شينجياڭ گازەتىنىڭ حابارى (ءتىلشى ما ينيڭ حابارلايدى). ءتىلشىنىڭ اۆتونوميالى رايوندىق حالىق شيپاحاناسىنان ۇعىسۋىنشا، شينجياڭداعى تۇڭعىش ءتورتىنشى ۇرپاق Xi داۋىنچي وتا قۇلتەمىرى اۆتونوميالى رايوندىق حالىق شيپاحاناسىنا ەنگىزىلگەن ءبىر جىلدان بەرى، 150 وتانى ءساتتى جاسادى.
2018 - جىلعى تۇڭعىش كەزەكتى جۇڭگو حالىقارالىق يمپورت كورمەسىندە ءجۇزىم قابىعىن تىگە الاتىن عاجايىپ تەحنيكالىق ەمدەۋ اسپابى — داۋىنچي وتا قۇلتەمىرى تانىمالى بولدى. يۇننان، شينجياڭ سياقتى ولكە، رايون، قالالاردىڭ 3A دارەجەلى شيپاحانالارى داۋىنچي وتا قۇلتەمىرىن جالپى باعاسى 60 ميلليوننان استام دوللارعا ساتىپ الۋ كەلىسىمىن جاساسىپ، تۇڭعىش كەزەكتى يمپورت كورمەسىنىڭ كوزگە تۇسەر تابىسىنىڭ بىرىنە اينالدى.
ۇعىسۋعا قاراعاندا، داۋىنچي وتا جۇيەسى قازىرگى سىرتقى اۋرۋلار سالاسىنداعى وزىق جوعارى عىلىم - تەحنيكالىق ءونىم، وندا ءداستۇرلى ميكرو زاقىمدى سىرتقى اۋرۋلار وتا جابدىقتارىنىڭ بارلىق ارتىقشىلىقتارى بار بولىپ قالماستان، بۇدان دا كورنەكتىسى، داۆىنچي وتا جۇيەسىنەن پايدالانىپ سىرتقى اۋرۋلار وتاسىن جاساۋ بارىسىندا، قۇلتەمىر قولىنىڭ كومەگىندە، سىرتقى اۋرۋلار شيپاگەرى تەك مەڭگەرۋ تەكشەسىندە وتىرىپ، وتا جاساعان ورىننىڭ ءۇش ولشەمدى كەڭىستىك كەسكىنىنە قاراپ، قۇلتەمىردىڭ بىلەگىن الىستان مەڭگەرىپ وتا جاساۋىنا بولادى. قۇلتەمىردىڭ بىلەگىندە ادام قولىنان ارتىق ورنىقتى ءارى دالدىك قاسيەت بار، ول ءداستۇرلى وتاعا قاراعاندا، جارا اۋزىن كىشىرەيتىپ، اۋىرعاندى جەڭىلدەتىپ قانا قالماستان، ينفەكسيالانۋ مەن قوسانجار اۋرۋلاردىڭ تۋىلۋىن اناعۇرلىم ازايتادى.
2019 - جىلى 9 - ايدىڭ 4 - كۇنى، داۋىنچي وتا قۇلتەمىرى اۆتونوميالى رايوندىق حالىق شيپاحاناسىنا ەنگىزىلگەننەن كەيىن، تۇڭعىش باۋىردى كەسۋ وتاسىن ءساتتى ىستەپ، 73 جاستاعى باۋىر راگىنا شالدىققان ناۋقاستىڭ وسپە وسكەن سول جاق باۋىرىنىڭ جارىمىن كەسىپ الىپ تاستادى. بۇل جابدىقتىڭ ەنگىزىلۋى باتىس سولتۇستىك رايوننىڭ سىرتقى اۋرۋلار وتاسىنىڭ ”قۇلتەمىر كومەگىندە ميكرو زاقىمدى قۋىس ايناسى وتا داۋىرىنە“ قادام باسقاندىعىنىڭ ايعاعى.
قۇلتەمىر ەنگىزىلگەننەن بەرى، داۋىنچي وتا قۇلتەمىرى اۆتونوميالى رايوندىق حالىق شيپاحاناسىنىڭ ءارقايسى بولىمىندە كەڭىنەن قولدانىلدى، قازىرگە دەيىن، اۆتونوميالى رايوندىق حالىق شيپاحاناسى قۇلتەمىر ارقىلى اۋرۋى سالماقتى جالپى 150 ناۋقاسقا نەسەپ شىعارۋ، باۋىر - ءوت، اسقازان - ىشەك، ايەلدەر ءبولىمى قاتارلى جاقتارداعى 150 وتانى ءساتتى جاسادى. شينجياڭداعى ناۋقاستار الىسقا سابىلماي - اق دۇنيەدەگى ماڭداي الدى ەمدەۋ تەحنيكاسىنان يگىلىكتەنەتىن بولدى.
