تيانشان تورى   ›   جاڭالىقتار   ›   ماڭىزدى حابارلار

شي جينپيڭ لاوس حالىق توڭكەرىستىك پارتياسى ورتالىق كوميتەتىنىڭ باس شۋجيى تۇڭلۇنمەن تەلەفوندا سويلەستى

  شينحۋا اگەنتتىگىنىڭ 1 - ايدىڭ 21 - كۇنى بەيجيڭنەن بەرگەن حابارى. 1 - ايدىڭ 21 - كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ ۇسىنىس بويىنشا لاوس حالىق توڭكەرىستىك پارتياسى ورتالىق كوميتەتىنىڭ باس شۋجيى تۇڭلۇنمەن تەلەفوندا سويلەستى.

  شي جينپيڭ جۇڭگو پارتياسى، ۇكىمەتى، حالقى اتىنان، تۇڭلۇننىڭ لاوس پارتياسى ورتالىق كوميتەتىنىڭ باس شۋجيى بولىپ سايلانعاندىعىن قۇتتىقتادى. شي جينپيڭ مىنانى ءبىلدىردى: لاوس پارتياسىنىڭ 11 - قۇرىلتايى جەڭىسپەن اشىلىپ، پارتيانى جونگە سالۋعا، مەملەكەتتى جونگە سالۋعا قاتىستى ءبىر قىدىرۋ جاڭا وي جەلىنى، جاڭا شارانى العا قويدى، بۇل لاوس سوتسياليزم ىستەرىنىڭ ۇزدىكسىز العا دامۋىن ىلگەرىلەتۋ جونىنەن كەلەلى ماڭىز الادى. تۇڭلۇن جولداس باستاعان جاڭا كەزەكتى لاوس پارتيا ورتالىق كوميتەتىنىڭ باسشىلىعىندا لاوس بۇكىل پارتيانىڭ، بۇكىل ەل حالقىنىڭ ءبىر نيەتپەن ىنتىماقتاسىپ، 11 - قۇرىلتايدا تۇراقتاندىرعان نىسانا - مىندەتتەردى قۇلشىنا ىسكە اسىراتىندىعىنا سەنەمىن.

  شي جينپيڭ بىلاي دەپ اتاپ كورسەتتى: جۇڭگو مەن لاوس تاۋ - وزەنى تۇتاسقان تاتۋ كورشىلەر، كوممۋنيستىك پارتيا باسشىلىعىنا تاباندى بولۋ، سوتسياليزم بەتالىسىنا تاباندى بولۋ − جۇڭگو مەن لاوس قارىم - قاتىناسىنىڭ ماندىك ەرەكشەلىگى. قازىر جۇڭگو مەن لاوس قارىم - قاتىناسى تاريحتاعى ەڭ جاقسى مەزگىلدە تۇر، دۇنيە جۇزىندە 100 جىلدا بولماعان زور وزگەرىس پەن بۇكىل الەمدىك ىندەتتىڭ قاباتتاسۋى ىقپالى الدىندا جۇڭگو جاق لاوس جاقپەن بىرگە جوعارى جىكتەگىلەردىڭ بارىس - كەلىسىن اناعۇرلىم جيىلەتىپ، ستراتەگيالىق پىكىر اۋىستىرۋدى كۇشەيتىپ، پارتيانى جونگە سالۋ، مەملەكەتتى جونگە سالۋ تاجىريبەلەرىن اۋىستىرۋدى تەرەڭدەتۋدى قالايدى. ەكى جاق جۇڭگو - لاوس ەكونوميكالىق ءدالىزى جانە جۇڭگو - لاوس تەمىر جولى سياقتى ءىرى نىسان قۇرىلىستارىن ورنىقتى قاداممەن ىلگەرىلەتىپ، جۇڭگو مەن لاوستىڭ ”ءبىر بەلدەۋ، ءبىر جولدى“ بىرگە قۇرۋىن ىلگەرىلەتۋدە اناعۇرلىم كوپ جەتىستىكتەرگە قول جەتكىزۋ كەرەك. سونىمەن بىرگە ەكى جاق مادەنيەت، جاستار، ساياحات سياقتى سالالارداعى اۋىس - كۇيىستى، سەلبەستىكتى تەرەڭدەتىپ، جۇڭگو - لاوس تاعدىرلاس ورتاق تۇلعاسىنىڭ گۋمانيتارلىق ءمانىن ۇزدىكسىز بايىتۋ كەرەك. جۇڭگو جاق لاوس جاقتىڭ ىندەتكە قارسى اتتانۋداعى قۇلشىنىسىن ۇزدىكسىز قولدايدى، لاوس جاققا جاڭا تيپتى ايدارشا ۆيرۋس وكپە قابىنۋ ۆاكسيناسىن كومەككە بەرۋدى بەلسەنە ويلاستىرۋدى قالايدى. جۇڭگو جاق لاوس جاقپەن حالىقارالىق جانە وڭىرلىك ىستەردە سايكەسۋدى جانە سەلبەسۋدى كۇشەيتىپ، بىرگە دامىپ گۇلدەنۋدى جەبەۋدى قالايدى. شي جينپيڭ تۇڭلۇننىڭ جاڭا، ماڭىزدى قىزمەت ورنىندا ءتىپتى زور، جاڭا جەتىستىكتەرگە قول جەتكىزۋىن تىلەدى.

