تيانشان تورى   ›   جاڭالىقتار   ›   ماڭىزدى حابارلار

شي جينپيڭ دۇنيە جۇزىلىك ەكونوميكا تالقى مىنبەرى ”داۆوس كەڭەستىك ءتارتىپ“ كەڭەسىنە قاتىناستى ءارى ارناۋلى ءسوز سويلەدى

داۋىرلىك تاقىرىپتى شەشۋدە، ءسوز جوق، كوپ جاقتىلىقتى قورعاپ جانە امالياتتا ايگىلەپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى باسا دارىپتەدى

  1 - ايدىڭ 25 - كۇنى مەملەكەت ءتوراعاسى شي جينپيڭ بەيجيڭدە بەينە ەكران تاسىلىمەن دۇنيە جۇزىلىك ەكونوميكا تالقى مىنبەرى ”داۆوس كەڭەستىك ءتارتىپ“ كەڭەسىنە قاتىناستى ءارى ارناۋلى ءسوز سويلەدى. □ سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن

  شينحۋا اگەنتتىگىنىڭ 1 - ايدىڭ 25 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 1 - ايدىڭ 25 - كۇنى كەشتە بەيجيڭدە بەينە ەكران تاسىلىمەن دۇنيە جۇزىلىك ەكونوميكا تالقى مىنبەرى ”داۆوس كەڭەستىك ءتارتىپ“ كەڭەسىنە قاتىناستى ءارى «كوپ جاقتىلىق الاۋىمەن ادامزاتتىڭ العا باسۋ جولىن نۇرلاندىرايىق» دەگەن تاقىرىپتا ارناۋلى ءسوز سويلەدى. شي جينپيڭ بىلاي دەپ باسا دارىپتەدى: وسى ءداۋىر ءدوپ كەلگەن تاقىرىپتى ويداعىداي شەشۋدىڭ شىعار جولى − كوپ جاقتىلىقتى قورعاپ جانە امالياتتا ايگىلەپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ. 21 - عاسىرداعى كوپ جاقتىلىقتا تۋرالىقتى ساقتاپ جاڭالىق اكەلۋ، بولاشاققا بەت الۋ، كوپ جاقتىلىقتىڭ وزەكتى قۇنى مەن نەگىزگى پرينسيبىنە تاباندى بولۋمەن بىرگە، دۇنيە ءجۇزى ارناسىنىڭ وزگەرىسىن تياناق ەتە وتىرىپ، الەمدىك سىن - سايىسقا توتەپ بەرۋ قاجەتتىلىگىن دە كوزدەۋ كەرەك. اشىق، سيىسىمدى بولۋعا تاباندى بولۋ، حالىقارالىق ەرەجەلەردى نەگىز ەتۋگە تاباندى بولۋ، اقىلداسۋعا، سەلبەسۋگە تاباندى بولۋ، داۋىرمەن بىرگە العا باسۋعا تاباندى بولۋ كەرەك. جۇڭگو ىندەتكە قارسى اتتانۋداعى حالىقارالىق سەلبەستىككە ۇزدىكسىز تۇردە بەلسەنە ات سالىسىپ، ءوزارا تيىمدىلىك جەتكىزەتىن، تەڭ يگىلىككە كەنەلەتىن اشىق ستراتەگيا اتقارىپ، باياندى دامۋدى جەبەپ، عىلىم - تەحنيكالىق جاڭالىق اشۋدى ىلگەرىلەتىپ، جاڭاشا حالىقارالىق قارىم - قاتىناس ورناتۋدى جەبەپ، ادامزاتتىڭ تاعدىرلاس ورتاق تۇلعاسىن قۇرۋعا قاراي ۇزدىكسىز قادام تاستايدى!

