انار بۇلت، شينجياڭ گازەتىنىڭ تىلشىلەرى رىن جياڭ، جاڭ تيڭ حابارلايدى. 2020 - جىلى 12 - ايدىڭ 26 - كۇنى 5 - كەزەكتى جۇڭگو . جيلين حالىقارالىق قار - مۇز كاسىپ سالاسى كورمەسى، 8 - كەزەكتى جۇڭگونىڭ ساياحات كاسىپ سالاسىن دامىتۋ جىلدىق ٴماجىلىسى چاڭچۇندە اشىلدى. التاي ايماعى كاسىپتىك تالقى مىنبەرى، كورمە، كاسىپ سالاسىن ۇشتاستىرۋ، ارناۋلى تانىستىرۋ سياقتى قيمىلدارعا ۇيىرمە ۇيىمداستىرىپ قاتىناسىپ، التايدىڭ قىسقى قار - مۇز ساياحات بايلىعىن، قىسقى سارا ساياحات جەلىسىن جاپپاي ايگىلەدى، قىسقى ساياحات تيىمدىلىك ساياساتىن تانىستىرىپ، بۇكىل ەلدىڭ جەر - جەرىندەگى ساياحاتشىلارعا شاقىرتۋ جىبەردى. ال التاي ايماعىنىڭ قار - مۇز ساياحاتىنىڭ جۇرت نازارىن اۋدارۋىنىڭ استارىندا جەرگىلىكتى ورىننىڭ سوڭعى جىلداردان بەرى قار - مۇز ساياحاتىنا باسا ٴمان بەرىپ، قار - مۇز ساياحاتىنىڭ دارەجەسىن ٴوسىرۋدى زور كۇشپەن ىلگەرىلەتكەندىگىنىڭ ناتيجەسى جاتىر.
نىسانانى جەتەكشى ەتىپ، جوعارى دەڭگەيدە جوبالاۋ
”قازىر ٴبىز جوسپار بويىنشا قار - مۇز ساياحاتى نەگىزدىك قۇرىلعىلارىن سالىپ، كەمەلدەندىرىپ، قار - مۇز ساياحات ونىمدەرى جانە جەلىلەرىن مولايتىپ، قار - مۇز ساياحات ايگىلى ماركاسىن جاراتۋعا كۇش سالۋدامىز“، - دەدى 2020 - جىلى 12 - ايدىڭ 27 - كۇنى التاي ايماقتىق مادەنيەت، دەنە تاربيە، راديو - تەلەۆيزيا جانە ساياحات مەكەمەسىنىڭ ورىنباسار باستىعى نيە پيڭ.
جاقىنعى جىلداردان بەرى التاي ايماعى”تۇنىق سۋ، جاسىل تاۋ — باعالى بايلىق، قار جامىلىپ، مۇز قۇرسانعان ٴوڭىر دە — باعالى بايلىق“ سىندى دامۋ ۇستانىمىندا تاباندى بولىپ، ساياحات ارقىلى شينجياڭدى گۇلدەندىرۋ ستراتەگياسىن تىڭعىلىقتى دايەكتىلەندىرىپ، ”300 ميلليون ادامدى قار - مۇز سپورتىنا قاتىناسۋعا جەتەكتەۋ “دى بەلسەنە اتقاردى، ”ساياحاتتى نەگىزگى تۇلعا ەتۋ، 1 - كاسىپتى جەتەكتەۋ، 2 - كاسىپتى كوتەرۋ“ سىندى دامۋ ۇستانىمىندا تاباندى بولىپ، قار - مۇز ساياحاتى مەن قار - مۇز سپورتىن پارمەندى دامىتىپ، ساياحاتتىڭ ٴتورت ماۋسىم ٴانىن اسقاقتاتا شىرقادى.
قازىر التاي ايماعى ”التايدى دۇنيە ٴجۇزىنىڭ ساياحات نىسانالى جەرى، دۇنيە ٴجۇزىنىڭ قار - مۇز سپورتىنىڭ نىسانالى جەرى ەتىپ قۇرىپ شىعۋ“ نىساناسىن ارقاۋ ەتىپ، قار - مۇز ساياحاتى كاسىپ سالاسىن زور كۇشپەن دامىتۋدا. قار - مۇز ساياحاتى جەرگىلىكتى ورىننىڭ تاماشا تانىسقىسىنا اينالىپ، التاي دا شينجياڭنىڭ قار - مۇز ساياحاتى ارقىلى ەكونوميكانى دامىتۋدىڭ وزەكتى رايوندارىنىڭ بىرىنە اينالدى.
ۇيلەسىمدى ورنالاستىرىپ، نەگىزدى بەكەمدەۋ
قار - مۇز ساياحاتىنىڭ دارەجەسىن ٴوسىرۋ نەگىزدىك قۇرىلعى قۇرىلىسىنان، اسىرەسە، قار شاڭعى الاڭىنىڭ سانى مەن ساپاسىن بىردەي جوعارىلاتۋدان ايىرىلا المايدى.
