− جۇڭگو حالىق ەرىكتىلەر ارمياسىنىڭ امەريكا جيھانگەرلەرىنە قارسى تۇرىپ، چاۋشيانعا كومەك بەرۋ ءۇشىن مەملەكەتتەن شىعىپ سوعىس جۇرگىزگەندىگىنىڭ 70 جىلدىعى بايلانىسىمەن
شينحۋا اگەنتتىگىنىڭ تىلشىلەرى لي شۋانلياڭ، مەي شىشيۇڭ، شۇي ياڭ، ۋاڭ چي
وتانىمەن 70 جىلعا جۋىق ايرىلىسقان قاھارماندار اقىرى قايتىپ ورالدى!
2020 - جىلى 9 - ايدىڭ 27 - كۇنى كورەيانىڭ رىنچۋان اۋەجايىنان ۇشقان جۇڭگونىڭ ارناۋلى ۇشاعى شىنياڭنىڭ تاۋشيان حالىقارالىق اۋەجايىنا قوندى، جۇڭگو حالىق ەرىكتىلەر ارمياسىنىڭ 117 قۇربانىنىڭ سۇيەگى وسى ۇشاقپەن جەتكىزىلدى.
بۇل كورەيادان 7 - توپتا وتانعا ورالعان ەرىكتىلەر ارمياسى قۇرباندارىنىڭ سۇيەگى ەدى.
”باۋىرلاستار، سەندەر اقىرى قايتىپ ورالدىڭدار - اۋ!“. ەرىكتىلەر ارمياسىنىڭ 88 جاستاعى ساقا جاۋىنگەرى لي ۋيبو ءۇنى قارلىعا كوزىنە جاس الدى، ”وتان مەن حالىق سەندەردى ۇمىتقان جوق!“.
70 جىلدىڭ الدىندا قاھارمان جۇڭگو حالىق ەرىكتىلەر ارمياسىنىڭ قولباسىلارى مەن جاۋىنگەرلەرى بەيبىتشىلىكتى قورعاۋ، شاپقىنشلىققا قارسى تۇرۋدىڭ ادىلەت تۋىن بيىك ۇستاپ، ايبارلى ەرلىكپەن، اسقاق رۋحپەن يالۋجياڭ وزەنىنەن ەندەي ءوتىپ، چاۋشيان حالقىمەن جانە ارمياسىمەن بىرگە 2 جىل 9 ايعا جالعاسقان ءولىمدى ەلەڭ قۇرلى كورمەي قان كەشكەن قيان -كەسكى شايقاستى باستان كەشىرىپ، امەريكا جيھانگەرلەرىنە قارسى تۇرىپ، چاۋشيانعا كومەك بەرۋ سوعىسىنىڭ ۇلى جەڭىسىنە قول جەتكىزدى.
بۇل ادىلەتتىڭ جەڭىسى، بۇل بەيبىتشىلىكتىڭ جەڭىسى، بۇل حالىقتىڭ جەڭىسى!
ۇلى جەڭىس ماڭگىلىك نۇر شۇعىلا شاشتى − شوق جۇلدىزداي جارقىراعان قاھارماندار تاريحتىڭ اسپانىندا نۇر توكتى، ولاردىڭ ەسىمى حالىقتىڭ جۇرەگىندە ماڭگىلىككە جازىلىپ قالدى.
ۇلى جەڭىس ءبىزدى شابىتتاندىردى − ورىندالمايتىن مىندەت بار دەگەنگە سەنبەيمىز، جەڭە المايتىن قيىنشىلىق بار دەگەنگە سەنبەيمىز، جەڭىلمەيتىن جاۋ بار دەگەنگە سەنبەيمىز.
ۇلى جەڭىس كەلەشەكتى كورسەتتى − جۇڭحۋا ۇلتىنىڭ ۇلى گۇلدەنۋگە بەت العان تاريحي قادامىنا ەشنارسە بوگەت بولا المايدى.
ادىلەت سوعىسى
”جۇڭگو حالقى شەتەلدىڭ شاپقىنشىلىعىنا استە جول قويمايدى، ءوزىنىڭ كورشىسىنە يمپەرياليستەردىڭ قۇتىرىنا شاپقىنشىلىق جاساۋىن دا ەلەمەي وتىرا المايدى“
ايدىندى وزەن، ءداۋ تولقىن.
4 تەسىكتى قالدىق كوپىر كۇزگى يالۋجياڭ وزەن ايدىنىندا قاسقايىپ تۇر. ويراندالعان بۇل ۇزىك كوپىر امەريكا جيھانگەرلىگىنە قارسى تۇرىپ، چاۋشيانعا كومەك بەرۋ سوعىسىنىڭ ەستەلىك بەلگىسىنە اينالدى.
1950 - جىلى 10 - ايدىڭ 19 - كۇنى وتان مەن حالىقتىڭ كەلەلى تاپسىرماسىن ارقالاعان جۇڭگو حالىق ەرىكتىلەر ارمياسى يالۋجياڭ وزەنىنەن كوكتەي ءوتتى.
”ءان ايتىلمادى، گۇل ۇسىنىلمادى، بارلىعى قاراڭعى تۇندە جۇرگىزىلدى“. ەرىكتىلەر ارمياسىنىڭ 88 جاستاعى ساقا جاۋىنگەرى ۋ سۇڭلين ەسكە الىپ بىلاي دەدى: ”كوپشىلىكتىڭ ويىندا تەك مەكەندى، وتاندى قورعاۋ عانا بولدى!“.
1950 - جىلى 6 - ايدىڭ 25 - كۇنى چاۋشياندا ىشكى سوعىس بۇرق ەتە ءتۇستى. امەريكانىڭ ترۋمەن ۇكىمەتى شىمىرىكپەستەن قارۋلى كيلىگۋ جۇرگىزىپ، ايتىلمىش ”بىرلەسكەن مەملەكەتتەر ارمياسىن“ جيناپ چاۋشيانعا جالپى بەتتىك سوعىس اشتى. چاۋشيان سوعىسى تەز ارادا ىشكى سوعىستان شاپقىنشىلىق جانە شاپقىنشىلىققا قارسى تۇرۋ حالىقارالىق سيپاتتى ءىشىنارالىق سوعىسقا اينالدى.
