10-ايدىڭ 28-كۇنى تۇستەن كەيىن، شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسى قاشقار ايماعى كونەٴشار اۋدانىنداعى جاڭا تيپتى ايدارشا ۆيرۋس وكپە قابىنۋ ىندەتى جانە ىندەتتەن ساقتانۋ- تىزگىندەۋ قىزمەتى جونىندەگى 4 ـ رەتكى اقپار جاريالاۋ ٴماجىلىسىن اشىپ، قاتىستى جاعدايلاردى حابارلاندىردى.
قاشقار ايماعى كونەٴشار اۋدانىندا جاڭادان قوسىلعان جاڭا تيپتى ايدارشا ۆيرۋس وكپە قابىنۋ دياگنوزى تۇراقتاندىرىلعان 22 ناۋقاستىڭ بارلىعى الدىنداعى اۋرۋ بەلگىسى جوق جۇعىمدالۋشىدان دياگنوزى تۇراقتاندىرىلعان ناۋقاسقا اينالعاندار
اقپار جاريالاۋ ماجىلىسىندە، قاشقار ايماقتىق اۋرۋدىڭ الدىن الۋ-تىزگىندەۋ ورتالىعىنىڭ ورىنباسار مەڭگەرۋشىسى ۋاڭ شيجياڭ بىلاي دەپ حابارلاندىردى: 10 ـ ايدىڭ 27 ـ كۇنى ساعات 0دەن 24كە دەيىن، قاشقار ايماعى كونەٴشار اۋدانىندا جاڭادان قوسىلعان جاڭا تيپتى ايدارشا ۆيرۋس وكپە قابىنۋ دياگنوزى تۇراقتاندىرىلعان ناۋقاس 22، بارلىعى اۋرۋ بەلگىسى جوق جۇعىمدالۋشىدان دياگنوزى تۇراقتاندىرىلعان ناۋقاسقا اينالعاندار. 10-ايدىڭ 27-كۇنى ساعات 24كە دەيىن، قاشقار ايماعىندا قازىر دياگنوزى تۇراقتاندىرىلعان ناۋقاس 22، اۋرۋ بەلگىسى جوق جۇعىمدالۋشى 161 ادام بولعان، بارلىعى كونەٴشار اۋدانىندا.
قازىر كونەٴشار اۋدانىنداعى ىندەتتىڭ تارالىپ ٴورشۋ مۇمكىندىگى نەگىزىنەن جويىلدى ۋاڭ شيجياڭ مىنانى حابارلاندىردى: 24 – كۇنى تۇڭعىش اۋرۋ بەلگىسى جوق جۇعىمدالۋشى مالىمدەلگەننەن كەيىن، ٴبىز تىزگىن ۇشىمەن بارلىق ادامنىڭ نۋكلەين قىشقىلىن اقىسىز تەكسەرۋدى باستادىق، ٴۇش كۇن كۇندىز-ٴتۇنى دەمەي ٴۇرتىس شايقاس جاساۋ ارقىلى 27 - كۇنى ساعات 17دە قاشقار ايماعىنداعى بارلىق ادامنىڭ نۋكلەين قىشقىلى تەكسەرىلىپ بولدى، كونەٴشار اۋدانىندا مالىمدەلگەن 183 ادام بولىمدى بولعاننان سىرت، باسقالارى تۇگەلدەي بولىمسىز بولدى. قازىر ىندەتتىڭ تارالىپ ٴورشۋ مۇمكىندىگى نەگىزىنەن جويىلدى.
جۇعۋ قاينارى جانە تارالۋ جولى تەز ارادا انىقتالادى ۋاڭ شيجياڭ مىنانى حابارلاندىردى: ٴبىز مەملەكەتتىڭ، اۆتونوميالى رايوننىڭ ەپيدەميولوگيالىق تەكسەرۋ ماماندارمەن تىعىز سايكەسىپ، جاڭا تەحنيكالاردان، جاڭا تاسىلدەردەن بەلسەنە پايدالانىپ، ەپيدەميولوگيالىق تەكسەرۋ جانە تەگىن انىقتاۋدى ۇزدىكسىز ورىستەتىپ، قازىرگى دياگنوزى تۇراقتاندىرىلعان ناۋقاستارعا، اۋرۋ بەلگىسى جوق جۇعىمدالۋشىلارعا ەپيدەميولوگيالىق تەكسەرۋ جۇرگىزۋ تەبىنىن ونان ارى ارتتىرامىز، كوپ ٴتۇرلى شارانى قاتار قولدانىپ، ساتىلار بويىنشا ٴبىر ـ بىرلەپ تەكسەرىپ، ۆيرۋستىڭ تەگىن انىقتاۋدى قۋارلاپ، جۇعۋ قاينارىن، تارالۋ جولىن تەز ارادا انىقتاپ شىعامىز.
