ۋاڭيۋان توبى 5600دەن استام مالشى وتباسىن كەدەيلىكتەن ارىلۋعا باستادى
□ انار بۇلت/ شينجياڭ گازەتىنىڭ ءتىلشىسى جاڭ تيڭ
جاڭا جىل كىرىسىمەن، بۋرىلتوعاي اۋدانىنا ورنالاسقان شينجياڭ ۋاڭيۋان بيو عىلىم - تەحنيكا توبىنىڭ (تومەندە قىسقارتىلىپ ”ۋاڭيۋان توبى“ دەلىنەدى) ءوندىرۋ، وڭدەۋ سەحىندا 3 ءوندىرىس جەلىسى بۇكىل ەلدىڭ جەر - جەرىنەن كەلىپ تۇسكەن تاپسىرىستاعى ونىمدەردى كۇش سالا ءوندىرىپ جاتتى.
”2020 - جىلى ۋاڭيۋان توبىنىڭ ساتۋ سوماسى 700 ميلليون يۋانعا جەتتى. بيىل جىل باسىندا ءبىز 20 ميلليون يۋاننىڭ تاپسىرىسىن قابىلداپ، جاقسى باستاما باستادىق. قازىر جوسپار بويىنشا زاتتى قوراپتاپ دايىنداپ، جەدەل جەتكىزۋ ارقىلى بۇكىل ەلدىڭ جەر - جەرىنە جونەلتۋدەمىز“، - دەدى 1 - ايدىڭ 24 - كۇنى ۋاڭيۋان توبىنىڭ ۇنەمىلىك ىستەرگە جاۋاپتى ورىنباسار باس ديرەكتورى ليۋ شانشان.
ۋاڭيۋان توبىنا كىرگەنىڭىزدە قاز - قاتار رەتتى تىزىلگەن تۇيە ءسۇتىن وڭدەيتىن زاۆود ۇيلەرى كوزگە تۇسەدى. ءسۇت تاسۋ كولىگى ساتىپ الىنعان جاڭا ءسۇتتى سەحقا جەتكىزۋدە. قىزمەتكەرلەر جاڭا ءسۇتتى توتتانبايتىن بولات كۇبىگە قۇيۋمەن ابىگەر. اۋادان ءسۇتتىڭ حوش ءيىسى اڭقيدى.
ليۋ شانشان تىلشىگە مىنانى ايتتى: ۋاڭيۋان توبىنىڭ 60 مىڭنان استام تۇيە باعاتىن بازاسى بار، ءار جىلى 6000 توننانىڭ ۇستىندە تۇيە ءسۇتىن ساتىپ الادى، ساپالى تۇيە ءسۇتىنىڭ كۇندىك ءونىمى 20 توننا شاماسىندا، باعۋدان ءوندىرۋ، وڭدەۋگە دەيىن كولەمدەندىرۋ، ولشەمدەندىرۋ، وسىزامانداندىرۋ ىسكە اسىرىلدى.
ۋاڭيۋان توبىنىڭ ونىمدەر كورمەسى اۋماعىندا تۇيە ءسۇتى، تۇيە ءسۇتى تالقانى، ءتۇيە ءسۇتى ىرىمشىگى، تۇيە ءسۇتى سابىنى، تۇيە جۇنىنەن توقىلعان بۇيىمدار سياقتى 5 ۇلكەن جەلى بويىنشا 20 نەشە ءتۇرلى ءونىم قويىلىپتى.
”ءبىز ەڭلىك بۇيىمدار سالاسىندا دا زەرتتەۋ - اشۋ تەبىنىن ارتتىردىق. قاراڭىز، مىناۋ ءبىزدىڭ بيىل ۇسىنعان بەت جاپسىرماسى“. ۋاڭيۋان توبىنىڭ ورىنباسار باس ديرەكتورى گو جىچياڭ بۇل بەت جاپسىرماسى بازارعا شىعىسىمەن جىجياڭدىق ءبىر ساۋداگەردىڭ ءبىر ميلليون يۋاندىق ساۋدا توقتامىن جاساسقانىن ايتتى.
سونىمەن قاتار اۋدان قالاشىعىنان 15 كيلومەتر جەردەگى جەتارال قالاشىعىنىڭ قارابيە قىستاعىندا مالشى ارعىن ءالىپ تۇيەسىنە جەم بەرىپ جاتىپتى.
