شينحۋا اگەنتتىگىنىڭ 1 - ايدىڭ 25 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 1 - ايدىڭ 25 - كۇنى كەشتە دومينيكانىڭ زۇڭليى سكەرريتپەن تەلەفوندا سويلەستى.
شي جينپيڭ بىلاي دەپ اتاپ كورسەتتى: جۇڭگو مەن دومينيكانىڭ ارالىعى شالعاي بولعانىمەن، ەكى ەل ءبىر - بىرىنە قۇرمەت ەتەتىن، تەڭ تۇرعىدا ءوزارا پايدا جەتكىزەتىن جاقسى دوستار. ديپلوماتيالىق قارىم - قاتىناس ورناتقان 17 جىلدان بەرى جۇڭگو - دومينيكا قارىم - قاتىناسى باياندى ىلگەرىلەۋشىلىككە قول جەتكىزدى، ەكى جاق ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ءبىرىن - ءبىرى قولداپ، نەگىزدىك قۇرىلعىلار قۇرىلىسى، اۋىل شارۋاشىلىعى، ەمدەۋ، وقۋ - اعارتۋ سياقتى سالالاردا تاماشا سەلبەستىك جاسادى، ەكى ەل حالقىنىڭ دوستىعى كۇن سايىن تەرەڭدەدى. جۇڭگو جاق دومينيكا جاقتىڭ جۇڭگومەن قارىم - قاتىناستى دامىتۋدى ديپلوماتيادا الدىمەن ويلاساتىن بەتالىس ەتكەندىگىن القايدى، دومينيكانىڭ ەكونوميكالىق، قوعامدىق دامۋىنا مۇمكىندىگىنشە ۇزدىكسىز كومەكتەسۋدى قالايدى. مەن ەكى جاقتىڭ بىرگە قۇلشىنۋىندا جۇڭگو - دومينيكا دوستىق سەلبەستىك قارىم - قاتىناسىنىڭ، ءسوز جوق، اناعۇرلىم جاقسى داميتىندىعىنا سەنەمىن.
شي جينپيڭ بىلاي دەپ باسا دارىپتەدى: توسىن تۋىلعان جاڭا تيپتى ايدارشا ۆيرۋس وكپە قابىنۋ ىندەتى الدىندا جۇڭگو مەن دومينيكا قول ۇستاسا ىندەتكە قارسى اتتانىپ، ءوزارا قارايلاساتىن تەرەڭ دوستىق سۇيىسپەنشىلىكتى ايگىلەدى. جۇڭگو جاق دومينيكا جاقتىڭ ىندەتكە قارسى اتتانۋىنا ۇزدىكسىز بار كۇشپەن قولداۋ كورسەتىپ، دومينيكانى قامتىعان وركەندەپ كەلە جاتقان ەلدەرگە كومەكتەسىپ جانە قولداۋ كورسەتىپ، ۆاكسينانى ءار ەل حالقى ىستەتە الاتىن، ىستەتۋگە جاعدايى كەلەتىن الەۋمەتتىك ونىمگە اينالدىرۋعا قۇلشىنىپ، ۆاكسينانىڭ جالپىلاسۋى مەن قولجەتىمدى بولۋىن جۇزەگە اسىرۋعا جۇڭگو ۇلەسىن قوسادى. جۇڭگو مەن دومينيكا ەكى جاق دۇنيە جۇزىلىك دەنساۋلىق ساقتاۋ ۇيىمىنىڭ ءتيىستى رول اتقارۋىن باتىل قولداپ، ادامزاتتىڭ دەنساۋلىق ساقتاۋ سالاماتتىق ورتاق تۇلعاسىن قۇرۋدى بىرگە ىلگەرىلەتۋى كەرەك.
