تيانشان تورى   ›   ۇيرەنۋ   ›   شولۋ

شىنداپ يگەرىپ، ناقتاپ ىستەپ، حالىقتى وزەك ەتكەن دامۋ يدەياسىن امالياتتا ايگىلەيىك

− باس شۋجي شي جينپيڭنىڭ شىنجىن ەكونوميكالىق ەرەكشە رايونى قۇرىلعاندىعىنىڭ 40 جىلدىعىن قۇتتىقتاۋ جينالىسىندا سويلەگەن ماڭىزدى ءسوزىن ۇيرەنۋ، دايەكتىلەندىرۋ جونىندە

حالىق گازەتىنىڭ شولۋشىسى

  جۇڭگو كوممۋنيستىك پارتياسىنىڭ ءتۇپ نەگىزى حالىقتا، تامىرى حالىقتا. باس شۋجي شي جينپيڭ شىنجىن ەكونوميكالىق ەرەكشە رايونى قۇرىلعاندىعىنىڭ 40 جىلدىعىن قۇتتىقتاۋ جينالىسىندا: شىنداپ يگەرىپ، ناقتاپ ىستەپ، حالىقتى وزەك ەتكەن دامۋ يدەياسىن امالياتتا ايگىلەۋ كەرەك، - دەپ باسا دارىپتەپ، - حالىقتىڭ تاماشا تۇرمىسقا دەگەن تالپىنىسى ءبىزدىڭ كۇرەس نىسانامىز، ەكونوميكالىق ەرەكشە رايون رەفورماسىنىڭ، دامۋىنىڭ شىعار ءتۇيىنى مەن تياناعى تۇگەلدەي وسى نىساناعا شوعىرلانۋى كەرەك، - دەپ تەرەڭ اتاپ كورسەتتى.

  پارتيانىڭ حالىقتى ىنتىماقتاستىرىپ، باستاپ، توڭكەرىس، قۇرىلىس، رەفورما جۇرگىزۋىندەگى ءتۇبىرلى ماقساتى حالىقتى جاقسى تۇرمىسقا كەنەلتۋ ءۇشىن. رەفورما جاساعاننان، ەسىك اشقاننان بەرگى قۇلاشىن كەڭ جايعان ۇلى اماليات بىزگە مىناداي وي سالدى: جۇڭگو حالقىن باقىتقا كەنەلتۋ، جۇڭحۋا ۇلتىنىڭ گۇلدەنۋىن جۇزەگە اسىرۋ − جۇڭگو كوممۋنيستەرىنىڭ اۋەلگى ماقساتى مەن بورىشى ءارى رەفورما جاساۋدىڭ، ەسىك اشۋدىڭ اۋەلگى ماقساتى مەن بورىشى. 40 جىلدان بەرى شىنجىن حالىقتى وزەك ەتۋگە تاباندى بولدى، حالىقتىڭ تۇرمىس ورەسى زور دارەجەدە جوعارىلادى، وقۋ - اعارتۋ، ەمدەۋ، تۇرعىن ءۇي سياقتىلاردا وراسان زور وزگەرىستەر تۋىلدى، 2019 - جىلى تۇرعىنداردىڭ جان باسىندىق قولداعى تابىسى 62 مىڭ 500 يۋان بولىپ، 1985 - جىلداعىدان 31.6 ەسە ارتىپ، جاپپاي دوڭگەلەك داۋلەتتى قوعام ورناتۋ نىساناسىن الدىمەن ورىنداپ، كيەر كيىم، ىشەر اس ماسەلەسىن شەشۋدەن جوعارى ساپالى جاپپاي دوڭگەلەك داۋلەتتىلىككە دەيىنگى تاريحي قارىشتاۋدى جۇزەگە اسىردى. ”ءسوز جوق، حالىقتى وزەك ەتكەن دامۋ يدەياسىنا تاباندى بولىپ، رەفورمانىڭ، دامۋدىڭ جەتىستىكتەرىمەن حالىق بۇقاراسىنا اناعۇرلىم كوپ، اناعۇرلىم ءادىل تيىمدىلىك جەتكىزۋ كەرەك“، بۇل − ەكونوميكالىق ەرەكشە رايوننىڭ 40 جىلدىق رەفورما جاساۋ، ەسىك اشۋىندا، جاڭالىق اشىپ دامۋىندا جيناقتالعان قىمباتتى تاجىريبە، ءسوز جوق، بارىنشا قاستەرلەپ، ۇزاق ۋاقىت تاباندى بولىپ، اماليات بارىسىندا ۇزدىكسىز بايىتۋ جانە دامىتۋ كەرەك.

