مەديتسينالىق باقىلاۋدان بوساتىلعان اۋرۋ بەلگىسى جوق جۇعىمدالۋشىلار 200 ادامنان استى
شينجياڭ گازەتىنىڭ جالپىلىق اقپارات قۇرالدارى ءتىلشىسى چاۋ جين 11 - ايدىڭ 15 - كۇنى حابارلايدى. 11 - ايدىڭ 15 - كۇنى مەملەكەت پەن اۆتونوميالى رايوننىڭ مەديتسينالىق قۇتقارۋ - ەمدەۋ ماماندار گرۋپپاسىنىڭ بىرلەسىپ دياگنوز قويۋى، ساراپتاۋى ارقىلى قاشقار ايماعىندا دياگنوزى تۇراقتاندىرىلعان 8 ناۋقاس مەملەكەتتىك دەنساۋلىق ساقتاۋ، سالاماتتىق كوميتەتىنىڭ جاڭا تيپتى ايدارشا ۆيرۋس وكپە قابىنۋىنا شالدىعىپ دياگنوزى تۇراقتاندىرىلعان ناۋقاستاردىڭ شيپاحانادان شىعۋ ولشەمىنە ۇيلەسكەندىكتەن ساۋىعىپ شيپاحانادان شىقتى؛ اۋرۋ بەلگىسى جوق 57 جۇعىمدالۋشى مەديتسينالىق باقىلاۋدان بوساتىلدى، مۇندا قاشقار ايماعىندا 53 جۇعىمدالۋشى، قىزىلسۋ قىرعىز اۆتونوميالى وبلىسىندا 4 جۇعىمدالۋشى بار. قازىرگە دەيىن، وسى جولعى ىندەتتە دياگنوزى تۇراقتاندىرىلعان 61 ناۋقاس ساۋىعىپ شيپاحانادان شىقتى، اۋرۋ بەلگىسى جوق 222 جۇعىمدالۋشى مەديتسينالىق باقىلاۋدان بوساتىلدى.
اۆتونوميالى رايوننىڭ جاڭا تيپتى ايدارشا ۆيرۋس وكپە قابىنۋىنا مەديتسينالىق قۇتقارۋ - ەمدەۋ جۇرگىزۋ ماماندار گرۋپپاسىنىڭ باستىعى لۋ چىن بىلاي دەپ تانىستىردى: مەملەكەتتىڭ، اۆتونوميالى رايوننىڭ ماماندار گرۋپپاسىنىڭ، سونداي - اق بارلىق ەمدەۋ قىزمەتكەرلەرىنىڭ ۇزدىكسىز، كۇش سالا قۇتقارۋىمەن، ەمدەۋىمەن، 11 - ايدىڭ 15 - كۇنىنە دەيىن، وسى رەتكى ىندەتتە ساۋىعىپ شيپاحانادان شىققان دياگنوزى تۇراقتاندىرىلعان ناۋقاستار مەن مەديتسينالىق باقىلاۋدان بوساتىلعان اۋرۋ بەلگىسى جوق جۇعىمدالۋشىلار جالپى ساننىڭ جارىمىنان استى، بۇل ءبىزدىڭ ەمدەۋ جوبامىزدىڭ دالمە - ءدال ءارى كەمەلدى ەكەندىگىن، باقىلاۋ، كيلىگۋ شارامىزدىڭ بەلسەندى دە ءونىمدى ەكەندىگىن دالەلدەدى. شيپاحانادان شىققاندار سانىنىڭ كۇننەن - كۇنگە كوبەيۋى كوپشىلىكتىڭ وسى رەتكى ىندەتتى جويۋ شايقاسىندا جەڭىسكە جەتۋ سەنىمىن كۇشەيتتى. كەلەسى قادامدا، ءبىز ءالى دە بىرتەكتىلەندىرە ەمدەۋ جوباسى بويىنشا، جۇڭگوشا شيپاگەرلىكتەن، جۇڭگوشا ءدارى - دارمەكتەردەن پايدالانۋعا ۇزدىكسىز نازار اۋدارىپ، ناۋقاستاردىڭ پسيحيكالىق جاقتان ساۋىعۋىنا باسا ءمان بەرۋمەن قاتار، ارقاۋدى شيراتىپ، قايراتتى مىعىمداپ، قۇتقارۋ - ەمدەۋ قىزمەتىن ۇزدىكسىز ويداعىداي ىستەۋمەن بىرگە، شيپاحانادا جۇعىمدالۋدىڭ تۋىلۋىنان قاتاڭ ساقتانامىز.
