شينحۋا اگەنتتىگىنىڭ 11 - ايدىڭ 24 - كۇنى بەيجيڭنەن بەرگەن حابارى (تىلشىلەر فان شي، ليۋ شياسۇن). پارتيا 19 - كەزەكتى ورتالىق كوميتەتىنىڭ بەسىنشى جالپى ءماجىلىسىنىڭ رۋحىن ۇيرەنىپ، دايەكتىلەندىرىپ، باس شۋجي شي جينپيڭنىڭ جۇمىسشى تابى جانە جۇمىسشى ۇيىمى قىزمەتى جونىندەگى ماڭىزدى بايىمداۋلارىن مۇقيات تياناقتاندىرىپ، ەڭبەك ەرى رۋحىن، ەڭبەك رۋحىن، ۇستا رۋحىن زور كۇشپەن ساۋلەلەندىرىپ، قالىڭ جۇمىسشى - قىزمەتكەرلەردى ”14 - بەسجىلدىق“ جوبانىڭ نىسانالارىن، مىندەتتەرىن جانە 2035 - جىلعا دەيىنگى بولاشاقتىق نىسانانى جۇزەگە اسىرۋعا اقىل - پاراساتى مەن كۇش - قۋاتىن ارناۋعا ىنتىماقتاستىرا اتتانىسقا كەلتىرۋ ءۇشىن، مەملەكەتتىك ەڭبەك ەرلەرىن جانە وزات قىزمەتكەرلەردى ماداقتاۋ - سيلاۋ جينالىسى اشىلۋ قارساڭىندا ورتالىق كوميتەت ۇگىت ءبولىمى، مەملەكەتتىك باس جۇمىسشى ۇيىمى 2020 - جىلعى ”ەڭ ارداقتى جۇمىسشى - قىزمەتكەرلەردىڭ“ ىزگى ىستەرىن تۇتاس قوعامعا اشىق جاريالادى.
سۇن زىجوۋ، باي يۇيجيڭ، ليۋ لي، ۋاڭ شۋچۇن، ليۋ شۋاڭيان، حۋ حۇڭۋي، شيۇڭ گۇيلين، پان سۇڭميڭ، جاۋ شينلۋ، پاشاگۇل كەرىم قاتارلى 10 ادام 2020 - جىلى مەملەكەتتىك ەڭبەك ەرى جانە وزات قىزمەتكەر بولىپ جاڭادان سايلاندى. ولار جىلدار بويى نەگىزگى ساتىنىڭ ءبىرىنشى شەبىندە ەرلىكپەن كۇرەس جاساۋدا، كەيبىرەۋلەرى اي شارى مەن تەرەڭ كەڭىستىكتى بارلاۋ سالاسىندا كۇش سالا زەرتتەۋ جۇرگىزۋدە جانە ينجەنەريانى امالياتتا ايگىلەۋدە؛ كەيبىرەۋلەرى ”ءوزىم بەس باتتام بولىپ جۇرسەم دە قالىڭ وتباسىن باقىتقا كەنەلتەمىن“ دەپ سۋمەن قامداۋ، سۋ ىعىستىرۋ قىزمەتى ءۇشىن ءۇن - ءتۇنسىز ۇلەس قوسۋدا؛ كەيبىرەۋلەرى ءوندىرىستىڭ ءبىرىنشى شەبىندە مۇناي سالاسىنىڭ بىلىكتى مامانى بولىپ جەتىلدى؛ كەيبىرەۋلەرى ”شىنجوۋ“، ”تيانگۇڭ“، ”تيانجوۋ“ سياقتى ۇشۋ اپپاراتىنىڭ كەڭىستىكتە ءتۇيىلىسۋ مىندەتىن ءساتتى ورىنداۋعا كۇش قوستى؛ كەيبىرەۋلەرى اۋىل - قىستاقتىڭ كەدەيلىكتەن ارىلتۋدان قامال الۋ شايقاسىنا ىرىقتىلىقپەن تامىر تارتتى؛ كەيبىرەۋلەرى ىندەت الدىندا استە شەگىنبەي، لەيشىنشان، حۋوشىنشان شيپاحاناسىنىڭ ەلەكتر پايدالانۋ حاۋىپسىزدىگىن قامتاماسىز ەتتى؛ كەيبىرەۋلەرى حاۋىپ - قاتەردەن قورىقپاي، ىندەت مەزگىلىندە شالعايداعى اۋىل - قىستاققا ”مەيىر جەتكىزۋ پوچتا جولىن“ اشتى؛ كەيبىرەۋلەرى مەتال قورىتۋدىڭ ”جاراقسىز ۇنتاعىنان“ سيرەك، قىمبات مەتال ايىرۋ ءۇشىن ۇڭىلە زەرتتەۋ جۇرگىزدى؛ كەيبىرەۋلەرى جورعا بوكەندى قورعاۋدىڭ، ەكولوگيالىق وركەنيەتتى ساقتاۋدىڭ قاسيەتتى بورىشىن ارقالادى؛ كەيبىرەۋلەرى اۋىلداستاردى بىرگە اۋقاتتانۋعا باستادى... ولار ءوز قىزمەتتەرىن تياناق ەتىپ، قىزمەت ورنىن ءسۇيىپ، كاسىبىن ارداقتاپ، قامال الىپ، قيىنشىلىقتاردى جەڭىپ، قاراپايىم قىزمەت ورنىندا ەلەۋلى ەڭبەك كورسەتىپ، ءبىلىمدى، شەبەر، جاسامپاز ەڭبەكشى بولىپ شىعۋعا قۇلشىنىپ، تۇتاس قوعامدا ەڭبەك ەڭ داڭقتى، ەڭبەك ەڭ ارداقتى، ەڭبەك ەڭ ۇلى، ەڭبەك ەڭ قاستەرلى دەيتىن ءداۋىر نەگىزگى اۋەنىن اسقاقتاتىپ، جۇڭگو جۇمىسشى تابىنىڭ ءداۋىر كەلبەتىن ايگىلەپ، جاپپاي دوڭگەلەڭ داۋلەتتى قوعام ورناتۋدىڭ شەشۋشى جەڭىسىنە، كەدەيلىكتەن ارىلتۋدان قامال الۋدىڭ شەشۋشى جەڭىسىنە قول جەتكىزۋ ءۇشىن قۋاتتى وڭ ەنەرگيا ۇيىستىرىپ، تۇتاس قوعامدا ەڭبەك ەرىن قادىرلەيتىن، ەڭبەك ەرىنەن ۇيرەنەتىن، ەڭبەك ەرى بولۋعا تالپىناتىن قويۋ راي قالىپتاستىردى.
تاراتۋ سالتى ورتالىق راديو - تەلەۆيزيا باس ستانسياسىندا وتكىزىلدى، ناق مايداندا ”ەڭ ارداقتى جۇمىسشى - قىزمەتكەرلەردىڭ“ ىزگى ىستەرى جونىندەگى قىسقا كەسكىن قويىلىپ، ولاردىڭ قىزمەت، تۇرمىس جونىندەگى تۇسىنىكتەرىنە ءار قىرىنان سۇحبات جاساپ، باياندادى. ورتالىق كوميتەت ۇگىت ءبولىمىنىڭ، مەملەكەتتىك باس جۇمىسشى ۇيىمىنىڭ جاۋاپتى جولداستارى ولارعا ”ەڭ ارداقتى جۇمىسشى - قىزمەتكەر“ كۋالىگىن تاراتتى.