”2010 - جىلدان باستاپ ۋاڭيۋان توبىنا تۇيە باقتىم. باستابىندا 8 تۇيەم عانا بار ەدى، قارىزىم دا بار بولاتىن. ۋاڭيۋان توبىنىڭ كومەگىندە قازىر تۇيەم 200گە جەتتى، ءار جىلى تۇيە ءسۇتىن ساتۋدىڭ وزىنەن 650 مىڭ يۋان كىرىس تابامىن، اۆتوكولىك ساتىپ الدىم، ءۇيىم دە بار“، - دەدى ارعىن تەبىرەنە.
2020 - جىلى 3 - ايدا ۋاڭيۋان توبى بۋرىلتوعاي اۋدانىمەن بىرلەسىپ، شامامەن 2 ميلليارد يۋان قارجى قوسىپ بىرگە قۇراتىن ساياحات، دەنساۋلىق كۇتىمدەۋ، مادەنيەت، دەمالىس، كوڭىل اشۋ، ساۋدا، تۇتىنۋ، قارجى قوسىپ شارۋاشىلىق قۇرۋ ءبىر تۇلعالانعان جۇڭگو تۇيەلى قالاشىق نىسانىنىڭ قۇرىلىسى باستالدى.
بيىل ارعىن تۇيە باعۋعا كومەكتەسۋ ءۇشىن بىرنەشە ادامدى جالداپ الماقشى، ءوزى جۇڭگو تۇيەلى قالاشىعىنان ءۇي ساتىپ الىپ ساياحاتپەن شۇعىلدانباقشى.
”قازىر شينجياڭعا ساياحاتتاپ كەلۋشىلەر بارعان سايىن كوبەيۋدە. ۋاڭيۋان توبىنا ىلەسىپ تۇيە باعىپ قانا قويماي، ساياحاتپەن دە شۇعىلدانامىز“، - دەدى ارعىن كوڭىلدى بەينەمەن.
ارعىن ۋاڭيۋان توبىنىڭ كەدەيلەردى دالمە - ءدال سۇيەمەلدەۋدىڭ پايداسىن كورگەن كوپ ادامنىڭ ءبىرى. 10 نەشە جىلدان بەرى ۋاڭيۋان توبى ”نولدىك وزىندىك قۇن ۇسىنىلىمى، نولدىك تيجارات حاۋىپ - قاتەرى، سول جەردىڭ وزىندە جۇمىستانۋ“ سىندى كەدەيلەردى دالمە - ءدال سۇيەمەلدەۋدىڭ كاسىپ سالالاندىرىلعان ۇلگىسى ارقىلى التاي، تارباعاتاي، سانجى، ءۇرىمجى، قۇمىل سياقتى جەرلەردەن تۇيە باعاتىن 5600دەن استام مالشى وتباسىنىڭ كەدەيلىكتەن ارىلىپ بايۋىنا باستاماشىلدىق ەتتى، ىلگەرىندى - كەيىندى 600گە تاياۋ مالشى وتباسىنا 120 ميلليون يۋاننان استام ءوسىمسىز قارىز بەردى.
”كوپ جىلدىق دامۋ ارقىلى تۇيە گەنىنىڭ سپەكترلىك ءتارتىبىن جاساۋدان تۇيە ءسۇتىنىڭ وزگەشە تەحنولوگياسىن اشۋعا، كاسىپ سالاسى تىزبەگىن كەڭەيتۋگە، ت. ب عا دەيىن ءبىز ءبىرسىپىرا پاتەنت تابىسىنا يە بولدىق. كەلەسى قادامدا ءبىز جۇڭگو تۇيەلى قالاشىعى، ۋانتويۋان باعىمشىلىق بازاسى، تۇيە وسى زامانعى كاسىپ باقشاسى قۇرىلىسىن جەدەلدەتۋ ارقىلى زەردەلىلەنگەن كاسىپ سالاسى تىزبەگىن قالىپتاستىرىپ، اناعۇرلىم كوپ ەگىنشى - مالشىنىڭ توپ قۇرعان تۇعىر ارقىلى ورنىقتى تۇردە كەدەيلىكتەن ارىلۋىنا، كىرىستى ارتتىرىپ بايۋىنا كومەكتەسەمىز“، - دەدى ۋاڭيۋان توبىنىڭ القا باستىعى چىن گاڭلياڭ.
