تيانشان تورى حابارى. (ءتىلشى لي يافىڭ، ەرىكتى ءتىلشى باي يۇي حابارلايدى) 11 - ايدىڭ 23 - كۇنى، ءتىلشىنىڭ مەملەكەتتىك ەلەكتر تورابى ىلە ەلەكترمەن قامداۋ سەرىكتەستىگىنەن ۇعىسۋىنشا، بيىل قىستا، ىلە وزەنى اڭعارىنداعى 254 ورتا، باستاۋىش مەكتەپ، بالا باقشا كومىر جاعىپ جىلۋمەن قامداۋعا حوش ايتقان. بۇنداي وزگەرىس بيىل ورىستەتىلگەن ”تازا ەنەرگيانى مەكتەپ اۋلاسىنا جەتكىزۋ“ قيمىلىنىڭ ارقاسى.
بيىل قىس كىرگەننەن بەرى، كۇنەس اۋداندىق چىنشيڭ بالاباقشاسىنىڭ وقىتۋشى - وقۋشىلارى جونىنەن العاندا ايىرىقشا جىلى بولدى. ”كلاستى ەلەكترمەن جىلىتقالى، بالالار كلاستىڭ جىلى ەكەنىن جاپپاي اڭىس ەتتى“، - دەدى ەلەكترمەن جىلىتۋ جابدىعىنىڭ قولدانىلۋ احۋالىن تىلگە تيەك ەتكەندە كۇنەس اۋداندىق وقۋ - اعارتۋ مەكەمەسى نىسان باسقارۋ ءبولىمىنىڭ ورىنباسار مەڭگەرۋشىسى جاڭ يۇنپىڭ ريزالىق ٴبىلدىرىپ.
بۇرىن ءارقايسى مەكتەپ كومىر جاعىپ جىلۋمەن قامداعان كەزدە، مەكتەپ قاقپاسىنان كىرگەندە ىستىڭ ءيسى مۇرىنعا ۇراتىن، ەكولوگيالىق ورتا مەن وقىتۋشى - وقۋشىلاردىڭ ۇيرەنۋ، تۇرمىسىنا دا ناشار ىقپال جەتكىزەتىن، ونىڭ ۇستىنە ءار جىلعى كومىر قاراجاتى، جىلۋمەن قامداۋ قۇبىرىن قورعاۋ قاراجاتى، پار قازان جۇمىسشىلارىنىڭ ەڭبەكاقىسى سىندى شىعىندار ءبىرشاما جوعارى بولاتىن“، - دەدى جاڭ يۇنپيڭ، ”ەلەكترمەن جىلىتۋدى قولدانعاننان كەيىن، ءارقايسى مەكتەپ تەمپەراتۋرانى زەردەلى مەڭگەرەدى، كلاستا ساباق وقىعاندا، جاتاقتىڭ ايىرىپ - قوسقىشىن جاۋىپ قويادى، ساباقتان تۇسكەننەن كەيىن كلاستىڭ ايىرىپ - قوسقىشىن جاۋىپ قويادى، ەنەرگيانى ۇنەمدەپ ورتانى قورعاۋعا ٴتيىمدى، بالالاردىڭ جاۋراپ، تۇماۋراتىپ قالۋىنان الاڭداۋدىڭ قاجەتى جوق“.
”بالالاردىڭ مەكتەپتە توڭباي، حاۋىپسىز ۇيرەنۋى ءبىزدىڭ ەڭ ۇلكەن ارمانىمىز“، - دەدى كۇنەس اۋداندىق چىنشيڭ بالاباقشاسىندا 10 جىل وقىتۋشىلىقپەن شۇعىلدانعان رىزۋانگۇل قاناعات كوڭىلدى تۇردە.
مەملەكەتتىك ەلەكتر تورى ىلە ەلەكترمەن قامداۋ سەرىكتەستىگى تيجارات قىزمەت وتەۋ ورتالىعىنىڭ مەڭگەرۋشىسى دوۋ جيە مىنانى ءبىلدىردى: كەلەسى قادامدا ”تازا ەنەرگيانى مەكتەپ اۋلاسىنا جەتكىزۋ“ وزگەرتۋ نىسانىن بەلسەنە اتقارىپ، وزەن اڭعارىنداعى 1500 ورتا، باستاۋىش مەكتەپ، بالاباقشانىڭ جىلۋمەن قامداۋىن ەرتەرەك جۇزەگە اسىرىپ، مەكتەپ اۋلاسى تازا، جوعارى ءونىمدى، جاسىل ەنەرگيا پايدالاناتىن ورتانى ۇزدىكسىز قالىپتاستىرىپ، جىلۋمەن قامداۋ حاۋىپسىزدىگىنىڭ كومەسكى قاتەرىن جويىپ، ءتىپتى دە كوپ اۋىل - قىستاق بالالارىنىڭ ”شاعىن پار قازانعا“ تۇبەگەيلى حوش ايتۋىنا مۇمكىندىك جاسايدى.