شينجياڭ گازەتىنىڭ جالپىلىق اقپارات قۇرالدارى ءتىلشىسى لي چۇنشيا
10 - ايدىڭ 31 - كۇنى ساعات 11دە، قاشقار قالاسى حالىق باتىس جولىنداعى يجيا ەرەن بازارى ساۋدا جۇرگىزە باستادى. جەر اۋدانى 16 مىڭ شارشى مەتر كەلەتىن وسىناۋ ءىرى تيپتى ەرەن بازاردا ازىق - تۇلىك، كۇندەلىكتى حيميالىق بۇيىمدار، كيىم - كەشەك، تۇبەككە ەگىلگەن جاسىل وسىمدىكتەر سياقتى نە كەرەكتىڭ ءبارى بار، ساتۋشىلار ماسكى تاعىپ، قولعاپ كيىپ، زاتتاردى رەتتەۋ، تولەنگەن اقشالاردى الۋ جۇمىستارىن رەت - رەتىمەن جۇرگىزىپ جاتتى.
تاۋارلاردىڭ قورابىنداعى وندىرىلگەن كۇنىنىڭ، اشىق ازىق - تۇلىكتەردى ساقتاۋ شارت - جاعدايىنىڭ ولشەمگە ۇيلەسەتىن - ۇيلەسپەيتىندىگىن، سۋىق تىزبەكتى ازىق - تۇلىكتەردە نۋكلەين قىشقىلىن تەكسەرۋ مالىمەتىنىڭ بار - جوقتىعىن مۇقيات تەكسەرىپ شىقتى... ەرەن بازاردا قاشقار ايماقتىق بازار باقىلاۋ - باسقارۋ مەكەمەسى مونوپولياعا قارسى تۇرۋ جانە ورىنسىز باسەكەگە قارسى تۇرۋ ءبولىمىنىڭ باستىعى سۋ حاۋ بىرنەشە قىزمەتتەسىمەن بىرگە ەرەن بازارداعى ازىق - تۇلىك حاۋىپسىزدىگى جانە باعا جاعدايى جونىندە داعدىلى تەكسەرۋ جۇرگىزۋدە.
”ىندەت تۋىلعاننان بەرى، ءبىز ’التىنى ورنىقتىرۋ‘، ’التىنى قامتاماسىز ەتۋ‘ قىزمەت تالابىن قاتاڭ تياناقتاندىرىپ، زات باعاسىن مەڭگەرۋگە، بازاردى ورنىقتىرۋعا، قامداۋمەن قامتاماسىز ەتۋگە تاباندى بولدىق“، - دەدى قاشقار ايماقتىق بازار باقىلاۋ - باسقارۋ مەكەمەسى پارتيا باسشىلىق گرۋپپاسىنىڭ مۇشەسى، ورىنباسار مەكەمە باستىعى حوۋ دىشان.
كونەءشار اۋدانىندا ىندەت تۋىلعان سوڭ، قاشقار ايماعى ءتۇرلى ساقتانۋ - تىزگىندەۋ شارالارىن مىقتى، ناقتى يگەرىپ، بازار باقىلاۋ - باسقارۋدى كۇشەيتتى. ءبىر جاعىنان، كۇرىش، ۇن، ازىقتىق ماي، ەت، جۇمىرتقا، ءسۇت، كوكونىس سياقتى تۇرمىستىق قاجەتتى زاتتاردى ماڭىزدى ءتۇيىن ەتىپ، قىمباتقا ساتۋ ءۇشىن باسىپ قويۋ، استاسىپ باعانى ءوسىرىپ جىبەرۋ، زات باعاسىن قىمباتتاتىپ جىبەرۋ، بەلگىلەمە بويىنشا باعانى اشىق جازىپ قويماۋ سياقتى باعاداعى زاڭ بۇزۋشىلىق ءىس - ارەكەتتەرىن زاڭ بويىنشا قاتاڭ تەكسەرىپ ءبىر جاقتى ەتسە؛ ەندى ءبىر جاعىنان، سۋىق تىزبەكتى ازىق - تۇلىكتەردىڭ توپ - كەزەگى، اۆتوموبيلدەرى، جەتكىزۋشىلەرى، كاسىپورىننىڭ تىركەۋى سياقتى جاعدايلار جونىندە جان - جاقتى باقىلاۋ - باسقارۋ جۇرگىزىپ، ازىق - تۇلىك حاۋىپسىزدىگىنە شىنايى كەپىلدىك ەتىپ، بازاردى قامداۋدى تولىق قامتاماسىز ەتىپ، باعانىڭ تۇراقتىلىعىن ساقتاپ، ءادىل، ادىلەتتى بازار ءتارتىبىن قورعادى.
”بازار باقىلاۋ - باسقارۋ بويىنشا زاڭ اتقارۋشى قىزمەتكەرلەردىڭ تەكسەرۋگە كەلگەنىن ۇنەمى بايقاپ قالامىز، سوندىقتان تاۋارلاردىڭ ساپاسىنان الاڭداپ كەتپەيمىز“، - دەدى يجيا ەرەن بازارى جاس ەت تۇرلەرى سورەسىنىڭ الدىندا تۇرعىندار ءۇشىن تۇرمىستىق بۇيىمدار ساتىپ الۋعا كەلگەن ەرىكتى مۇرادىل تۇرسىن.