امەريكا جۇڭگو ۇكىمەتىنىڭ تالاي رەتكى ەسكەرتۋىمەن ساناسپاي، 38 - پاراللەلدەن ءوتىپ، جۇڭگو مەن چاۋشياننىڭ شەكاراسىنداعى يالۋجياڭ وزەنى مەن تۋمىنجياڭ وزەنىنە تاياپ، سوعىس ۇشاعىن شىعارىپ ەلىمىزدىڭ شىعىس سولتۇستىك شەكارا وڭىرىندەگى قالالار مەن اۋىل - قىستاقتاردى بومبىلاپ، سوعىس ءورتىن جاڭا قۇرىلعان جۇڭحۋا حالىق رەسپۋبليكاسىنىڭ مەملەكەت تەرريتورياسىنا دەيىن تۇتاتتى.
سول جىلى 9 - ايدىڭ 30 - كۇنى اكىمشىلىك كەڭەسىنىڭ زۇڭليى، قوسىمشا سىرتقى ىستەر مينيسترى جوۋ ىنلاي: ”جۇڭگو حالقى شەتەلدىڭ شاپقىنشىلىعىنا استە جول قويمايدى، ءوزىنىڭ كورشىسىنە يمپەرياليستەردىڭ قۇتىرىنا شاپقىنشىلىق جاساۋىن دا ەلەمەي وتىرا المايدى“ دەپ ايقىن ەسكەرتۋ جاسادى.
الايدا، امەريكا ەڭسە كوتەرگەن جۇڭگو حالقىنىڭ بەكىمى مەن كۇشىن تىم تومەن ساناپ، جۇڭگو ۇكىمەتىنىڭ تالاي رەتكى ەسكەرتۋىن ەلەپ - ەسكەرمەدى.
10 - ايدىڭ 1 - كۇنى الدىمەن وڭتۇستىك چاۋشيان ارمياسى 38 - پاراللەلدەن ءوتتى، 10 - ايدىڭ 7 - كۇنى امەريكا ارمياسى دا 38 - پاراللەلدەن ءوتىپ، چاۋشيان مەن جۇڭگونىڭ شەكاراسىنا قاراي تەز ىلگەرىلەپ، تۇتاس چاۋشياندى باسىپ الۋعا ازىرلەندى.
قاتەرلى ساتتە چاۋشيان پارتياسى مەن ۇكىمەتى جۇڭگودان اسكەر شىعارىپ، چاۋشيانعا كومەك بەرۋدى ءوتىندى.
سان سالالى كاسىپ كوركەيتۋدى كۇتىپ تۇرعان جاڭا جۇڭگو دۇنيە جۇزىندەگى ەڭ قۋاتتى يمپەرياليستىك ەل امەريكاعا قارسى سوعىسقا شىعۋعا باتىلدىق ەتە الا ما، قارسى سوعىسقا شىعا الا ما؟
شۇعىل جاعداي الدىندا جۇڭگو كوممۋنيستىك پارتياسى ورتالىق كوميتەتىنىڭ ساياسي بيۋروسى پايدا مەن زياندى تولىق تالقىلاپ، سالماقتاعاننان كەيىن، ءبىر اۋىزدان جۇڭگو شايقاسقا قاتىناسۋى، ءسوز جوق، قاتىناسۋى كەرەك دەپ قارادى.
تاريحي سيپاتتى ستراتەگيالىق شەشىم جاسالدى: امەريكا جيھانگەرلىگىنە قارسى تۇرىپ، چاۋشيانعا كومەك بەرىپ، مەكەندى، وتاندى قورعاۋ كەرەك!
1950 - جىلى 10 - ايدىڭ 25 - كۇنىنەن 1951 - جىلى 6 - ايدىڭ 10 - كۇنىنە دەيىن جۇڭگو حالىق ەرىكتىلەر ارمياسى ىركەس - تىركەس 5 رەت زور كولەمدى شايقاس جۇرگىزىپ، چاۋشيان سوعىسىنىڭ جاعدايىن تۇبەگەيلى وزگەرتىپ، شايقاس شەبىن 38 - پاراللەل ماڭىندا ورنىقتىرىپ، ”بىرلەسكەن مەملەكەتتەر ارمياسىن“ ستراتەگيالىق قورعانۋعا وتۋگە ماجبۇرلەدى.
1951 - جىلى 7 - ايدىڭ 10 - كۇنىنەن باستاپ امەريكا ۇكىمەتى جۇڭگو - چاۋشيان جاقپەن كايچىڭدا سوعىس توقتاتۋ كەلىسسوزىن وتكىزۋگە ءماجبۇر بولدى.
سوعىس توقتاتۋ كەلىسىمى ءبىر توقتاپ، ءبىر جۇرگىزىلىپ، ۇزدىك - سوزدىق 2 جىلعا جالعاستى. 1953 - جىلى 7 - ايدىڭ 27 - كۇنى سوعىس توقتاتۋ كەلىسىمىنە قول قويىلدى. جۇڭگو حالىق ەرىكتىلەر ارمياسى چاۋشيان حالىق ارمياسىمەن تىزە قوسا شايقاس جۇرگىزىپ، امەريكا باس بولعان ”بىرلەسكەن مەملەكەتتەر ارمياسىن“ جەڭىپ، سوعىستىڭ جەڭىسىنە قول جەتكىزدى.
”امەريكا جيھانگەرلىگىنە قارسى تۇرىپ، چاۋشيانعا كومەك بەرۋ ۇلى سوعىسى بەيبىتشىلىكتى قورعاۋ، شاپقىنشىلىققا قارسى تۇرۋداعى ادىلەت سوعىسى بولدى“. اسكەري ىستەر عىلىم اكادەمياسىنىڭ ەرەكشە ۇسىنىس ەتىلگەن باس مامانى حى لەي بىلاي دەدى: جۇڭگو حالىق ەرىكتىلەر ارمياسىنىڭ كۇش قاينارى، سونداي - اق ونىڭ جەڭىسكە جەتۋىنىڭ ءتۇبىرلى سەبەبى − امەريكا جيھانگەرلىگىنە قارسى تۇرىپ، چاۋشيانعا كومەك بەرۋ ۇلى كۇرەسىنىڭ ادىلەتتىلىگىندە جاتىر.
ادىلەت سوعىسى بولعاندىقتان دا، ەرىكتىلەر ارمياسىنىڭ قولباسىلار مەن جاۋىنگەرلەرى شايقاسقان سايىن ەرلەگەن ارىندى كۇرەس جىگەرىنە جانە اسقاقتاعان جاۋىنگەرلىك ارىنعا يە بولىپ، جەر مەن كوكتى ءدۇر سىلكىندىرگەن، كورگەن جاننىڭ كوزىنە جاس الدىرعان سوعىس كەرەمەتتەرىن ۇزدىكسىز جاراتا الدى.
