شينجياڭ گازەتىنىڭ جالپىلىق اقپارات قۇرالدارى ٴتىلشىسى سۋ لۋپيڭ
قىس ماۋسىمى جۇقپالى تۇماۋ سياقتى تىنىس جولى جۇقپالى اۋرۋلاردىڭ كوپ تۋىلاتىن مەزگىلى. قىس كىرگەننەن بەرى ادامداردىڭ بولمە ىشىندە قيمىل جاساۋ ۋاقىتى ارتىپ، ادامداردىڭ كوپ توپتاسۋى وڭاي تۋىلادى، ونىڭ ۇستىنە، بولمە ىشىندە اۋا الماسۋدىڭ ناشارلىعى جۇقپالى اۋرۋلاردىڭ تارالۋ قاتەرىن ارتتىرادى. اۆتونوميالى رايوندىق اۋرۋدىڭ الدىن الۋ - تىزگىندەۋ ورتالىعىنىڭ ەپيدوميولوگيالىق اعا شيپاگەرى، زەرتتەۋشىسى ني ميڭجيان مىنانى ەسكەرتتى: قىس مەزگىلىندە ىندەتتەن ساقتانۋ - تىزگىندەۋدە ”ساقتانۋ“ دەگەن ٴسوزدى كورنەكتىلەندىرىپ، ماسكى تاعۋ، قولدى ٴجيى جۋۋ، ۇنەمى اۋا الماستىرۋ سياقتى جەكەلىك قورعانۋ كەم بولسا بولمايدى.
ني ميڭجيان بىلاي دەپ تانىستىردى: جۇقپالى تۇماۋ – جۇقپالى تۇماۋ ۆيرۋسىنان تۋىلاتىن جۇقپالى اۋرۋ بولىپ، ادەتتە اۋرۋ ٴبىرشاما شۇعىل، اۋرۋ بەلگىلەرى ٴبىرشاما اۋىر بولادى، كوبىندە قىزۋ بەلگىسى بولىپ، دەنە تەمپەراتۋراسى 39 سەلتسي گرادۋستان جوعارى بولادى ٴارى باس اۋرۋ، بۇلشىق ەت سىرقىراپ اۋرۋ، تۇلا بويى دارمەنسىزدەنۋ، تاماققا تابەتى تارتپاۋ سياقتى بۇكىل دەنەلىك اۋرۋ بەلگىلەرى كورىلەدى. جاڭا تيپتى ايدارشا ۆيرۋس وكپە قابىنۋ ىندەتى مەن جۇقپالى تۇماۋدىڭ اۋرۋ بەلگىسىندە ۇقساستىعى بار، قىزۋ، جوتەلۋ، جۇتقىنشاق اۋرۋ، ٴىش ٴوتۋ سياقتى اۋرۋ بەلگىلەرى كورىلەدى، سوڭعى مەزگىلىندە ادەتتە تىنىس الۋ قيىنداسۋ سياقتى وكپە قابىنۋ اۋرۋ بەلگىسى كورىلەدى، ٴبىراق بۇكىل دەنەلىك اۋرۋ بەلگىلەرى ايقىن بولمايدى.
”ادەتتەگى ادامدار جاڭا تيپتى ايدارشا ۆيرۋس وكپە قابىنۋ ىندەتى مەن جۇقپالى تۇماۋدى وزدىگىنەن پارىقتاي المايدى. تىنىس جولى اۋرۋ بەلگىلەرى بايقالعاندا، ٴوزىن ٴوزى اۋاشالاپ، دەركەزىندە ەمدەۋ قۇرىلىمدارىنا بارىپ ەمدەلۋ كەرەك. قازىر جاڭا تيپتى ايدارشا ۆيرۋس وكپە قابىنۋ ىندەتى مەن جۇقپالى تۇماۋدى پارىقتاۋدىڭ بىردەن - ٴبىر ٴادىسى نۋكلەين قىشقىلىن تەكسەرۋ“. ني ميڭجيان بىلاي دەدى: قىس مەزگىلىندە اۋا تەمپراتۋراسى ٴبىرشاما تومەن، ۆيرۋستىڭ ٴومىر ٴسۇرۋ ۋاقىتى ٴبىرشاما ۇزاق، اۋرۋ بەلگىسى جوق جۇعىمدالۋشىلار ٴبىرشاما جاسىرىن بولىپ، اشىققا شىعۋ قاتەرى ۇزدىكسىز ساقتالادى. مۇنداي جاعدايدا ادەتتەگى قورعانۋ پرينسيپى جاڭا تيپتى ايدارشا ۆيرۋسىمەن جۇعىمدالۋدىڭ الدىن الۋداعى ەڭ ٴونىمدى شارا ەسەپتەلەدى.
