تيانشان تورى   ›   ۇيرەنۋ   ›   ماڭىزدى حۇجاتتار

ورمان باستىعى ءتۇزىمى جالپى بەتتىك اتقارىلادى

ورتالىق كوميتەت كەڭسەسى، مەملەكەتتىك كەڭەس كەڭسەسى پىكىر باسىپ تاراتتى

ورمان باستىعى ءتۇزىمى جالپى بەتتىك اتقارىلادى

  شينحۋا اگەنتتىگىنىڭ 1 - ايدىڭ 12 - كۇنى بەيجيڭنەن بەرگەن حابارى. جۋىقتا جۇڭگو كوممۋنيستىك پارتياسى ورتالىق كوميتەتى كەڭسەسى، مەملەكەتتىك كەڭەس كەڭسەسى «ورمان باستىعى ءتۇزىمىن جالپى بەتتىك اتقارۋ جونىندەگى پىكىردى» باسىپ تاراتتى ءارى حابارلاندىرۋ شىعارىپ، وڭىرلەردەن، تاراۋلاردان ءىس جۇزىندىكپەن بىرلەستىرىپ مۇقيات دايەكتىلەندىرۋدى، تياناقتاندىرۋدى تالاپ ەتتى.

  «ورمان باستىعى ءتۇزىمىن جالپى بەتتىك اتقارۋ جونىندەگى پىكىردىڭ» تولىعى تومەندەگىدەي.

   ورمان مەن جايلىم − ماڭىزدى جاراتىلىستىق ەكولوگيالىق جۇيە، مەملەكەتتىڭ ەكولوگيالىق حاۋىپسىزدىگىن قورعاۋدا، ەكولوگيالىق وركەنيەت قۇرىلىسىن ىلگەرىلەتۋدە نەگىزدىك، ستراتەگيالىق رول اتقارادى. ورمان مەن جايلىم سياقتى ەكولوگيالىق جۇيەلەردىڭ فۋنكتسيالارىن جاپپاي جوعارىلاتۋ، جەرگىلىكتى ءار دارەجەلى پارتكومدار مەن ۇكىمەتتەردىڭ ورمان، جايلىم بايلىعىن قورعاۋداعى تۇلعالىق جاۋاپكەرلىگىن ونان ارى نىعايتۋ ءۇشىن قازىر ورمان باستىعى ءتۇزىمىن جالپى بەتتىك اتقارۋ جونىندە مىناداي پىكىر ورتاعا قويىلدى.

  ءبىرىنشى، جالپىلىق تالاپ

  (1) جەتەكشى يدەيا. شي جينپيڭنىڭ جاڭا ءداۋىر جۇڭگوشا سوتسياليزم يدەياسىن جەتەكشى ەتىپ، پارتيا 19 - قۇرىلتايىنىڭ جانە 19 - كەزەكتى ورتالىق كوميتەتى ەكىنشى، ءۇشىنشى، ءتورتىنشى، بەسىنشى جالپى ماجىلىستەرىنىڭ رۋحىن جالپى بەتتىك دايەكتىلەندىرىپ، شي جينپيڭنىڭ ەكولوگيالىق وركەنيەت يدەياسىن مۇقيات امالياتتا ايگىلەپ، جاڭا دامۋ ۇستانىمىن باتىل دايەكتىلەندىرىپ، پارتيا ورتالىق كوميتەتىنىڭ، مەملەكەتتىك كەڭەستىڭ شەشىمدەرىنە، ورنالاستىرۋلارىنا ساي، تاۋ، سۋ، ورمان، ەگىنجاي، كول، جايلىم جۇيەسىن جونگە سالۋ تالابى بويىنشا بۇكىل مەملەكەتتە ورمان باستىعى ءتۇزىمىن جاپپاي اتقارىپ، جەرگىلىكتى پارتيا، ۇكىمەت ورىندارىنداعى باسشى كادرلاردىڭ ورمان، جايلىم بايلىعىن قورعاۋ، دامىتۋ نىسانالىق جاۋاپكەرشىلىگىن ايقىنداپ، پارتيا مەن ۇكىمەت بىرگە جاۋاپكەرشىلىك ارقالايتىن، قاراستى جەر جاۋاپتى بولاتىن، تاراۋلار سايكەسەتىن، قاينار كوزىنەن جونگە سالاتىن، جالپى ءوڭىردى قامتيتىن باياندى مەحانيزم ورناتىپ، ەكولوگيالىق وركەنيەت جانە كورىكتى جۇڭگو قۇرىلىسىن جەدەل ىلگەرىلەتۋ.

