شاعانتوعاي:
”ءبىر جۇمىس“ توپتاماسى ۋاقىت ۇنەمدەپ، كوڭىلدى ورنىقتىرىپ، حالىق كوڭىلىنەن شىقتى
□ انار بۇلت/شينجياڭ گازەتىنىڭ ءتىلشىسى ءرايدا
”ماتەريالداردى الدىن الا دايىنداپ قويساڭىز، دەرەۋ قولعا تيەدى“. 1 - ايدىڭ 20 - كۇنى شاعانتوعاي اۋداندىق اكىمشىلىك ىستەر جونىنەن قىزمەت وتەۋ ورتالىعىنىڭ ءبىرىنشى قاباتىنداعى ۇلكەن زالدا نۇرمانگۇل قادىر الگىندە عانا قولىنا تيگەن تيجارات كۋالىگىن كورسەتىپ: ”بۇرىن 3 قىزمەت كۇنىندە ارەڭ بىتەدى ەكەن، قازىر ماتەريال ينتەرنەتتەن قارالادى، قاعاز نۇسقاسىنىڭ قاجەتى جوق، كوپتەگەن بۋىندار ىقشامدالعان“، - دەدى ءدان ريزالىقپەن.
بۇقارانىڭ ءىس ءبىتىرۋ ونىمدىلىگىنىڭ جوعارىلاۋى وسى ورتالىقتىڭ ”ءبىر جۇمىس“ توپتاماسى بويىنشا قىزمەت وتەۋىنىڭ ارقاسى، اتاپ ايتقاندا، سالالاپ بىرىكتىرۋ، جۇمىس ءتارتىبىن قايتا جاساۋ، ينفورماتسيادان بىرگە يگىلىكتەنۋ ارقىلى اۋەلدە كوپتەگەن تاراۋعا، كوپتەگەن ساتىعا بارىپ بىتىرىلەتىن جۇمىستار ينتەرنەتتەگى ءبىر تۇعىردا نەمەسە ينتەرنەتتەن تىسقارعى ءبىر تەرەزەلىكتە ءبىر تۇتاس ءبىتىرىلىپ، ”ءبىر تەرەزەلىكتە قابىلداۋ، ءبىر رەت حابارلاندىرۋ، ءبىر كەستەمەن ءوتىنىش بەرۋ، ءبىر تۇتاس ماتەريال، ءبىر رەت تاپسىرۋ، ءبىر رەت جاۋاپ بەرۋ، ءبىر رەت ءبولىپ ىستەۋ، ءبىر تەرەزەلىكتە كۋالىك شىعارۋ، ءبىر نومىرمەن قىزمەت وتەۋ، ءبىر كىنوپكامەن باعالاۋ“ سىندى جۇمىس ءبىتىرۋ ۇلگىسى قالىپتاستى.
”بىلتىر 10 - ايدا قىزمەت وتەۋ جۇيەسى جۇمىس باستاعان ەدى، جۇرتتىڭ جاقسى باعاسىنا يە بولدى“. ورتالىقتىڭ جاۋاپتىسى ۋاڭ جيڭ بىلاي دەدى: العاشقى توپتاعى ”ءبىر جۇمىس“ توپتاماسىندا 157 ءىس بار، بۇلار بازارعا كىرۋ رۇقساتى، سۋ يگىلىگى، تۇرعىن ءۇي قۇرىلىسى، جىلجىمايتىن مۇلىك ساۋداسىن تىركەۋ سياقتى تۇرلەردى قامتيدى، ”كاسىپتىك راسىمدەۋدىڭ الدىندا قالا تۇرعىندارى ۇلكەن زالداعى قىزمەت وتەۋ تەكشەسىنە بارىپ قىزمەتكەرلەردەن كەڭەس سۇراپ، قاجەتتى ماتەريالداردى جازىپ دايىندايدى، ونان سوڭ قىزمەتكەرلەر قالا تۇرعىندارىنا سايكەستى تەرەزەلىككە بارىپ جۇمىس بىتىرۋگە نۇسقاۋ جاسايدى“.
”بۇرىن جۇمىس بىتىرۋدە بىرنەشە تاراۋعا شاپقىلايتىنبىز، كەزەككە تۇرىپ تەرەزەلىكتىڭ الدىنا بارعاندا عانا ماتەريالدىڭ تولىق ەمەستىگىن ءبىلىپ، قايتا باستان باستايسىڭ. قازىر قىزمەت وتەۋ تەكشەسىندەگى قىزمەتكەرلەر الدىن الا كومەكتەسىپ ماتەريالداردى دۇرىستاپ بەرەدى، ونىڭ ۇستىنە تاراۋلاردىڭ جۇمىس ءبىتىرۋ تەرەزەلىكتەرى ءبىر جەردە، ارى - بەرى شاپقىلاپ جۇرمەيسىڭ، وتە قولايلى، ۋاقىت ۇنەمدەپ، كوڭىلدى ورنىقتىردى“، - دەدى نۇرمانگۇل قادىر.
”پارتيا 19 - كەزەكتى ورتالىق كوميتەتىنىڭ بەسىنشى جالپى ماجىلىسىندە اكىمشىلىك ىستەر قىزمەت وتەۋىن ولشەمدەندىرۋ، ارناعا ءتۇسىرۋ، قولايلىلاستىرۋدى ىلگەرىلەتۋ العا قويىلدى. الداعى ۋاقىتتا ءبىز كاسىپورىندار مەن بۇقارانىڭ جۇمىس ءبىتىرۋىن ۇزدىكسىز ساپالىلاندىرىپ، شارۋاشىلىق ساۋدا ورتاسىن جاقسارتۋ شارالارىن ەگجەي - تەگجەيلى، ناقتى تياناقتاندىرىپ، ونان ارى حالىققا قولايلىلىق تۋدىرىپ، حالىققا تيىمدىلىك جاسايمىز. ءبىز بيىل ’باسقا جەردە ءبىر تۇتاس ءبىتىرۋ‘ كاسىبىن اشىپ، ءتىپتى جاقسى شارۋاشىلىق ساۋدا ورتاسىن جانە ءتىپتى جاناسىمدى قىزمەت وتەۋدى ازىرلەيمىز“، - دەدى ۋاڭ جيڭ.
