شينجياڭ گازەتىنىڭ جالپىلىق اقپارات قۇرالدارى ءتىلشىسى جاڭ جىلي، ەرىكتى ءتىلشى ۋاڭ جيانچياڭ
”نان پىستى!“. 12 - ايدىڭ 28 - كۇنى تاڭ بوزارا كۇشار قالاسى ۇچا قالاشىعى ۇچا 3 - قىستاعىنا ورنالاسقان سايبويى ۇلكەن نان بازارىندا ناننىڭ حوش يىسىمەن ءبىر كۇندىك دۋماندى بازار باستالدى. روزى توحتى سياقتى نان جابۋشىلار جاپقان ءبىرىنشى مەشتەگى ناندار ەندى عانا كولىككە تيەلىپ جونەلتىلىپ ەدى، نان ساتىپ العالى كەلگەن شارۋالار الدەقاشان ەكىنشى مەشتىڭ نانىن كۇتىپ تۇردى.
سەحتا الدىندا تۇرعان شاعالاداي ۇن، مولدىرەگەن سۋماي، التىنداي سارى كۇنجۇت، قىپ - قىزىل قىزىل بۇرىش، ال كۇلگىن جەمىس توسابى سياقتى ازىق ماتەريالدارىنىڭ تۇرلىشە ۇلگىدەگى نانعا اينالعانىن كورگەن نان يلەپ ازىرلەيتىن ءاينيسام باراتتىڭ ءجۇزى باقىت پەن تابىس سەزىمىنە تولدى. ول: ”كۇشار ۇلكەن نانى بۇل ارانىڭ اۋىل شارۋاشىلىعى ونىمدەرىن تۇگەلدەي جانداندىردى، شارۋالاردىڭ نان شارۋاشىلىعىنا سۇيەنىپ اقشا تابۋ جولى بارعان سايىن كوبەيە ءتۇستى“، - دەدى شاتتانا.
كۇشار قالالىق تۇرعىن ءۇي جانە قالا، اۋىل قۇرىلىسى مەكەمەسىنىڭ ۇچا 3 - قىستاعىندا تۇراتىن ”ۇعىسۋ، تيىمدىلىك جاساۋ، توعىستىرۋ“ قىزمەت اترەتىنىڭ اترەت باستىعى، ءبىرىنشى شۋجي ۋاڭ شىرۇڭنىڭ تانىستىرۋىنشا، بيىل قىزمەت اترەتى 3 ميلليون يۋاننان استام كەدەيلەردى سۇيەمەلدەۋ قارجىسىن ءوتىنىش ەتىپ، سايبويى ۇلكەن نان بازارىن سالىپ، ۇچا قالاشىعىنىڭ ءارقايسى قىستاقتارىنداعى نان جاباتىن بايلىقتاردى بىرىكتىرىپ، كووپەراتيۆ قۇرىپ، ءبىر تۇتاس باسقارىپ، ءبىر تۇتاس جۇمىس جۇرگىزگەن ەكەن.
نان شارۋاشىلىعىنىڭ كاسىپ سالالانۋى ساتۋ مولشەرىنىڭ جوعارىلاۋى، ءتۇرىنىڭ مولايۋى، جۇمىسقا قابىلداۋدىڭ كوبەيۋى، كىرىستىڭ جوعارىلاۋى سىندى تىكە وزگەرىستەر الا كەلدى. سونىمەن بىرگە، تاعى ۇچا 3 - قىستاعى مەن توڭىرەگىندەگى قىستاقتاردىڭ دامۋىن جەتەكتەدى، ءسۇت نان، جۇگەرى نان، راۋشانگۇل نان، قىزىل بۇرىش نان سياقتى جاڭا تۇرلەردىڭ شيكىزاتتارى تۇگەلدەي جەرگىلىكتى ورىننان شىعادى. ”ناننىڭ ساپاسى مەن شارۋالاردىڭ كىرىسىن جوعارىلاتۋ ءۇشىن، ۇلكەن نان بازارى شارۋالارمەن توقتامعا قول قويىسىپ، تاپسىرىستى اۋىل شارۋاشىلىعى ءتاسىلى ارقىلى ءونىم قاينارىنىڭ ساپاسىن باسقارۋدى كۇشەيتتى“، - دەدى ۋاڭ شىرۇڭ.