  (2) قىزمەت پرينسيبى

 − ەكولوگيانى الدىمەن ويلاستىرۋعا، قورعاۋدى نەگىز ەتۋگە تاباندى بولۋ. ورمان زاڭى، جايلىم زاڭى سياقتى زاڭداردى، زاڭ ەرەجەلەردى جالپى بەتتىك تياناقتاندىرىپ، ورمان، جايلىم بايلىعىن قورعاۋدىڭ ەڭ قاتاڭ ءتۇزىمىن ورناتىپ، اقاۋسىزداندىرىپ، ەكولوگيانى قورعاۋدى، قالپىنا كەلتىرۋدى كۇشەيتىپ، ورگانيزمدەردىڭ كوپ تۇرلىلىگىن قورعاپ، ورمان مەن جايلىم سياقتى ەكولوگيالىق جۇيەلەردىڭ تۇراقتىلىعىن كۇشەيتۋ.

  − جاسىل دامۋعا، ەكولوگيا ارقىلى حالىققا تيىمدىلىك جاساۋعا تاباندى بولۋ. تۇنىق سۋ، جاسىل تاۋ − باعالى بايلىق ۇستانىمىن بەرىك ورناتىپ جانە امالياتتا ايگىلەپ، ەكولوگيانىڭ كاسىپ سالالانۋىن جانە كاسىپ سالاسىنىڭ ەكولوگيالانۋىن بەلسەنە ىلگەرىلەتىپ، حالىق بۇقاراسىنىڭ تاماشا ەكولوگيالىق ورتاعا، تاڭداۋلى ەكولوگيالىق ونىمگە، ساپالى ەكولوگيالىق قىزمەت وتەۋگە بولعان قاجەتىن ۇزدىكسىز قاناعاتتاندىرۋ.

  − ماسەلەنى باعدار ەتۋگە، جەرگىلىكتى جاعدايعا قاراي ىستەۋگە تاباندى بولۋ. تۇرلىشە وڭىرلەردەگى ورمان جانە جايلىم سياقتى ەكولوگيالىق جۇيەلەردى قورعاۋداعى، باسقارۋداعى كورنەكتى ماسەلەلەرگە باعىتتاي وتىرىپ، تۇرلەر بويىنشا شارا قولدانۋعا، عىلمي باسقارۋعا، كەشەندى جونگە سالۋعا، ورمان وسىرۋگە لايىقتى بولسا ورمان ءوسىرىپ، ءشوپ وسىرۋگە لايىقتى بولسا ءشوپ ءوسىرىپ، تىڭ يگەرۋگە لايىقتى بولسا تىڭ يگەرىپ، ورمان، جايلىم بايلىعىنىڭ ەكولوگيالىق، ەكونوميكالىق، قوعامدىق فۋنكتسياسىن جاپپاي جوعارىلاتۋ.

  − پارتكوم باسشىلىق ەتۋگە، تاراۋلار بىرلەسە قيمىلداۋعا تاباندى بولۋ. پارتكومنىڭ باسشىلىعىن كۇشەيتىپ، پارتيا، ۇكىمەت ورىندارىنداعى باسشىلار جاۋاپتى بولۋ ءتۇزىمىن وزەك ەتكەن جاۋاپكەرشىلىك جۇيەسىن ورناتىپ، اقاۋسىزداندىرىپ، ءار دارەجەلى ورمان (جايلىم) باستىقتارىنىڭ (تومەندە ءبىرىڭعاي ورمان باستىعى دەلىندى) ورمان، جايلىم بايلىعىن قورعاۋ، دامىتۋ قىزمەت جاۋاپكەرشىلىگىن ايقىنداپ، قىزمەت شارالارىن كۇشەيتىپ، ءار جاقتىڭ كۇشىن ءبىر تۇتاس جوسپارلاپ، ءبىر دارەجە ءبىر دارەجەنى يگەرەتىن، ساتىلار بويىنشا تياناقتاندىرۋدى يگەرەتىن قىزمەت ارناسىن قالىپتاستىرۋ.