”ٴبىزدىڭ ەڭ الدىمەن ۇسىنىس ەتەتىنىمىز ماسكى تاعۋ“. ني ميڭجيان بىلاي دەدى: قىستا ماسكى تاعۋ كەيبىر قاۋىمعا قولايسىزدىق تۋدىرۋى مۇمكىن، مىسالى، كوزىلدىرىك تاعاتىنداردىڭ اينەگى بۋلانۋ، الايدا جاڭا تيپتى ايدارشا ۆيرۋسىمەن جۇعىمدالۋدىڭ الدىن الۋ تۇرعىسىنان الىپ ايتقاندا، ادامدار وسى قولايسىزدىقتاردى مۇمكىندىكتىڭ بارىنشا جەڭىپ، مەديتسينادا قولدانىلاتىن تولىمدى ماسكى تاعۋى كەرەك.
تاياۋدان بەرى، ەل ىشىندەگى سۋىق جانە توڭازىتىلعان ازىق - تۇلىكتەردەن جاڭا تيپتى ايدارشا ۆيروس نۋكلەين قىشقىلىنىڭ بولىمدى بولعاندىعىن ارت - ارتىنان تەكسەرىپ شىقتى، جاڭا تيپتى ايدارشا ۆيرۋستىڭ دا جاناسۋ ارقىلى جۇعىمدالاتىنى دالەلدەندى، قولدى ٴجيى جۋۋ الەۋمەت جونىنەن العاندا توتەنشە ماڭىزدى.”توڭازىتىلعان ازىق - تۇلىكتەرگە قولعاپ كيمەي جاناسۋدان ساقتانۋ كەرەك. ازىق - تۇلىكتى پىسىرعاننان كەيىن جەسە نەگىزىنەن حاۋىپ - قاتەر بولمايدى“، ـ دەدى ني ميڭجيان.
ني ميڭجيان مىنانى ۇسىنىس ەتتى: بەلگىلى ۋاقىتتا ٴبىر رەت تەرەزەنى اشىپ اۋا الماستىرۋ، مىسالى، ٴار ەكى ساعاتتا تەرەزەنى اشىپ جارىم ساعات اۋا الماستىرۋ، ەسىك - تەرەزەنى ۇلكەن اشىپ تاستاۋدىڭ قاجەتى جوق، الايدا، تەرەزەدە قۋىس قالدىرىپ، اۋا الماسۋ كۇيىن ساقتاۋ كەرەك.
”ادامداردىڭ توپتاسۋىنان مۇمكىندىكتىڭ بارىنشا ساقتانۋ، سونىمەن بىرگە، الەۋمەتتىك اۋماقتار مەن مەكەمە - ورىنداردىڭ قاجەتتى نۋكلەين قىشقىلىن تەكسەرۋىنە سايكەسىپ، ٴتۇرلى ۇدايىلانعان ساقتانۋ - تىزگىندەۋ شارالارىن تياناقتاندىرۋ كەرەك“. ني ميڭجيان بىلاي دەدى: ”ۇدايىلاندىرۋ دەگەنىمىز كۇندەلىكتى قىزمەت جانە تۇرمىستا جاڭا تيپتى ايدارشا ۆيرۋستان ساق بولۋ، ساقتىق ويىندا بولۋ دەگەن ٴسوز“.
اۋدارعان: قادىر ماقان
