انار بۇلت / شينجياڭ گازەتىنىڭ ءتىلشىسى ياۋ گاڭ
كۇمبىرلەگەن دومبىرا ءۇنى، اسقاقتاعان حالىق ءانى، جايناعان شام - شىراق، جالىنداعان الاۋ... 1 - ايدىڭ 30 - كۇنى كەشتە لاۋلاعان جالىن كوتەرىلىپ، قۇلپىرما شامدار جايناپ، كوكتوعاي اۋدانى كوكتوعاي قالاشىعى تاراتى قىستاعىنىڭ اعاش ۇيلەرىنىڭ توبەسىندەگى، اۋلالارىنداعى ۇيىلگەن قارلاردى الۋان تۇسكە بوياپ، ساياحاتشىلاردىڭ كوز مەيىرىن قاندىردى.
تاراتى قىستاعى − ەرتىس وزەنىنىڭ باسىنداعى ءبىرىنشى قىستاق بولعاندىقتان، ”ەرتىستەگى ءبىرىنشى قىستاق“ دەپ اتالعان. 2018 - جىلدان بەرى وسى قىستاق قىسقى ساياحاتپەن شۇعىلدانىپ، اس - سۋ، قونالقى، ساياحاتتىق تاۋار سياقتى كاسىپ سالالارىن دامىتىپ، قىسقى ساياحاتتاعى ”ءسوزسىز باراتىن جەرگە“ اينالدى.
قىستاق تۇرعىنى ەرلان ساۋلەت قىستاق جولى بويىنا ۇلكەن قازان استى، مازداعان وتقا قويىلعان قازانداعى بىلقىپ پىسقان قوي ەتىنىڭ حوش ءيىسى سونادايدان مۇرىن جارادى. ”الىستان كەلگەن دوستار كەلىپ ءبىر شىنى سورپا ءىشىپ، بوي جىلىتىپ الىڭىزدار“. ول ارى - بەرى قايشالىسىپ، كەشكى كورىنىستى تاماشالاپ جۇرگەن ساياحاتشىلاردى شاقىرىپ، ىقىلاسپەن شىنىعا بۋى بۇرقىراعان سورپانى قۇيىپ ۇسىنىپ جاتتى.
ەرلان قىستاق تۇرعىندارىنا تانىمالى بايۋدىڭ باستاماشىسى، 2016 - جىلى ول مالشىلار شاتتىعى ساياجايىن اشىپ، قىستاقتاعى ”ۇلكەن بايعا“ اينالدى. 2018 - جىلى، تاراتى قىستاعى كوكتوعاي كورىنىس اۋماعىنا جاقىن بولۋداي جاعراپيالىق باسىمدىعىنا سۇيەنىپ، ساياحات كاسىبىن جالپى تۇلعالىق جوبا بويىنشا دامىتىپ، حالىقتىق تۇسەلحانا تۇلعالادى. ەرلان بىلاي دەدى: ”پارتيانىڭ ابزال ساياساتىنىڭ ارقاسىندا داۋلەت جيىپ، ىرعىنعا كەنەلدىم. ءبىر ادامنىڭ بايۋى بايۋ ەمەس، كوپشىلىك بايىسا عانا بايىعاندىق ەسەپتەلەدى“. ەرلاننىڭ باستاماشىلدىق ەتۋىندە قىستاقتا حالىقتىق تۇسەلحانا كووپەراتيۆى قۇرىلدى.
قىستاق تۇرعىنى ماقپال شالقار مەن ناعاشى باۋىرى الپار بيموللا بىرلەسىپ ”قاراجورعا كەرۋەن سارايى“ حالىقتىق تۇسەلحاناسىن اشتى، ەكەۋى تۋادا جەز تاڭداي، بۇلبۇل كومەي بولعاندىقتان، حالىق اندەرىن شىرقاۋ حالىقتىق تۇسەلحانانىڭ ۇلكەن ءبىر ەرەكشەلىگىنە اينالدى. مەيلى اس - سۋ، ءدامدى تاعام، الدە ۇلتتىق ءان - ءبي ونەرى بولسىن، تۇگەلدەي بۇكىل ەلدىڭ جەر - جەرىنەن كەلگەن ساياحاتشىلاردى باۋرادى. ”ساياحات قالتامىزدى قامپايتتى. 2019 - جىلى وتباسىمىزدىڭ كىرىسى 100 مىڭ يۋان بولدى“، - دەدى الپار.
قايتكەندە ساياحات كاسىبىن مىقتاپ ۇستاپ، جاقسى يگىلىكتەنۋگە بولادى؟ ”كوكتوعاي قالاشىعى قىستاقتاعى حالىقتىق تۇسەلحانالاردىڭ سىرتقى تامدارىن جاڭالادى، ىشكى بولىكتەرىن دە ارلەدى، پارىقتانۋىن كورنەكتىلەندىرىپ، ۇلكەنى ءۇي جيھازدارى، كيىم - كەشەكتەن كىشكەنەسى مايلىق قاعاز قورابى، قابىرعاداعى قاپ جانە اسپا ساعات سياقتىلارعا دەيىن تۇگەلدەي جەرگىلىكتى ەرەكشەلىكتى كورنەكتىلەندىردى“. تاراتى قىستاعى ساياحاتشىلارعا قىزمەت وتەۋ ورتالىعىنىڭ جاۋاپتىسى نازيگۇل رازدان بىلاي دەدى: حالىقتىق تۇسەلحانا ساياحاتشىلاردىڭ دەمالاتىن ورنى عانا ەمەس، ونان دا ماڭىزدىسى، ۇلتتىق سالت - سانانى جاقىننان سەزىنەتىن تۇعىر، ”كەلسەڭىز كەتكىڭىز كەلمەيدى، كەتسەڭىز تاعى كەلگىڭىز كەلەدى. 2 جىلدان بەرى ەرەكشە حالىقتىق تۇسەلحانا قىرۋار ساياحاتشىنى باۋرادى، تۇتاس قىستاقتاعى دامىپ، كەمەلدەنگەن حالىقتىق تۇسەلحانا 20 نەشەگە جەتتى. باسقا قىستاق تۇرعىندارى دا اۋىل شارۋاشىلىق قوسىمشا ونىمدەرىن ساتۋ، حالىقتىق تۇسەلحانالاردا جۇمىس ىستەۋ ارقىلى ساياحات كاسىبىنىڭ دامۋىنا ات سالىستى. ساياحات كىرىسى قىستاق تۇرعىندارىنىڭ جىلدىق كىرىسىنىڭ ۇشتەن ءبىرىن يەلەدى“.
كوكتەم مەرەكەسى جاقىنداپ قالدى، بارلىق ۇيلەر قىزىل تۇمشالامالى شام اسىپ، شاعىن قىستاقتان مەرەكەلىك لەپ ەسىپ، قىستاق تۇرعىندارىنىڭ تۇرمىسى تۇمشالامالى شامداي قىزارىپ شالقي ءتۇستى.
