تيانشان تورى
تيانشان تورى   ›   جاڭالىقتار   ›   ماڭىزدى حابارلار

شي جينپيڭ 20 ەل توبى باسشىلارىنىڭ 15 - رەتكى باس قوسۋىنىڭ 1 - كەزەڭدەگى ماجىلىسىنە قاتىناستى ءارى ماڭىزدى ءسوز سويلەدى

  20 ەل توبىنىڭ ىندەتتەن كەيىنگى داۋىردە حالىقارالىق ءتارتىپ جانە الەمدىك جونگە سالۋ جاقتارىندا اناعۇرلىم زور جەتەكتەۋ رولىن ساۋلەلەندىرۋى كەرەكتىگىن، جۇڭگونىڭ باستان - اياق دۇنيە ءجۇزى بەيبىتشىلىگىنىڭ قۇرۋشىسى، الەمدىك دامۋدىڭ ۇلەس قوسۋشىسى، حالىقارالىق ءتارتىپتىڭ قورعاۋشىسى بولۋعا تاباندى بولاتىندىعىن باسا دارىپتەدى

     11 - ايدىڭ 21 - كۇنى كەشتە مەملەكەت ءتوراعاسى شي جينپيڭ بەيجيڭدە بەينە ەكران تاسىلىندە 20 ەل توبى باسشىلارىنىڭ 15 - رەتكى باس قوسۋىنىڭ 1 - كەزەڭدەگى ماجىلىسىنە قاتىناستى ءارى ماڭىزدى ءسوز سويلەدى. سۋرەتتى شينحۋا اگەنتتىگىنىڭ ءتىلشىسى راۋ ايمين تۇسىرگەن

   11 - ايدىڭ 21 - كۇنى كەشتە مەملەكەت ءتوراعاسى شي جينپيڭ بەيجيڭدە بەينە ەكران تاسىلىندە 20 ەل توبى باسشىلارىنىڭ 15 - رەتكى باس قوسۋىنىڭ 1 - كەزەڭدەگى ماجىلىسىنە قاتىناستى ءارى ماڭىزدى ءسوز سويلەدى. سۋرەتتى شينحۋا اگەنتتىگىنىڭ ءتىلشىسى ۋاڭ يە تۇسىرگەن

  شينحۋا اگەنتتىگىنىڭ 11 - ايدىڭ 21 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 11 - ايدىڭ 21 - كۇنى كەشتە بەيجيڭدە بەينە ەكران تاسىلىندە 20 ەل توبى باسشىلارىنىڭ 15 - رەتكى باس قوسۋىنىڭ 1 - كەزەڭدەگى ماجىلىسىنە قاتىناستى ءارى «ىندەتپەن سەلبەسە شايقاسىپ، بولاشاقتى بىرگە اشايىق» تاقىرىبىندا ماڭىزدى ءسوز سويلەپ، بىلاي دەپ باسا دارىپتەدى: 20 ەل توبى بىرگە اقىلداسۋ، بىرگە قۇرۋ، بىرگە يگىلىكتەنۋ پرينسيبىنە بويسۇنىپ، كوپ جاقتىلىققا، اشىق سيىسىمدى بولۋعا، ءوزارا پايدا جەتكىزىپ سەلبەسۋگە، داۋىرمەن بىرگە ىلگەرىلەۋگە تاباندى بولىپ، ىندەتتەن كەيىنگى داۋىردە حالىقارالىق ءتارتىپ جانە الەمدىك جونگە سالۋ جاقتارىندا اناعۇرلىم زور جەتەكشىلىك رولىن ساۋلەلەندىرۋ كەرەك. جۇڭگو ءارقايسى ەلدەرمەن قاتار ءوزارا قۇرمەت ەتىپ، تەڭ تۇرعىدا ءوزارا پايدا جەتكىزىپ، بەيبىت قاتار تۇرىپ، بىرگە دامىپ، ادامزاتتىڭ تاعدىرلاس ورتاق تۇلعاسىن قۇرۋدى بىرگە ىلگەرىلەتۋدى قالايدى.

  شي جينپيڭ بىلاي دەپ اتاپ كورسەتتى: ادامزات باستان كەشىرىپ جاتقان 100 جىلدان بەرگى ەڭ اۋىر جۇقپالى اۋرۋدىڭ جاپپاي تارالۋىنا قاراتا، 20 ەل توبى جىلدام قيمىلداپ، الەمدىك ىندەتكە قارسى اتتانۋ سەلبەستىگى مەن ەكونوميكانى قالپىنا كەلتىرۋدىڭ بەتالىسىنا جەتەكشىلىك ەتتى. كەزەكتە ىندەت ءالى دە تارالۋدا، حالىقارالىق ارنا جىلدام قۇبىلىپ، سىڭار جاقتىلىق، قورعامپازدىق اسقىنىپ، الەمدىك كاسىپ سالاسى تىزبەگى، قامداۋ تىزبەگى سوققىعا ۇشىرادى. مەن 20 ەل توبىنىڭ تومەندەگى بىرنەشە جاقتا ونان ارى كۇش سالۋىن ۇسىنىس ەتەمىن:

  ءبىرىنشى، الەمدىك ىندەتكە قارسى اتتانۋدىڭ ءورت بوگەتىن قۇرۋ. الدىمەن وزدەرىنىڭ ىندەتتەن ساقتانۋ - تىزگىندەۋىن ويداعىداي ىستەپ، اۋىس - كۇيىستى، سەلبەستىكتى كۇشەيتۋى، سونداي - اق باسقا ەلدەرگە كومەك قولدارىن سوزۋى كەرەك. دۇنيە جۇزىلىك دەنساۋلىق ساقتاۋ ۇيىمىنىڭ بايلىقتى سايكەستىرۋىن، بىرىكتىرۋىن قولداپ، ۆاكسينانى ءادىل دە ءونىمدى تۇردە ۇلەستىرۋ كەرەك. جۇڭگو ءارقايسى ەلمەن سەلبەستىكتى كۇشەيتىپ، ۆاكسينانى ءار ەل حالقى ىستەتەتىن، ىستەتۋگە شاماسى كەلەتىن الەۋمەتتىك ونىمگە اينالدىرۋعا قۇلشىنۋدى قالايدى.

  ەكىنشى، دۇنيە ءجۇزى ەكونوميكاسى اينالىمىنىڭ جۇلگەسىن ىركىلىسسزدەندىرۋ. ىندەتتەن ساقتانۋ - تىزگىندەۋدى ويداعىداي ىستەۋ العى شارتىندا، الەمدىك كاسىپ سالاسى تىزبەگىنىڭ، قامداۋ تىزبەگىنىڭ حاۋىپسىز، بوگەتسىز جۇمىس جۇرگىزۋىن قالپىنا كەلتىرىپ، ماڭىزدى ەمدەۋ زاتتىق ماتەريالدارى ساۋداسىن ەركىندەستىرۋدى، ادامداردىڭ تارتىپپەن بارىس - كەلىس جاساۋىن قولايلىلاستىرۋدى كەڭەسۋ كەرەك. اناعۇرلىم كوپ ەلدىڭ جۇڭگو جاق ورتاعا قويىپ قۇرعان سالاماتتىق كودتى حالىقارالىق ءوزارا مويىنداۋ مەحانيزمىنە ات سالىسۋىن ءۇمىت ەتەمىن. 20 ەل توبىنىڭ ادامدار بارىس - كەلىسىن جانە زات اينالىمىن قولايلىلاستىرۋ جونىندە ۇزدىكسىز مەحانيزمدەنگەن سەلبەستىك ورىستەتۋىن قولداپ، الەمدىك سەلبەستىك تورىن قۇرۋ كەرەك.

  ءۇشىنشى، سيفرلى ەكونوميكانىڭ ىلگەرىلەتۋ رولىن ساۋلەلەندىرۋ. عىلىم - تەحنيكادا جاڭالىق اشۋ جانە سيفرلانعان وزگەرىس ارقىلى جاڭا دامۋ قوزعاۋشى قۋاتىن جارىققا شىعارۋ كەرەك. ساندى مالىمەت حاۋىپسىزدىك سەلبەستىگى مەن سيفرلى نەگىزدىك قۇرىلعىلار قۇرىلىسىن كۇشەيتىپ، ءار ەلدىڭ عىلىم - تەحنيكا كاسىپورىندارى ءۇشىن ءادىل باسەكە ورتاسىن ازىرلەۋ كەرەك. سيفرلى ەكونوميكانىڭ جۇمىستانۋعا، سالىق كىرىسىنە جانە قوعامداعى ءالسىز توپتارعا اكەلگەن سىن - سايىستارىن شەشىپ، سيفر بوگەتىن جويۋ كەرەك.

