تيانشان تورى   ›   جاڭالىقتار   ›   ماڭىزدى حابارلار

شي جينپيڭ ازيا - تىنىق مۇحيت ەكونوميكالىق سەلبەستىك ۇيىمى ونەركاسىپ - ساۋدا باسشىلار كەڭەسىندە ارقاۋ ءسوز سويلەدى

  11 - ايدىڭ 19 - كۇنى مەملەكەت ءتوراعاسى شي جينپيڭ بەيجيڭدە بەينە ەكران تاسىلىمەن ازيا - تىنىق مۇحيت ەكونوميكالىق سەلبەستىك ۇيىمى ونەركاسىپ - ساۋدا باسشىلار كەڭەسىنە قاتىناستى جانە «جاڭا دامۋ ارناسىن قالىپتاستىرىپ، ءوزارا پايدا جەتكىزۋدى، تەڭ يگىلىككە كەنەلۋدى جۇزەگە اسىرايىق» دەگەن تاقىرىپتا ارقاۋ ءسوز سويلەدى. سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن

  شينحۋا اگەنتتىگىنىڭ 11 - ايدىڭ 19 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 11 - ايدىڭ 19 - كۇنى بەيجيڭدە بەينە ەكران تاسىلىمەن ازيا - تىنىق مۇحيت ەكونوميكالىق سەلبەستىك ۇيىمى ونەركاسىپ - ساۋدا باسشىلار كەڭەسىنە قاتىناستى جانە «جاڭا دامۋ ارناسىن قالىپتاستىرىپ، ءوزارا پايدا جەتكىزۋدى، تەڭ يگىلىككە كەنەلۋدى جۇزەگە اسىرايىق» دەگەن تاقىرىپتا ارقاۋ ءسوز سويلەپ، بىلاي دەپ باسا دارىپتەدى: دۇنيە ءجۇزى − بولىنبەس تاعدىرلاس ورتاق تۇلعا، ىندەتكە قارسى اتتانۋدىڭ حالىقارالىق سەلبەستىگىن جالپى بەتتىك تەرەڭدەتىپ، دۇنيە ءجۇزى ەكونوميكاسىنىڭ قالپىنا كەلۋىن ىلگەرىلەتۋ كەرەك. جۇڭگو جاڭا دامۋ ارناسىن بەلسەنە قالىپتاستىرىپ، سىرتقا ەسىك اشۋعا تاباندى بولىپ، دۇنيە جۇزىندەگى ءار ەلمەن ءوزارا پايدا جەتكىزۋدى، تەڭ يگىلىككە كەنەلۋدى جۇزەگە اسىرىپ، ازيا - تىنىق مۇحيت ءوڭىرىنىڭ جانە دۇنيە ءجۇزىنىڭ اناعۇرلىم تاماشا بولاشاعىن بىرگە جاراتادى.

  شي جينپيڭ بىلاي دەپ اتاپ كورسەتتى: جاڭا تيپتى ايدارشا ۆيرۋس وكپە قابىنۋ ىندەتى ادامزاتتىڭ بەينەت پەن زەينەتتە بىرگە بولاتىن تاعدىرلاس ەكەندىگىن، ءار ەلدىڭ مۇددەسى تىعىز بايلانىستى ەكەندىگىن، دۇنيە ءجۇزىنىڭ بولىنبەس تاعدىرلاس ورتاق تۇلعا ەكەندىگىن تاعى ءبىر مارتە دالەلدەدى. ءار ەل ءوزارا قارايلاسىپ، قيىندىقتى بىلەك بىرىكتىرە جەڭىپ، سەرىكتەستىك رۋحتى اسقاقتاتىپ، ساياساتتىق بايلانىستى جانە سايكەسۋدى جيىلەتىپ، ىندەتكە قارسى اتتانۋدىڭ حالىقارالىق سەلبەستىگىن جالپى بەتتىك تەرەڭدەتىپ، اشىق تيپتەگى دۇنيە ءجۇزى ەكونوميكاسىن قۇرۋعا تاباندى بولىپ، ىندەتتى ەرتەرەك جەڭىپ شىعۋعا ۇمتىلىپ، دۇنيە ءجۇزى ەكونوميكاسىنىڭ تەبىندى، باياندى، تەڭگەرىمدى، سيىسىمدى ارتۋىن جۇزەگە اسىرۋعا قۇلشىنۋ كەرەك.