  تۇڭلۇن مىنالاردى ءبىلدىردى: باس شۋجي شي جينپيڭ جولداستىڭ لاوس پارتياسى 11 - قۇرىلتايىنىڭ جەڭىسپەن جابىلىپ كوپ وتپەي مەنىمەن تەلەفوندا سويلەسكەنىنە ەرەكشە العىس ايتامىن، بۇل باس شۋجي جولداستىڭ لاوس پەن جۇڭگو قارىم - قاتىناسىنا وسكەلەڭ ءمان بەرەتىندىگىن جانە لاوس پەن جۇڭگو ەكى پارتياسىنىڭ، ەكى ەلدىڭ، ەكى ەل حالقىنىڭ تەرەڭ سۇيىسپەنشىلىگى مەن ءداستۇرلى دوستىعىن تولىق ايگىلەدى. وسى رەت لاوس پارتياسى 11 - قۇرىلتايى ءبىر قىدىرۋ ماڭىزدى جەتىستىكتەرگە قول جەتكىزدى، لاوس پارتياسى پرينسيپتى تۇردە جاپپاي جاڭالىق جاساۋ لۋشيانىنا تاباندى بولىپ، حالىقتى باستاپ ءبىر قىدىرۋ جاڭا جەڭىستەرگە قول جەتكىزىپ، لاوستىڭ سوتسياليستىك قۇرىلىسىن ىلگەرىلەتۋگە مىعىم نەگىز قالايدى. لاوس جاق جاڭا تيپتى ايدارشا ۆيرۋس وكپە قابىنۋ ىندەتىنە توتەپ بەرۋدى قامتىعان لاوستىڭ دامۋىنداعى ءاربىر مەزگىلدە جۇڭگو جاقتىڭ لاوسقا كورسەتكەن قىمباتتى قولداۋىنا جانە كومەگىنە شىن جۇرەكتەن العىس ايتادى، لاوس - جۇڭگو تاعدىرلاس ورتاق تۇلعاسى ارەكەت جوسپارىن تياناقتاندىرۋ قىزمەتىن ۇزدىكسىز ىلگەرىلەتىپ، جۇڭگو جاقپەن ”ءبىر بەلدەۋ، ءبىر جولدى“ بىرگە قۇرۋ سياقتى سالالارداعى سەلبەستىكتى كۇشەيتىپ، ءارقايسى ساتىداعى دوستىق اۋىس - كۇيىستى جەبەيدى. لاوس جاق شي جينپيڭ جولداستى ۇيتقى ەتكەن جۇڭگو كوممۋنيستىك پارتياسى ورتالىق كوميتەتىنىڭ باسشىلىعىندا جۇڭگو حالقىنىڭ جاپپاي سوتسياليستىك وسىزاماندانعان مەملەكەت قۇرۋدا جاڭا جەتىستىكتەرگە، ءسوز جوق، قول جەتكىزىپ، بەلگىلەنگەن كۇرەس نىساناسىن دەر كەزىندە ورىندايتىندىعىنا كامىل سەنەدى.

  تەلەفوندا سويلەسكەن كەزدە شي جينپيڭ مەن تۇڭلۇن جۇڭگو - لاوس دوستىق جىلىنىڭ رەسمي باستالعاندىعىن، جەلىلەس قۇتتىقتاۋ قيمىلدارى وتكىزىلىپ، جۇڭگو مەن لاوستىڭ دوستىعىن جۇرت جۇرەگىنە تەرەڭ ۇيالاتۋ ىلگەرىلەتىلەتىندىگىن بىرگە جاريالادى.

جاۋاپتى رەداكتور : ريزا حاميت

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.