شي جينپيڭ سىچۋان ولكەسىندەگى توڭكەرىستىك جارالى - مۇگەدەك اسكەريلەردىڭ دەمالىس ورنىنداعى بارلىق جولداستارعا جاۋاپ حات قايتارىپ بىلاي دەپ باسا دارىپتەدى
بۇكىل پارتيا، بۇكىل قوعام قاھارمانداردى ارداقتاپ، قاھارمانداردان ۇيرەنىپ، قاھارماندارعا قامقورلىق جاساپ، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋدىڭ تەلەگەي كۇشىن توپتاۋ كەرەك
شينحۋا اگەنتتىگىنىڭ 10 - ايدىڭ 21 - كۇنى بەيجيڭنەن بەرگەن حابارى. جۇڭگو حالىق ەرىكتىلەر ارمياسىنىڭ امەريكا جيھانگەرلەرىنە قارسى تۇرىپ، چاۋشيانعا كومەك بەرۋ ءۇشىن مەملەكەتتەن شىعىپ سوعىس جۇرگىزگەندىگىنىڭ 70 جىلدىعى قارساڭىندا جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ جاقىندا سىچۋان ولكەسىندەگى توڭكەرىستىك جارالى - مۇگەدەك اسكەريلەردىڭ دەمالىس ورنىنداعى بارلىق جولداستارعا جاۋاپ حات قايتارىپ، ولارعا شىنايى سالەم جولدادى.
شي جينپيڭ جاۋاپ حاتىندا مىنالاردى ءبىلدىردى: امەريكا جيھانگەرلەرىنە قارسى تۇرىپ، چاۋشيانعا كومەك بەرۋ سوعىسىندا، جۇڭگو حالىق ەرىكتىلەر ارمياسى ۇلى وتانشىلدىق رۋح پەن توڭكەرىستىك قاھارماندىق رۋحتى ساۋلەلەندىرىپ، ەرلىكپەن العا ۇمتىلىپ، قاندى شايقاس جۇرگىزىپ، مەكەندى، وتاندى قورعاۋدا ماڭىزدى ۇلەس قوستى. ەرىكتىلەر ارمياسىنداعى قولباسىلار مەن جاۋىنگەرلەردىڭ، سونداي - اق قاھارمان ۇلگىلەردىڭ ەڭبەگىن پارتيا مەن حالىق ماڭگى ۇمىتپايدى.
شي جينپيڭ بىلاي دەپ اتاپ كورسەتتى: 60 نەشە جىلدان بەرى سىزدەر پارتيانى سۇيۋگە، پارتياعا سەنۋگە، پارتياعا ىلەسۋگە تاباندى بولىپ، وتانشىلدىق تاربيە مەن مەملەكەت قورعانىسى تاربيەسى قيمىلىنا بەلسەنە ات سالىسىپ، پارتيا مەن حالىق ءۇشىن كۇش - قۋاتتارىڭىزدى ۇزدىكسىز ارناپ، اۋەلگى ماقساتتان اينىماۋ، كۇرەس جۇرگىزۋدەن تىنباۋ رۋحىن ايگىلەدىڭىزدەر.
شي جينپيڭ بىلاي دەپ باسا دارىپتەدى: جۇڭحۋا ۇلتى − قاھارماندار تولاسسىز شىعاتىن ۇلت، جاڭا ءداۋىر قاھارمانداردى سومدايتىن ءداۋىر. بۇكىل پارتيا، بۇكىل قوعام قاھارمانداردى ارداقتاپ، قاھارمانداردان ۇيرەنىپ، قاھارماندارعا قامقورلىق جاساپ، قاھارمان رۋحىن بارىنشا ساۋلەلەندىرىپ، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋدىڭ تەلەگەي كۇشىن توپتاۋ كەرەك.
سىچۋان ولكەلىك توڭكەرىستىك جارالى - مۇگەدەك اسكەريلەردىڭ دەمالىس ورنى 1951 - جىلى قۇرىلعان، ىلگەرىندى - كەيىندى 2800دەن استام جارالى - مۇگەدەك اسكەريلەردى شوعىرلى باعىپ - قاقتى، مۇنىڭ ىشىندە امەريكا جيھانگەرلەرىنە قارسى تۇرىپ، چاۋشيانعا كومەك بەرۋ سوعىسىنا قاتىناسقاندار شامامەن 2200 ادام. 60 نەشە جىلدان بەرى بۇل ورىنداعى جارالى - مۇدەگەك اسكەريلەر جاي ادامدار ويلاي المايتىن قيىندىقتى جەڭىپ، وتان قۇرىلىسىنا شاماسىنىڭ جەتىسىنشە ۇلەس قوسىپ، مىندەتتى تۇردە 10 مىڭ كەزەككە تاياۋ ءداستۇر تاربيەسى بايانداماسىن جاسادى، 3 ميلليوننان استام ادام - رەت تاربيە قابىلداپ، بەلسەندى قوعامدىق اڭىس تۋدىردى. 2019 - جىلى بۇل ورىن ”مەملەكەتتىك قوسىننان قايتقان اسكەريلەر قىزمەتىندەگى ۇلگىلى ورىن“ بولىپ ماداقتالىپ - سيلاندى. تاياۋدا بۇل ورىنداعى ەرىكتىلەر ارمياسىنىڭ ساقا جاۋىنگەرى تۋ بو - ي بارلىق جارالى - مۇگەدەك اسكەريلەر اتىنان ءتوراعا شي جينپيڭگە حات جازىپ، قىزمەت جانە تۇرمىس جاعدايلارىن مالىمدەپ، اۋەلگى ماقساتتى ۇمىتپاي، بورىشتى ەستە بەرىك ساقتاپ، قاسيەتتەرىن ساقتاپ، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋ ءۇشىن ۇزدىكسىز ۇلەس قوسۋ بەكىمدەرىن بىلدىرەدى.