مەملەكەتتىك دەنساۋلىق ساقتاۋ، سالاماتتىق كوميتەتى ەل ىشىندەگى ماڭداي الدى مامانداردى تىزگىن ۇشىمەن شينجياڭعا جىبەرىپ، ەمدەۋ، قۇتقارۋ قىزمەتىن ورىستەتتى
اقپار جاريالاۋ ماجىلىسىندە، اۆتونوميالى رايوندىق دەنساۋلىق ساقتاۋ، سالاماتتىق كوميتەتىنىڭ ورىنباسار مەڭگەرۋشىسى گۋ يىڭسۋ مىنانى حابارلاندىردى: ىندەت تۋىلعاننان كەيىن، مەملەكەتتىك دەنساۋلىق ساقتاۋ، سالاماتتىق كوميتەتى دۇڭنان داشۋەسىنە قاراستى جۇڭدا شيپاحاناسىنىڭ ورىنباسار باستىعى چيۋ حايبو، جۇڭشان داشۋەسىنە قاراستى 1 - شيپاحانانىڭ سالماقتى ناۋقاس مەديتسيناسى ٴبولىمىنىڭ مەڭگەرۋشىسى گۋان شياڭدۇڭ، بەيجيڭ شۋان - ۋ شيپاحاناسى سالماقتى ناۋقاس مەديتسيناسى ٴبولىمىنىڭ مەڭگەرۋشىسى جياڭ لي، سۋبەي حالىق شيپاحاناسى سالماقتى ناۋقاس مەديتسيناسى ٴبولىمىنىڭ مەڭگەرۋشىسى جىڭ رۇيچياڭداردى دەرەۋ اتتاندىردى، جۇعىمدالۋ، تەكسەرۋ، شيپاحانانىڭ جۇعىمدالۋىن باسقارۋ سياقتى جاقتارداعى ەل ىشىندەگى تاڭداۋلى، تاجىريبەسى مول مامانداردى شينجياڭعا كەلىپ، ەمدەۋ ـ قۇتقارۋ قىزمەتىن ورىستەتۋگە كومەكتەسۋگە جىبەردى. اۆتونوميالى رايون دا تىنىس جولى، سالماقتى اۋرۋ، جۇعىمدالۋ، شيپاحانانىڭ جۇعىمدالۋىن باسقارۋ، كۇتىمدەۋ، پسيحولوگيا، تەكسەرۋ، كەسكىنگە الۋ، جۇڭگوشا ەمشىلىك جانە جۇڭگوشا-باتىسشا ەمدەۋدى ۇشتاستىرۋ قاتارلى كاسىپتىڭ ۇزدىك ماماندارى مەن مەملەكەتتىك ماماندار گرۋپپاسىنان بىرىككەن ماماندار گرۋپپاسىن قۇرىپ، بەلگىلەنگەن شيپاحانادا ماماندار بىرلەسىپ دياگنوز قويۋ، ەمدەۋ مەحانيزمىن ورناتتى. ناۋقاستار شيپاحاناعا كىرگەننەن كەيىن ٴتۇرلى تەكسەرۋلەردى جەدەل ورىنداپ، دياگنوز قويۋدى كەمەلدەندىردى، ماماندار گرۋپپاسى ناۋقاستارعا بىرلەسىپ دياگنوز قويىپ، ٴبىر - بىرلەپ تالداۋ جاساپ، ٴبىر - بىرلەپ تۇجىرىمدادى. بالنيساداعى كەزدە، ماماندار گرۋپپاسى ٴار كۇنى بارلىق ناۋقاستاردىڭ اۋرۋ جاعدايىن تۇجىرىمداپ جانە بىرىگىپ دياگنوز قويىپ، ناۋقاستاردى ەمدەۋدەگى ماسەلەلەردى دەر كەزىندە شەشىپ، جەڭىل تيپتى، جاي تيپتى ناۋقاستاردىڭ سالماقتى تيپتى جانە قاتەرلى سالماقتى تيپتى ناۋقاسقا وزگەرۋىنىڭ بار كۇشپەن الدىن الدى.
كونەٴشار اۋدانى زەمىن اۋىلى 3- قىستاعىنداعى زاۆودقا تىزگىن ۇشىمەن تۇيىق باسقارۋ جۇرگىزدى
اقپار جاريالاۋ ماجىلىسىندە، قاشقار ايماقتىق اكىمشىلىك مەكەمەسىنىڭ ورىنباسار باس حاتشىسى اسەت ٴۇرايىم مىنانى حابارلاندىردى: بۇل رەتكى كونەٴشار اۋدانىنداعى ىندەتتىڭ كونەٴشار اۋدانى زەمىن اۋىلى 3 ـ قىستاعىنداعى ٴبىر زاۆودپەن قاتىستى بولۋ دارەجەسى ٴبىرشاما جوعارى، تومەندە كوپشىلىككە وسى زاۆودتىڭ نەگىزگى جاعدايىن تانىستىرامىز.