  (3) ۇيىمدىق جۇيە. ءارقايسى ولكە (اۆتونوميالى رايون، توتە قاراستى قالا) باس ورمان باستىعىن تاعايىندايدى، بۇل مىندەتتى ولكە دارەجەلى پارتكومداعى نەمەسە ۇكىمەتتەگى جاۋاپتى باسشى جولداس ارقالايدى؛ ورىنباسار باس ورمان باستىعىن تاعايىندايدى، بۇل مىندەتتى ولكە دارەجەلى جاۋاپتى جولداس ارقالايدى، وڭىرلەرگە (اۋماق) ءبولىپ جاۋاپتى بولادى. ءارقايسى ولكە (اۆتونوميالى رايون، توتە قاراستى قالا) ءىس جۇزىندىك جاعدايعا قاراي، قالا، اۋدان، اۋىل سياقتىلاردىڭ ءار دارەجەلى ورمان باستىقتارىن تاعايىنداۋىنا بولادى. جەرگىلىكتى ءار دارەجەلى ورمان شارۋاشىلىعى جانە جايلىم باسقارۋ تاراۋلارى ورمان باستىعى ءتۇزىمىن ۇيىمداستىرۋدىڭ، اتقارۋدىڭ ناقتى قىزمەتىن ۇستىنە الادى.

  (4) قىزمەت جاۋاپكەرشىلىگى. جەر - جەر ءوڭىر، بايلىق ەرەكشەلىگىن جانە جاراتىلىستىق ەكولوگيالىق جۇيەنىڭ كەمەلدىلىگىن جالپىلاي ويلاستىرىپ، ورمان باستىعى جاۋاپتى بولاتىن ءوڭىردى عىلمي بەلگىلەيدى. ءار دارەجەلى ورمان باستىقتارى جاۋاپتى وڭىردەگى ورمان، جايلىم بايلىعىن قورعاۋ، دامىتۋ قىزمەتىن ۇيىمداستىرىپ جانە وعان باسشىلىق ەتىپ، ورمان، جايلىم بايلىعىن قورعاۋدىڭ، دامىتۋدىڭ نىسانالىق جاۋاپكەرشىلىك ءتۇزىمىن تياناقتاندىرىپ، ورمانمەن كومكەرىلۋ مولشەرى، ورماننىڭ قور مولشەرى، جايلىمنىڭ وسىمدىك جامىلعىسىمەن كومكەرىلۋ جالپىلىق دەڭگەيى، قۇمايتتانعان جەرلەردى جونگە سالۋ اۋدانى سياقتىلاردى ماڭىزدى كورسەتكىش ەتىپ، جەرگىلىكتى جاعدايعا قاراي نىسانا - مىندەتتەردى بەلگىلەيدى؛ ورمان، جايلىم بايلىعىن قورعاۋ، دامىتۋ جوبا - جوسپارىن جاساۋدى ۇيىمداستىرىپ، ءبىر تۇتاس جوسپارلاپ جونگە سالۋدى كۇشەيتىپ، ءتۇزىم قۇرىلىسىن ىلگەرىلەتىپ، جاۋاپكەرشىلىك مەحانيزمىن كەمەلدەندىرەدى؛ جاۋاپتى وڭىردەگى ءتۇيىندى، قيىن ماسەلەلەردى سايكەستىرۋ، شەشۋ جۇمىسىن ۇيىمداستىرىپ، ورمان، جايلىم بايلىعىن زاڭ بويىنشا جالپى بەتتىك قورعاپ، ەكولوگيانى قورعاۋدى، قالپىنا كەلتىرۋدى ىلگەرىلەتىپ، ورماندا، جايلىمدا ورتتەن ساقتانۋ، ءورت ءسوندىرۋ، ەلەۋلى زياندى ورگانيزمدەردەن ساقتانۋ جانە ونى تىزگىندەۋ جاۋاپكەرشىلىگىن جانە شارالارىن تياناقتاندىرۋ جۇمىسىن ۇيىمداستىرىپ، ورمان، جايلىم كاسىبىندەگى اكىمشىلىك زاڭ اتقارۋدى كۇشەيتەدى.