  ءتورتىنشى، اناعۇرلىم سيىسىمدى دامۋدى جۇزەگە اسىرۋ. جۇڭگو جاق قينشىلىقتى جەڭىپ، 20 ەل توبىنىڭ قارىزدى كەشەۋىلدەتۋ باستاماسىن جاپپاي تياناقتاندىرىپ، قارىزدى كەشەۋىلدەتۋ باستاماسىنىڭ مەرزىمدى شەگىن ۇزارتۋ ۇيعارىمىن قولدايدى، سونداي - اق شىنىمەن دە قيىنشىلىعى بار ەلدەرگە قارىزدى كەشەۋىلدەتۋ، قارىزدى ازايتۋ سەرپىنىن كۇشەيتەدى. ايەلدەردىڭ ىندەتتىڭ ىقپالىنان قۇتىلۋىنا كومەكتەسەدى، جۇڭگو جاق 2025 - جىلى تاعى ءبىر رەت الەمدىك ايەلدەر باس قوسۋىن اشۋ جونىندە باستاما كوتەردى، ىندەتتەن كەيىنگى داۋىردە ايەلدەر ىستەرىن دامىتۋ ءۇشىن كۇش قوسپاق. جۇڭگو جاق بىرلەسكەن مەملەكەتتەر ۇيىمىنىڭ كەلەر جىلى دۇنيە جۇزىلىك استىق باسشىلار باس قوسۋىن وتكىزۋدى قولدايدى، لايىقتى ۋاقىتتا حالىقارالىق استىق شىعىنىن ازايتۋ تۋرالى جينالىس اشىپ تۇرۋدى ۇسىنىس ەتەدى.

  شي جينپيڭ بىلاي دەپ باسا دارىپتەدى: 20 ەل توبى بىرگە كەڭەسۋ، بىرگە قۇرۋ، بىرگە يگىلىكتەنۋ پرينسيبىنە بويسۇنىپ، كوپ جاقتىلىققا تاباندى بولىپ، اشىق، سيىسىمدى بولۋعا تاباندى بولىپ، ءوزارا پايدا جەتكىزىپ سەلبەسۋگە تاباندى بولىپ، داۋىرمەن بىرگە ىلگەرىلەۋگە تاباندى بولىپ، ىندەتتەن كەيىنگى داۋىردە حالىقارالىق ءتارتىپ پەن الەمدىك جونگە سالۋ جاقتارىندا اناعۇرلىم زور جەتەكشىلىك رولىن ساۋلەلەندىرۋ كەرەك.

  ءبىرىنشى، بىرلەسكەن مەملەكەتتەر ۇيىمىن ۇيتقى ەتكەن حالىقارالىق جۇيەنى كۇشەيتۋ. بىرلەسكەن مەملەكەتتەر ۇيىمىنىڭ بەدەلى مەن ورنىن باتىل قورعاپ، بىرلەسكەن مەملەكەتتەر ۇيىمى ۋستاۆىنىڭ باس ماقساتى مەن پرينسيبىنە بويسۇنىپ، حالىقارالىق زاڭدى نەگىز ەتكەن حالىقارالىق ءتارتىپتى قورعاۋ كەرەك. بىرلەسكەن مەملەكەتتەر ۇيىمىنىڭ اناعۇرلىم ءونىمدى تۇردە الەمدىك ورتاق تانىم ۇيىستىرىپ، الەمدىك بايلىقتى جۇمىلدىرىپ، الەمدىك ارەكەتتى سايكەستىرىپ، اناعۇرلىم زور رولىن ساۋلەلەندىرۋىن قولداۋ كەرەك.

  ەكىنشى، ەكونوميكانىڭ جاھاندانۋىنىڭ جونگە سالۋ قۇرىلىمىن كەمەلدەندىرۋ. كوپ جاقتى ساۋدا ءتۇزىلىسىن باتىل قورعاپ، ەركىن ساۋدانى جەبەپ، سىڭار جاقتىلىق پەن قورعامپازدىققا قارسى تۇرىپ، ءادىل باسەكەنى قورعاۋ كەرەك. حالىقارالىق فينانس جۇيەسىن ۇزدىكسىز رەفورمالاپ، الەمدىك فينانس حاۋىپسىزدىگى تورىن بەرىك توقىپ، وركەندەپ كەلە جاتقان ەلدەردىڭ ۋاكىلدىك سيپاتى مەن ءسوز سويلەۋ ۇقىعىن كۇشەيتۋ كەرەك.

