شينحۋا اگەنتتىگىنىڭ 1 - ايدىڭ 18 - كۇنى بەيجيڭنەن بەرگەن حابارى (ءتىلشى چىن ۋيۋي، ۋاڭ يۇيشياۋ). جۇڭگو ەكونوميكاسى ماڭىزدى بەلەستى قارسى الدى. مەملەكەتتىك ساناق مەكەمەسى 1 - ايدىڭ 18 - كۇنى مىناداي ساندى مالىمەت جاريالادى: 2020 - جىلى جۇڭگونىڭ ەل ىشىندەگى ىشكى ءوندىرىس جالپى ءونىم قۇنى (GDP)101 تريلليون 598 ميلليارد 600 ميلليون يۋانعا جەتىپ، تۇڭعىش رەت 100 تريلليون يۋاندىق ۇلكەن وتكەلدەن ءوتتى.
”بۇل ەلىمىزدىڭ ەكونوميكالىق قۋاتىنىڭ، عىلىم - تەحنيكالىق قۋاتىنىڭ، جالپىلىق مەملەكەت قۋاتىنىڭ تاعى ءبىر تىڭ، ۇلكەن بەلەسكە كوتەرىلگەندىگىن كورسەتەدى“، - دەدى مەملەكەتتىك دامۋ جانە رەفورما كوميتەتىنىڭ ورىنباسار مەڭگەرۋشىسى، قوسىمشا مەملەكەتتىك ساناق مەكەمەسىنىڭ باستىعى نيڭ جيجى باعا بەرىپ.
GDP ءبىر مەملەكەتتىڭ نەمەسە ءوڭىردىڭ ەكونوميكالىق كولەمى مەن دامۋ دەڭگەيىن ولشەيتىن ماڭىزدى كورسەتكىش. 1952 - جىلعى 67 ميلليارد 900 ميلليون يۋاننان بۇگىنگى تاڭدا 100 تريلليون يۋاندىق كولەمنەن اسقان دۇنيە جۇزىندەگى 2 - ۇلكەن ەكونوميكالىق تۇلعا بولعانعا دەيىن، جۇڭگونىڭ جالپىلىق مەملەكەت قۋاتى تاريحي سەكىرىستى جۇزەگە اسىرىپ، ادامزاتتىڭ دامۋ تاريحىنداعى كەرەمەت دەپ اتالدى.
جۇڭگو ەكونوميكاسىنىڭ ۇلى شارىقتاۋدى جۇزەگە اسىرۋى رەفورما جاساۋ، ەسىك اشۋ سىندى تاريحي تاڭداۋدىڭ ارقاسى. 1978 - جىلى جۇڭگونىڭ GDPى 367 ميلليارد 900 ميلليون يۋان بولىپ، دۇنيە ءجۇزى ەكونوميكاسىنىڭ ％1.7تىك ۇلەسىن يەلەپ، دۇنيە ءجۇزى بويىنشا 11 - ورىندا تۇرعان.
وسىدان سوڭ، جۇڭگو ەكونوميكاسى شاپشاڭ دامىپ، 1986 - جىلى GDP ءبىر تريلليون يۋاننان استى؛ 2000 - جىلى 10 تريلليون يۋاننان اسىپ، يتاليانىڭ الدىنا ءوتىپ دۇنيە ءجۇزى بويىنشا 6 - ۇلكەن ەكونوميكالىق تۇلعاعا اينالدى؛ 2010 - جىلى 40 تريلليون يۋاننان اسىپ، جاپونيانىڭ الدىنا ءوتىپ دۇنيە ءجۇزى بويىنشا 2 - ۇلكەن ەكونوميكالىق تۇلعاعا اينالىپ، دۇنيە ءجۇزى ەكونوميكاسىندا ％9.2تىك ۇلەس يەلەدى.
پارتيا 18 - قۇرىلتايىنان بەرى جۇڭگو ەكونوميكاسى ۇزدىكسىز ءوستى. 2016 - جىلى 2017 - جىلى GDP ىركەس - تىركەس 70 تريلليون يۋاندىق، 80 تريلليون يۋاندىق وتكەلدەن ءوتىپ، 2018 - جىلى 90 تريلليون يۋاندىق وتكەلدەن اتتاپ، دۇنيە ءجۇزى ەكونوميكاسىنداعى ۇلەسى ％16تەن استى.
2020 - جىلى ىندەتتىڭ ۇلكەن سىناعى الدىندا، ەلىمىز ىندەتتى الدىمەن تەجەدى، جۇمىستى، ءوندىرىستى الدىمەن قالپىنا كەلتىردى، ەكونوميكالىق ارتۋدىڭ تەرىس ماننەن وڭ ارتۋىن الدىمەن جۇزەگە اسىردى، دۇنيە ءجۇزى ەكونوميكاسىنداعى ۇلەسى 2019 - جىلداعى ％16.3تەن ％17 مولشەرىنە كوتەرىلدى.
بۇل ناتيجەگە، ارينە، وڭاي - وسپاق قول جەتكەن جوق، جۇڭگو الەمدىك ەكونوميكاداعى ۇلەسى اناعۇرلىم سالماقتى، قۇنى اناعۇرلىم جوعارى جەتەكشىگە اينالۋ ۇستىندە. ايتكەنمەن، مىنانى جىعا تانۋ كەرەك: ەلىمىزدىڭ جان باسىندىق GDPى ءالى دە دۇنيە ءجۇزىنىڭ ورتاشا دەڭگەيىنەن تومەن تۇر، باستى دامىعان ەلدەرمەن ءالى دە ءبىرتالاي پارىق بار.
بۇل جونىندە نيڭ جيجى بىلاي دەدى: ەلىمىز ءالى دە دۇنيە ءجۇزى بويىنشا ەڭ ۇلكەن وركەندەپ كەلە جاتقان مەملەكەت، دامۋدىڭ بىركەلكى بولماۋ، تولىق بولماۋ ماسەلەسى ءالى دە كورنەكتى، دامۋدىڭ بولاشاقتىق نىساناسىن جۇزەگە اسىرۋ ءالى دە قاجىرلى قۇلشىنىستى قاجەت ەتەدى.
جاڭا تاريحي باستامادا پارتيا 19 - كەزەكتى ورتالىق كوميتەتىنىڭ بەسىنشى جالپى ءماجىلىسى جاڭا جوبا كەسكىندەدى: 2035 - جىلى ەل ىشىندەگى جان باسىندىق ىشكى ءوندىرىس جالپى ءونىم قۇنىن ورتا دارەجەلى دامىعان مەملەكەتتەر دەڭگەيىنە جەتكىزۋ. ماماندار تالداۋ جاساپ: بۇل دەگەنىمىز قازىرگى تۇراقتى باعا بويىنشا ەسەپتەگەندە، 2035 - جىلى ەلىمىزدىڭ GDPى قازىرگى 100 تريلليون يۋاندىق نەگىزدە تاعى ءبىر قاتتالىپ، 200 تريلليون يۋانعا جەتۋى كەرەكتىگىن كورسەتەدى، - دەدى.
