شينحۋا اگەنتتىگىنىڭ 1 - ايدىڭ 24 - كۇنى بەيجيڭنەن بەرگەن حابارى (ءتىلشى باي يىڭ). ورتالىق راديو - تەلەۆيزيا باس ستانسياسى، شينجياڭ ۇيعۇر اۆتونوميالى رايوندىق پارتكوم ۇگىت ءبولىمى بىرلەسىپ تۇسىرگەن 8 سەريالى حۇجاتتى فيلم «جۇڭگو شينجياڭ تاريح ىزدەرى» جاقىندا ورتالىق تەلەۆيزياسىنىڭ امبەباپ ارناسىندا قويىلادى. فيلم تاريح، ۇلت، ءدىن، مادەنيەت سىندى 4 تۇرعى ارقىلى ارحەولوگيالىق تابىستارمەن جانە بەينە جازبا، ءتىل ارقىلى شينجياڭ ءوڭىرىنىڭ جۇڭحۋا وركەنيەتىنىڭ ۇلكەن اياسىنداعى تاريحي تامىرلاستىعىن ايشىقتاپ كورسەتەدى.
ورتالىق راديو - تەلەۆيزيا باس ستانسياسىنىڭ تانىستىرۋىنا قاراعاندا، «جۇڭگو شينجياڭ تاريح ىزدەرىندە» جىلنامالىق قۇرىلىم قولدانىلىپ، چين - حان، ۋي - جين، سۇي - تاڭ، موڭعۇل يۋان، ميڭ - چيڭ، مينگو جانە جاڭا جۇڭگو قاتارلى تاريحي داۋىرلەردەن ءوتىپ، شينجياڭنىڭ جەرگىلىكتى تاريحى، ۇلتتاردىڭ دامۋ تاريحى، دىندەردىڭ وزگەرۋ تاريحى، وركەنيەتتەردىڭ توعىسۋ تاريحى سىندى 4 نەگىزگى تاقىرىپ قامتىلىپ، ەل ءىشى - سىرتىنداعى ونداعان تاريحشى مەن ارحەولوگيا ماماندارىنا تىلشىلىك جاسالعان.
تانىستىرۋعا قاراعاندا، فيلمدە جۇڭگو شينجياڭ وڭىرىندەگى كوپتەگەن كەلەلى تاريحي فاكتتەر تۇسىندىرىلگەن: شينجياڭ جۇڭگو تەرريتورياسىنىڭ ايرىلماس ءبىر بولىگى، شينجياڭداعى ءار ۇلت حالقى جۇڭحۋا ۇلتى وتباسىنىڭ تامىرلاس مۇشەلەرى، شينجياڭ ەجەلدەن كوپ ءدىن قاتار ءومىر سۇرگەن ءوڭىر، شينجياڭداعى ءار ۇلت مادەنيەتى جۇڭحۋا مادەنيەتىنىڭ قۇرامداس بولىگى.