ادىلەت سوعىسى بولعاندىقتان دا، بۇكىل ەل حالقى ءبىر نيەتپەن ىنتىماقتاسىپ، جاۋعا تەگىس كەكتەنىپ، ”ادامى بارلار ادامىن شىعارىپ، اقشاسى بارلار اقشاسىن شىعارىپ، استىعى بارلار استىعىن شىعارىپ“، ارمياعا، سوعىسقا قاتىناسۋدىڭ، الدىڭعى شەپكە كومەك بەرۋدىڭ قىزۋ ورلەۋىن كوتەردى.
ادىلەت سوعىسى بولعاندىقتان دا، بۇكىل دۇنيە جۇزىندەگى بەيبىتشىلىكتى سۇيەتىن مەملەكەتتەر مەن حالىقتار جۇڭگو مەن چاۋشيان حالقىنا تىلەۋلەستىك ءبىلدىرىپ، قولداۋ كورسەتىپ جانە كومەك بەرىپ، ەڭ سوڭىندا ادىلەتشىل قوسىن سوعىس جەڭىسىنە قول جەتكىزىپ، يمپەرياليزمنىڭ ىرگە كەڭەيتۋ ىقپال كولەمى ورنالاستىرۋىن بىت - شىت ەتىپ، ازيانىڭ، سونداي - اق دۇنيە ءجۇزىنىڭ بەيبىتشىلىگىن قورعادى.
جەڭىستى شايقاس
”باتىس شاپقىنشىلارىنىڭ نەشە جۇزدەگەن جىلداردان بەرگى شىعىستا ءبىر تەڭىز جاعالاۋىنا بىرنەشە زەڭبىرەك قۇرسا بولعانى ءبىر مەملەكەتتى باسىپ الاتىن زامانى كەلمەسكە كەتتى“
1950 - جىلى 10 - ايدىڭ 25 - كۇنى ەرىكتىلەر ارمياسى 40 - جۇنىنىڭ 18 جاستاعى جاۋىنگەرى لي شياڭيۇي وڭتۇستىك چاۋشيان ارمياسىنىڭ الدىڭعى قوسىنىمەن چاۋشياننىڭ اسقار تاۋ، بيىك قۇزىندا كەزدەيسوق ۇشىراسىپ قالادى.
سول كۇنى ەرىكتىلەر ارمياسى باتىس شەپتەگى لياڭشۇيدۇڭ، يۇنشان جانە شىعىس شەپتەگى حۋاڭساۋليڭدا وڭتۇستىك چاۋشيان ارمياسىمەن قيان - كەسكى شايقاس جۇرگىزىپ، امەريكا جيھانگەرلىگىنە قارسى تۇرىپ، چاۋشيانعا كومەك بەرۋ سوعىسىنىڭ شىمىلدىعىن اشتى.
”ۋىنجيڭ مەن لياڭشۇيدۇڭنىڭ ارالىعىنداعى تاس جولدا ءبىزدىڭ 40 - جۇننىڭ 118 - شىسى باسىن توسۋ، قۇيرىعىن كەسۋ، بەلىن شابۋ ءادىسىن ىستەتىپ، نەبارى ءبىر ساعاتتىڭ ىشىندە وڭتۇستىك چاۋشيان ارمياسىنىڭ ءبىر يىڭىن جويدى“، - دەدى لي شياڭيۇي ەسكە الىپ.
10 - ايدىڭ 25 - كۇنى، كەيىن جۇڭگو حالىق ەرىكتىلەر ارمياسىنىڭ امەريكا جيھانگەرلەرىنە قارسى تۇرىپ، چاۋشيانعا كومەك بەرۋ ءۇشىن مەملەكەتتەن شىعىپ سوعىس جۇرگىزگەندىگىن ەسكە الۋ كۇنى بولىپ تۇراقتاندىرىلدى. حالىق ارمياسى جەڭىستەن - جەڭىستى بەتكە الۋ ساپارىندا تاعى ءبىر نۇر شۇعىلالى كوورديناتا ورناتتى.
11 - ايدىڭ 1 - كۇنى ”مەملەكەت قۇرۋداعى ەگەي شى“ اتالعان امەريكا ارمياسى اتتى اسكەرلەر 1 - شىسى چاۋشياننىڭ سولتۇستىك بولىگىندەگى ماڭىزدى قاتىناس ءتۇيىنى يۇنشان قالاشىعىنا جينالىپ، وسىدان سولتۇستىككە قاراي ۇزدىكسىز شابۋىلداۋعا ازىرلەندى.
مەنمەنسىگەن امەريكا ارمياسى جۇڭگونىڭ اسكەر شىعارىپ، سوعىسقا قاتىناساتىندىعىن ويلاماعان ەدى. ەرىكتىلەر ارمياسىنىڭ 39 - جۇنى زەڭبىرەك وعىنىڭ قورعاۋىندا يۇنشانعا شابۋىل جاسادى. ەرىكتىلەر ارمياسىنىڭ جاۋىنگەرلەرى قالاعا شابۋىلداپ كىرگەندە وزدەرىنىڭ قارسىلاسى امەريكا ارمياسىنىڭ ماڭدايعا باسار شىسى ەكەندىگىن بايقادى. كوماندير - جاۋىنگەرلەردىڭ ارىنى تاسقىنداپ، كۇرەس جىگەرى ءتىپتى دە اسقاقتاي ءتۇستى: ”تاپ سەنىڭ وسى ماڭدايعا باسار شىلارىڭمەن سوعسامىز!“.
ەرىكتىلەر ارمياسى امەريكا ارمياسىمەن چاۋشيان سوعىس مايدانىنداعى تۇڭعىش بەلدەسۋىنىڭ جەڭىسىنە قول جەتكىزدى. امەريكا اتتى اسكەرلەر 1 - شىسى اۋىر شىعىنعا ۇشىراپ، 8 - تۋانىنىڭ باسىم ءبولىمى جويىلدى.
1 - رەتكى شايقاستا ەرىكتىلەر ارمياسى جاۋدىڭ 15 مىڭنان استام ادامىن جويىپ، ”بىرلەسكەن مەملەكەتتەر ارمياسىن“ چيڭچۋانجياڭ وزەنىنىڭ وڭتۇستىگىنە شەگىندىرىپ، جەڭىس ارقىلى چاۋشيانداعى سوعىس جاعدايىن العاشقى قادامدا ورنىقتىرىپ، نىق قادام تىرەدى.