قازىر شينجياڭداعى 5S دارەجەلى 4 قار شاڭعى الاڭىنىڭ ٴبىرى بولعان التاي قالاسىنىڭ گەنەرال تاۋ قار شاڭعى الاڭىندا 40 نەشە قار شاڭعى جولى بار، قار شاڭعى جولىنىڭ جالپى ۇزىندىعى 41 كيلومەتر، بيىك تاۋدا شاڭعى تەبۋ، قارعىما شاڭعى تەبۋدى وتكىزۋ سياقتى ەل ىشىندەگى، حالىقاراداعى كوپ ساندى قار ٴۇستى تۇرلەرىنە جاتتىعۋ جانە جارىس قابىلەتىن ازىرلەگەن. 4 ميلليارد يۋاننان استام قارجى قوسىلعان قار شاڭعى دەمالىسى، سەيىل - سەرۋەن، جازعى جايلاۋ ساياحاتى، دالالىق سپورت ٴبىر تۇلعالانعان ۋنيۆەرسال حالىقارالىق دەمالىس رايونى قازىر سالىنۋ ۇستىندە، مەجەمەن بيىل سالىنىپ ٴبىتىپ، پايدالانۋعا بەرىلەدى؛ التاي تاۋى كوكتوعاي حالىقارالىق شاڭعى الاڭى قۇرىلىس تەبىنىن ارتتىرىپ، جۇڭگو قار ٴۇستى ٴتۇرى مەملەكەتتىك كوماندانىڭ جاتتىعۋ بازالارىنىڭ بىرىنە اينالدى. وسى قار شاڭعى الاڭىنىڭ قار مەزگىلى وتە ۇزاق بولىپ، ەل ىشىندەگى قار شاڭعى جاتتىعۋ ۋاقىتىن 2 اي مولشەرىندە الدىعا جىلجىتتى؛ 2019 - جىلى رەسمي اشىلعان ەكاشا حالىقارالىق قار شاڭعى الاڭى ۋيچات تەكشەسىندە الدىنالا كەلىسۋ قىزىپ، قالىڭ قار اۋەسكەرلەرىن باۋرادى؛ 2020 - جىلى 12 - ايدىڭ 22 - كۇنى قومداعى جەكپەلەڭ قار شاڭعى الاڭى اشىلدى. بۇل قار شاڭعى الاڭى — التاي تاۋى قار - مۇز ساياحات ٴىرى رايون جوباسىنداعى ماڭىزدى ٴتۇيىن، تۇگەلدەي سالىنىپ بولعاننان كەيىن، جۇڭگوداعى ەڭ ٴىرى، دۇنيەدەگى ماڭداي الدى قار شاڭعى دەمالىس رايونىنا اينالادى. بۇدان سىرت، التاي ايماعىندا تاعى دا كوپتەگەن قار شاڭعى الاڭدارى جوبالانۋ، سالىنۋ ۇستىندە، قار شاڭعى الاڭدارى مارجانداي ٴتىزىلىپ، جەرگىلىكتى ورىننىڭ قار – مۇز ساياحاتىنىڭ دامۋىن پارمەندى نەگىزبەن قامدادى.
التاي ايماقتىق مادەنيەت، دەنە تاربيە، راديو - تەلەۆيزيا جانە ساياحات مەكەمەسىنىڭ باستىعى ليۋ كىچۋاننىڭ تانىستىرۋىنا قاراعاندا، التاي قىسقى ساياحاتى قاناس رايونىن باستاماشى ەتىپ، مىڭ شاقىرىمدىق سۋرەت ٴداليزى جەلىلەس ينجەنەرياسىن اتقارىپ، ”4 رايون، ٴبىر بەلدەۋ“ قىسقى ساياحات لەنياسىن كۇش سالا قالىپتاستىرعان. ”4 رايون“ دەگەنىمىز – قاناس قوم ەرەكشە كوركەم قار مەكەنى قار – مۇز ساياحاتى دەمالىس رايونى، ۇلىڭگىر كولى قىسقى بالىق اۋلاۋ سالت - سانا سىناق رايونى، التاي قار شاڭعى ساياحاتى دەمالىس رايونى، كوكتوعاي قارلى تاۋ شاتقالىن جەكە كولىكپەن ساياحاتتاۋ دەمالىس رايونىن مەڭزەيدى؛”ٴبىر بەلدەۋ“ دەگەنىمىز – كوكتوعاي قارلى تاۋ شاتقالى – بۋرىلتوعاي ۇلىڭگىر كولى قىسقى بالىق اۋلاۋ – التاي شاڭعى تەبۋ – قاناس اسا كوركەم قار مەكەنى قىسقى التىن قار - مۇز ساياحاتى بەلدەۋىن مەڭزەيدى ەكەن.