  شي جينپيڭ بىلاي دەپ اتاپ كورسەتتى: وتكەن ءبىر جىلدا، توسىن كەلگەن جاڭا تيپتى ايدارشا ۆيرۋس وكپە قابىنۋ ىندەتى دۇنيە جۇزىنە لاڭ سالىپ، الەمدىك الەۋمەتتىك دەنساۋلىق ساقتاۋعا اۋىر حاۋىپ ءتوندىردى، دۇنيە ءجۇزى ەكونوميكاسى تەرەڭ قۇلدىراۋعا تاپ بولىپ، ادامزات تاريحتا سيرەك كەزدەسەتىن قات - قابات داعدارىستى باستان كەشىردى. قازىر ىندەتتىڭ بەتى ءالى قايتا قويعان جوق، ىندەتكە قارسى اتتانۋ ءالى جالعاسۋدا، دەسەدە، ءبىز قاھارلى قىستىڭ كوكتەمنىڭ قادامىن بوگەي المايتىندىعىنا، قاراڭعى ءتۇننىڭ تاڭ شۋاعىن كولەگەيلەي المايتىندىعىنا كامىل سەنەمىز. ادامزات، ىندەتتى، ءسوز جوق، جەڭىپ، اپاتپەن كۇرەس بارىسىندا تولىسىپ، العا باسىپ، قات - قابات قيىنشىلىق بارىسىندا قايتا سومدالادى.

  شي جينپيڭ بىلاي دەپ باسا دارىپتەدى: ءبىز وسى ءداۋىر ءدوپ كەلگەن 4 ۇلكەن تاقىرىپتى ويداعىداي شەشۋىمىز كەرەك.

  ءبىرىنشى، ماكرولىق ەكونوميكالىق ساياساتتى سايكەستىرۋدى كۇشەيتىپ، دۇنيە ءجۇزى ەكونوميكاسىنىڭ قۋاتتى، باياندى، تەڭگەرىمدى، سيىسىمدى ارتۋىن بىرگە ىلگەرىلەتۋ. قازىرگى جاعدايدى يگەرىپ، ىندەتتەن ساقتانۋ - تىزگىندەۋ مەن ەكونوميكالىق دامۋدى ءبىر تۇتاس جوسپارلاپ، ماكرولىق ەكونوميكالىق ساياساتتىڭ قولداۋىن كۇشەيتىپ، دۇنيە ءجۇزى ەكونوميكاسىنىڭ داعدارىستىڭ كولەڭكەسىنەن ەرتەرەك شىعۋىن ىلگەرىلەتۋ، ونان دا ماڭىزدىسى، بولاشاقتى كوزدەپ، دۇنيە ءجۇزى ەكونوميكاسىنىڭ قوزعاۋشى كۇشىن اۋىستىرۋدى، تاسىلىنە بۇرىلىس جاساۋدى، قۇرىلىمىن رەتتەۋدى ىلگەرىلەتۋگە بەل بايلاپ، دۇنيە ءجۇزى ەكونوميكاسىن ۇزاق ۋاقىت، اقاۋسىز، ورنىقتى دامۋ ارناسىنا ءتۇسىرۋ كەرەك.

  ەكىنشى، يدەولوگيالىق سىڭار جاقتى كوزقاراستى تاستاپ، بەيبىت قاتار تۇرۋ، ءوزارا تيىمدىلىك جەتكىزۋ، تەڭ يگىلىككە كەنەلۋ جولىمەن بىرگە ءجۇرۋ. ءار ەلدىڭ تاريحى، مادەنيەتى جانە قوعامدىق ءتۇزىمى ءار ءتۇرلى، جوعارى - تومەن، جاقسى - جامان دەپ بولىنبەيدى، مۇنداعى تەتىك ءوز ەلىنىڭ مەملەكەت جاعدايىنا ۇيلەسۋ - ۇيلەسپەۋدە، حالىقتىڭ جاقتاۋى مەن قولداۋىنا يە بولۋ - بولماۋدا، ساياسيدىڭ ورنىقتىلىعىن، قوعامنىڭ العا باسۋىن، حالىق تۇرمىسىنىڭ جاقسارۋىن ىسكە اسىرا الۋ - الماۋدا، ادامزاتتىڭ العا باسۋ ىستەرىنە ۇلەس قوسا الۋ - الماۋدا. الۋان تۇرلىلىك بولمايىنشا، ادامزات وركەنيەتى دە بولماق ەمەس. پارىق قورقىنىشتى ەمەس، قورقىنىشتىسى مەنمەندىك، سىڭار جاقتىلىق، وشپەندىلىك، قورقىنىشتىسى ادامزات وركەنيەتىن سان قيلى دارەجەگە ايىرۋ، قورقىنىشتىسى ءوزىنىڭ تاريحى مەن مادەنيەتىن جانە قوعامدىق ءتۇزىمىن باسقالارعا زورلاپ تاڭۋ. ءار ەل ءبىر - بىرىنە قۇرمەت ەتۋ، پارىقتاردى ساقتاپ، ورتاقتىققا ۇمتىلۋ نەگىزىندە بەيبىت قاتار تۇرۋدى جۇزەگە اسىرىپ، اۋىس - كۇيىستى، ءبىر - بىرىنەن ۇلگى الۋدى جەبەپ، ادامزات وركەنيەتىنىڭ العا باسۋىنا قوزعاۋشى كۇش ۇستەۋ ءتيىس.