سايبويى ۇلكەن نان بازارى سياقتى نان شارۋاشىلىعى باقشالارى كۇشار قالاسىنىڭ ءارقايسى اۋىل - قالاشىقتارىنىڭ بارىندە بار، مۇنىڭ ىشىندەگى ەڭ كولەمدى، ەڭ ەرەكشەسى كۇشار قالاسى ىشقىلا قالاشىعىنداعى كۇشار ۇلكەن نان بازارى. قۇرىلىستارىنان بايىرعى لەپ ەسكەن، قۇرىلعىلارى بىرەگەي كۇشار ۇلكەن نان بازارى مەملەكەتتىك 3A دارەجەلى ساياحات كورىنىس اۋماعى بولىپ قانا قالماستان، ونىڭ ۇستىنە اۆتونوميالى رايوننىڭ بەيزاتتىق مادەني مۇراسى كۇشار ۇلكەن نانىنا مۇراگەرلىك ەتەتىن جانە جاڭالىق اشاتىن جەر، سونداي - اق كۇشاردىڭ اۋىل شارۋاشىلىعىنداعى دامۋ تابىستارىن ايگىلەيتىن تەرەزەلىك ورىن.
ءتىلشىنىڭ ۇعىسۋىنشا، كۇشار ۇلكەن نان بازارىنىڭ ءوندىرىس سەحىنداعى تونارلار ورتانى قورعاۋ بويىنشا جاڭالاعاننان كەيىن كۇنىنە، از دەگەندە، 5000 نان ءوندىرىپ، 2.5 توننا ۇن، 100 كيلوگرام پياز جانە مولشەرى اركەلكى سۋ ماي، قىزىل بۇرىش، ماقسارى، كۇنجىت سياقتىلاردى پايدالانا الادى ەكەن.
كۇشار ۇلكەن نان بازارى شەكتى جاۋاپكەرشىلىك سەرىكتەستىگىنىڭ ديرەكتورى ليۋ چيڭحۋا كۇشار ۇلكەن نان بازارى تەك كۇشار ۇلكەن نانىن جاسايتىن، تانىستىراتىن ورىن عانا ەمەس، تاعى كەدەيلەردى سۇيەمەلدەۋ بويىنشا جۇمىستاندىرۋ بازاسى، ساپالى اۋىل شارۋاشىلىعى ونىمدەرىن مانەرلەيتىن بازا دەپ قارايدى ەكەن.
ىشقىلا قالاشىعى لانگار قىستاعىنىڭ قىستاق تۇرعىنى ميجيت روزى ەرلى - زايىپتىلار بۇرىن كەدەي بولاتىن، 2018 - جىلى 6 - ايدا كۇشار ۇلكەن نان بازارىندا جۇمىستانعاننان كەيىن ءار ايداعى وتباسىلىق كىرىسى 4000 يۋان كوبەيىپ، سول جىلى - اق كەدەيلىك قالپاعىن لاقتىرىپ تاستادى. ميجيتتىڭ تىلشىگە ايتۋىنشا بىلتىر ونىڭ ۇيىندەگى 2 مۋ جەردىڭ پيازى مەن ءسابىزىن كۇشار ۇلكەن نان بازارى بازار باعاسىنان جوعارى باعادا تۇگەل ساتىپ الىپتى.
ۇعىسۋعا قاراعاندا، كۇشار قالاسى قازىر كۇنىنە 150 مىڭ نان وندىرەدى، مۇنىڭ ىشىندە 100 مىڭى جەرگىلىكتى ورىندا ساتىلسا، 50 مىڭى سىرت جەرلەرگە ساتىلادى. بەيجيڭدە، گۋاڭجوۋدا، نيڭبودا تۇگەلدەي كۇشار ۇلكەن نانىن ۇستىندە جاساۋ، ساتۋ بولىمشە دۇكەندەرى بولىپ، كۇشاردىڭ ساپالى اۋىل شارۋاشىلىعى ونىمدەرى دە ۇلكەن نانمەن توڭىرەككە تارالعان. كۇشار قالاسىنىڭ ورىنباسار قالا باستىعى، نان شارۋاشىلىعىن دامىتۋ باسشىلىق گرۋپپاسىنىڭ مەڭگەرۋشىسى مەيىزگۇل مامەت مىنانى ءبىلدىردى: كۇشار ۇلكەن نانى كۇشار قالاسىنداعى 1 -، 2 -، 3 - كاسىپ سالالارىنىڭ توعىسا دامۋىن جەتەكتەپ، بۇقارانىڭ كىرىستەرىن ۇزدىكسىز ورنىقتى ارتتىرۋىن جەبەدى.