  ەكىنشى، باستى مىندەتتەر

  (5) ورمان، جايلىم بايلىعى ەكولوگياسىن قورعاۋدى كۇشەيتۋ. ورمان، جايلىم بايلىعىن قورعاۋدى، باسقارۋدى قاتايتىپ، ەكولوگيانى قورعاۋدىڭ قىزىل سىزىعىن قاتاڭ ساقتاۋ. ورماندىق جەردى، جايلىمدىق جەردى قۇرىلىسقا پايدالانىلاتىن جەرگە وزگەرتۋدى قاتاڭ مەڭگەرىپ، ءتۇيىندى ەكولوگيالىق فۋنكتسيالىق وڭىرلەر مەن ەكولوگيا ورتاسى سەزىمتال، ءالسىز وڭىرلەردەگى ورمان، جايلىم بايلىعىن قورعاۋدى كۇشەيتىپ، ورماندى قيراتىپ، جايلىمدى ءبۇلدىرىپ تىڭ اشۋعا تيىم سالۋ. الەۋمەتتىك يگىلىك ورماندارىن باسقارۋ - قورعاۋدى كۇشەيتىپ، تابيعي ورماندى قورعاۋدى ءبىر تۇتاس جوسپارلاپ ىلگەرىلەتىپ، تابيعي ورمانداردى ساۋدالىق ماقساتتا كەسۋدى جاپپاي توقتاتىپ، ورمان ەكولوگياسىنىڭ ونىمدىلىگى بويىنشا تولەم بەرۋ ءتۇزىمىن كەمەلدەندىرۋ. جايلىمدا مال باعۋدى شەكتەۋ، تىنىقتىرۋ جانە جايلىم مەن مال تەپە - تەڭدىگىن ساقتاۋ ءتۇزىمىن تياناقتاندىرىپ، جايلىم ەكولوگياسىن قورعاۋ بويىنشا جاردەماقى - سيلىق بەرۋ ساياساتىن كەمەلدەندىرۋ. ورماندى، جايلىمدى باقىلاۋدى كۇشەيتىپ، ورمان، جايلىم بايلىعىن بۇلدىرەتىن زاڭعا قايشى قىلمىستىق ءىس - ارەكەتتەرگە قاتاڭ سوققى بەرۋ. مەملەكەتتىك باقشانى نەگىزگى تۇلعا ەتكەن جاراتىلىستىق قورىق جۇيەسىن قۇرۋدى ىلگەرىلەتۋ. جابايى جانۋارلار مەن وسىمدىكتەردى جانە ولاردىڭ ءوسىپ - ونەتىن، مەكەندەيتىن جەرلەرىن قورعاۋدى كۇشەيتۋ.

  (6) ورمان، جايلىم بايلىعى ەكولوگياسىن قالپىنا كەلتىرۋدى كۇشەيتۋ. مەملەكەت جەرىنىڭ كەڭىستىك جوسپارى بويىنشا، ەكولوگيالىق ماقساتتا پايدالانىلاتىن جەرلەردى عىلمي بەلگىلەپ، مەملەكەت جەرىن كەڭ كولەمدە جاسىلداندىرۋ ارەكەتىن ۇزدىكسىز ىلگەرىلەتۋ. ماڭىزدى ەكولوگيالىق جۇيەنى قورعاۋ جانە قالپىنا كەلتىرۋ ەلەۋلى ينجەنەريالارىن اتقارىپ، بەيجيڭدى، تيانجيندى، حىبەيدى سايكەستىرىپ دامىتۋ، چاڭجياڭ ەكونوميكالىق بەلدەۋىن دامىتۋ، گۋاڭدۇڭ - شياڭگاڭ - اۋمىن ۇلكەن شىعاناق رايونى قۇرىلىسى، چاڭجياڭ اتىراۋىن ءبىر تۇلعالاندىرىپ دامىتۋ، حۋاڭحى وزەنى الابىنىڭ ەكولوگياسىن قورعاۋ جانە جوعارى ساپالى دامىتۋ، حاينان ەركىن ساۋدا پورتى قۇرىلىسى سياقتى ەلەۋلى ستراتەگيالارعا ساياتىن وڭىرلىك ەكولوگيالىق جۇيەلەردى قورعاۋدى جانە قالپىنا كەلتىرۋدى ىلگەرىلەتىپ، ەگىستىك جەردى ورمانعا قايتارۋ، جايلىمعا قايتارۋ، ءۇش تەرىستىك ىقتاسىن ورمانى جۇيەسى قۇرىلىسى، جايلىم ەكولوگياسىن قالپىنا كەلتىرۋ سياقتى ءتۇيىندى ينجەنەريالاردى ىشكەرىلەي اتقارۋ. ورمان شارۋاشىلىعىمەن شۇعىلدانۋ جانە قىسىراعان ورماندى قالپىنا كەلتىرۋدى كۇشەيتىپ، ورمان ساپاسىن جوعارىلاتۋ. تاراۋلاردىڭ جاسىلداندىرۋ جاۋاپكەرشىلىگىن تياناقتاندىرىپ، مىندەتتى اعاش ەگۋ مەحانيزمىندە جاڭالىق اشىپ، جالپى حالىقتىڭ مىندەتتى اعاش ەگۋ بورىشىن ادا ەتۋ مولشەرىن جوعارىلاتۋ.