  ءۇشىنشى، دامىعان ەلدەر مەن وركەندەپ كەلە جاتقان ەلدەردىڭ دامۋىنداعى تەرەڭ شاتقالدان ارىلىپ، ءار ەلدىڭ دامۋىن، گۇلدەنۋىن بىرگە ىلگەرىلەتۋ. وركەندەپ كەلە جاتقان ەلدەر دامىسا، بۇكىل دۇنيە ءجۇزىنىڭ گۇلدەنۋى، ورنىقتىلىعى اناعۇرلىم بەرىك نەگىزگە يە بولادى. حالىقارالىق قوعام ۋادەنى تياناقتاندىرىپ، وركەندەپ كەلە جاتقان ەلدەرگە قاجەتتى قولداۋ كورسەتىپ، وركەندەپ كەلە جاتقان ەلدەردىڭ ورىندى دامۋ ۇقىق - مۇددەسىن قامتاماسىز ەتىپ، ۇقىق - مۇددەنىڭ تەڭدىگىن، ورايدىڭ تەڭدىگىن، قاعيدانىڭ تەڭدىگىن جەبەپ، ءار ەل حالقىنىڭ دامۋ ورايى مەن جەتىستىگىنەن بىرگە يگىلىكتەنۋىنە مۇمكىندىك جاساۋ كەرەك.

  ءتورتىنشى، الەمدىك سىن - سايىسقا قول ۇستاسا توتەپ بەرىپ، ادامزاتتىڭ جارقىن بولاشاعىن بىرگە تۇلعالاۋ. جاڭا تيپتى ايدارشا ۆيرۋس وكپە قابىنۋ ىندەتى سياقتى توسىن تۋىلعان الەۋمەتتىك دەنساۋلىق ساقتاۋ وقيعاسى استە ەڭ سوڭعى ءبىر رەتكى وقيعا ەمەس، الەمدىك الەۋمەتتىك دەنساۋلىق ساقتاۋدى جونگە سالۋدى كۇشەيتۋ ەرەكشە قاجەتتى. كليمات وزگەرىسىنە توتەپ بەرۋدى كۇشەيتىپ، باياندى دامۋدى ىلگەرىلەتۋ ادامزاتتىڭ كەلەشەگى مەن بولاشاعىنا سايادى. ادامزات ءدوپ كەلگەن بارلىق الەمدىك ماسەلەلەردە، ءسوز جوق، الەمدىك ارەكەت، الەمدىك توتەپ بەرۋ، الەمدىك سەلبەستىك ورىستەتۋ كەرەك.

  شي جينپيڭ بىلاي دەپ اتاپ كورسەتتى: دۇنيە جۇزىندەگى ماسەلەلەر قىم - قۋىت كۇردەلى، ماسەلەلەردى شەشۋدىڭ شىعار جولى كوپ جاقتىلىقتى قورعاپ جانە امالياتتا ايگىلەپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ بولىپ تابىلادى.