  شي جينپيڭ بىلاي دەپ باسا دارىپتەدى: جۇڭگونىڭ ەكونوميكالىق دامۋىنىڭ ورنىقتىلىق بارىسىندا جاقسارۋ، ۇزاق ۋاقىت جاقسارۋ سىندى نەگىزگى اۋقىمى وزگەرگەن جوق. ءبىز جاڭا دامۋ كەزەڭىن عىلمي يگەرىپ، جاڭا دامۋ ۇستانىمىن تاباندىلىقپەن دايەكتىلەندىرىپ، جاڭا دامۋ ارناسىن بەلسەنە قالىپتاستىرامىز.

  ءبىرىنشى، ءبىز ىشكى سۇرانىستى كەڭەيتۋ سىندى ستراتەگيالىق نەگىزگى ءتۇيىندى مىقتى ۇستاپ، حالىق شارۋاشىلىعىنىڭ اينالىمىن ىركىلىسسىزدەندىرەمىز. قامداۋ جاعىنداعى قۇرىلىمدىق رەفورمانى ۇزدىكسىز تەرەڭدەتىپ، قاجەتسىنۋ قامداۋدى جەتەكتەيتىن، قامداۋ قاجەتسىنۋدى جارىققا شىعاراتىن اناعۇرلىم جوعارى دەڭگەيدەگى يكەمدى تەڭگەرىمدىلىك قالىپتاستىرامىز.

  ەكىنشى، ءبىز عىلىم - تەحنيكالىق جاڭالىق اشۋدى زور كۇشپەن ىلگەرىلەتىپ، ەكونوميكالىق دامۋدىڭ جاڭا قوزعاۋشى قۋاتىن قالىپتاستىرامىز. جاڭالىق اشۋ ارقىلى دامۋعا دەم بەرۋ ستراتەگياسىن ىلگەرىلەتىپ، كاسىپ سالاسى تىزبەگىنىڭ دەڭگەيىن ۇزدىكسىز جوعارىلاتامىز.

  ءۇشىنشى، ءبىز رەفورمانى ۇزدىكسىز تەرەڭدەتىپ، بازاردىڭ ومىرشەڭدىگىن تولىق قاۋلاتامىز. اناعۇرلىم زور باتىلدىقپەن، اناعۇرلىم كوپ شارالارمەن تەرەڭ قاتپارداعى تۇزىلىستىك - مەحانيزمدىك كەدەرگىلەردى جويىپ، مەملەكەتتى جونگە سالۋ جۇيەسى مەن جونگە سالۋ قابىلەتىن وسىزامانداندىرۋدى ىلگەرىلەتەمىز.

  شي جينپيڭ بىلاي دەپ باسا دارىپتەدى: جۇڭگو دۇنيە ءجۇزى ەكونوميكاسىمەن جانە حالىقارالىق جۇيەمەن الدەقاشان تەرەڭ توعىسىپ كەتتى. ءبىز قالىپتاستىراتىن جاڭا دامۋ ارناسى ەشقاشان دا ەل ءىشىنىڭ تۇيىقتالعان دارا اينالىمى ەمەس، قايتا اشىق، ءبىرىن - ءبىرى جەبەيتىن ەل ءىشى، حالىقارا قوس اينالىم بولىپ تابىلادى.

  − جاڭا دامۋ ارناسىندا جۇڭگو بازارىنىڭ كومەسكى كۇشى تولىق قاۋلاپ، دۇنيە جۇزىندەگى ءار ەل ءۇشىن اناعۇرلىم كوپ قاجەتسىنۋدى جارىققا شىعارادى. ءبىز كەدەن باجىسىن جانە تۇزىمدىك نارىقتى ونان ارى تومەندەتىپ، يمپورت ساۋداسىن جەبەيتىن جاڭالىق اشۋدان ۇلگى كورسەتۋ اۋماقتارىنان ءبىر توبىن جەتىلدىرىپ، ءار ەلدىڭ جوعارى ساپالى ونىمدەرى مەن قىزمەت وتەۋىن يمپورت ەتۋدى كەڭەيتەمىز.