الايدا، ءومىر مەن ءولىم ايقاسى ەندى عانا باستالعان بولاتىن.
11 - ايدىڭ 21 - كۇنى امەريكانىڭ 7 - شىسى يالۋجياڭ وزەنىنىڭ بويىنداعى حۇيشان قالاشىعىنا ىلگەرىلەپ كەلدى. 11 - ايدىڭ 24 - كۇنى ”بىرلەسكەن مەملەكەتتەر ارمياسىنىڭ“ باس سىليڭى ماكارتۋر ۇشاقپەن يالۋجياڭ وزەنىنىڭ ايدىنىن ءبىر اينالىپ شارلاپ، دۇنيە جۇزىنە جالپى شابۋىل باستالعاندىعىن جاريالادى ءارى ”جاۋىنگەرلەرىمىز روجدەستۆا مەرەكەسىن ۇيىندە وتكىزەدى دەگەن ءسوزىمنىڭ ىسكە اسۋىن ءۇمىت ەتەمىن“، - دەدى.
ماكارتۋر لەپىرە سويلەگەننىڭ ەرتەسى ەرىكتىلەر ارمياسى تۇتاس شەپ بويىنشا شايقاس باستاپ قارسى شابۋىلعا ءوتتى.
سۇڭگۋفىڭ، كەزىندە سان ميلليونداعان جۇڭحۋا پەرزەنتتەرىنىڭ ىستىق قانىن تاسقىنداتقان جەر اتى. 11 - ايدىڭ 30 - كۇنى تاڭ راۋاندا ەرىكتىلەر ارمياسىنىڭ 38 - جۇن 112 - شى 335 - تۋانى وڭتۇستىككە قاشقان امەريكا ارمياسىنا قۋالاي سوققى بەرىپ، شەرۋ تارتىپ وسىندا كەلدى. امەريكا ارمياسىنىڭ نەشە ونداعان زەڭبىرەگى مەن 10 نەشە تانكىسى شوعىرلى اتقىلادى ءارى كوپ مولشەردەگى قاتىرما بەنزين بومبىسىن تاستاپ، شەپتى وت تەڭىزىنە اينالدىردى. تۇلا بويىندا وت لاۋلاعان ەرىكتىلەر ارمياسىنىڭ جاۋىنگەرلەرى جاۋعا اتىلىپ، ولىسپەي - بەرىسپەي شايقاس جۇرگىزدى.
سۇراپىل سۇڭگۋفىڭ شايقاسى «ەڭ سۇيىكتى ادامدارىمىز كىم» دەگەن شىعارماعا ەنگىزىلدى. وسىدان باستاپ، ”ەڭ سۇيىكتى ادامدار“ دەگەن ءسوز ەرىكتىلەر ارمياسىنىڭ قولباسىلارى مەن جاۋىنگەرلەرىنىڭ داڭق اتاعىنا اينالدى.
”ءبىزدىڭ جەڭىسىمىز ايانباي ايقاسۋمەن كەلدى!“. ەرىكتىلەر ارمياسىنىڭ 91 جاستاعى ساقا جاۋىنگەرى چاڭ زۇڭشين سول جىلى 27 - جۇن 79 - شى سىليڭبۋىنىڭ سانموۋى بولاتىن، ول كىسىنىڭ 70 جىلدىڭ الدىنداعى قان كەشىپ سوعىس جۇرگىزگەن چاڭجينحۋ شايقاس مايدانىن تۇسىندە قانشا رەت كورگەنىن كىم ءبىلسىن، ”مۇزداي سۋىق، سۇيەكتى قاريدى. ءۇسىپ ولگەن ساپتاستار وتە كوپ، مەنىڭ قۇلاعىم، مۇرنىم تۇگەل ءۇسىپ كەتتى، زاردابى قازىرگە دەيىن بار“.
وسى رەتكى شايقاستا چاڭ زۇڭشين تۇرعان 27 - جۇن دۇنيە ءجۇزىن ءدۇر سىلكىندىرگەن شايقاس جەمىسىن جاراتتى − امەريكا ارمياسىنىڭ ”اق ايۋ تۋانىن“ بۇكىلدەي جويدى.
ەرىكتىلەر ارمياسىنىڭ سۇراپىل شابۋىلى ناتيجەسىندە امەريكا ارمياسى ”قۇرلىق ارميا تاريحىنداعى ەڭ ۇلكەن جەڭىلىسكە“ تاپ بولىپ، 38 - پاراللەلدىڭ وڭتۇستىگىنە قاراي بۇكىل لەنيا بويىنشا شەگىندى.
1950 - جىلى 11 - ايدىڭ 7 - كۇنىنەن 12 - ايدىڭ 24 - كۇنىنە دەيىن جۇرگىزىلگەن 2 - رەتكى شايقاستا ەرىكتىلەر ارمياسى ”بىرلەسكەن مەملەكەتتەر ارمياسىنىڭ“ تۇتاس چاۋشياندى باسىپ الۋ ماقساتىن تاس - تالقان ەتىپ، چاۋشيان سوعىس جاعدايىن تۇبەگەيلى وزگەرتتى.
1951 - جىلى الدىڭعى جارتى جىلدا ەرىكتىلەر ارمياسى ”بىرلەسكەن مەملەكەتتەر ارمياسىمەن“ 38 - پاراللەلدىڭ وڭتۇستىگى مەن سولتۇستىگىندەگى وڭىرلەردە ۇزدىكسىز 3 رەت شايقاسىپ، امەريكا بيلەۋشىلەرىن چاۋشيان سوعىسى ساياساتىن رەتتەۋگە ماجبۇرلەپ، سوعىس توقتاتۋ كەلىسىمى ارقىلى سوعىستى اياقتاتۋعا ۇمتىلدى.
قيان - كەسكى شايقاستا ەرىكتىلەر ارمياسى ءاربىر شەپتە تۇگەلدەي جاۋلارمەن دۇركىن - دۇركىن ايقاسىپ، جاۋلاردىڭ قىرۋار تەبىندى قوسىنىن ويراندادى. تياندىشان، مالياڭشان، جينچىڭچۋان... ەرىكتىلەر ارمياسىنىڭ ءاربىر شەبى تۇگەلدەي امەريكا ارمياسى اسكەرلەرىنىڭ كورىنە اينالدى.
