 ـ قىستاعىنداعى بالدىڭ ”ءوتىمىن“ جاقسارتتى. ”ٴءبىز 30 قىستاق تۇرعىنىنىڭ ارا شارۋاشىلىعىن دامىتۋىنا كومەكتەسىپ، ارا باعۋشى وتباسىلارىنىڭ جىلدىق ورتاشا كىرىسىن 50 مىڭ يۋاننان اسىردىق“، ـ دەدى پىڭ حاييان.
بيىلعى ىندەت كەزىندە، بۋىرشىن اۋدانى ينتەرنەتتىك تۇتىنۋ ارقىلى كەدەيلەردى سۇيەمەلدەۋ ساۋدا ورايىن مىقتى يگەرىپ، ”ەلەكتروندى ساۋدا + تىكەلەي تاراتىلىم“ كەدەيلەردى سۇيەمەلدەۋ نىسانىن اتقارۋعا ۇيىمداستىردى، ەگىنشى – مالشىلاردىڭ تىكە تاراتىلىمدا زات ساتۋى ارقىلى اۋدان، اۋىل – قىستاق زات اينالىمىنىڭ ”ەڭ سوڭعى ءبىر كيلومەترىن“ تۇتاستىردى. وسىنداي ۇتىمدى ورايدا پىڭ حاييان كاسىپ كولەمىن كەڭەيتىپ، قىستاق تۇرعىندارىنىڭ ىرىمشىك، شاباق، كەپتىرىلگەن ەت، شەكىلدەۋىك سياقتىلاردى ساتۋىنا كومەكتەسۋ ارقىلى اۋىلدىڭ ونىمدەرىن سىرتقا شىعاردى.
بۇل كۇندەرى، پىڭ حاييان اۋدان قالاشىعىنان تىكەلەي ساتۋ دۇكەنىن اشىپ، ءبىر ۋاقىتتا ءۇش تاۋباۋ دۇكەنىن باسقاردى ءاربىر دۇكەننىڭ ءبىر ايداعى جەلىدەگى زات ساتۋ سوماسى ورتا ەسەپپەن 20 مىڭ يۋانعا جەتتى.
”مەن ۇنەمى وزىمە مىنانى ەسكەرتەمىن، ’جاڭا داۋىردەگى اۋىلعا قايتقان ستۋدەنت رەتىندە، جاڭالىق جاراتۋ ارقىلى جاستىق كوكتەمىمىز بەن ارمانىمىزدى اتا مەكەنىمىزدىڭ توپىراعىندا نۇرلاندىرايىق‘“،-دەدى، پىڭ حاييان، ول تاعى بىلاي دەدى: ”ەلەكتروندىق ساۋدا بىلىمدەرىن جۇيەلى ۇيرەنىپ، ەلەكتروندىق ساۋدا كۋرستارىن اشىپ، كوپشىلىككە كورسەتۋ ارقىلى ولارعا جول باستاپ، اۋقاتتانۋىنا كومەكتەسسەم دەيمىن“.