كونەٴشار اۋدانى زەمىن اۋىلى 3-قىستاعىنداعى بۇل زاۆودتىڭ يەلەگەن جەر اۋدانى 20 مۋ كەلەدى، شامامەن 1300 شارشى مەتر كەلەتىن ەكى ٴوندىرىس سەحى بار، قازىر بار جۇمىسشى 252 ادام، باستىسى كيىم - كەشەك تىگۋ جانە ساتۋمەن شۇعىلدانادى، سەيىل-سەرۋەن، سپورت كيىمىن تىگۋدى نەگىز ەتەدى، 2020 ـ جىلدىق ٴوندىرىس قۋاتى 200 مىڭ پاردان استام كيىم تىگۋگە جەتتى.
زەمىن اۋىلى 3- قىستاعىندا ادام كوپ، جەر از بولىپ، جاراتىلىستىق ورتاسى ناشار. قىستاق تۇرعىندارىنىڭ كاسىپتەنىپ كىرىسىن ارتتىرۋىنا كومەكتەسۋ ٴۇشىن، جەرگىلىكتى ۇكىمەت پەن قاتىستى تاراۋلار 3-قىستاق تۇرعىندارىنىڭ جەكەلىك سەلبەسىپ قارجى قوسۋىنا قولداۋ كورسەتىپ، وسى كيىم-كەشەك تىگۋ زاۆودىن قۇرعان ٴارى ٴىشىنارا تىگىنشىلىك جابدىقتارىن اقشالاي جاردەم بەرىپ دايىنداپ، نەگىزدىك قۇرىلعىلاردى وزگەرتىپ، سەرىكتەستىكتىڭ ماڭىنداعى قىستاق تۇرعىندارىن سول جەردىڭ وزىندە جۇمىستانۋعا شابىتتاندىردى. بۇل زاۆودتىڭ جۇمىسشىلارى نەگىزىنەن زەمىن اۋىلى جانە ونىمەن كورشىلەس ۇعۇساق قالاشىعى سياقتى ىرگەلەس اۋىل-قالاشىقتاردان كەلگەن. زاۆود قۇرىلعاننان كەيىن، جەرگىلىكتى ورىنداعى ديقاندار ٴۇي ماڭىندا جۇمىسقا ورنالاسىپ، كىرىستەرىن ارتتىرۋمەن بىرگە، وتباسىنا دا قارايلاسا الاتىن بولدى، جۇمىسشىلاردىڭ ايلىق كىرىسى 1500 - 3000 يۋان بولىپ، وتباسىلاردىڭ شارت- جاعدايى كورنەكتى جاقساردى. بۇرىن، سول جەردەگى كوپ ساندى ايەلدەر ۇزاق ۋاقىت ۇيدە ەگىنشىلىكپەن شۇعىلدانىپ، ٴۇي شارۋاسىن ىستەپ، تۇراقتى كىرىسى جوق بولاتىن. زاۆودقا كىرىپ قىزمەت ىستەگەننەن كەيىن، وزدەرىنىڭ قاجىرلى ەڭبەگى ارقىلى تۇراقتى كىرىس قاينارىنا يە بولدى. كەيبىر ەرلى - زايىپتىلار زاۆودتا جۇمىس ىستەپ، جىلدىق كىرىسى 60 مىڭ يۋاننان استى، تۇرمىستارى بارعان سايىن جاقساردى.
ىندەت جاعدايى تۋىلعاننان كەيىن، جەرگىلىكتى ورىنداعى اۋرۋدىڭ الدىن الۋ - تىزگىندەۋ تاراۋلارى ٴتۇرلى ساقتانۋ - تىزگىندەۋ شارالارىن قاتاڭ تياناقتاندىرىپ، تىزگىن ۇشىمەن قاتىستى ورىنداردى تۇيىق كۇيدە باسقاردى؛ بارلىق جۇمىسشىلارعا نۋكلەين قىشقىلىن تەكسەرۋدى ٴبىر تۇتاس جۇرگىزىپ، نۋكلەين قىشقىلىن تەكسەرۋ ناتيجەسى بولىمدى بولعان جۇمىسشىلاردى دەر كەزىندە بەلگىلەنگەن شيپاحاناعا اپارىپ مەديتسينالىق باقىلاۋعا الدى، تىعىز جاناسۋشىلار مەن 2- تىعىز جاناسۋشىلارعا مەديتسينالىق باقىلاۋ تۇيىندەرىندە مەديتسينالىق باقىلاۋ جۇرگىزدى؛ زاۆود رايونىنىڭ ورتاسىن تۇبەگەيلى زارارسىزداندىرىپ، ٴار كۇنى ورتادان ۇلگى الىپ، ورتا جاعدايىن دەر كەزىندە يگەرىپ، ۆيرۋستىڭ تارالۋىنان باتىل ساقتاندى.
اۋدارعان: قادىر ماقان
