تيانشان تورى   ›   جاڭالىقتار   ›   شينجياڭ حابارلارى

ايعا تولماعان نارەستە كولىكتىڭ ىشىندە قامالىپ، كورلانىڭ حالىق ساقشىلارى 45 سەكۋندتا تەرەزەنى شاعىپ نارەستەنى قۇتقارىپ شىقتى

ما يزى تەرەزەنى شاعۋدا.

  تيانشان تورىنىڭ حابارى. (حابارىن جازىپ سۋرەتىن تۇسىرگەن ءتىلشى ليۋ يميڭ، ەرىكتى ءتىلشى گاۋ شانشان) ما يزى ساقشى سويىلىمەن كولىكتىڭ الدىڭعى جاق تەرەزەسىن كۇشپەن ءدال شاعىپ اشتى! تەرەزەدەن قولىن جۇگىرتىپ، قۇلىبىن اشىپ، ەسىكتى تارتىپ اشتى، جورگەكتە ءالى دە شىرت ۇيقىدا جاتقان ساۋ - سالەمەت بوبەكتى كورگەندە، توڭىرەكتەن شاپالاق ءۇنى كوتەرىلدى. بىرەۋلەر: ”ساقشى جولداس، قولىڭىزدان قان سورعالاپ جاتىر!“، - دەدى شوشىنا.

  ما يزى كورلا قالالىق قوعام حاۋىپسىزدىگى مەكەمەسى سايباق ساقشى بولىمشەسىنىڭ حالىق ساقشىسى، 11 - ايدىڭ 16 - كۇنى ساعات 14تە، بايىنعولين موڭعۇل اۆتونوميالى وبلىسى كورلا قالاسى بايىنعولين وبلىستىق حالىق شيپاحاناسىنىڭ ەسىك الدىندا ءبىر ايعا تولماعان نارەستە كولىكتىڭ ىشىنە قامالعان ەدى، بۇل ىستەن حابارلى بولىپ ناق مايدانعا كەلگەن ما يزى دەرەۋ قۇتقارۋعا كىرىسەدى.

  ءاسىلى، نارەستەنىڭ اكەسى بالاسىن شيپاحاناعا اپارىپ دەنساۋلىعىن تەكسەرتپەكشى ەدى، شيپاحاناعا جەتكەننەن كەيىن، اكەسى كولىكتەن ءتۇسىپ ەسىكتى جاۋىپ، ارتقى ورىندىقتا جاتقان بالاسىن كوتەرىپ الماقشى بولعاندا، اۆتوكولىك ەسىگى ويلاماعان جەردەن وزدىگىنەن قۇلىپتانىپ قالادى، ال، اۆتوكولىك كىلتى كولىكتىڭ ىشىندە قالعان ەدى.

  جەدەل تۇجىرىمداۋ ارقىلى، شۇعىل قۇتقارۋدىڭ 3 قيىن ءتۇيىنىن بايقادى. ءبىرىنشى، جاعداي تۋىلعاننان كەيىن، بالانىڭ اكەسى ءتۇرلى ءادىس - امالدارمەن كولىك ەسىگىن اشپاقشى بولادى، ەش ناتيجە بولماعان سوڭ ساقشىعا مالىمدەيدى، ال، وسى كەزدە بالانىڭ كولىك ىشىندە قامالعانىنا جارىم ساعاتتان اسقان بولاتىن؛ ەكىنشى، سول كۇنى اۋا تەمپەراتۋراسى ەداۋىر تومەن، وتالعان كولىكتى سوندىرگەننەن كەيىن اۆتوكولىك ءىشىنىڭ تەمپەراتۋراسى كۇرت تومەندەپ، ۋاقىت ۇزارا كەلە بالاعا جەتەتىن زاقىم ارتا تۇسەدى؛ ءۇشىنشى، بالا ارتقى ورىندىقتىڭ ەسىك جاعىنا جاتقىزىلعان بولىپ، ويلانباستان تەرەزەنى شاقسا، شاعىلعان اينەك سىنىقتارى بالانى تىكە زاقىمدايتىن ەدى.

  كولىكتىڭ تەرەزەسىنەن ارتقى ورىندىقتاعى نارەستەنىڭ شىرت ۇيقىدا جاتقانىن، جىلاپ، شىرىلداماعانىن كورۋگە بولادى. ”قىبىر ەتپەي جاتقانى، كوپشىلىكتىڭ كوڭىلىن ءتىپتى دە الاڭداتتى“. ما يزى ءوزىنىڭ ءبىر ساتكە دە كۇتە الماي، دەرەۋ بارىپ كولىكتىڭ الدىڭعى جاق تەرەزەسىن شاعىپ قۇلىبىن اشۋعا بەكىگەنىن ايتتى.

  اينەك سىنىقتارىنىڭ شاشىراۋىنان الاڭداعان ما يزى قىزمەتتەستەرىنە پلاستر العىزىپ، كولىكتىڭ الدىڭعى جاق تەرەزەسىنىڭ ءبىر ٴبولىم جەرلەرىنە جاپسىرىپ، سىرتقى كۇشتىڭ اسەرىندە شاعىلۋ اۋماعىنىڭ كەڭەيۋىنەن ساقتاندى.

  ءبىر رەت، ەكى رەت... 45 سەكۋندتان كەيىن، كولىكتىڭ تەرەزەسى شاعىلدى. تەرەزە ەرنەۋىندەگى اينەكتىڭ سىنىعىن تازالاۋعا ٴمان بەرمەستەن، ما يزى شاعىلعان جەردەن قولىن كىرگىزىپ قۇلىپتى اشىپ، اقىرىندا ەسىكتى اشادى.

  ”بالامدى قۇشاعىما باسقاندا، كوزىمنەن ەرىكسىز جاس سورعالادى“. 11 - ايدىڭ 19 - كۇنى، بالانىڭ اكەسى سول كەزدە كولىكتىڭ ارتقى ەسىگىنىڭ الدىنان ايرىلماي، ەسىك اشىلا سالا بالاسىن كوتەرىپ تەكسەرۋگە اپارعانىن، بالاسىنىڭ تىنىسىنىڭ قالىپتى ەكەنىن، دەنەسىنە اينەك سىنىقتارى دارىماعانىن ايتتى. ول قۋانا: ”جاقسى ەكەن، ەشتەڭە بولماپتى، راقىمەت، راقىمەت...“،-دەدى.

  وسى ىستەن كەيىن، ما يزى بالالارىن ەرتىپ كولىكپەن سىرتقا شىعاتىن اتا - انالارعا: ”بالانى اۆتوكولىككە جالعىز قالدىرماۋدى، شۇعىل جاعدايعا تاپ بولعاندا دەرەۋ ساقشىعا نەمەسە ءورت ءسوندىرۋ تاراۋلارىنا مالىمدەۋدى“ ەسكەرتتى.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.