تيانشان تورى حابارى (حابارىن جازىپ سۋرەتىن تۇسىرگەن ءتىلشى گو ليڭ، ەرىكتى ءتىلشى مىڭ شياۋچيڭ). 12 - ايدىڭ 26 - كۇنى، نانجيڭ قالاسىنداعى 145 اس - سۋ دۇكەنى شينجياڭ ىلە قازاق اۆتونوميالى وبلىسى تەكەس اۋدانىنىڭ سيىر، قوي ەتتەرىنەن جاسالعان وزگەشە قۋىرماشتاردى ءبىر ۋاقىتتا شىعارىپ، قىرۋار جەرگىلىكتى قالا تۇرعىندارىن باۋرادى.
12-ايدىڭ 26 - كۇنى، ”شينجياڭنىڭ ءتورت ماۋسىمى . ءدامدى تاعامداردان ءلاززات العان تاماشا ساتتەر“ تاقىرىبىنداعى تەكەستىڭ سيىر، قوي مەرەكەسى جانە نانجيڭنىڭ جۇزدەگەن اس - سۋ دۇكەنىنەن ءدام تاتۋ قيمىلى نانجيڭ كورمە ورتالىعىندا وتكىزىلدى، قيمىلدى تەكەس اۋداندىق حالىق ۇكىمەتى، نانجيڭ قالالىق اس - سۋ ساۋدا قوعامى، جياڭنيڭنىڭ شينجياڭعا باعىتتامالى كومەكتەسۋ قىزمەت گرۋپپاسى ۇستىنە الىپ وتكىزدى.
اشىلۋ سالتىندا، تەكەستىڭ بال، تاسپاءشوپ، جابايى ورىك، جۇقا قابىقتى جاڭعاق، بالاۋىزدى جۇگەرى سياقتى وزگەشە ونىمدەرى تەگىس بوي كورسەتتى، اقتاس قويىنىڭ قابىرعا ەتى قاقتاماسى، ۇلكەنقۇشتايدىڭ جەرگىلىكتى سيىر ەتى، لاۋشان قوي ەتى قاقتاماسى، 18 سەكۋند جەرگىلىكتى سيىر ەتى...... نانجيڭنىڭ اس - سۋ كاسىپورىندارى اكەلگەن 36 ءتۇرلى سيىر، قوي ەتىنەن جاسالعان وزگەشە قۋىرماشتار بۇكىل الاڭداعى جۇرتتىڭ نازارىن وزىنە اۋداردى.
”بۇل سيىر، قوي ەتى ءبىر ماي ءبىر ەت بولىپ، ءدامى ءتىل ۇيىرەدى، قورەكتىگى مول، جەي بەرگىڭ كەلەدى، تەكەس حالقىنىڭ نانجيڭگە اسا تاماشا ازىق ماتەريالىن ۇسىنعانىنا راقىمەت“. قۋىرماش تۇرلەرىن زەرتتەپ اشۋدى ۇيىمداستىرعان نانجيڭ جينليڭ اسحاناسىنىڭ بۇرىنعى ورىنباسار باستىعى، ءارى جۇڭگو اسپاز شەبەرى حۋا حۇيشىڭ ناق مايداندا تەكەستىڭ سيىر، قوي ەتتەرىنە وسىلاي باعا بەردى. ءتىلشىنىڭ ۇعىسۋىنشا، بيىل 9 - ايدا، جياڭنيڭنىڭ شينجياڭعا باعىتتامالى كومەكتەسۋگە كەلگەن قىزمەت گرۋپپاسى نانجيڭ قالالىق اس - سۋ ساۋدا قوعامىمەن بىرلەسىپ، جەرگىلىكتى اس - سۋ باستاماشى كاسىپورىندارىن تەكەستىڭ سيىر، قوي ەتتەرىن مانەرلەپ، قۋىرماشتاردى زەرتتەپ اشىپ، ىشكى ولكەدەگىلەردىڭ تابەتىنە ۇيلەسەتىن سيىر، قوي ەتى قۋىرماشتارىن شىعارۋعا ۇسىنىس ەتتى. بۇل شارا جولعا قويىلعاننان كەيىن، نانجيڭ اس - سۋ بازارى تەكەستىڭ سيىر، قوي ەتتەرىنىڭ جەرگىلىكتەگى ساۋدا جولىن اشتى، ەكى ايدا 50 تونناعا جۋىق ەت ساتىلدى.
ساناققا قاراعاندا، جۇمىس باستاۋ سالتىندا ءار ءتۇرلى ەگىن، مال شارۋاشىلىق ونىمدەرىنىڭ كەلىسىم جاساسۋ جالپى سوماسى 24 ميلليون 500 مىڭ يۋان بولدى، مۇنىڭ ىشىندە 275 توننا سيىر، قوي ەتىن ساتىپ الۋ كەلىسىمى بار. بال، تاسپاءشوپ، جابايى ورىك سياقتى ىلەنىڭ اۋىل شارۋاشىلىق ەرەكشە ونىمدەرى قامتىلعان تارتۋ - تارالعى قورابىنا ناق مايداندا 5000 دانا تاپسىرىس بەرىلىپ، جالپى قۇنى 940 مىڭ يۋان بولدى.