  − اشىق، سيىسىمدى بولۋعا تاباندى بولۋ، توماعا تۇيىق بولۋدان، باسقالاردى قاقپايلاۋدان اۋلاق بولۋ كەرەك. كوپ جاقتىلىقتىڭ ءمانى − حالىقارالىق ىستەردى كوپشىلىك بىرگە اقىلداسىپ ءبىتىرۋ، دۇنيە ءجۇزىنىڭ بولاشاعى مەن تاعدىرىن ءار ەل بىرگە يگەرۋ. حالىقارادا ”شاعىن شەڭبەر“ قۇرىپ، ”جاڭا قىرعي قاباق سوعىس“ تۋدىرىپ، باسقالاردى قاقپايلاپ، حاۋىپ ءتوندىرىپ، قۇقاي كورسەتىپ، قيت ەتسە بولعانى بايلانىستى ءۇزىپ، قامداۋدى توقتاتىپ، جازالاپ، ءوزارا وقشاۋلانۋدى، ءتىپتى ات كەكىلىن كەسىسۋدى قولدان جاساۋ دۇنيە ءجۇزىن تەك قانا بولشەكتەنۋگە، ءتىپتى قارسىلاسۋعا يتەرمەلەيدى. بولشەكتەنگەن دۇنيە ءجۇزى ادامزات ءدوپ كەلگەن ورتاق سىن - سايىسقا توتەپ بەرە المايدى، قارسىلاسۋ ادامزاتتى تىعىرىققا تىرەيدى. بۇكىل ادامزاتتىڭ بەيبىتشىلىك، دامۋ، ادىلدىك، تۋراشىلدىق، دەموكراتيا، ەركىندىك سىندى ورتاق قۇندىلىقتارىنان جازباي، دۇنيە ءجۇزىنىڭ بەيبىتشىلىگى مەن ورنىقتىلىعىن بىرگە قورعاپ، اشىق دۇنيە ءجۇزى ەكونوميكاسىن قۇرۋ كەرەك.

  − حالىقارالىق ەرەجەلەردى نەگىز ەتۋگە تاباندى بولۋ، وزىمنەن كەرەمەت ەشكىم جوق دەۋدەن اۋلاق بولۋ كەرەك. حالىقارالىق قوعام ءار ەل بىرگە كەلىسكەن ەرەجەلەر مەن ورتاق تانىمدار نەگىزىندە جونگە سالۋى، ءبىر نەمەسە بىرنەشە ەلدىڭ عانا بيلىك ايتىپ، ءامىر جۇرگىزۋىنە جول بەرمەۋ ءتيىس. بىرلەسكەن مەملەكەتتەر ۇيىمىنىڭ ۆستاۋى مەملەكەت پەن مەملەكەت اراسىنداعى قارىم - قاتىناستىڭ ورتاق مويىندالعان نەگىزگى ولشەمى، بىرلەسكەن مەملەكەتتەر ۇيىمىن وزەك ەتكەن حالىقارالىق جۇيەنى، حالىقارالىق زاڭدى نەگىز ەتكەن حالىقارالىق ءتارتىپتى قورعاۋ، كوپ جاقتى قۇرىلىمداردىڭ قۇزىرەتتىلىگى مەن ونىمدىلىگىن قورعاۋ كەرەك. ءتۇزىم مەن ەرەجە ارقىلى ءار ەلدىڭ قارىم - قاتىناسىن سايكەستىرۋگە، ارناعا تۇسىرۋگە تاباندى بولۋ، كۇشتىگە ارقالانىپ ءالسىزدى باسىنۋعا قارسى تۇرۋ كەرەك، كوپ جاقتىلىقتى جەلەۋ ەتىپ، ءىس جۇزىندە سىڭار جاقتىلىقپەن شۇعىلدانۋعا جول بەرمەۋ كەرەك. ەرەجە بەلگىلەنگەن ەكەن، كوپشىلىك وعان ءونىمدى بويسۇنۋى كەرەك. ”قولايىنا قاراي تاڭدايتىن كوپ جاقتىلىق“ ءبىزدىڭ تالعامىمىز بولماۋعا ءتيىس.