  − جاڭا دامۋ ارناسىندا جۇڭگونىڭ ەسىگى ونان ارى ايقارا اشىلىپ، دۇنيە جۇزىندەگى ءار ەلمەن دامۋ ورايىنان بىرگە يگىلىكتەنەدى. جۇڭگو ساۋدانىڭ جانە قارجى قوسۋدىڭ ەركىن، قولايلى بولۋىن ۇزدىكسىز ىلگەرىلەتىپ، شەتەل ساۋداگەرلەرىنىڭ قارجى قوسۋىنا رۇقسات بەرۋدەن بۇرىن ازاماتتىق مامىلە بەرۋگە ۇنامسىز تىزىمدىكتى قوسىپ باسقارۋ ءتۇزىمىن كەمەلدەندىرىپ، شەتەل قارجىلاندىرعان كاسىپورىنداردىڭ زاڭدى ۇقىق - مۇددەسىن زاڭ بويىنشا قورعاپ، قىزمەت وتەۋ كاسىبىنىڭ سىرتقا ەسىك اشۋىن ءتارتىپتى تۇردە كەڭەيتىپ، بازارلانعان، زاڭمەن جونگە سالىناتىن، حالىقارالانعان شارۋاشىلىق - ساۋدا ورتاسىن ۇزدىكسىز قالىپتاستىرادى. ەركىن ساۋدا سىناق رايونىنا رەفورمادا اناعۇرلىم ۇلكەن ءوزى باسقارۋ ۇقىعىن بەرەدى. كوپ جاقتى ساۋدا تۇزىلىسىنە ۇزدىكسىز، تاباندى تۇردە قولداۋ كورسەتىپ، الەمدىك ەكونوميكانى جونگە سالۋ جۇيەسى رەفورماسىنا اناعۇرلىم بەلسەندى تۇردە ات سالىسادى.

  − جاڭا دامۋ ارناسىندا جۇڭگونىڭ سىرتپەن سەلبەستىگى ۇزدىكسىز تەرەڭدەپ، دۇنيە جۇزىندەگى ءار ەلمەن ءوزارا پايدا جەتكىزۋدى، تەڭ يگىلىككە كەنەلۋدى جۇزەگە اسىرادى. ءبىز حالىقارالىق جۇمىس بولىسىنە اناعۇرلىم بەلسەندى تۇردە ات سالىسىپ، الەمدىك كاسىپ سالاسى تىزبەگىنە، قامداۋ تىزبەگىنە، قۇن تىزبەگىنە اناعۇرلىم ءونىمدى تۇردە توعىسامىز. ءبىز جۇڭگومەن سەلبەسۋدى قالايتىن مەملەكەتتەردىڭ، وڭىرلەردىڭ، كاسىپورىنداردىڭ بارلىعىمەن بەلسەندى تۇردە سەلبەستىك ورىستەتەمىز. ءبىز كوپ جاقتىلىققا جانە بىرگە اقىلداسۋ، بىرگە قۇرۋ، بىرگە يگىلىكتەنۋ پرينسيبىنە ۇزدىكسىز تاباندى بولىپ، ”ءبىر بەلدەۋ، ءبىر جولدى“ جوعارى ساپادا بىرگە قۇرۋدى ىلگەرىلەتىپ، جاسىل دامۋ سەلبەستىگىن كۇشەيتەمىز.

  شي جينپيڭ بىلاي دەپ اتاپ كورسەتتى: ازيا - تىنىق مۇحيت ءوڭىرى − ءبىزدىڭ ورتاق مەكەنىمىز. بىلتىر مەن اشىق، سيىسىمدى، جاڭالىق اشا ارتاتىن، ءوزارا ۇلاساتىن - تۇتاساتىن، سەلبەسىپ تەڭ يگىلىككە كەنەلەتىن ازيا - تىنىق مۇحيت تاعدىرلاس ورتاق تۇلعاسىن قۇرۋدى ورتاعا قويدىم. ءبىز تاعدىرلاس ورتاق تۇلعا تانىمىن تەرەڭدەتىپ، وڭىرلىك ەكونوميكانىڭ ءبىر تۇلعالانۋىن ۇزدىكسىز ىلگەرىلەتىپ، ءۇمىت - تىلەكتەردى ءبىر - بىرلەپ رەالدىققا اينالدىرىپ، ازيا - تىنىق مۇحيت ءوڭىرى حالقىن باقىتقا كەنەلتۋىمىز كەرەك.

  شي جينپيڭ سوڭىندا بىلاي دەپ باسا دارىپتەدى: ىندەت تۇبىندە كەتەدى، جەڭىس، ءسوز جوق، كەلەدى. قول ۇستاسىپ، بوران - شاشىندى بىرگە وتكەرىپ، ءوزارا قارايلاسىپ، اشىق سەلبەستىككە تاباندى بولىپ، ىشكى - سىرتقى اينالىمدى ىركىلىسسىزدەندىرىپ، ازيا - تىنىق مۇحيت ءوڭىرىنىڭ جانە دۇنيە ءجۇزىنىڭ اناعۇرلىم كوركەم بولاشاعىن بىرگە اشايىق جانە ودان بىرگە يگىلىكتەنەيىك!

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.