شايقاس مايدانىندا امەريكا ارمياسى يادرولىق قارۋدان باسقا بارلىق جاڭا قارۋلارىن پايدالانسادا، ءباز - باياعىسىنداي ولجا تۇسىرە المادى. 1953 - جىلى 7 - ايدىڭ 27 - كۇنى ساعات 10دا بانمىندياندا چاۋشيان سوعىسىن توقتاتۋ كەلىسىمىنە رەسمي قول قويىلدى.
”بىرلەسكەن مەملەكەتتەر ارمياسىنىڭ“ 3 - كەزەكتى باس سىليڭى مارك كلارك كەيىن ەستەلىگىندە بىلاي دەپ جازادى: ”مەن تاريحتاعى جەڭىسكە جەتپەگەن سوعىستى توقتاتۋ كەلىسىمىنە قول قويعان العاشقى امەريكا قولباسشىسى بولدىم ...“
كلاركتىڭ ”تورىعۋى مەن ازاپتانۋىنىڭ“ ەسەسىنە، پىڭ دىحۋاي ماقتانىشپەن بىلاي دەپ جاريالادى: ”باتىس شاپقىنشىلارىنىڭ نەشە جۇزدەگەن جىلداردان بەرگى شىعىستا ءبىر تەڭىز جاعالاۋىنا بىرنەشە زەڭبىرەك قۇرسا بولعانى ءبىر مەملەكەتتى باسىپ الاتىن زامانى كەلمەسكە كەتتى“.
امەريكا جيھانگەرلىگىنە قارسى تۇرىپ، چاۋشيانعا كومەك بەرۋ ۇلى سوعىسى − جاڭا جۇڭگونىڭ مەملەكەت قۇرۋ سوعىسى، حالىق ارمياسىنىڭ بەدەل تىكتەۋ سوعىسى.
اسكەري ىستەر اكادەمياسىنىڭ اعا زەرتتەۋشىسى جاڭ يوۋميڭ بىلاي دەپ قارايدى: چاۋشيان سوعىس مايدانىندا ارميامىز وسى زامانعى سوعىستىڭ قاتاڭ سىنىنان ءوتىپ، ناشار تەحنيكالىق جابدىقتارمەن باسىمدىققا يە تەحنيكاسى بار كۇشتى جاۋدى جەڭگەن جاڭا سوعىس ءتاسىلى مەن جاڭا تاجىريبەلەرىن ازىرلەپ، ارميامىزدىڭ قاھارمان دا قايسار شايقاس ستيلىن تولىق ايگىلەپ، وسى زامانعى سوعىستا جەڭىسكە جەتە الاتىن ءبىر توپ اسكەري دارىندىلاردى جەتىلدىردى. سوعىستىڭ سىنىنان ءوتۋ ەلىمىزدىڭ اسكەري ىستەر نازارياسى مەن اسكەري ىستەر عىلىم - تەحنيكاسىنىڭ دامۋىن جەبەپ، ارميامىزدىڭ جالاڭ ارميا تۇرىمەن سوعىس جۇرگىزۋدەن كوپتەگەن ارميا اسكەر ءتۇرىن بىرلەستىرە سوعىس جۇرگىزۋگە بۇرىلىس جاساۋداي اياق الىسىن جەدەلدەتىپ، ارميامىزدىڭ توڭكەرىستەنگەن، وسىزاماندانعان، جۇيەلىلەنگەن قۇدىرەتتى ارميا قۇرۋ سىندى جاڭا كەزەڭگە ءوتۋىن ىلگەرىلەتتى.
امەريكا جيھانگەرلىگىنە قارسى تۇرىپ، چاۋشيانعا كومەك بەرۋدىڭ سوعىس ورتىنەن كەلگەن بۇگىنگى حالىق ارمياسى شي جينپيڭنىڭ ارميانى قۇدىرەتتەندىرۋ يدەياسىنىڭ جەتەكشىلىگىندە، پارتيانىڭ جاڭا داۋىردەگى ارميانى قۇدىرەتتەندىرۋ نىساناسىنا، دۇنيە جۇزىندە بىرەگەي ارميانى جاپپاي قۇرۋعا قاراي ارشىندى قاداممەن العا تارتۋدا.
رۋحاني سوعىس
”امەريكا جيھانگەرلىگىنە قارسى تۇرىپ، چاۋشيانعا كومەك بەرۋ ۇلى رۋحى − ءبىزدىڭ العا باسۋ جولىنداعى بارلىق قيىندىقتار مەن حاۋىپ - قاتەرلەردى جەڭۋدەگى قۇدىرەتتى قوزعاۋشى كۇشىمىز“
لياۋنيڭنىڭ داندۇڭى، امەريكا جيھانگەرلىگىنە قارسى تۇرىپ، چاۋشيانعا كومەك بەرۋ ۇلى سوعىسى ەسكەرتكىش سارايى.
بيىل 9 - ايدىڭ 19 - كۇنى قايتا اشىلعاننان باستاپ، بۇكىل ەلدىڭ جەر - جەرىنەن كەلگەن ساياحاتشىلار مەن ەكسكۋرسيالاۋشىلار وسىندا ات باسىن بۇرىپ، تاريحتى ەسكە ءتۇسىرىپ، قۇربانداردى ساعىنا ەسكە الدى.
”امەريكا جيھانگەرلىگىنە قارسى تۇرىپ، چاۋشيانعا كومەك بەرۋ سوعىسى ءبىر - بىرلەگەن جان تەبىرەنتەرلىك جەڭىس جىرىن اسقاقتاتىپ قالماستان، امەريكا جيھانگەرلىگىنە قارسى تۇرىپ، چاۋشيانعا كومەك بەرۋ ۇلى رۋحىن سومدادى. ەسكەرتكىش سارايىنىڭ باستىعى ليۋ جيڭيۋان بىلاي دەدى: ”مۇنداي رۋح − ءبىزدىڭ العا باسۋ جولىنداعى بارلىق قيىندىقتار مەن حاۋىپ - قاتەرلەردى جەڭۋىمىزدەگى قۇدىرەتتى قوزعاۋشى كۇش!“.