سكەرريت مىنالاردى ءبىلدىردى: دومينيكا مەن جۇڭگو ەكى ەل ديپلوماتيالىق قارىم - قاتىناس ورناتقاننان بەرى، ەكى جاق باستان - اياق ءبىر - بىرىنە قۇرمەت ەتىپ، ءوزارا تەڭ مامىلە جاساپ، ءىرى ەل مەن شاعىن ەل قارىم - قاتىناسىنىڭ ۇلگىسىنە اينالدى. جۇڭگو ۇكىمەتى حالىقتى وزەك ەتۋگە تاباندى بولىپ، دامۋداعى بىركەلكىسىزدىك ماسەلەسىن شەشۋگە كۇش سالىپ، دومينيكانىڭ جانە باسقا دا وركەندەپ كەلە جاتقان ەلدەردىڭ ەكونوميكالىق، قوعامدىق دامۋىنا قۇندى كومەك بەردى. جۇڭگو جاق دومينيكا قاتارلى ەلدەردىڭ ىندەتكە قارسى اتتانۋىنا ەمدەۋ زاتتىق ماتەريالدارىن كومەككە بەردى ءارى ۆاكسينانىڭ وركەندەپ كەلە جاتقان ەلدەردە جالپىلاسۋى مەن قولجەتىمدى بولۋىن جۇزەگە اسىرۋعا ۇلەس قوساتىندىعىنا ۋادە بەردى. جۇڭگو دۇنيە جۇزىنە ۇلگى بولدى، دومينيكانىڭ سەنىم ارتاتىن ناعىز دوسى. دومينيكا جاق ءبىر جۇڭگو پرينسيبىنە تاباندى بولادى، جۇڭگونىڭ بەيبىت بىرلىككە كەلۋىن قولدايدى، ءارقانداي كۇشتىڭ جۇڭگونىڭ ىشكى ىسىنە كيلىگۋىنە باتىل قارسى تۇرادى، شياڭگاڭعا، تايۋانعا ساياتىن ماسەلەلەردە جۇڭگومەن باتىل بىرگە تۇرادى. دومينيكا جاق جۇڭگو جاقتىڭ دۇنيە ءجۇزىنىڭ كليمات وزگەرىسىنە توتەپ بەرۋدە باسشىلىق رول اتقارعاندىعىن القايدى، ”ءبىر بەلدەۋ، ءبىر جولدى“ بىرگە قۇرۋعا بەلسەنە ات سالىسىپ، دومينيكا - جۇڭگو قارىم - قاتىناسىنىڭ، سونداي - اق كارايب تەڭىزى جاعالاۋىنداعى ەلدەردىڭ جۇڭگومەن قارىم - قاتىناسىنىڭ ۇزدىكسىز دامۋىن ىلگەرىلەتەدى.
شينحۋا اگەنتتىگىنىڭ 1 - ايدىڭ 25 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 1 - ايدىڭ 25 - كۇنى كەشتە حالىقارالىق وليمپيادا كوميتەتىنىڭ ءتوراعاسى باحپەن تەلەفوندا سويلەستى.
شي جينپيڭ بىلاي دەپ اتاپ كورسەتتى: جاڭا تيپتى ايدارشا ۆيرۋس وكپە قابىنۋ ىندەتى تۋىلعاننان بەرى حالىقارالىق وليمپيادا كوميتەتى ىرىقتى تۇردە توتەپ بەرىپ، وليمپيادا سپورتىنىڭ ىنتىماعىن، ورنىقتىلىعىن بار كۇشپەن قورعاپ، بۇكىل الەمنىڭ ىندەتكە قارسى اتتانۋىنا جانە وليمپيادا سپورتىنىڭ باياندى، اقاۋسىز دامۋىن جەبەۋگە بەلسەندى ۇلەس قوستى. جۇڭگو جاق حالىقارالىق وليمپيادا كوميتەتىنىڭ جۇڭگونىڭ دەنە تاربيە ىستەرىن بەلسەنە قولداپ كەلگەندىگىن القايدى، حالىقارالىق وليمپيادا كوميتەتىنىڭ قىزمەتىن بۇرىنعىداي قولدايدى. جۇڭگو جاق حالىقارالىق وليمپيادا كوميتەتىمەن، سونداي - اق ءار ەلمەن بىرگە قۇلشىنىپ، توكيو وليمپيادا سپورت جينالىسىن، بەيجيڭ قىسقى وليمپيادا سپورت جينالىسىن حاۋىپسىز، ءساتتى وتكىزۋگە كۇش سالۋدى، حالىقارالىق قوعامنىڭ ىندەتتى ەرتەرەك جەڭۋىنە، دۇنيە ءجۇزى ەكونوميكاسىنىڭ قايتا جاندانۋىن ىسكە اسىرۋعا، ءار ەل حالقىنىڭ ءومىرىنىڭ حاۋىپسىزدىگى مەن دەنساۋلىعىن قورعاۋعا ۇلەس قوسۋدى قالايدى.
