شينجياڭ گازەتىنىڭ جالپىلىق اقپارات قۇرالدارى ءتىلشىسى ما ينيڭ 11 - ايدىڭ 11 - كۇنى ۇرىمجىدەن حابارلايدى. جۇڭگو مۇنايى شينجياڭ مۇناي الابى سەرىكتەستىگىنەن ۇعىسۋعا قاراعاندا، جۋىقتا شينجياڭ مۇناي الابى جوڭعار ويپاتىنىڭ شىعىس بولىگىندەگى فۋكاڭ ويپاڭىنا ورنالاستىرعان تاۋەكەلدىك بارلاۋ قۇدىعى كاڭتان 1 - قۇدىعىندا ەلەۋلى ناتيجەگە قول جەتىپ، 3 قاباتىنان تۇگەلدەي جوعارى ءونىمدى ونەركاسىپتىك مۇناي، تابيعي گاز اعىنى بايقالدى.
وسى 3 قابات مىنالار: ورقى گرۋپپاسى 2 - بولىگىنىڭ كۇندىك مۇناي ءونىم مولشەرى 133.4 تەكشەمەتر، كۇندىك تابيعي گاز ءونىم مولشەرى 6000 تەكشەمەتر؛ ورقى گرۋپپاسى 1 - بولىگىنىڭ كۇندىك مۇناي ءونىم مولشەرى 158 تەكشەمەتر، كۇندىك تابيعي گاز ءونىم مولشەرى 11 مىڭ 200 تەكشەمەتر؛ پەرم جۇيەسى لۋساۋگوۋدىڭ كۇندىك مۇناي ءونىم مولشەرى 24.1 تەكشەمەتر، كۇندىك تابيعي گاز ءونىم مولشەرى 14 مىڭ 400 تەكشەمەتر.
شينجياڭ مۇناي الابى سەرىكتەستىگى پارتكومىنىڭ شۋجيى، باس ديرەكتور حو جين بىلاي دەپ تانىستىردى: كاڭتان 1 - قۇدىعىنىڭ ءساتتى اشىلۋى جوڭعار ويپاتىنىڭ شىعىس بولىك وڭىرىندە مۇناي، تابيعي گاز بارلاۋدىڭ تاريحي تىڭ ناتيجەگە قول جەتكىزگەنىن، جوڭعار ويپاتىنىڭ شىعىس بولىگىندە مۇناي، تابيعي گاز بارلاۋدىڭ اسىلگى دوڭەس الاپتان ويدىم وڭىرگە ستراتەگيالىق اۋىسۋدى جۇزەگە اسىرعانىن كورسەتتى، ويپاتتاعى مۇناي كولەمىنىڭ شىعىس پەن باتىسقا قاراي بىردەي ارتۋى سىندى جاڭا ارنانىڭ قالىپتاسۋىنان ءۇمىت بار، بۇل شينجياڭنىڭ مۇناي ونەركاسىبىنىڭ جەدەل دامۋى جونىنەن كەلەلى ماڭىزعا يە.
وسىنىڭ الدىندا، جوڭعار ويپاتىنىڭ شىعىس بولىگىندە مۇناي، تابيعي گاز بارلاۋدا دوڭەستە بارلاۋدان جازباۋدى ارقاۋ ەتىپ كەلە جاتقان ەدى، 2015 - جىلدان باستاپ شينجياڭ مۇناي الابى ويپاتتىڭ شىعىسىنداعى ويدىمنىڭ مۇناي كولەمىنە بارلاۋ جۇرگىزۋدى بەلسەنە جوسپارلاپ، جەر سىلكىنىسىن الدىمەن ويلاستىرۋ پرينسيبى بويىنشا، ىلگەرىندى - كەيىندى كوپتەگەن جوعارى تىعىزدىقتاعى ءۇش ولشەمدى جەر سىلكىنىسىن ورنالاستىرىپ، فۋكاڭ ويپاڭىنىڭ بەتكەيىندەگى پەرم جۇيەسى جەر قاباتىنىڭ قۇرىلىمىن انىقتاۋعا ماتەريالدىق نەگىز قالادى. 2017 - جىلى شينجياڭ مۇناي الابى باستاماشى بولىپ، ءبىر تۇلعالانعان قامال الۋ ۇجىمىن قۇرىپ، تۇتاس تۇلعالىق زەرتتەۋ ارقىلى فۋكاڭ ويدىمى ”ءىرى مۇناي اۋماعىن“ قالىپتاستىرۋدىڭ مۇناي گەولوگيالىق شارت - جاعدايىن ازىرلەگەن دەپ قارادى، جوعارعى ورقى گرۋپپاسى 1 - بولىگى كولەمدى، جوعارى ءونىمدى بارلاۋدىڭ جاڭا سالاسىن بايقاپ، ىلە - شالا تۇتاس تۇلعادا 3 تاۋەكەلدىك بارلاۋ قۇدىعىن ورنالاستىرىپ، ەڭ الدىمەن كاڭتان 1، كاڭتان 2 قۇدىقتارىنا بارلاۋ جۇرگىزدى.