  − اقىلداسۋعا، سەلبەسۋگە تاباندى بولۋ، قاقتىعىسۋمەن، قارسىلاسۋمەن اينالىسپاۋ كەرەك. مەيلى قىرعي قاباق سوعىس، قارۋلى سوعىس بولسىن، الدە ساۋدا سوعىسى، عىلىم - تەحنيكا سوعىسى بولسىن، تۇپتەپ كەلگەندە ءار ەلدىڭ مۇددەسىن زيانداپ، حالىقتىڭ ىرىس - قۇتىن قۇرباندىققا شالادى. ايىرماشىلىققا قۇرمەت ەتۋ جانە وعان كەڭ پەيىلدىلىكپەن قاراۋ، باسقا ەلدىڭ ىشكى ىسىنە كيلىكپەۋ، الاۋىزدىقتاردى اقىلداسۋ، كەڭەسۋ ارقىلى شەشۋ كەرەك. قىرعي قاباق سوعىسى ويى، نولدىك جيىندىق ويىنى سىندى ەسكى ۇستانىمداردى تاستاپ، ءوزارا قۇرمەت ەتۋگە، ءوزارا كەشىرىمدى بولۋعا تاباندى بولىپ، ءوزارا تيىمدىلىك جاسايتىن، تەڭ يگىلىككە كەنەلەتىن سەلبەستىك كوزقاراسىنان جازباۋ كەرەك. جەكە مۇددەسىن، ءوز قامىن عانا ويلايتىن تار ءورىستى ساياساتتاردان اۋلاق بولۋ، ءادىل، تەڭ باسەكەنى دارىپتەپ، ءبىر - بىرىنەن قالىسپاۋعا ۇمتىلاتىن، بىرگە جوعارىلايتىن اتلەتيكا جارىسىن ورىستەتۋ، ءبىر - بىرىنە شابۋىل جاسايتىن، ولىسپەي بەرىسپەيتىن مۇيىزدەسۋمەن اينالىسپاۋ كەرەك.

  − داۋىرمەن بىرگە العا باسۋعا تاباندى بولۋ، باياعى قالپىنان جازباي توقىراپ قالۋدان اۋلاق بولۋ كەرەك. 21 - عاسىرداعى كوپ جاقتىلىقتا تۋراشىلدىقتى ساقتاپ جاڭالىق اكەلۋ، بولاشاققا بەت الۋ، كوپ جاقتىلىقتىڭ وزەكتى قۇنى مەن نەگىزگى پرينسيبىنە تاباندى بولۋمەن بىرگە، دۇنيە ءجۇزى ارناسىنىڭ وزگەرىسىن تياناق ەتە وتىرىپ، الەمدىك سىن - سايىسقا توتەپ بەرۋ قاجەتتىلىگىن دە كوزدەپ، كەڭىنەن اقىلداسۋ، ورتاق تانىم ۇيىستىرۋ نەگىزىندە الەمدىك جونگە سالۋ جۇيەسىن رەفورمالاۋ جانە كەمەلدەندىرۋ كەرەك. دۇنيە جۇزىلىك دەنساۋلىق ساقتاۋ ۇيىمىنىڭ رولىن ساۋلەلەندىرىپ، ادامزاتتىڭ دەنساۋلىق ساقتاۋ، سالاماتتىق ورتاق تۇلعاسىن قۇرۋ كەرەك. دۇنيە جۇزىلىك ساۋدا ۇيىمى مەن حالىقارالىق فينانس - اقشا جۇيەسى رەفورماسىن ىلگەرىلەتىپ، الەمدىك سيفرلى جونگە سالۋ قاعيداسىن جاساۋدى تالقىلاپ، كليمات وزگەرىسىنە توتەپ بەرۋ جونىندەگى «پاريج كەلىسىمىن» تياناقتاندىرىپ، بىرلەسكەن مەملەكەتتەر ۇيىمىنىڭ 2030 - جىلعا دەيىنگى باياندى دامۋ كەڭەستىك ءتارتىبىن تياناقتاندىرۋ كەرەك.