شي جينپيڭ بىلاي دەپ باسا دارىپتەدى: جۇڭگو ەڭ الدىمەن ەل ىشىندەگى ىندەتتى تىزگىندەپ ءارى ەكونوميكانىڭ قايتا جاندانۋىن جۇزەگە اسىرىپ، بەيجيڭ قىسقى وليمپيادا سپورت جينالىسىنىڭ ءساتتى وتكىزىلۋىنە ءتيىمدى شارت - جاعداي ازىرلەدى. ءبىز ساقتانۋ - تىزگىندەۋ شارالارىن قاتاڭ تياناقتاندىرىپ، ىندەت ىقپالىن جەڭىپ، ءتۇرلى دايىندىق قىزمەتتەرىنىڭ ورنىقتى ءجۇرىلۋىن بەلسەنە ىلگەرىلەتتىك. كەزەكتە بەيجيڭ قىسقى وليمپيادا سپورت جينالىسىنىڭ الاڭ، ساراي جانە نەگىزدىك قۇرىلعىلار قۇرىلىسىندا كەزەڭدىك ناتيجەلەرگە قول جەتتى، جارىس ىستەرىن ۇيىمداستىرۋ قىزمەتى تارتىپپەن ورىستەتىلدى، جارىسقا قىزمەت وتەۋ جانە ونى قامتاماسىز ەتۋ قىزمەتى جاپپاي ىلگەرىلەتىلدى، ۇگىتتەۋ، جالپىلاستىرۋ ۇزدىكسىز ورلەۋگە كوتەرىلدى، حالىقارالىق اۋىس - كۇيىس، سەلبەستىك ىشكەرىلەي ورىستەتىلدى، باياندى دامۋ مەن مۇرالار قىزمەتىنىڭ ونىمدىلىگى كورنەكتى بولدى. ءبىز بەيجيڭ قىسقى وليمپيادا سپورت جينالىسىنا دايىندىق جاساۋدى وراي ەتىپ، قار - مۇز سپورتىنىڭ جالپىلاسۋىن، دامۋىن ىلگەرىلەتەمىز. قاتىستى جاقتاردىڭ بار كۇشپەن قولداۋىندا جۇڭگو جاقتىڭ ءتۇرلى دايىندىق مىندەتىن ءوز ۋاعىندا ورىنداپ، ويداعىداي جان - جاقتى دايىندىق جاساپ، بەيجيڭ قىسقى وليمپيادا سپورت جينالىسىنىڭ تولىق تابىستى بولۋىنا شىنايى كەپىلدىك ەتەتىندىگىنە سەنەمىز. بەيجيڭ حالىقارادا جازعى جانە قىسقى وليمپيادا سپورت جينالىسىن وتكىزگەن بىردەن - ءبىر ”قوس وليمپيادا قالاسى“ ساناتىندا حالىقارالىق وليمپيادا سپورتىنا وزىندىك ۇلەس قوسادى.
باح مىنالاردى ءبىلدىردى: ءتوراعا شي جينپيڭنىڭ پارمەندى باسشىلىعىندا جۇڭگو جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋدا ەرەكشە ناتيجەلەرگە قول جەتكىزىپ، ەكونوميكانى ەڭ الدىمەن قالپىنا كەلتىرىپ، دۇنيە ءجۇزى ەكونوميكاسىنىڭ قايتا جاندانۋىن ىلگەرىلەتەتىن ماڭىزدى قوزعاۋشى كۇشكە اينالدى، مەن شىن جۇرەكتەن قۇتتىقتايمىن. جۇڭگو ۇكىمەتىنىڭ ايرىقشا ءمان بەرۋىندە جانە جۇڭگو حالقىنىڭ بار كۇشپەن قولداۋىندا بەيجيڭ قىسقى وليمپيادا سپورت جينالىسىنىڭ ءتۇرلى دايىندىق قىزمەتتەرى ىندەت ىقپالىن جەڭىپ، اياق الىسى توتەنشە ءساتتى بولدى. حالىقارالىق وليمپيادا كوميتەتى جۇڭگو جاقتىڭ جاسىل، بىرگە يگىلىكتەنەتىن، اشىق، پاك قىسقى وليمپيادا سپورت جينالىسىن وتكىزۋ ۇستانىمىن قولدايدى، جۇڭگو جاقپەن بىرگە قۇلشىنىپ، بەيجيڭ قىسقى وليمپيادا سپورت جينالىسىنىڭ تابىستى، تارتىمدى، حاۋىپسىز بولۋىنا شىنايى كەپىلدىك ەتۋدى قالايدى. بۇل جۇڭگودا 300 ميلليون ادامعا قار - مۇز سپورتىن جالپىلاستىرۋ ارمانىنىڭ شىندىققا اينالۋىنا مۇمكىندىك جاساۋمەن بىرگە، حالىقارالىق وليمپيادا سپورتىنىڭ دامۋىن پارمەندى جەبەيدى. حالىقارالىق وليمپيادا كوميتەتى وليمپيادا رۋحىن قورعاۋعا كۇش سالادى، دەنە تاربيە سپورتىن ساياسيلاندىرۋعا قارسى تۇرادى، جۇڭگو جاقپەن ۇزاق ۋاقىتتىق ستراتەگيالىق سەلبەستىكتى كۇشەيتۋدى قالايدى. جۇڭگو حالقىنىڭ كوكتەم مەرەكەسىنىڭ كوڭىلدى بولۋىن شىن جۇرەكتەن تىلەيمىن! جۇڭگو حالقىنىڭ جاڭا ءبىر جىلدا جاڭا تابىستارعا قول جەتكىزۋىن تىلەيمىن!