  (7) ورمان، جايلىم بايلىعىن اپاتتان ساقتاۋدى جانە ونى تىزگىندەۋدى كۇشەيتۋ. ورمانعا، جايلىمعا زياندى ەلەۋلى بيولوگيالىق اپاتتاردان ساقتانۋعا جانە ونى جونگە سالۋعا جەرگىلىكتى ۇكىمەت جاۋاپتى بولۋ ءتۇزىمىن ورناتىپ، اقاۋسىزداندىرىپ، ورمانعا، جايلىمعا زياندى بيولوگيالىق اپاتتاردى اپاتتان ساقتانۋ، اپات زيانىن ازايتۋ، اپاتتان قۇتقارۋ جۇيەسىنە ەنگىزىپ، ورمانعا، جايلىمعا زياندى ەلەۋلى ورگانيزمدەردى باقىلاۋ - باسقارۋ جانە بىرلەسىپ ساقتانۋ، بىرلەسىپ تىزگىندەۋ مەحانيزمىن اقاۋسىزداندىرىپ، قاراعاي سۇرەگىنىڭ نەماتوداسى، امەريكا اق كوبەلەگى، جايلىمداعى تىشقان، قويان اپاتى سياقتىلاردان ساقتانۋ جانە ونى جونگە سالۋ قىزمەتىن ويداعىداي يگەرۋ. ورمانداعى، جايلىمداعى ءورت اپاتىنان ساقتانۋدى، ءورت ءسوندىرۋدى ءبىر تۇلعالاندىرۋعا تاباندى بولىپ، جەرگىلىكتى اكىمشىلىك باسشى جاۋاپتى بولۋ ءتۇزىمىن تياناقتاندىرىپ، ءورت اپاتىنان كەشەندى ساقتانۋ جانە ونى تىزگىندەۋ قابىلەتىن جوعارىلاتۋ.

  (8) ورمان، جايلىم سالاسىنداعى رەفورمالاردى تەرەڭدەتۋ. مەملەكەت مەنشىگىندەگى ءتۇيىندى ورمان الاپتارى جانە مەملەكەت مەنشىگىندەگى ءتۇيىندى ورمان الاڭدارى رەفورماسىنىڭ جەتىستىكتەرىن بەكەمدەپ، كەڭەيتىپ، ورمان بايلىعىن جانە مال - مۇلكىن باسقارۋدى كۇشەيتىپ، ورمان الاپتارىنىڭ، ورمان الاڭدارىنىڭ باياندى دامۋىن ىلگەرىلەتۋ. جايلىمدى كوتەرمەگە الىپ شارۋاشىلىق جۇرگىزۋ ءتۇزىمىن كەمەلدەندىرىپ، جايلىمدى اينالىمعا سالۋدى ارناعا ءتۇسىرۋ. كوللەكتيۆ ورمان ۇقىعى ءتۇزىمى رەفورماسىن تەرەڭدەتىپ، جەر - جەردى مەنشىك ۇقىعى، كوتەرمەگە الۋ ۇقىعى، شارۋاشىلىق جۇرگىزۋ ۇقىعى سىندى ”ءۇش ۇقىقتى ءبولۋ“ جانە مال - مۇلىك ۇقىعىندا ۇقىق پەن فۋنكتسياسىن كەمەلدەندىرۋ جاعىندا بەلسەنە ىزدەنىس جاساۋعا ىنتالاندىرىپ، حالىقتى بايىتاتىن جاسىل كاسىپ سالالارىن زور كۇشپەن دامىتۋ.