ماسكىنىڭ بىرەۋى 0.55 يۋان، سپيريتتىڭ ءبىر قۇتىسى 3.5 يۋان... ىزىنشە، سۋ حاۋ قاتارلى بازار باقىلاۋ - باسقارۋ بويىنشا زاڭ اتقارۋشى قىزمەتكەرلەر يجيا ەرەن بازارىنىڭ جانىنداعى شينجياڭ پۋجيتاڭ ءدارى - دارمەك بولشەك ساتۋ تىزبەكتى شەكتى سەرىكتەستىگىنىڭ 136 - تارماق دۇكەنىنە كىرىپ، مەديتسينالىق قورعانۋ بۇيىمدارىنىڭ باعاسىن تەكسەردى. ”ءبىزدىڭ قورعانۋ بۇيىمدارىمىزدىڭ، ءدارى - دارمەكتەرىمىزدىڭ باعاسى بۇرىنعىداي، قورىمىز دا جەتكىلىكتى“، - دەدى دۇكەن باستىعى ساۋ ليپيڭ، - وسى ءدارى - دارمەك دۇكەنى تۇرعىندار ءۇشىن ءدارى - دارمەك جەتكىزىپ بەرۋ قىزمەتىن ۇسىنعان، تۇرعىندار تاپسىرىس بەرگەن سوڭ، ءدارى - دارمەك دۇكەنى ءدارى - دارمەكتەردى تۇرعىندار تۇراتىن شاعىن اۋماقتىڭ قاقپاسىنا جەتكىزىپ، ونان ارى ەرىكتىلەر تۇرعىنداردىڭ ۇيلەرىنە اپارىپ بەرەدى ەكەن.
كونەءشار اۋدانىنداعى جياجيالى ەرەن بازارىندا كونەءشار اۋدانى توققۇزاق قالاشىعى اۋات الەۋمەتتىك اۋماعى دۇڭفاڭ حۋايۋان شاعىن اۋماعىنداعى ەرىكتى ۋاڭ شياۋگاڭ تۇرعىندار ءۇشىن زات ساتىپ الىپ جاتىر ەكەن، ”بۇگىن مەن 7 تۇرعىننىڭ ۇيىنە كوكونىس جانە كۇندەلىكتى بۇيىمداردى ساتىپ الىپ جەتكىزىپ بەرۋىم كەرەك، ەرەن بازاردا زات تۇرلەرى جەتكىلىكتى، تۇرعىندارعا قاجەتتى زاتتاردىڭ ءبارىن ساتىپ الۋعا بولادى“، - دەدى ۋاڭ شياۋگاڭ.
جياجيالى ەرەن بازارىنىڭ جاۋاپتىسى ۋاڭ پىڭچىڭنىڭ تىلشىگە ايتۋىنشا، ىندەت كەزىندە وسى ەرەن بازار قالىپتى ساۋدا جۇرگىزىپ، ينتەرنەت جەلىسىندە جانە ينتەرنەت جەلىسىنەن تىسقارى ساتۋدى ۇشتاستىرىپ، ءار كۇنى 300دەي تاپسىرىس ساتقان، ەرەن بازاردىڭ كۇندىك ساۋدا سوماسى 20 مىڭ يۋانعا تاياعان.
كونەءشار اۋدانى بازار باقىلاۋ - باسقارۋ مەكەمەسى پارتيا باسشىلىق گرۋپپاسىنىڭ شۋجيى لي فۋجيدىڭ تانىستىرۋىنشا، ىندەت تۋىلعان سوڭ، جەرگىلىكتى ورىنداعى قاتىستى تاراۋلار كوپ جاقپەن بايلانىس ورناتىپ، ءارقايسى ۇلكەن ساۋدا دۇكەندەرى ەرەن بازارلارى، كوكونىس دۇكەندەرى، ەت دۇكەندەرى ءۇشىن زات كىرگىزەتىن جاسىل ارنا اشىپ، زاتتىق ماتەريالدار ساتىپ الۋدىڭ ىركىلىسسىز بولۋىنا شىنايى كەپىلدىك ەتكەن. ”تۇستەن بۇرىن تاۋارمەن قامداۋشىلار تاپسىرىس بويىنشا تاۋارلاردى بەلگىلەنگەن ورىنعا جەتكىزەدى، تۇستەن كەيىن ءبىز ەرەن بازار جۇرگىزۋشىلەردى زات كىرگىزۋگە بارۋعا ۇيىمداستىرامىز، كىرۋ - شىعۋ ارناسى بولەك بولعاندىقتان، اۋرۋدىڭ الدىن الۋ بويىنشا حاۋىپسىزدىككە شىنايى كەپىلدىك ەتىلدى“، - دەدى لي فۋجي.
”قاتىستى تاراۋلاردىڭ سايكەستىرۋىندە، ءبىزدىڭ زات كىرگىزۋ ارنامىز ىركىلىسسىز، زات قاينارىمىز تۇراقتى بولىپ تۇر، كەشە مەن 2 توننا زات كىرگىزدىم“، - دەدى ۋاڭ پىڭچىڭ، وسى ەرەن بازار كۇرىش، ۇن، ازىقتىق مايدان 3.5 توننا زاپاس ساقتاپ وتىر، وندا تاعى ءبىر جاس كۇيدە ساقتاۋ قامباسى بار ەكەن، وندا 1.5 توننا ءتۇرى مول، ساپاسى جاقسى كوكونىس، جەمىس - جيدەك ساقتالعان.
قازىر كونەءشار اۋدانىنىڭ اۋدان قالاشىعىنداعى 7 ەرەن بازار، 4 ۇلكەن كوكونىس ساتۋ دۇكەنى، 4 ەت دۇكەنى جانە ءار اۋىل - قالاشىقتا 11 ەرەن بازار قالىپتى ساۋدا جۇرگىزىپ تۇر، زات جەتكىلىكتى، باعا تۇراقتى، تۇرعىنداردىڭ تۇرمىستىق قاجەتتەرىن نەگىزىنەن قاناعاتتاندىرا الادى.