  باس شۋجي شي جينپيڭ بىلاي دەپ اتاپ كورسەتتى: ”تۇرمىس جاقسى ما، جوق پا، بۇل جونىندە حالىق بۇقاراسى ءسوز ايتۋ ۇقىعىنا ەڭ يە“. بۇگىن ەلىمىز قوعامىنداعى باستى قايشىلىقتا جالپى جاعدايعا ساياتىن تاريحي سيپاتتى وزگەرىس تۋىلىپ، حالىقتىڭ تاماشا تۇرمىسقا دەگەن تالابى ۇزدىكسىز جوعارىلادى. جاڭا باستامادا ەكونوميكالىق ەرەكشە رايون حالىقتىڭ جاڭا تىلەگىنە ۇيلەسىپ، حالىق بۇقاراسى جالپى بەتتىك كوڭىل ءبولىپ وتىرعان، اڭىسى كۇشتى، قايتا - قايتا جارىققا شىققان ماسەلەلەردى شىعار ءتۇيىن ەتىپ، اناعۇرلىم كوپ رەفورما جاساۋ، جاڭالىق اشۋ شارالارىن شىعارىپ، جۇمىستاندىرۋ، وقۋ - اعارتۋ، ەمدەۋ، قوعامدىق قامسىزداندىرۋ، تۇرعىن ءۇي، زەينەتكەرلىك ازىق - تۇلىك حاۋىپسىزدىگى، ەكولوگيالىق ورتا، قوعام اماندىعى سياقتى ماسەلەلەردى ءبىر - بىرلەپ ويداعىداي شەشىپ، حالىق بۇقاراسىنىڭ تابىس سەزىمىنىڭ اناعۇرلىم تاتىمدى، باقىت سەزىمىنىڭ اناعۇرلىم باياندى، حاۋىپسىزدىك سەزىمىنىڭ اناعۇرلىم قامتاماسىز ەتىلۋىنە مۇمكىندىك جاساۋعا قۇلشىنۋ كەرەك. دامۋدىڭ تەپە - تەڭدىگىن جوعارىلاتۋدى ماڭىزدى ورىنعا قويىپ، الەۋمەتتىك بايلىقتىڭ نەگىزگى ساتىعا قاراي كەڭەيۋىن ۇزدىكسىز ىلگەرىلەتىپ، ساپالى، بىركەلكى الەۋمەتتىك قىزمەت وتەۋ جۇيەسىن تۇلعالاپ، جاپپاي قامتىعان باياندى قوعامدىق قامتاماسىزدىق جۇيەسىن ورناتۋ كەرەك. ىندەتتەن ساقتانۋ - تىزگىندەۋدى ۇدايىلاندىرۋدى ەش بوساڭسىماستان ويداعىداي يگەرىپ، تاجىريبە - ساباقتاردى مۇقيات قورىتىندىلاپ، الەۋمەتتىك دەنساۋلىق ساقتاۋداعى ولقىلىقتاردى بىرەۋى ارقىلى وزگەسىن تۇسپالداي وتىرىپ تولىقتاۋ كەرەك. اسىرەسە، شىنجىن حالىق تۇرمىسىنىڭ باقىت ولشەمىن تۇلعالاۋدى كوزدە ۇستاپ، بىرگە قۇراتىن، بىرگە جونگە سالاتىن، بىرگە يگىلىكتەنەتىن، بىرگە باييتىن حالىق تۇرمىسىنىڭ دامۋ ارناسىن الدىمەن قالىپتاستىرىپ، بالالاردىڭ ىزگى تاربيەسى، وقۋشىلاردىڭ ساپالى اعارتۋى، ەڭبەكتىڭ قوماقتى تابىسى، اۋىرعاندا جاقسى شيپاگەرى، قارتايعاندا جايلى كۇتىمى، قونىستا جايلى باسپاناسى، السىزدەرگە كوپتىڭ جاردەمى بولۋدى قۇلشىنا جۇزەگە اسىرۋ كەرەك.