  ءۇشىنشى، سيفرلى ەكونوميكانىڭ اقاۋسىز دامۋىن ىلگەرىلەتۋ. اشىق، ءادىل، تۋراشىل، كەمسىتپەيتىن سيفرلى دامۋ ورتاسىن قول ۇستاسا تۇلعالاۋ كەرەك. جۇڭگو جاق «الەمدىك ساندى مالىمەت حاۋىپسىزدىك باستاماسىن» ورتاعا قويدى، الەمدىك سيفرلى جونگە سالۋ ەرەجەسىن ءارقايسى جاقتارمەن بىرگە كەڭەسۋدى جانە جاساۋدى قالايدى. جۇڭگو جاق لايىقتى ۋاقىتتا جاساندى زەردە ارناۋلى تاقىرىبىندا ءماجىلىس اشىپ، 20 ەل توبى جاساندى زەردە پرينسيبىن تياناقتاندىرۋدى ىلگەرىلەتىپ، الەمدىك جاساندى زەردەنىڭ اقاۋسىز دامۋىن جەتەكتەۋ جونىندە باستاما كوتەردى. زاڭدا بەلگىلەنگەن سيفرلى اقشا ولشەمى مەن پرينسيبىن اشىق جانە سيىسىمدى ادىسپەن كەڭەسىپ جاسايدى.

  ءتورتىنشى، جاھاندىق سىن - سايىستارعا توتەپ بەرۋ قابىلەتىن جوعارىلاتۋ. دۇنيە جۇزىلىك دەنساۋلىق ساقتاۋ ۇيىمىنىڭ رولىن كۇشەيتىپ، الەمدىك اۋرۋدىڭ جاپپاي تارالۋىنان ساقتانۋدى، توتەپ بەرۋدى ىلگەرىلەتىپ، ادامزاتتىڭ دەنساۋلىق ساقتاۋ، سالاماتتىق ورتاق تۇلعاسىن قۇرۋ كەرەك. كەلەر جىلعى بىرلەسكەن مەملەكەتتەر ۇيىمىنىڭ 26 - رەتكى كليمات وزگەرىسى شارتىن جاساسۋشىلار جاعى جينالىسى مەن 15 - رەتكى «ورگانيزمدەردىڭ الۋان تۇرلىلىگى كەلىسىمى» شارتىن جاساسۋشىلار جاعى جينالىسىن وراي ەتىپ، ەكولوگيالىق ورتا سالاسىنداعى حالىقارالىق سەلبەستىكتى كۇشەيتۋ كەرەك. جۇڭگو جاق جابايى حايۋاناتتاردى زاڭسىز ساۋدالاۋعا جاپپاي تيىم سالۋعا ۇندەيدى.

  شي جينپيڭ بىلاي دەپ اتاپ كورسەتتى: جۇڭگو جاڭا دامۋ كەزەڭىن عىلمي يگەرىپ، جاڭا دامۋ ۇستانىمىن باتىل دايەكتىلەندىرىپ، جاڭا دامۋ ارناسىن بەلسەنە قۇرادى. بۇل ءارقايسى ەلدەرگە اناعۇرلىم كوپ وراي الىپ كەلەدى. جۇڭگو باستان - اياق دۇنيە ءجۇزى بەيبىتشىلىگىنىڭ قۇرۋشىسى، الەمدىك دامۋدىڭ ۇلەس قوسۋشىسى، حالىقارالىق ءتارتىپتىڭ قورعاۋشىسى بولۋعا تاباندى بولادى. جۇڭگو جاق بارلىق ەلدەرمەن ءوزارا قۇرمەت ەتۋ، تەڭ تۇرعىدا ءوزارا پايدا جەتكىزۋ نەگىزىندە بەيبىت قاتار تۇرىپ، بىرگە دامىپ، تىلدەسۋ ارقىلى الاۋىزدىقتى اياقتاتىپ، كەلىس ءسوز ارقىلى داۋ - شاردى جويىپ، دۇنيە ءجۇزىنىڭ بەيبىتشىلىگى مەن دامۋى ءۇشىن بىرگە قۇلشىنىس جاساۋدى قالايدى.