  (9) ورمان، جايلىم بايلىعىن قاداعالاۋدى، باقىلاۋ - باسقارۋدى كۇشەيتۋ. وسى زامانعى ينفورماتسيا تەحنيكاسى تاسىلدەرىنەن تولىق پايدالانىپ، ورمان، جايلىم بايلىعىن ”ءبىر كارتامەن“، ”ءبىر جۇيە ساندارمەن“ يكەمدى قاداعالاۋ جۇيەسىن ۇزدىكسىز كەمەلدەندىرىپ، ءتۇيىندى وڭىرلەردە دەر كەزىندە باقىلاۋ - مەڭگەرۋ تورىن بىرتىندەپ ورناتىپ، بايلىقتىڭ اۋقىمدىق وزگەرىسىن دەر كەزىندە يەلەپ، ماسەلەلەردەن الدىن الا ساقتاندىرۋ، الدىن الا مالىمەت بەرۋ جانە ونى تەكسەرىپ ءبىر جاقتى ەتۋ قابىلەتىن جوعارىلاتىپ، ورمان، جايلىم بايلىعىن قورعاۋدى، دامىتۋدى زەردەلىلەندىرىپ باسقارۋ دەڭگەيىن كوتەرۋ.

  (10) نەگىزگى ساتىنىڭ نەگىزدىك قۇرىلىسىن كۇشەيتۋ. ەكولوگيالىق ورمان قورعاۋشى سياقتى باسقارۋ - قورعاۋ قىزمەتكەرلەرىنىڭ رولىن تولىق ساۋلەلەندىرىپ، تور كوزدەندىرىپ باسقارۋدى ىسكە اسىرۋ. اۋىل - قالاشىقتاعى ورمان شارۋاشىلىعى (جايلىم) قىزمەت پۋنكتتەرىنىڭ قابىلەت قۇرىلىسىن كۇشەيتىپ، ەكولوگيالىق ورمان قورعاۋشى سياقتى باسقارۋ - قورعاۋ قىزمەتكەرلەرىن باۋلۋدى جانە كۇندەلىكتى باسقارۋدى كۇشەيتۋ. قارجى قوسۋدىڭ بازارلانعان، كوپ نەگىزدەنگەن مەحانيزمىن ورناتىپ، ورمان، جايلىم بايلىعى ەكولوگياسىن قورعاۋدى، قالپىنا كەلتىرۋدى قازىنالىق جاقتان سۇيەمەلدەۋ ساياساتىن كەمەلدەندىرۋ.

  ءۇشىنشى، قامتاماسىز ەتۋ شارالارى

  (11) ۇيىمدىق باسشىلىقتى كۇشەيتۋ. جەرگىلىكتى ءار دارەجەلى پارتكومدار مەن ۇكىمەتتەر ورمان باستىعى ءتۇزىمىن اتقارۋدىڭ جاۋاپكەرشىلىك تۇلعالارى بولىپ تابىلادى، ۇيىمدىق باسشىلىقتى جانە ءبىر تۇتاس جوسپارلاۋدى شىنايى كۇشەيتىپ، جاۋاپكەرشىلىك ءبولىسىن ايقىنداپ، قىزمەت ورنالاستىرۋلارىن ناقتىلاندىرىپ، جاۋاپكەرشىلىكتى تياناقتاندىرۋدى مىقتاپ يگەرىپ، 2022 - جىلى 6 - ايدا ورمان باستىعى ءتۇزىمىن جالپى بەتتىك ورناتۋعا شىنايى كەپىلدىك ەتۋ.

