ۋاڭ حۋنيڭ كەزدەسۋگە قاتىناستى ءارى ماداقتاۋ - سيلاۋ جينالىسىندا ءسوز سويلەدى
11 - ايدىڭ 20 - كۇنى پارتيا مەن مەملەكەت باسشىلارىنان شي جينپيڭ، ۋاڭ حۋنيڭ قاتارلىلار بەيجيڭدە رۋحاني وركەنيەت قۇرىلىسى جونىندەگى مەملەكەتتىك ماداقتاۋ - سيلاۋ جينالىسىنا قاتىناسقان ۋاكىلدەرمەن كەزدەستى. سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن
شينحۋا اگەنتتىگىنىڭ 11 - ايدىڭ 20 - كۇنى بەيجيڭنەن بەرگەن حابارى. رۋحاني وركەنيەت قۇرىلىسى جونىندەگى مەملەكەتتىك ماداقتاۋ - سيلاۋ جينالىسى 11 - ايدىڭ 20 - كۇنى بەيجيڭدە وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ جينالىسقا قاتىناسقان جاڭا كەزەكتى مەملەكەتتىك وركەنيەتتى قالالاردىڭ، وركەنيەتتى قىستاق - قالاشىقتاردىڭ، وركەنيەتتى ورىنداردىڭ، وركەنيەتتى وتباسىلارىنىڭ، وركەنيەتتى مەكتەپتەردىڭ، سونداي - اق ازامات جاسىنا تولماعانداردىڭ يدەيا - ءمورال قۇرىلىسى قىزمەتىندەگى وزاتتاردىڭ ۋاكىلدەرىمەن ىقىلاستى تۇردە كەزدەسىپ، ولاردان شىنايى حال سۇرادى جانە قىزۋ قۇتتىقتادى.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق رۋحاني وركەنيەت قۇرىلىسىنا جەتەكشىلىك ەتۋ كوميتەتىنىڭ مەڭگەرۋشىسى ۋاڭ حۋنيڭ كەزدەسۋگە قاتىناستى ءارى ماداقتاۋ - سيلاۋ جينالىسىندا ءسوز سويلەدى.
تۇستەن بۇرىن ساعات 10دا شي جينپيڭ قاتارلىلار جيڭشي قوناق ءۇيى ءماجىلىس عيماراتىنىڭ الدىڭعى زالىنا كەلگەندە تۇتاس الاڭدا قىزۋ شاپالاق ءۇنى كوتەرىلدى. شي جينپيڭ قاتارلىلار ۋاكىلدەردىڭ اراسىنا كەلىپ، كوپشىلىكپەن ىقىلاسپەن اڭگىمەلەستى ءارى بىرگە ەستەلىك سۋرەتكە ءتۇستى.
ۋاڭ حۋنيڭ ماداقتاۋ - سيلاۋ جينالىسىندا ءسوز سويلەدى. ول مىنالاردى ءبىلدىردى: باس شۋجي شي جينپيڭنىڭ ماجىلىسكە قاتىناسقان ۋاكىلدەرمەن ىقىلاستى تۇردە كەزدەسۋى پارتيا ورتالىق كوميتەتىنىڭ سوتسياليستىك رۋحاني وركەنيەت قۇرىلىسىنا ايرىقشا ءمان بەرەتىندىگىن، رۋحاني وركەنيەت قۇرىلىسى شەبىندەگى جولداستارعا دەگەن شىنايى قامقورلىعىن، جاڭا داۋىردەگى رۋحاني وركەنيەت قۇرىلىسى قىزمەتىنە دەگەن ىقىلاستى تىلەگىن تولىق ايگىلەدى. شي جينپيڭنىڭ جاڭا ءداۋىر جۇڭگوشا سوتسياليزم يدەياسىن جەتە ۇيرەنىپ، جەتە يگەرىپ، شىنايى تياناقتاندىرۋدى ماڭداي الدى ساياسي مىندەت ەتىپ، ۇزدىكسىز تۇردە ”ءتورت تانىمدى“ كۇشەيتىپ، ”ءتورت سەنىمدى“ بەكەمدەپ، ”ەكىنى قورعاۋدى“ ورىنداۋ كەرەك. پارتيا 19 - كەزەكتى ورتالىق كوميتەتى بەسىنشى جالپى ءماجىلىسىنىڭ رۋحى جونىندەگى ۇگىت - تاربيەنى تەرەڭدەي ورىستەتىپ، كادرلاردى، بۇقارانى سەنىمدى بەكەمدەپ، رۋحتى سەرپىلتىپ، ءبىر نيەتتە ىنتىماقتاسىپ، جاڭا ساپاردا ەكپىندەي ىلگەرىلەۋگە ىنتالاندىرۋ كەرەك. سوتسياليستىك وزەكتى قۇن كوزقاراسى ارقىلى ءداۋىردىڭ جاڭا ادامدارىن باۋلۋعا جەتەكتەپ، مۇرات - سەنىم تاربيەسىن ۇدايىلاندىرۋدى، تۇزىمدەندىرۋدى ىلگەرىلەتىپ، پارتيا تاريحى، جاڭا جۇڭگو تاريحى، رەفورما جاساۋ، ەسىك اشۋ تاريحى، سوتسياليزمنىڭ دامۋ تاريحى تاربيەسىن ورىستەتىپ، جاستار مەن ورەندەردى سوتسياليستىك وسىزاماندانعان مەملەكەت قۇرۋ ۇلى مۇراتىن ورناتۋعا جەتەكتەۋ قاجەت. حالىقتى وزەك ەتكەن دامۋ يدەياسىن رۋحاني وركەنيەتتى ورىن قۇرۋدىڭ تۇتاس بارىسىنا ءسىڭىرىپ، بۇقارانىڭ ات سالىسۋىن جانە رازىلىعىن جوعارىلاتىپ، وركەنيەتتى ورىن قۇرۋ قىزمەتىنىڭ ونىمدىلىگىن كۇشەيتىپ، فورماشىلدىققا، تورەشىلدىككە قارسى تۇرۋ ءتيىس. پارتيانىڭ جالپى بەتتىك باسشىلىعىن كۇشەيتىپ، تەگىس يگەرىپ، ءبىر تۇتاس باسقاراتىن، سايكەسە ىلگەرىلەتەتىن قىزمەت بىرىككەن كۇشىن قالىپتاستىرۋ كەرەك.
ديڭ شۋەشياڭ كەزدەسۋگە قاتىناستى، سۇن چۇنلان كەزدەسۋگە قاتىناستى ءارى ماجىلىستە ماداقتاۋ - سيلاۋ قارارىن وقىدى، حۋاڭ كۇنميڭ كەزدەسۋگە قاتىناستى ءارى جينالىستى باسقاردى.
جينالىستا ماداقتالىپ - سيلانعان ۋاكىلدەرگە سيلىق تاراتىلدى. 6 - كەزەكتى مەملەكەتتىك وركەنيەتتى قالالاردىڭ، وركەنيەتتى قىستاق - قالاشىقتاردىڭ، وركەنيەتتى ورىنداردىڭ ۋاكىلدەرى، 2 - كەزەكتى مەملەكەتتىك وركەنيەتتى وتباسىلارىنىڭ، وركەنيەتتى مەكتەپتەردىڭ ۋاكىلدەرى، جاڭا كەزەكتى مەملەكەتتىك ازامات جاسىنا تولماعانداردىڭ يدەيا - ءمورال قۇرىلىسى قىزمەتىندەگى مەملەكەتتىك وزاتتاردىڭ ۋاكىلدەرى جينالىستا جەكە - جەكە ءسوز سويلەدى.