  رەفورما جاساۋدىڭ، جاڭالىق اشۋدىڭ ەڭ زور ومىرشەڭدىك كۇشى نەگىزگى ساتىدا جانە حالىق بۇقاراسىنىڭ اراسىندا. ەكونوميكالىق ەرەكشە رايوننىڭ 40 جىلدىق رەفورما جاساۋ، ەسىك اشۋ، جاڭالىق اشۋ، دامۋ جولىندا ءاربىر قادام وڭاي - وسپاق بولعان جوق، بارلىعىنا جاپالى قۇلشىنىس بوداۋ ەتىلدى، بارلىعىن حالىق بۇقاراسىنىڭ جاڭالىق اشۋىنان، جاسامپازدىعىنان بولە قاراۋعا بولمايدى. قازىر دۇنيە ءجۇزى 100 جىلدا بولماعان زور وزگەرىستى باستان كەشىرۋدە، ەلىمىز دامۋىنىڭ ىشكى شارت - جاعدايى مەن سىرتقى ورتاسىندا تەرەڭ دە كۇردەلى وزگەرىستەر تۋىلۋدا. ەكونوميكالىق ەرەكشە رايون پارتيا ورتالىق كوميتەتى جۇكتەگەن تاريحي بورىشتى ارقالاپ، ورايدى يگەرىپ، سىن - سايىسقا توتەپ بەرىپ، سوتسياليستىك وسىزاماندانعان مەملەكەتتى جاپپاي قۇرۋعا، ەكىنشى 100 جىلدىق كۇرەس نىساناسىن جۇزەگە اسىرۋعا تىڭ دا اناعۇرلىم زور ۇلەس قوسۋى، وتە - موتە، حالىق بۇقاراسىنىڭ ءتول جاسامپازدىق رۋحىنا قۇرمەت ەتىپ، حالىق بۇقاراسىنىڭ امالياتتىق قيمىل بارىسىندا بەينەلەگەن قالاۋىنا، جاراتقان تاجىريبەسىنە، يە بولعان ۇقىعىنا، اتقارعان رولىنا قۇرمەت ەتىپ، حالىق بۇقاراسى اراسىنان ەكونوميكالىق ەرەكشە رايوندى دامىتۋدىڭ جاڭالىق اشۋ، جاسامپازدىق ومىرشەڭدىك كۇشىن ۇزدىكسىز قابىلداپ، حالىق بۇقاراسى اراسىنداعى جاسامپازدىق ۇلى كۇشتى تولىق قاۋلاتىپ، حالىقتى ىنتىماقتاستىرىپ، باستاپ، ىستەردىڭ دامۋىنىڭ جاڭا جاعدايىن اشۋ كەرەك.

  حالىق − تاريحتىڭ جاراتۋشىسى، حالىق − پارتيامىزدىڭ بيلىك جۇرگىزۋىنىڭ ەڭ زور سەنىمى. العا ىلگەرىلەۋ جولىندا مەيلى قانشالىقتى سىن - سايىس پەن قىسىمعا ءدوپ كەلسەك تە، مەيلى قانشالىقتى قۇرباندىق پەن بوداۋ بەرسەك تە، باستان - اياق حالىقتى بارىنەن جوعارى قويۋعا، حالىققا تىعىز ارقا سۇيەۋگە، حالىقتى ۇزدىكسىز باقىتقا كەنەلتۋگە، حالىققا تەرەڭ تامىر تارتۋعا تاباندى بولساق، باستان - اياق حالىقپەن بىرگە ويلاپ، بىرگە ىستەسەك، پارتيامىز، ءسوز جوق، جۇڭگو حالقىنىڭ ۇلى ارمانىن ارقالاعان كەمەنىڭ تولقىن جارا العا ىلگەرىلەپ، جەڭىسپەن شۇعىلالى جاعاعا بەت الۋىنا جەتەكشىلىك ەتە الاتىن بولادى.

  (شينحۋا اگەنتتىگىنىڭ 10 - ايدىڭ 17 - كۇنى بەيجيڭنەن بەرگەن حابارى)

جاۋاپتى رەداكتور : سايراش تۇرارجان

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.