  شي جينپيڭ بىلاي دەپ باسا دارىپتەدى: جۇڭگو جاپپاي سوتسياليستىك وسىزاماندانعان مەملەكەت قۇرۋدىڭ جاڭا ساپارىن باستادى، ءبىز جاڭا دامۋ كەزەڭىن تياناق ەتىپ، جاڭا دامۋ ۇستانىمىن دايەكتىلەندىرىپ، جاڭا دامۋ ارناسىن بەلسەنە قالىپتاستىرىپ، باياندى بەيبىت، جاپپاي حاۋىپسىز، بىرگە گۇلدەنەتىن، اشىق، سيىسىمدى، تازا، كورىكتى دۇنيە ءجۇزىن ءار ەلمەن بىرگە قۇرامىز.

  − جۇڭگو ىندەتكە قارسى اتتانۋدىڭ حالىقارالىق سەلبەستىگىنە ۇزدىكسىز بەلسەنە ات سالىسادى. ءار ەلمەن ىندەتتەن ساقتانۋ - تىزگىندەۋدىڭ پايدالى تاجىريبەلەرىن ءبولىسىپ، ىندەتكە توتەپ بەرۋ قابىلەتى ءالسىز ەلدەر مەن وڭىرلەرگە مۇمكىندىگىنشە كومەك بەرەدى. ۆاكسينا سەلبەستىگىن كۇشەيتىپ، ۆاكسيانى شىن مانىندە ءار ەل حالقى ىستەتە الاتىن، ىستەتۋگە جاعدايى كەلەتىن الەۋمەتتىك ونىمگە اينالدىرادى.

  − جۇڭگو ءوزارا تيىمدىلىك جاسايتىن، تەڭ يگىلىككە كەنەلەتىن اشىق ستراتەگيانى ۇزدىكسىز اتقارادى. ىندەتتەن پايدالانىپ ”جاھاندانۋدان بەزۋ“، توماعا تۇيىقتىققا سالىنىپ، بايلانىستى ءۇزۋ ەشقانداي ءبىر جاقتىڭ مۇددەسىنە ۇيلەسپەيدى. جۇڭگو ەكونوميكانىڭ جاھاندانۋىنا باستان - اياق قولداۋ كورسەتىپ، سىرتقا ەسىك اشۋ سىندى نەگىزگى مەملەكەت ساياساتىن باتىل اتقارادى. ساۋدا مەن قارجى قوسۋدىڭ ەركىن، قولايلى بولۋىن جەبەپ، الەمدىك كاسىپ سالاسى تىزبەگىنىڭ، قامداۋ تىزبەگىنىڭ ىركىلىسسىزدىگىن، ورنىقتىلىعىن قورعاپ، ”ءبىر بەلدەۋ، ءبىر جولدى“ جوعارى ساپادا بىرگە قۇرۋدى ىلگەرىلەتىپ، بازارلانعان، زاڭمەن جونگە سالىناتىن، حالىقارالانعان شارۋاشىلىق - ساۋدا ورتاسىن ۇزدىكسىز قالىپتاستىرىپ، اسا ۇلكەن بازار باسىمدىعىن جانە ىشكى سۇرانىستىڭ كومەسكى كۇشىن ساۋلەلەندىرىپ، دۇنيە ءجۇزى ەكونوميكاسىنىڭ قالپىنا كەلۋى مەن ارتۋىنا اناعۇرلىم كوپ قوزعاۋشى كۇش ۇستەيدى.

  − جۇڭگو باياندى دامۋدى ۇزدىكسىز جەبەيدى. ەكولوگيالىق وركەنيەت قۇرىلىسىن كۇشەيتىپ، 2030 - جىلدان بۇرىن كومىرتەگى قوس توتىعىنىڭ ىعىستىرىلۋىن ەڭ جوعارى شەكتە تەجەۋ، 2060 - جىلدان بۇرىن كومىرتەگىن بەيتاراپتاندىرۋ نىساناسىن جۇزەگە اسىرۋعا شىنايى كەپىلدىك ەتەدى. بۇكىل ادامزاتقا پايدالى ءىس بولسا بولعانى، جۇڭگو مىندەتتى تۇردە، ءسوزسىز، ىستەيدى، سونداي - اق ونى جاقسى ىستەپ، ناقتى ارەكەتىمەن كوپ جاقتىلىقتى امالياتتا ايگىلەيدى.