بۇل وتان مەن حالىقتىڭ مۇددەسىن بارىنەن جوعارى قوياتىن، وتان مەن ۇلتتىڭ ار - نامىسى ءۇشىن ەشتەڭەدەن تايىنباي العا ۇمتىلاتىن وتانشىلدىق رۋحتىڭ تاريحي داستانى −
”قايتپاس ەرلىكپەن، اسقاق رۋحپەن يالۋجياڭ وزەنىنەن ەندەي ءوتتى، بەيبىتشىلىكتى قورعادى، وتاندى قورعادى، اتا مەكەندى قورعادى...“ 70 جىلدىڭ الدىندا، ءدال وسىنداي مىزعىماس بەرىك رۋحاني كۇش - قۋاتتىڭ جىگەرلەندىرۋىندە، ەرىكتىلەر ارمياسى زەڭبىرەكشى اسكەرلەر 1 - شىسى 27 - تۋانى 3 - يىڭى 8 - ليانىنىڭ بايلانىسشىسى جاۋ يۇن مەن جاۋىنگەر سەرىكتەرى ىس - تۇتەك تورلاعان چاۋشيان سوعىس مايدانىنا ىركەس - تىركەس اتتاندى.
”وتان ءۇشىن بار قايراتىمىزدى سالامىز، وتان ءۇشىن ادالدىقپەن جان قيامىز“. جاۋ يۇن مەن جاۋىنگەر سەرىكتەرى وزدەرىنىڭ جاس رەسپۋبليكانىڭ حاۋىپسىزدىگى مەن ار - نامىسىن قورعاي الاتىنىنا كامىل سەندى.
”وتانىمىز ارت جاعىمىزدا، حالىق ءبىزدىڭ قاسىمىزدا“. وتان مەن حالىققا تەرەڭ سۇيىسپەنشىلىك − ەرىكتىلەر ارمياسىنداعى قولباسىلار مەن جاۋىنگەرلەردىڭ رۋحاني تىرەگى. ەرىكتىلەر ارمياسى مەملەكەتتەن شىعىپ سوعىس جۇرگىزگەن كۇندەردە بۇكىل ەلدە امەريكا جيھانگەرلىگىنە قارسى تۇرىپ، چاۋشيانعا كومەك بەرۋدىڭ اسا دابىرالى ورلەۋى كوتەرىلدى. جاستار مەن وقۋشىلار جاپا - تارماعاي ارمياعا قاتىناسىپ، قىرۋار ەمدەۋ اترەتى مەن تەمىر جول قىزمەتكەرلەرى، الدىڭعى شەپكە كومەكتەسكەن حالىق جۇمىسكەرلەرى سوعىس مايدانىنا اتتاندى، حال سۇراۋ حاتى، حال سۇراۋ قالتالارى تۇس - تۇستان الدىڭعى شەپكە جىبەرىلىپ، الدىڭعى شەپتەگى قولباسىلار مەن جاۋىنگەرلەردىڭ كۇرەس ەركىن جانىدى. سونىمەن بىرگە، ايبىنى زور ۇشاق، زەڭبىرەك اتاۋ قيمىلى دا بۇكىل ەل كولەمىندە ورىستەتىلدى. تولىق ەمەس ساناققا قاراعاندا، نەبارى ءبىر جىل ىشىندە جىلۋعا اتالعان اقشاعا 3710 سوعىس ۇشاعىن ساتىپ الۋعا بولادى ەكەن.
ەرىكتىلەر ارمياسىنىڭ ۇشقىشى حان دىساي وتان حالقى جىلۋعا اتاعان سوعىس ۇشاعىن ايداپ الدىڭعى شەپكە ۇشتى. ءبىر رەتكى اۋە سوعىسى كەزىندە ول امەريكا اۋە ارمياسىنىڭ بەتكە ۇستار ۇشقىشى فيشەردى اتىپ تۇسىرەدى. فيشەر تۇتقىنعا تۇسكەننەن كەيىن، ءوزىن اتىپ تۇسىرگەن ادامعا، ءسوزسىز، كەزدەسپەكشى بولادى.
فيشەر نەبارى 19 جاستاعى حان دىسايدى كورگەندە، ەرىكسىزدەن: ”مەنى اتىپ تۇسىرگەنىڭە قانشالىق سياقى الاسىڭ؟“ - دەپ سۇرادى.
حان دىساي بەس ساۋساعىن كورسەتىپ: ”500 ميلليون!“، - دەيدى.
”500 ميلليون دوللار ما؟“
”جوق! 500 ميلليون جۇڭگو حالقىنىڭ كوڭىلى!“
بۇل قاجىرلى دا قايسار، ولىمنەن قورىقپايتىن توڭكەرىستىك قاھارماندىق رۋحتىڭ ايبىندى جىرى −
15 - جۇننىڭ جاۋىنگەرى چيۋ شاۋيۇن شايقاس جۇرگىزۋ بارىسىندا جاسىرىنعاندا، باقىتقا قارسى جاۋدىڭ ورتەگىش بومبىسى تيەدى. تۇتاس شايقاستىڭ جەڭىسى ءۇشىن، ول ءون بويىنىڭ كۇيىپ، قاتتى اۋىرىپ بارا جاتقانىنا قاراماستان، داڭقپەن قۇربان بولعانعا دەيىن قىبىر ەتپەي جاتادى، سول كەزدە ول نەبارى 26 جاستا عانا بولاتىن.
چيۋ شاۋيۇننىڭ سۇيەگىن شايقاس مايدانىنان كوتەرىپ اكەلگەن ەرىكتىلەر ارمياسىنىڭ ساقا جاۋىنگەرى حان يۋانچۋان سول كەزدەگى جاعدايدى ەسكە العاندا، كوز جاسى كول بولدى: ”بويى ءبىر مەتر 70 سانتيمەتردەن اساتىن ادامنىڭ سۇيەگى كۇيىپ نەبارى 70 سانتيمەتر شاماسىندا عانا قالىپتى، سول كەزدەگى جايتتى ماڭگى ۇمىتا المايمىن ...“
بۇل جاپا - ماشاقاتتان جاسقانبايتىن، باستان - اياق اسقاق جاۋىنگەرلىك جىگەردى ساقتايتىن توڭكەرىستىك ۇمىتكەرلىك رۋحتىڭ كۇي تاراۋى −
شاڭگانليڭ، امەريكا ارمياسىنىڭ ”قاسىرەت جوتاسى“. 43 تاۋلىك سۇراپىل شايقاستا، جاۋ جاق وسى 3.7 شارشى كيلومەتر كەلەتىن جوتاعا ءبىر ميلليون 900 مىڭنان استام زەڭبىرەك وعىن اتىپ، 5000نان استام بومبى تاستادى. ەرىكتىلەر ارمياسىنىڭ تاباندى قورعانىسىندا، 25 مىڭ ادامى ولگەن جارالانعان جاۋ اقىرى شىداي المادى. ەرىكتىلەر ارمياسى شەشۋشى قايتارما شابۋىلعا ءوتىپ، شاڭگانليڭ شەبىن تۇگەلدەي قايتارىپ الدى ءارى مىقتاپ يەلەپ، جاۋدىڭ شابۋىلىن تۇبەگەيلى تالقاندادى.