  شي جينپيڭ ەڭ سوڭىندا بىلاي دەپ باسا دارىپتەدى: ”قالعانمەن ءبىر قايىق قايراڭداپ، سان كەمە كوتەرەر جەلكەنىن. قۋراعان اعاشتان ءدۇر قاۋلاپ، سان بۇتاق جايادى وركەنىن“. ىندەتتەن كەيىنگى داۋىردەگى دۇنيە ءجۇزى، ءسوز جوق، قايتادان جاندانىپ، جاڭا ومىرشەڭدىگىن قاۋلاتادى. قول ۇستاسا قۇلشىنىپ، اناعۇرلىم كوركەم باقىتتى تۇرمىسىمىزدى بىرگە جاراتىپ، ادامزاتتىڭ تاعدىرلاس ورتاق تۇلعاسىن قۇرۋدى بىرگە ىلگەرىلەتەيىك.

  باس قوسۋدى بيىلعى 20 ەل توبىنىڭ ءتوراعا ەلى ساۋد ارابياسىنىڭ پاتشاسى سالمان باسقاردى. 20 ەل توبىنا مۇشە ەلدەردىڭ باسشىلارى، قوناق ەلدەردىڭ باسشىلارى جانە قاتىستى حالىقارالىق ۇيىمداردىڭ جاۋاپتىلارى ماجىلىسكە قاتىناستى.

  باسشىلار بيىل 3 - ايداعى 20 ەل توبى باسشىلارىنىڭ جاڭا تيپتى ايدارشا ۆيرۋس وكپە قابىنۋىنا توتەپ بەرۋ جونىندەگى ەرەكشە باس قوسۋدان بەرگى حالىقارالىق ىندەتكە قارسى اتتانۋ سەلبەستىگىندە قول جەتكىزگەن ىلگەرىلەۋشىلىكتەرگە جاپپاي بەلسەندى باعا بەرىپ، مىنالاردى باسا دارىپتەدى: ىندەت الدىندا ىنتىماقتاسا سەلبەسۋدى كۇشەيتۋ ايرىقشا ماڭىزدى، 20 ەل توبى حالىقارالىق ىندەتكە قارسى اتتانۋ جانە ەكونوميكانى قالپىنا كەلتىرۋ جاقتارىندا جەتەكشىلىك رولىن ۇزدىكسىز ساۋلەلەندىرۋ كەرەك. ۆاكسينا جونىندەگى حالىقارالىق سەلبەستىكتى كۇشەيتىپ، دۇنيە جۇزىلىك دەنساۋلىق ساقتاۋ ۇيىمىنىڭ ماڭىزدى سايكەستىرۋ رولىن ساۋلەلەندىرۋىن قولداۋ كەرەك. ىندەتتەن ساقتانۋ - تىزگىندەۋمەن بىرگە، جۇمىستى، ءوندىرىستى قالپىنا كەلتىرىپ، الەمدىك قامداۋ تىزبەگىنىڭ اشىق، حاۋىپسىز بولۋىنا شىنايى كەپىلدىك ەتۋ كەرەك. 20 ەل توبىنىڭ قارىزدى كەشەۋىلدەتۋ باستاماسىن ۇزدىكسىز اتقارۋ كەرەك. حالىقارالىق زاڭ مەن حالىقارالىق ەرەجەلەردى قورعاپ، دۇنيە جۇزىلىك ساۋدا ۇيىمى رەفورماسىن قولداپ، كوپ جاقتى ساۋدا ءتۇزىلىسىن قورعاپ، اشىق، ءادىل جانە كەمسىتپەيتىن ورتانى بىرگە قالىپتاستىرۋ كەرەك. سيفرلى ەكونوميكا جانە كليمات وزگەرىسى سياقتى سالالارداعى سەلبەستىكتى كۇشەيتىپ، ىندەتتەن كەيىنگى داۋىردە دۇنيە ءجۇزىنىڭ ارىندى، باياندى، بىركەلكى، سيىسىمدى دامۋدى جۇزەگە اسىرۋىن ىلگەرىلەتۋ كەرەك.

  ديڭ شۋەشياڭ، ليۋ حى، ياڭ جيەچى، ۋاڭ ي، حى ليفىڭ قاتارلىلار قاتىناستى.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.