شينحۋا اگەنتتىگىنىڭ 11 - ايدىڭ 23 ـ كۇنى بەيجيڭنەن بەرگەن حابارى. (ٴتىلشى حوۋ شۋەجيڭ حابارلايدى) 11 - ايدىڭ 23 ـ كۇنى گۇيجوۋ ولكەسىندەگى ەڭ سوڭعى 9 كەدەي اۋداننىڭ كەدەي اۋداندار قاتارىنان شەگىندىرىلگەنى جاريالاندى. وسىمەن ەلىمىزدەگى 832 كەدەي اۋدان تۇگەلدەي كەدەيلىكتەن ارىلدى. پارتيا 18 - قۇرىلتايىنان بەرى، شي جينپيڭ جولداستى ۇيتقى ەتكەن پارتيا ورتالىق كوميتەتى كەدەي حالىقتى كەدەيلىكتەن ارىلتۋدى جاپپاي دوڭگەلەك داۋلەتتى قوعام ورناتۋدىڭ نەگىزگى مىندەتى جانە كورسەتكىشى ەتىپ، بۇكىل ەل كولەمىندە كەدەيلىكتەن ارىلتۋدان قامال الۋ شايقاسىن جاپپاي جۇرگىزىپ، ادامزاتتىڭ كەدەيلىكتى ازايتۋ تاريحىنداعى كەرەمەتتەردى جاراتتى.
كەدەي اۋدانداردى كەدەيلىك قاتارىنان شەگىندىرۋ جونىندەگى قاتىستى ساياساتتىق بەلگىلەمەلەر بويىنشا، كەدەي اۋدانداردى كەدەيلىكتەن شەگىندىرۋدە كەدەيلەسۋ مولشەرى نەگىزگى ولشەم ەتىلەدى، پرينسيپتىك جاقتان كەدەي اۋدانداردا كەدەيلىكتىڭ تۋىلۋ مولشەرى %2تەن تومەن بولۋعا، باتىس بولەكتەگى رايونداردا %3تەن تومەن بولۋ ولشەم ەتىلدى. ٴارقايسى ولكە (اۆتونوميالى رايون، توتە قاراستى قالالار) كەدەي اۋدانداردى كەدەيلىكتەن شەگىندىرۋ تەكسەرۋىن ءبىر تۇتاس ۇيىمداستىرادى ٴارى كەدەي اۋدانداردى كەدەيلىكتەن شەگىندىرۋدىڭ ساپاسىنا جاۋاپتى بولادى. كەدەي اۋداندار كەدەيلىكتەن شەگىنگەننەن كەيىن، مەملەكەتتىك كەڭەستىڭ كەدەيلەردى سۇيەمەلدەۋ، وركەندەتۋ باسشىلىق گرۋپپاسى ورتالىق پەن مەملەكەت ورگاندارىنىڭ قاتىستى تاراۋلارىن جانە قاتىستى كۇشتەردى ۇيىمداستىرىپ، شەگىندىرۋ جاعدايىنا ٴىشىنارا تەكسەرۋ جۇرگىزىپ، كەدەيلىكتەن ارىلتۋ ناتيجەسىنىڭ سىننان وتۋىنە شىنايى كەپىلدىك ەتتى. كەدەيلىكتەن شەگىنگەن كەدەي اۋدانداردىڭ، كەدەي قىستاقتاردىڭ جانە كەدەي وتباسىلارىنىڭ كەدەيلىكتەن ارىلتۋدان قامال الۋ مەزگىلىندەگى قاتىستى سۇيەمەلدەۋ ساياساتى وزگەرمەيدى.
2017 - جىلى 2 - ايدىڭ 26 - كۇنى جياڭشي ولكەسى جيڭگاڭشان قالاسى بۇكىل ەل بويىنشا ەڭ الدىمەن كەدەيلىكتەن ارىلىپ، كەدەيلىك قالپاعىن الىپ تاستاعاندىعىن جاريالادى. 2016 - جىلدىڭ سوڭىنا دەيىن، جيڭگاڭشان قالاسىندا كەدەيلىكتىڭ تۋىلۋ مولشەرى %1.6كە تومەندەدى، بۇل ەلىمىزدە كەدەيلىكتەن شەگىندىرۋ مەحانيزمى ورناتىلعاننان كەيىنگى تۇڭعىش كەدەيلىك قالپاعى الىنىپ تاستالعان اۋدان ەسەپتەلەدى.
كاسىپ سالاسىن دامىتۋ، باسقا جەرگە كوشىرىپ قونىستاندىرۋ، ەكولوگيالىق تولىقتاما قاراجاتىن بەرۋ … ٴاربىر كەدەي وتباسىنىڭ كەدەيلىكتەن ارىلۋىنىڭ استارىندا ٴبىر جۇيەلى ينجەنەريا، ٴبىر مايدان ەرلىكپەن شايقاساتىن سۇراپىل شايقاس بار. 2013 - جىلدان بەرى جيىنى 93 ميلليوننان استام كەدەي حالىق ازايىپ، جىلىنا ورتا ەسەپپەن 10 ميلليوننان استام كەدەي حالىق ازايدى، بيىلعى قۇلشىنىس ارقىلى قالعان كەدەي حالىق ۋاعىندا كەدەيلىكتەن ارىلادى.
كەدەيلىكتىڭ تاقسىرەتىن تارتساڭ، دوڭگەلەك داۋلەتتىلىككە تالپىناسىڭ. جۇڭحۋا ۇلتىنىڭ مۇلدەم كەدەيلىكتەن تۇبەگەيلى ارىلۋى، جاپپاي دوڭگەلەك داۋلەتتى قوعام ورناتۋ سىندى مىڭ جىلدىق ارمانى وسى ۇرپاق ادامدارىنىڭ قۇلشىنىسىندا جاقىن ارادا جۇزەگە اساتىن بولادى.
اۋدارعان: قادىر ماقان