  − جۇڭگو عىلىم - تەحنيكادا جاڭالىق اشۋدى ۇزدىكسىز ىلگەرىلەتەدى. عىلىم - تەحنيكاعا ۇسىنىلىمدى ارتتىرىپ، ءبىلىم مەنشىك ۇقىعىن قورعاۋدى كۇشەيتەدى. عىلىم - تەحنيكا تابىستارى بۇكىل ادامزاتتى باقىتقا كەنەلتۋى، باسقا ەلدىڭ دامۋىن شەكتەيتىن، شاۋجايلايتىن تاسىلگە اينالماۋى ءتيىس. جۇڭگو اناعۇرلىم اشىق ويمەن جانە شارالارمەن حالىقارالىق عىلىم - تەحنيكالىق اۋىس - كۇيىس پەن سەلبەستىكتى ىلگەرىلەتىپ، ءار ەلمەن قول ۇستاسا وتىرىپ اشىق، ءادىل، تۋراشىل، كەمسىتپەيتىن عىلىم - تەحنيكالىق دامۋ ورتاسىن قالىپتاستىرادى.

  − جۇڭگو جاڭاشا حالىقارالىق قارىم - قاتىناس ورناتۋدى ۇزدىكسىز ىلگەرىلەتەدى. بىرەۋ جەڭىلىپ، بىرەۋ جەڭەتىن، جەڭۋشى ءبارىن جالمايتىن جايت جۇڭگولىقتاردىڭ ءومىر فيلوسوفياسى ەمەس. جۇڭگو دەربەس، ءوز - وزىنە قوجايىن بولاتىن بەيبىت ديپلوماتيا ساياساتىن باتىل اتقارىپ، ءار ەلمەن دوستىق سەلبەستىك قارىم - قاتىناستى بەلسەنە دامىتىپ، تۇستىك پەن تۇستىك سەلبەستىگىن ۇزدىكسىز تەرەڭدەتىپ، الەم ەكونوميكاسىن جونگە سالۋعا اناعۇرلىم بەلسەندى تۇردە ارالاسىپ، ەكونوميكانىڭ جاھاندانۋىنىڭ اناعۇرلىم اشىق، سيىسىمدى، جالپىعا ءتيىمدى، تەڭگەرىمدى، تەڭ يگىلىكتەنەتىن بەتالىسقا قاراي دامۋىن ىلگەرىلەتەدى.

  شي جينپيڭ سوڭىندا بىلاي دەپ باسا دارىپتەدى: ادامزاتتا تەك ءبىر عانا جەر شارى بار، ادامزاتتىڭ تەك ءبىر عانا ورتاق بولاشاعى بار. قازىرگى داعدارىسقا توتەپ بەرۋ بولسىن، الدە جارقىن بولاشاققا بىرگە جول اشۋ بولسىن، ادامزات قيىندىقتى بىلەك بىرىكتىرە جەڭۋگە، ىنتىماقتاسا سەلبەسۋگە مۇقتاج. اماليات مىنانى قايتالاي دالەلدەدى: زوبالاڭدى وزگەگە يتەرەتىن ءارقانداي قىلىق، جەكە دارا كۇرەس جاسايتىن ءارقانداي وي، ءوز بۋىنا ءوزى سەمىرەتىن وركەۋدەلىك تۇبىندە، ءسوزسىز، جەڭىلىسپەن تىنادى! ءبىز قول ۇستاسىپ، كوپ جاقتىلىقتىڭ الاۋىمەن ادامزاتتىڭ العا باسۋ جولىن نۇرلاندىرىپ، ادامزاتتىڭ تاعدىرلاس ورتاق تۇلعاسىن قۇرۋعا قاراي ۇزدىكسىز قادام تاستايىق!

جاۋاپتى رەداكتور : نۇربولات قابىل

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.