(ەرىكتى تىلشىلەر ليۋ حۇيليڭ، ۋان جيڭ حابارلايدى). 11 - ايدىڭ 24 - كۇنى تۇستە، تۇرپان قالاسى ءپىشان اۋداندىق حالىق شيپاحاناسىنىڭ ىشكى اۋرۋلار 3 - ءبولىمى وتكىزگىش تۇتىكشە بولىمىندە حىڭياڭنان شينجياڭعا باعىتتامالى كومەكتەسۋگە كەلگەن شيپاگەر، نانحۋا داشۋەسىنە قاراستى 2 - شيپاحاناسى جۇرەك ىشكى اۋرۋلار ءبولىمىنىڭ ورىنباسار مەڭگەرۋشىسى وۋ چيلين ءپىشان اۋداندىق حالىق شيپاحاناسى ىشكى اۋرۋلار 3 - ءبولىمىنىڭ مەڭگەرۋشىسى يۋە يۇڭيۋە، شيپاگەر ليۋ حايباڭ، جاڭ تيانفەي قاتارلىلارمەن بىرگە سەلبەسىپ، ءبىر CTO (ايدارشا ارتەريانىڭ سوزىلمالى تولىق توسىلۋى) مينيمالدى ينۆازيۆتى ارالاس ەمدەۋ وپەراتسياسىن ءساتتى جاسادى. بۇل وۋ چيلين سول كۇنى جاساعان 3 - رەتكى وپەراتسيا ءارى شينجياڭعا كەلگەن 7 ايدان استام ۋاقىتتان بەرى جاساعان 1014 - رەتكى وپەراتسيا. قازىر ناۋقاستىڭ دەنساۋلىعىنىڭ قالپىنا كەلۋى جاقسى.
وۋ چيليننىڭ ۇلكەن ىشكى اۋرۋلار ءبولىمى جانە جۇرەك ىشكى اۋرۋلار ءبولىمى قىزمەتىمەن شۇعىلداعانىنا 20 جىلعا جۋىق ۋاقىت بولدى. ول ايدارشا ارتەريا جۇرەك اۋرۋىن ارالاس ەمدەۋ مەن جۇرەك - قان تامىر قاتەرلى اۋرۋلارىن قۇتقارۋ - ەمدەۋدىڭ شەبەرى. ءپىشاننىڭ ازىق - تۇلىگى، ءوڭىرى جانە كليماتى سەبەبىنەن، جۇرەك قان - تامىر ناۋقاستارىنىڭ كوبى ايدارشا ارتەريانىڭ سوزىلمالى تولىق توسىلۋ سيپاتتى اۋرۋ وزگەرىسىنە شالدىعادى (CTO). ونىڭ توسىلۋ ۋاقىتى ۇزاق، اۋرۋ وزگەرىسى ەرەكشە ورىندا بولاتىندىقتان، ەمدەۋ قيىندىعى زور، قاتەرى دە جوعارى.
يۋە يۇڭيۋە بىلاي دەپ تانىستىردى: ”CTO وپەراتسياسى كۇردەلى، قاتەرى جوعارى، وپەراتسيا ۋاقىتى ۇزاق بولادى. بۇرىن ءبىز بۇل سالاعا اياق باسا المايتىن ەدىك، ناۋقاستار نەگىزىنەن سىرت جەرلەرگە جوتكەلىپ ەمدەلەتىن. وۋ چيلين شيپاگەر كەلگەننەن كەيىن، قولما - قول ۇيرەتىپ، بولىمدەگى شيپاگەرلەر تەز ارادا جەتىلدى، قازىر ناۋقاستىڭ باسقا جەرگە بارىپ ەمدەلۋىنىڭ قاجەتى جوق، ’ءۇيىنىڭ ماڭىنداعى‘ شيپاحانادان ەمدەلۋدى جۇزەگە اسىردى“ .
وپەراتسيا جاساتقان ليۋ اتاي بيىل 67 جاستا، سوزىلمالى ايدارشا ارتەريا جۇرەك اۋرۋى بار، ەسكىلىكتى جۇرەك بۇلشىق ەتى ولەتتەنگەنىنە كوپ جىل بولعان. كەۋدەسىنىڭ قىسىلعانىنان، اۋىرعانىنان وتباسىنداعىلار ونى شيپاحاناعا اپاردى. CAG (ايدارشا ارتەريا رەنتگەنوگرافيا تەحنيكاسى) ارقىلى ايدارشا ارتەرياسىنىڭ الدىڭعى تومەندەگەن تارماعىندا سوزىلمالى تولىق توسىلۋ بار دەپ دياگنوز قويىلادى. بۇل ناۋقاستىڭ جۇرەك قىزمەتىنە اۋىر ىقپال جاسادى. وۋ چيليننىڭ باستاۋىندا كوپشىلىك بىرگە قۇلشىنىپ، ءبىر ساعات وپەراتسيا جاساۋ ارقىلى ناۋقاستىڭ قان تامىرىن ءساتتى اشادى ءارى PCI (تەرىدەن ايدارشا ارتەريا تىرەۋىن سالۋ تەحنيكاسى) تەحنيكاسىن قولدانىپ، ناۋقاستىڭ جۇرەگىنە جاڭا قوزعاۋشى كۇش قوستى.
