− باس شۋجي شي جينپيڭنىڭ ولكە - مينيسترلىك دارەجەلى نەگىزگى باسشى كادرلاردىڭ ارناۋلى تاقىرىپتىق زەرتتەۋ - تالقى كۋرسىندا سويلەگەن ماڭىزدى ءسوزىن ۇيرەنۋ، دايەكتىلەندىرۋ جونىندە
حالىق گازەتىنىڭ شولۋشىسى
جاڭا دامۋ ارناسىن قالىپتاستىرۋ − داۋىرمەن بىرگە ىلگەرىلەپ، ەلىمىزدىڭ ەكونوميكاسىنىڭ دامۋ دەڭگەيىن جوعارىلاتۋداعى ستراتەگيالىق تالعام، سونداي - اق ەلىمىزدىڭ حالىقارالىق ەكونوميكالىق سەلبەستىك پەن باسەكەدەگى جاڭا باسىمدىعىن تۇلعالاۋداعى ستراتەگيالىق تالعام.
ولكە - مينيسترلىك دارەجەلى نەگىزگى باسشى كادرلاردىڭ پارتيا 19 - كەزەكتى ورتالىق كوميتەتى بەسىنشى جالپى ءماجىلىسىنىڭ رۋحىن ۇيرەنۋ، دايەكتىلەندىرۋ جونىندەگى ارناۋلى تاقىرىپتىق زەرتتەۋ - تالقى كۋرسىنىڭ وقۋ باستاۋ سالتىندا باس شۋجي شي جينپيڭ بىلاي دەپ باسا دارىپتەدى: ەل ءىشى ۇلكەن اينالىمىن نەگىزگى تۇلعا ەتكەن، ەل ءىشى، حالىقارا قوس اينالىم ءبىرىن - ءبىرى جەبەيتىن جاڭا دامۋ ارناسىن جەدەل قالىپتاستىرۋ ”14 - بەسجىلدىق“ جوبا «ۇسىنىسىندا» ورتاعا قويىلعان ەلىمىز دامۋىنىڭ جالپى جاعدايىنا ساياتىن كەلەلى ستراتەگيالىق مىندەت، ونى جالپى جاعداي دەڭگەيىنەن دالمە - ءدال يگەرۋ جانە بەلسەنە ىلگەرىلەتۋ قاجەت.
”14 - بەسجىلدىق“ مەزگىلىندە ەلىمىز جاڭا دامۋ كەزەڭىنە وتەدى، بۇل جاپپاي سوتسياليستىك وسىزاماندانعان مەملەكەت قۇرىپ، ەكىنشى 100 جىلدىق كۇرەس نىساناسىنا قاراي جورىق جاسايتىن كەزەڭ، ەل ءىشى - سىرتى ورتاسىنىڭ تەرەڭ وزگەرىستەرى ءبىر سىپىرا جاڭا ورايلاردى، جاڭا سىن - سايىستاردى الا كەلەدى. شي جينپيڭ جولداستى ۇيتقى ەتكەن پارتيا ورتالىق كوميتەتى ەلىمىزدىڭ دامۋ كەزەڭىنە، ورتاسىنا، شارت - جاعداي وزگەرىسىنە قاراي جاعدايدى باعامداپ، جاڭا دامۋ ارناسىن جەدەل قالىپتاستىرۋ جونىندە كەلەلى شەشىم جاسادى. پارتيا 19 - كەزەكتى ورتالىق كوميتەتىنىڭ بەسىنشى جالپى ءماجىلىسى ەلىمىزدىڭ بولاشاقتاعى دامۋىنىڭ ۇلى جوباسىن جاساپ، جاڭا دامۋ ارناسىن جەدەل قالىپتاستىرۋ تۋرالى كەلەلى قىزمەت ورنالاستىرۋىن جاسادى. جاڭا دامۋ ارناسىن جەدەل قالىپتاستىرۋدى ورتاعا قويۋ − ءارى ەلىمىز دامۋىنداعى جاڭا ورايلاردى، جاڭا سىن - سايىستاردى تەرەڭ تانۋ، ءارى ەلىمىزدىڭ وبيەكتيۆتىك دامۋ زاڭدىلىعى مەن دامۋ اۋقىمىن سانالىلىقپەن يگەرۋ ەكەندىگىن، ”14 - بەسجىلدىق“ پەن بولاشاقتاعى ونان دا ۇزاق مەزگىلدەگى ەلىمىزدىڭ ەكونوميكالىق دامۋ ستراتەگياسىنا، جولىنا جاسالعان كەلەلى رەتتەۋ، كەمەلدەندىرۋ، ەلىمىزدىڭ ۇزاق بولاشاقتىق دامۋى مەن باياندى تىنىشتىعىن كوزدە ۇستاي وتىرىپ جاسالعان كەلەلى ستراتەگيالىق ورنالاستىرۋ ەكەندىگىن، ەلىمىزدىڭ اناعۇرلىم جوعارلى ساپالى، اناعۇرلىم ءونىمدى، اناعۇرلىم ءادىل، اناعۇرلىم باياندى، اناعۇرلىم حاۋىپسىز دامۋدى جۇزەگە اسىرۋىنا، دۇنيە ءجۇزى ەكونوميكاسىنىڭ گۇلدەنۋىن جەبەۋگە ماڭىزدى دا تەرەڭ ىقپال جاسايتىندىعىن كورە ءبىلۋىمىز كەرەك. سونىمەن بىرگە ءوزىمىزدى تياناق ەتىپ، ەل ءىشى ۇلكەن اينالىمىن ىركىلىسسىزدەندىرگەندە عانا، حالىقارالىق جاعداي قالاي قۇبىلىپ وزگەرسە دە قاشاندا كوكىرەك كەرنەگەن جالىنمەن ءومىر سۇرۋگە جانە دامي بەرۋگە بولاتىندىعىن كورە ءبىلۋىمىز كەرەك. جاڭا دامۋ ارناسىن جەدەل قالىپتاستىرۋ الدىن الا بايقاۋعا بولاتىن جانە الدىن الا بايقاۋ قيىن دولى داۋىل، سۇراپىل نوسەر، دۇلەي تولقىن ىشىندە ءوزىمىزدىڭ ءومىر ءسۇرۋ قابىلەتىمىزدى، باسەكەلىك قابىلەتىمىزدى، دامۋ قابىلەتىمىزدى، جالعاستىرۋ قابىلەتىمىزدى كۇشەيتۋ بولىپ تابىلادى.
جاڭا دامۋ ارناسىن جەدەل قالىپتاستىرۋدا ءدال يگەرۋ نەگىزىندە بەلسەندى ىلگەرىلەتۋ كەرەك. جاڭا دامۋ ارناسىن قالىپتاستىرۋدىڭ تەتىگى ەكونوميكالىق اينالىمنىڭ ىركىلىسسىز، بوگەتسىز بولۋىندا. ءسوز جوق، قامداۋ جاعىنداعى قۇرىلىمدىق رەفورمانى تەرەڭدەتۋ سىندى نەگىزگى جەلىگە تاباندى بولىپ، ”ءۇشتى ازايتۋ، ءبىردى تومەندەتۋ، ءبىردى تولىقتاۋدىڭ“ ماڭىزدى مىندەتتەرىن ۇزدىكسىز ورىنداپ، كاسىپ سالاسى قۇرىلىمىن جاپپاي ساپالىلاندىرىپ جانە دەڭگەيىن جوعارىلاتىپ، جاڭالىق اشۋ قابىلەتىن، باسەكەلىك قابىلەتتى جانە جالپىلىق قۋاتتى ءوسىرىپ، قامداۋ جۇيەسىنىڭ سەرپىمدىلىگىن كۇشەيتىپ، اناعۇرلىم جوعارى ءونىمدى جانە اناعۇرلىم جوعارى ساپالى ۇسىنىلىم - شىعارىلىم قاتىناسىن قالىپتاستىرىپ، ەكونوميكانىڭ جوعارى دەڭگەيدەگى ديناميكالىق تەپە - تەڭدىگىن جۇزەگە اسىرۋ كەرەك. جاڭا دامۋ ارناسىن قالىپتاستىرۋدىڭ ەڭ ماندىك ەرەكشەلىگى − جوعارى دەڭگەيدەگى ءوز كۇشىنە سۇيەنۋدى، ءوزىن الۋەتتەندىرۋدى جۇزەگە اسىرۋ، ءسوز جوق، دەربەس جاڭالىق اشۋدى اناعۇرلىم دارىپتەپ، عىلىم - تەحنيكالىق جاڭالىق اشۋ جونىندەگى ورنالاستىرۋلاردى جالپى بەتتىك كۇشەيتىپ، باسىم بايلىقتاردى بىرىكتىرىپ، جاڭالىق اشۋدان قامال الۋدىڭ ”باستاماشى تاعايىنداۋ“ ءتۇزىلىسىن، مەحانيزمىن پارمەندى، ءتارتىپتى