سوعىستان كەيىنگى شاڭگانليڭ جوتاسىنىڭ توبەسى 2 مەتر الاسارىپ، ءبىر مەتر تەرەڭدىكتەگى قيىرشىق تاستار قوپارىلىپ قالدى، ءبىر ۋىس توپىراق الساڭىز 10 نەشە پارشا بومبى جارقىشاعى قولعا ىلىنەدى. ەرىكتىلەر ارمياسى دۇنيە ءجۇزى سوعىس تاريحىنداعى قورعانىستىق شايقاستىڭ كەرەمەتىن جاسادى.
جاس ەرىكتىلەر ارمياسى اۋە ارمياسى زەڭگىر كوكتە ۇرىس سالىپ، ”كوك اسپاندا جاعالاسۋداي“ باتىلدىقپەن، ”بەتكە ۇستار“ دەپ اتالعان امەريكا اۋە ارمياسىنا سىلەيتە سوققى بەرىپ، جاۋدىڭ 330 ۇشاعىن اتىپ ءتۇسىرىپ، 95 ۇشاعىن زاقىمداپ، دۇنيە ءجۇزى اۋە شايقاسى تاريحىنداعى كەرەمەتتى جاسادى.
ەرىكتىلەر ارمياسىنىڭ قولباسىلارى مەن جاۋىنگەرلەرى سوڭعى كەزەڭدەگى شەپتى ساقتاۋ شايقاسىندا، ىلعي نەشە كۇن بويى سۋ ىشە الماي، ەرىندەرى جارىلىپ، قاناپ كەتتى، كەيبىرەۋلەرى جەر استى اكوبىندا كوبىرەك بولاتىندىقتان تۇندە كورمەۋشىلىك اۋرۋىنا شالدىقتى، ايتسە دە، كوپشىلىك باستان - اياق توڭكەرىستىك ۇمىتكەرلىك رۋحتى ساقتاپ، شايقاس ارەدىگىندە اڭگىمە شەرتىسىپ، ويىن ويناپ، ءبىر - بىرىنە جىگەر بەرىپ تۇردى. كوپشىلىك امالدىڭ بارىنشا وزدەرىنىڭ ”شەپ مەكەنىن“ ورنالاستىرىپ، وزدەرىنىڭ زەڭبىرەكتەن ساقتانۋ ۇڭگىرىنە ”ەڭبەك ءسىڭىرۋ ۇڭگىرى“، ”قاھارمان ۇڭگىرى“، ”امەريكا جيھانگەرلىگىنە قارسى تۇرۋ ۇڭگىرى“، ”جەڭىس ۇڭگىرى“ دەپ ات قويدى.
بۇل وتان مەن حالىق جۇكتەگەن بورىشتى ورىندايتىن، جومارتتىقپەن وزىندەگى بارىن ارنايتىن توڭكەرىستىك ادالدىق رۋحىنىڭ تاراۋى −
20 - جۇندەگى ليانجاڭ ياڭ گىنسى امەريكا ارمياسى قۇرلىقتا سوعىس جۇرگىزۋ 1 - شىسىنىڭ شابۋىلىن ۇزدىكسىز 8 رەت تويتارعاننان كەيىن، ەڭ سوڭعى ساتتە قوپارعىش ءدارى قاپشىعىن قۇشاقتاعان بەتى جاۋلارىن وزىمەن بىرگە الا كەتتى. ياڭ گىنسىعا ەرەكشە دارەجەلى ەڭبەك جازىلدى، ول تۇرعان ليان ”ياڭ گىنسى ليانى“ دەپ اتالىپ، كۇنى بۇگىنگە دەيىن حالىق ارمياسىنىڭ قاتارىندا ساقتالدى.
شاڭگانليڭ شايقاسىندا، ايگىلى سوعىس قاھارمانى حۋاڭ جيگۋاڭ باسىن ءباي تىگىپ مىلتىقتىڭ اۋزىن توسىپ، اسكەري ءبولىمنىڭ قايتارما شابۋىل جاساۋىنا جەڭىس جولىن اشىپ، ەرىكتىلەر ارمياسىنىڭ ەرەكشە دارەجەلى قاھارمانى جانە چاۋشيان دەموكراتيالىق حالىق رەسپۋبليكاسىنىڭ قاھارمانى اتاعىن الادى.
حۋاڭ جيگۋاڭ قۇربان بولعاننان كەيىن، ءتوراعا ماۋ زىدۇڭ ونىڭ اناسى دىڭ فاڭجىنى جۇڭنانحايعا قوناققا شاقىرىپ، ىقىلاسپەن: ”حۋاڭ جيگۋاڭنىڭ شەشەسى، حۋاڭ جيگۋاڭدى جاقسى تاربيەلەپسىڭ، ونى حالىققا قىزمەت ەتۋگە تاربيەلەپسىڭ“ دەدى.
رەسپۋبليكانىڭ كوسەمى مەن قاھارماننىڭ اناسى مىقتاپ قول الىستى. ماۋ زىدۇڭنىڭ ۇلى ماۋ انيىڭ دە ەرىكتىلەر ارمياسىنىڭ ءبىر جاۋىنگەرى. 1950 - جىلى 11 - ايدىڭ 25 - كۇنى ماۋ انيىڭ جاۋ ارمياسى ۇشاعىنىڭ بومبىلاۋىندا ەرلىكپەن قۇربان بولادى.
بۇل ادامزاتتىڭ بەيبىتشىلىگى مەن ادىلەت ىستەرى ءۇشىن كۇرەسەتىن ينتەرناتسيوناليزم رۋحنىڭ سيمفونياسى −
1952 - جىلى 1 - ايدىڭ 2 - كۇنى چاۋشيان پيڭ - اننان ولكەسى چىڭ چۋان ايماعىنىڭ شىتيانليى.
ەرىكتىلەر ارمياسىنىڭ جاۋىنگەرى لو شىڭجياۋ 3 رەت مۇزداي سۋىق سۋ تۇبىنە سۇڭگىپ، ەڭ سوڭعى قالعان قۋاتىمەن چاۋشياندىق بالا سۇي يڭدى قۇتقارىپ، قىمباتتى ءومىرىن ارنايدى. سول جىلى ول ەندى عانا 21 جاسقا تولعان ەدى.
