تيانشان تورى   ›   جاڭالىقتار   ›   عىلىم-تەحنيكا

چاڭ - ى 5 - ءنومىرلى بارلاۋ جابدىعى ديناميكالىق تومەندەۋدى ورىندادى ءارى ءساتتى قوندى

الدىن الا تاڭدالعان وڭىردە اي بەتىنەن ۇلگى الۋ جۇمىسىن باستايدى

    12 - ايدىڭ 1 - كۇنى بەيجيڭ عارىشقا ۇشۋدى مەڭگەرۋ ورتالىعىندا تۇسىرىلگەن چاڭ - ى 5 - ءنومىرلى بارلاۋ جابدىعىنىڭ ايعا قونۋ بارىسى. سۋرەتتى شينحۋا اگەنتتىگىنىڭ ءتىلشىسى جين لي - ۋاڭ تۇسىرگەن

    12 - ايدىڭ 2 - كۇنى بەيجيڭ عارىشقا ۇشۋدى مەڭگەرۋ ورتالىعىندا تۇسىرىلگەن چاڭ - ى 5 - ءنومىرلى بارلاۋ جابدىعىنىڭ ايعا قونعاننان كەيىنگى سۋرەتى. سۋرەتتى شينحۋا اگەنتتىگىنىڭ ءتىلشىسى جين لي - ۋاڭ تۇسىرگەن

  شينحۋا اگەنتتىگىنىڭ 12 - ايدىڭ 1 - كۇنى بەيجيڭنەن بەرگەن حابارى (ءتىلشى حۋ جى). ءتىلشىنىڭ مەملەكەتتىك عارىش مەكەمەسىنەن ۇعىسۋىنا قاراعاندا، 12 - ايدىڭ 1 - كۇنى ساعات 23تەن 11 مينۋت وتكەندە، چاڭ - ى 5 - ءنومىرلى بارلاۋ جابدىعى ايدىڭ وڭ بەتىندەگى باتىس بويلىق 51.8 گرادۋس، سولتۇستىك ەندىك 43.1 گرادۋس ماڭىنداعى الدىن الا تاڭدالعان قوناتىن وڭىرگە ءساتتى قونعان ءارى قونعان كەزدەگى كەسكىن سۋرەتتى جىبەرگەن.

  12 - ايدىڭ 1 - كۇنى ساعات 22دەن 57 مينۋت وتكەندە، چاڭ - ى 5 - ءنومىرلى بارلاۋ جابدىعىنىڭ قوندىرعىشى مەن كوتەرگىش قۇراماسى اي بەتىنەن 15 كيلومەتر بيىك قاشىقتىقتان باستاپ ديناميكالىق تومەندەۋگە كوشكەن، 7500 نيۋتوندىق اينىمالى قوزعالتقىش موتورى وت الىپ، بارلاۋ جابدىعىنىڭ ايعا سالىستىرمالى ۆەرتيكال باعىتتاعى جىلدامدىعى سەكۋندىنا 1.7kmدەن بىرتىندەپ نولگە ءتۇستى.

  وسى ارالىقتا بارلاۋ جابدىعى تەز جىلدامدىقتاعى كۇيىن رەتتەپ، بىرتە - بىرتە اي بەتىنە جاقىندادى؛ وسىدان سوڭ كەدەرگىنى اۆتوماتتى تۇردە تەكسەردى، قونۋ ءتۇيىنىن تاڭداعاننان كەيىن، كەدەرگىلەردەن قورعانا تومەندەۋ مەن جىلدامدىعىن باياۋلاتا ۆەرتيكال باعىتتا تومەندەۋدى باستاپ، اي شارىنىڭ وڭ بەتىندەگى بوران مۇحيتتاعى رۇمكەر تاۋىنىڭ سولتۇستىك وڭىرىنە ورنىقتى تۇردە قوندى. قونۋ بارىسىندا قوندىرعىعا ورناتىلعان قونۋ فوتو اپپاراتى قونۋ اۋماعىنىڭ كەسكىن سۋرەتىن ءتۇسىردى.

  ءساتتى قونعاننان كەيىن، قوندىرعىش جەر بەتىنىڭ مەڭگەرۋىندە، كۇن قاناتى مەن باعىتتى انتەننانى اشۋ سياقتى جاعدايلاردى تەكسەرۋ جانە ورنالاستىرۋ جۇمىستارىن جۇرگىزدى. الدا شامامەن 2 كۇن ۋاقىتپەن اي بەتىندەگى جۇمىستاردى رەسمي باستاپ، اي شارىنان ۇلگى زاتتار الا باستايدى.

جاۋاپتى رەداكتور : سايراش تۇرارجان

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.