التاي ايماعىنىڭ نىساناسى: 3 تە 5 جىل ۋاقىت جۇمساپ، بۇكىل ايماقتىڭ قىسقى ساياحاتشىلار سانىن جازعى ساياحاتتان اسىرىپ، جازعى، قىسقى ساياحاتتى ىردەي دامىتۋ. 2018 - جىلدان 2019 - جىلعا دەيىنگى قار ماۋسىمىندا، التاي ايماعىنىڭ قىسقى ساياحات ساياحاتشىلارى 3 ميلليون ادام - رەتتەن اسىپ، تىكەلەي ەكونوميكالىق كىرىسى 3 ميلليارد 700 ميلليون يۋانعا جەتتى. التاي قار - مۇز ساياحاتى مۇز قۇرسانىپ، قار قىمتاعان الاپتى باعالى بايلىققا اينالدىرۋدى جەدەلدەتۋدە.
كاسىپ سالاسى قوسىلا ارەكەتتەنىپ، بۇكىل ٴوڭىر دامىدى
جىل سوڭىندا ”ەرتىس وزەنىندەگى 1 - قىستاق“ اتالاتىن كوكتوعاي اۋدانى كوكتوعاي قالاشىعى تاراتى قىستاعىن قالىڭ قار قىمتاعانىمەن، ٴبىراق بۇل اراداعى شارۋالار تاعام جايلارى، وتباسىلىق تۇسەلحانالار، ساياحات ەستەلىك بۇيىمدارىن ساتۋ بۇرىنعىداي كۇسەت بولدى. قىسقى ساياحاتقا، اسىرەسە، التاي تاۋى كوكتوعاي حالىقارالىق قار شاڭعى الاڭىنا سۇيەنىپ، وسى قىستاقتىڭ ساياحات كاسىبىنىڭ دامۋى جىل سايىن تىڭ بەلەسكە كوتەرىلدى. قازىر قىستاقتا دامىپ جەتىلگەن وتباسىلىق تۇسەلحانادان 20 دان استامى بار.
قار – مۇز ساياحاتىنىڭ دامۋى كوكتوعاي قالاشىعىن قار – مۇز شاعىن قالاشىعى نىساناسىنا قاراي دامىتتى، كوكتوعاي اۋدانى مول قار – مۇز بايلىعىنا جانە التاي تاۋى كوكتوعاي حالىقارالىق قار شاڭعى الاڭىنا ٴتىپتى دە سۇيەنىپ، قار – مۇز ساياحاتىن زور كۇشپەن دامىتىپ، ”قار شاڭعى“ كوكتوعاي اۋدانى ساياحاتىنىڭ جاڭا تانىسقىسىنا اينالدى.
التاي ايماعىنىڭ ەڭ شىعىس شەتىندەگى شىڭگىل اۋدانى دا قار – مۇز كاسىپ سالاسىن ”قىزدىرۋعا“ كۇش سالۋدا. جەرگىلىكتى ورىن قىسقى قار – مۇز مادەنيەت، ساياحات قيمىلىن دانەكەر ەتىپ، ”قار – مۇز ساياحات كاسىبىن وڭىرلىك ماڭداي الدى كاسىپ سالاسى ەتىپ قۇرىپ شىعۋ“ سىندى دامۋ وي جەلىسىن ورتاعا قويىپ، ”ساياحات + قار شاڭعى + N “ جاڭالىق اشۋ ۇلگىسىن قالىپتاستىرۋدا.
5 – كەزەكتى جۇڭگو . جيلين حالىقارالىق قار – مۇز كاسىپ سالاسى كورمەسىندە، التاي ايماعى ”2020 - جىلعى جۇڭگونىڭ قىسقى ساياحات ايگىلى قالاسى“ بولىپ باعالاندى. جاقىنعى جىلداردان بەرى، بۋرىلتوعاي اۋدانىنىڭ قىسقى بالىق اۋلاۋ مادەنيەت – ساياحات مەرەكەسى، بۋىرشىن اۋدانىنىڭ قىراۋ مەرەكەسى، قابا اۋدانىنىڭ ”كوركى كوز تارتاتىن قار قايىڭى“ ساياحات قار - مۇز سالت - سانا ساياحاتى، قومنىڭ العاشقى جىلى سياقتى ٴبىرقىدىرۋ قار – مۇز ساياحات قيمىلدارى بارعان سايىن كوپ ادامعا تانىلىپ، التاي قار – مۇز ساياحاتىنىڭ اتاعى ۇزدىكسىز جوعارىلاۋدا.
”قازىر ٴبىز قار – مۇز ساياحاتى سارا لەنياسىن، جۇيەدەن، قار – مۇز ساياحاتى، فوتو سۋرەت ساياحاتى سياقتىلاردى قۇرۋعا بار كۇشىمىزدى سالىپ، ’قاسيەتتى جەر قاناس، قار قالاسى التاي‘ ايگىلى ماركاسىن ٴتىپتى دە ايگىلەيمىز“، - دەدى نيە پيڭ.
اۋدارعان: قادىر ماقان