ىلگەرىلەتىپ، جاڭالىق اشۋ تىزبەگى مەن كاسىپ سالاسى تىزبەگىنىڭ ۇشتاسۋىن كۇشەيتۋ كەرەك. قۋاتتى ەل ءىشى بازارىن قالىپتاستىرۋ جاڭا دامۋ ارناسىن قالىپتاستىرۋدىڭ ماڭىزدى تىرەگى، ىشكى سۇرانىستى كەڭەيتۋدىڭ ءونىمدى ءتۇزىمىن ورناتىپ، ىشكى سۇرانىستىڭ كومەسكى كۇشىن ىسكە قوسىپ، كەمەلدى ىشكى سۇرانىس جۇيەسىن جەدەل جەتىلدىرىپ، سۇرانىس جاعىن باسقارۋدى كۇشەيتىپ، تۇرعىنداردىڭ تۇتىنۋىن كەڭەيتىپ، تۇتىنۋدىڭ دەڭگەيىن جوعارىلاتىپ، اسا ءىرى كولەمدەگى ەل ءىشى بازارىن قۇرۋدى باياندى تاريحي ۇردىسكە اينالدىرۋ كەرەك. جاڭا دامۋ ارناسىن قالىپتاستىرىپ، جوعارى دەڭگەيدە سىرتقا ەسىك اشۋدا، ءسوز جوق، قۋاتتى ەل ءىشى ەكونوميكالىق اينالىم جۇيەسىنە جانە ورنىقتى، بەكەم نەگىزگى اۋقىمعا يە بولۋ كەرەك. ەلىمىزدىڭ حالىقارالىق سەلبەستىك پەن باسەكەگە ارالاسۋىنىڭ جاڭا باسىمدىعىن تۇلعالاپ، حالىقارالىق اينالىم ارقىلى ەل ءىشى ۇلكەن اينالىمىنىڭ ونىمدىلىگى مەن دەڭگەيىن جوعارىلاتۋعا ءمان بەرىپ، ەلىمىزدىڭ ءوندىرىس فاكتورلارىنىڭ ساپاسىن جانە سەپتەلۋ دەڭگەيىن جاقسارتىپ، ەلىمىز كاسىپ سالاسىنىڭ تيبىن وزگەرتۋدى، دارەجەسىن جوعارىلاتۋدى ىلگەرىلەتۋ كەرەك.
باس شۋجي شي جينپيڭ بىلاي دەپ اتاپ كورسەتتى: ”قازىر دۇنيە ءجۇزى 100 جىلدا بولماعان زور وزگەرىستى باستان كەشىرۋدە، دەگەنمەن ۋاقىت پەن جاعداي ءبىزدىڭ جاقتا تۇر، بۇل تاباندىلىعىمىز بەن قايراتىمىزدىڭ تياناعى، سونداي - اق بەكىمىمىز بەن سەنىمىمىزدىڭ تياناعى. سونىمەن بىرگە مىنانى، ءسوز جوق، سەرگەكتىكپەن كورە ءبىلۋ كەرەك: كەزەكتە جانە الداعى ءبىر مەزگىلدە ەلىمىزدىڭ دامۋى ءالى دە ماڭىزدى ستراتەگيالىق وراي مەزگىلىندە تۇرعانىمەن، وراي مەن سىن - سايىستىڭ بارلىعىندا جاڭا دامۋ، وزگەرىس جارىققا شىعادى، وراي مەن سىن - سايىستىڭ ۇلكەندىگى بۇرىن بولماعان دەڭگەيدە، جالپى تۇلعالىق جاقتان وراي سىن - سايىستان ۇلكەن“. تاريحتىڭ دۇرىس جاعىندا تۇرىپ، وراي تانىمى مەن حاۋىپ - قاتەر تانىمىن كۇشەيتىپ، جاڭا دامۋ ۇستانىمىن بۇلجىماي دايەكتىلەندىرىپ، جاڭا دامۋ ارناسىن جەدەل قالىپتاستىرىپ، جوعارى ساپالى دامۋدى ىلگەرىلەتىپ، ءوز ءىسىمىزدى بار كۇشپەن ويداعىداي ىستەسەك، ءبىز، ءسوز جوق، جاپپاي سوتسياليستىك وسىزاماندانعان مەملەكەت قۇرۋدىڭ جاڭا ساپارىندا ءتىپتى دە ۇلكەن كەرەمەت جاراتا الامىز.
(شينحۋا اگەنتتىگىنىڭ 1 - ايدىڭ 14 - كۇنى بەيجيڭنەن بەرگەن حابارى)