چاۋشيان حالقى لو شىڭجياۋ قۇربان بولعان جەرگە سايعاق ورناتىپ، وعان: ”چاۋشياندا تۋىپ وسكەن حالىق تۇگەلدەي دوسىمىز لو شىڭجياۋ جولداستى ەستەرىندە بەرىك ساقتاۋى، ونىڭ ۇلى ينتەرناتسيوناليزمدىك رۋحىنان ۇيرەنۋى كەرەك“ دەپ جازىلعان.
سوعىس بارىسىندا، جۇڭگو - چاۋشيان ەكى ەل حالقى مەن ارمياسى قۋانىش پەن جۇبانىشتى بىرگە تاتىپ، ءومىر مەن ءولىم ارپالىسىن بىرگە وتكەرىپ، ىستىق قاندارىمەن ۇلى شايقاس دوستىعىن قالىپتاستىردى.
ەرىكتىلەر ارمياسىنىڭ قولباسىلارى مەن جاۋىنگەرلەرى شايقاس مايدانىندا ەرلىكپەن جاۋدى جويىپ، ادەتتە چاۋشياننىڭ جەر - سۋىن كوز قاراشىعىنداي ايالاپ، چاۋشيان حالقىنىڭ ينە ساباق جىبىنە تيسكەن جوق، بار كۇشتەرىمەن چاۋشيان حالقىنا كومەكتەستى.
1958 - جىلى چاۋشيان باسشىسى جۇڭگو حالىق ەرىكتىلەر ارمياسىن اتتاندىرىپ سالعان سالتاناتتى مەملەكەتتىك قوناعاسىدا، تەرەڭ سۇيىسپەنشىلىكپەن بىلاي دەدى: ”جۇڭگو حالىق ەرىكتىلەر ارمياسى چاۋشياندا ءبىزدىڭ حالىق ماڭگى ەسىنەن شىعارۋىنا بولمايتىن ۇلى ناتيجەلەر قالدىردى... سىزدەر ەتكەن ەلەۋلى ەڭبەك − پرولەتارياتتىق ينتەرناتسيوناليزمنىڭ ۇلگىسى، ول ماڭگى ادامزاتتى العا باستىرۋدىڭ تاريح كىتابىندا جازىلادى“.
”نەلىكتەن سوعىس تۋى سۋرەتتەي كوركەم بولادى، ويتكەنى ونى قاھارمانداردىڭ ىستىق قانى بوياعان. نەلىكتەن بايابان ولكەدە ۇنەمى كوكتەم بولادى، ويتكەنى قاھارمانداردىڭ ءومىرى گۇلدەردى جايناتىپ تۇر...“
جۇڭگو حالىق توڭكەرىستىك اسكەري ىستەر مۇراجايىندا وتكىزىلىپ جاتقان ”ۇلى جەڭىستى ەستە ساقتاپ، بەيبىتشىلىكتى ادىلدىكتى قورعاۋ − جۇڭگو حالىق ەرىكتىلەر ارمياسىنىڭ امەريكا جيھانگەرلەرىنە قارسى تۇرىپ چاۋشيانعا كومەك بەرۋ ءۇشىن مەملەكەتتەن شىعىپ سوعىس جۇرگىزگەندىگىنىڭ 70 جىلدىعىن ەسكە ءتۇسىرۋ نەگىزگى تاقىرىبىنداعى كورمەدە“ مىناداي ءبىر توپ ساندى مالىمەتتەر بار: ”امەريكا جيھانگەرلەرىنە قارسى تۇرىپ چاۋشيانعا كومەك بەرۋ ۇلى سوعىسىندا، ەرىكتىلەر ارمياسىنىڭ قولباسىلارى مەن جاۋىنگەرلەرىنەن ىلگەرىندى - كەيىندى 2 ميلليون 900 مىڭنان استام ادام چاۋشيانعا بارىپ، سوعىسقا قاتىناستى، 2 جىل 9 اي قاندى شايقاس جۇرگىزۋ ارقىلى، جيىنى جاۋدىڭ 710 مىڭنان استام ادامىن اتىپ ءولتىردى، جارالادى، تۇتقىندادى، ەرىكتىلەر ارمياسىنىڭ شايقاستا 360 مىڭنان استام ادامى جارالاندى، وققا ۇشتى...“
ەرىكتىلەر ارمياسىنان ىلگەرىندى - كەيىندى 300 نەشە مىڭ قاھارمان ارداگەر جانە 6000عا جۋىق ەڭبەگى ەگەي كوللەكتيۆ جارىققا شىقتى. ولار جۇڭحۋا ۇلتىنىڭ قاھارمان ۇلاندارى دەۋگە لايىق، وتاننىڭ حاۋىپسىزدىگى مەن دۇنيە ءجۇزى بەيبىتشىلىگىنىڭ قايسار قورعاۋشىسى دەۋگە لايىق، ”ەڭ سۇيىكتى ادامدار“ دەگەن داڭقتى اتاققا لايىق.
ۇلى رۋح ۋاقىت كەڭىستىگىنەن ەندەي ءوتىپ، جۇڭحۋا ۇلتىنىڭ العا باسۋ ساپارىن نۇرلاندىرۋدا.
تاريحتان بولاشاققا جول الىپ، جەڭىستەن - جەڭىسكە جەتتىك، امەريكا جيھانگەرلەرىنە قارسى تۇرىپ چاۋشيانعا كومەك بەرۋ سوعىس ءورتىنىڭ سىنىنان وتكەن جۇڭگو جىگەرى تاسقىنداپ جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋدىڭ جاڭا ساپارىندا ىلگەرىلەپ كەلەدى. ءدال وسى ساتتە، ماڭگى اينىماس اقيقات ادامداردىڭ اسقاق قايراتىن تاعى دا تاسقىنداتتى −
ادىلەت، ءسوزسىز، جەڭەدى! بەيبىتشىلىك، ءسوزسىز، جەڭەدى! حالىق، ءسوزسىز، جەڭەدى!
(قاتىناسقان تىلشىلەر: ۋاڭ ۋي، زوۋ ميڭجۇڭ، جاڭ يفەي)
(شينحۋا اگەنتتىگىنىڭ 10 - ايدىڭ 22 - كۇنى بەيجيڭنەن بەرگەن حابارى)