  (12) قىزمەت مەحانيزمىن اقاۋسىزداندىرۋ. ورمان باستىعى ءماجىلىسى ءتۇزىمىن، ينفورماتسيالاردى اشىق جاريالاۋ ءتۇزىمىن، تاراۋلار سايكەسۋ ءتۇزىمىن، قىزمەتتى قۋزاۋ - تەكسەرۋ ءتۇزىمىن ورناتىپ، اقاۋسىزداندىرىپ، ورمان، جايلىم بايلىعىن قورعاۋ، دامىتۋ بارىسىنداعى ەلەۋلى ماسەلەلەردى زەرتتەپ، ورمان، جايلىم بايلىعىن قورعاۋدىڭ، دامىتۋدىڭ ءتۇيىندى قىزمەتتەرىن مەرزىم بويىنشا حابارلاندىرىپ وتىرۋ.

  (13) قوعامنىڭ باقىلاۋىن قابىلداۋ. ورمان باستىعى ءتۇزىمى ينفورماتسيا جاريالاۋ تۇعىرىن ورناتىپ، اقپارات قۇرالدارى ارقىلى قوعامعا ورمان باستىقتارىنىڭ ەسىمدىگىن جاريالاپ، جاۋاپتى وڭىردەگى كورنەكتى ورىنعا ورمان باستىعىن اشىق جاريا ەتۋ تاقتاسىن ورناتۋ. شارت - جاعدايى بار جەرلەر ورمان باستىعى ءتۇزىمىنىڭ اتقارىلۋ جاعدايىن 3 - جاققا ساراپتاتۋىنا بولادى. ءار جىلى ورمان، جايلىم بايلىقتارىن قورعاۋ، دامىتۋ جاعدايىن جاريالاپ وتىرۋ. ەكولوگيالىق وركەنيەت ۇگىت - تاربيەسىن كۇشەيتىپ، قوعامنىڭ، الەۋمەتتىڭ ەكولوگيانى قورعاۋ تانىمىن كۇشەيتىپ، سانالى تۇردە جاسىل وسىمدىك جامىلعىلارىن ءسۇيۋ، جاسىل وسىمدىك جامىلعىلارىن ەگۋ، جاسىل وسىمدىك جامىلعىلارىن قورعاۋ.

  (14) قۋزاۋ - جەتەكشىلىك ەتۋدى، باعالاۋدى كۇشەيتۋ. ورمان باستىعى ءتۇزىمى بويىنشا قۋزاۋ - جەتەكشىلىك ەتۋ جانە باعالاۋدى ورمان شارۋاشىلىعى مەن جايلىمدى كەشەندى قۋزاۋ - تەكسەرۋ، باعالاۋ كولەمىنە ەنگىزۋ، اۋدان دارەجەلى جانە ودان جوعارى ورمان باستىقتارى ءبىر دارەجە تومەن ورمان باستىقتارىن باعالاۋ جۇمىسىن ۇيىمداستىرۋعا جاۋاپتى بولادى، باعالاۋدىڭ ناتيجەسىن جەرگىلىكتى قاتىستى پارتيا، ۇكىمەت باسشى كادرلارىنىڭ جالپىلىق باعالاۋىنىڭ جانە جاراتىلىستىق بايلىقتار مەن مال - مۇلىكتەرگە مىندەتىنەن بوساعان سوڭ قازىنالىق تەكسەرۋ جۇرگىزۋدىڭ ماڭىزدى دايەگى ەتۋ. پارتيا، ۇكىمەت باسشى كادرلارىنىڭ ەكولوگيالىق ورتاعا زيان كەلتىرۋ جاۋاپكەرشىلىگىن ءومىر بويى قۋزاستىرۋ ءتۇزىمىن تياناقتاندىرىپ، ورمان، جايلىم بايلىعىن ورەسكەل بۇلدىرگەندەردىڭ جاۋاپكەرشىلىگىن قاتاڭ تۇردە قاتىستى بەلگىلەمەلەر بويىنشا قۋزاستىرۋ.

  ءارقايسى ولكەلىك (اۆتونوميالى رايون، توتە قاراستى قالا) پارتكومدار مەن ۇكىمەتتەر ورمان باستىعى ءتۇزىمىن اتقارۋ بارىسىندا ەلەۋلى جاعدايلاردى دەر كەزىندە پارتيا ورتالىق كوميتەتىنە، مەملەكەتتىك كەڭەسكە مالىمدەۋى كەرەك.

جاۋاپتى رەداكتور : نۇربولات قابىل

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.