شينحۋا اگەنتتىگىنىڭ 2 - ايدىڭ 8 - كۇنى بەيجيڭنەن بەرگەن حابارى. 2 - ايدىڭ 8 - كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ ۆيەتنام كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى رۋان فۋجۇڭمەن تەلەفوندا سويلەستى.
شي جينپيڭ رۋان فۋجۇڭنىڭ ۆيەتنام كوممۋنيستىك پارتياسى ورتالىق كوميتەتىنىڭ باس شۋجيلىگىنە تاعى دا سايلانعاندىعىن جانە ءبىر رەت قۇتتىقتادى. شي جينپيڭ مىنالاردى ءبىلدىردى: ۆيەتنام كوممۋنيستىك پارتياسىنىڭ 13 - قۇرىلتايى تابىستى وتكىزىلدى ءارى جاڭا دامۋ ساتىسىنداعى كۇرەس نىساناسىن بەلگىلەدى، بۇل ۆيەتنامنىڭ پارتيا مەن مەملەكەت ىستەرىنىڭ دامۋ ۇردىسىندە كەلەلى ماڭىز الادى. باس شۋجي رۋان فۋجۇڭ جولداستى باسشى ەتكەن جاڭا كەزەكتى ۆيەتنام كوممۋنيستىك پارتياسى ورتالىق كوميتەتىنىڭ باسشىلىعىندا ۆيەتنام پارتياسى مەن حالقى ۆيەتنام كوممۋنيستىك پارتياسىنىڭ 13 - قۇرىلتايىندا جاسالعان شەشىمدەردى، ورنالاستىرۋلاردى جاپپاي تياناقتاندىرىپ، ۆيەتنام پارتياسى مەن مەملەكەتىنىڭ دامۋ نىساناسىن كۇش سالا جۇزەگە اسىرا الاتىندىعىنا سەنەمىن.
شي جينپيڭ بىلاي دەپ باسا دارىپتەدى: جۇڭگو مەن ۆيەتنام ەكى ەل ستراتەگيالىق مانگە يە تاعدىرلاس ورتاق تۇلعا. جۇڭگو - ۆيەتنام قارىم - قاتىناسىنىڭ ۇزدىكسىز اقاۋسىز، ورنىقتى دامۋى ەكى پارتيانىڭ، ەكى ەلدىڭ، ەكى ەل حالقىنىڭ ءتۇبىرلى مۇددەسىنە ۇيلەسەدى، سوتسياليزم ىستەرىنىڭ گۇلدەنىپ دامۋىنا ءتيىمدى، ءوڭىردىڭ جانە دۇنيە ءجۇزىنىڭ بەيبىتشىلىگىن، ورنىقتىلىعىن قورعاۋعا، دامۋدى، گۇلدەنۋدى جەبەۋگە ءتيىمدى. جاڭا تيپتى ايدارشا ۆيرۋس وكپە قابىنۋ ىندەتىنىڭ سوققىسى مەن كۇردەلى سىرتقى ورتانىڭ سايىسى الدىندا، ەكى ەلدىڭ ءار سالاداعى ناقتى سەلبەستىكتەرى ءتيىمسىز جاعدايدا ارتىپ، كوممۋنيستىك پارتيانىڭ باسشىلىعى مەن سوتسياليستىك ءتۇزىمنىڭ كورنەكتى ابزالدىلىعىن ايگىلەدى، بۇل ەكى پارتيانىڭ، ەكى ەلدىڭ قارىم - قاتىناسىنىڭ وراسان زور ومىرشەڭدىككە يە ەكەندىگىن بەينەلەيدى.
شي جينپيڭ بىلاي دەپ اتاپ كورسەتتى: بيىل جۇڭگو كوممۋنيستىك پارتياسى قۇرىلعاندىعىنىڭ 100 جىلدىعى جانە ”14 - بەسجىلدىق“ جوبانىڭ باستالعان جىلى، سونداي - اق ۆيەتنامنىڭ ۆيەتنام كوممۋنيستىك پارتياسى 13 - قۇرىلتايى رۋحىن دايەكتىلەندىرۋدى، تياناقتاندىرۋدى باستاعان جىلى، جۇڭگو - ۆيەتنام قارىم - قاتىناسى تىڭ تاريحي باستامادا تۇر. جۇڭگو جاق ۆيەتنام جاقپەن بىرگە ستراتەگيالىق بايلانىستى كۇشەيتىپ، ساياسي جاقتاعى ءوزارا سەنىمدىلىكتى نىعايتىپ، ەكى پارتيانىڭ جوعارى جىكتەگىلەرىنىڭ ساياسي جەتەكشىلىگى مەن ءجيى بايلانىسىن ويداعىداي ساقتاپ، جۇڭگو مەن ۆيەتنام قارىم - قاتىناسىنىڭ ورنىقتى قاداممەن الىستارعا جەتۋىن ىلگەرىلەتۋدى قالايدى. جۇڭگو جاق ۆيەتنام جاقپەن ”ءبىر بەلدەۋ، ءبىر جول“ باستاماسىن جانە ”ەكى ءدالىز، ءبىر شەڭبەر“ ستراتەگيالىق ۇشتاسۋىن جەدەلدەتىپ، ەكى ەلدىڭ شەكارا اتتاعان ەكونوميكالىق سەلبەستىك رايون قۇرىلىسىن ىلگەرىلەتىپ، ەمدەۋ، دەنساۋلىق ساقتاۋ، سيفرلى ەكونوميكا، گۋمانيتارلىق سياقتى سالالارداعى اۋىس - كۇيىسى مەن سەلبەستىگىن قاراستىرۋدى قالايدى. ەكى جاق حالىقارالىق جانە وڭىرلىك ىستەردەگى سايكەسۋدى، سەلبەسۋدى كۇشەيتىپ، بىرلەسكەن مەملەكەتتەر ۇيىمىن وزەك ەتكەن حالىقارالىق جۇيەنى باتىل قورعاپ، قورعانىمپازدىققا جانە سىڭار جاقتىلىققا قارسى تۇرىپ، «وڭىرلىك جان - جاقتى ەكونوميكالىق سەرىكتەستىك قارىم - قاتىناس كەلىسىمىنىڭ» ەرتەرەك كۇشكە ەنۋىن ىلگەرىلەتۋى ءارى تەڭىزدەگى الاۋىزدىقتاردى ۇيلەسىمدى باسقارىپ، سىرتقى كۇشتەردىڭ ىرتكى سالۋىنا، پالە شىعارۋىنا قارسى تۇرىپ، ءوڭىردىڭ بەيبىت، ورنىقتى دامۋىن جەبەۋ كەرەك.
رۋان فۋجۇڭ ءوزىنىڭ ۆيەتنام كوممۋنيستىك پارتياسى ورتالىق كوميتەتىنىڭ باس شۋجيلىگىنە تاعى سايلانعاننان كەيىن باس شۋجي شي جينپيڭنىڭ تاماشا تىلەك بىلدىرگەندىگىنە العىس ايتىپ، مىنالاردى ءبىلدىردى: ۆيەتنام كوممۋنيستىك پارتياسىنىڭ 13 - قۇرىلتايى ۆيەتنامنىڭ كەلەر 5 جىلداعى ەكونوميكالىق، قوعامدىق دامۋ باعىتىن، مىندەتىن، سونداي - اق 2030 - جىلدان 2045 - جىلعا دەيىنگى دامۋ بولاشاعىن تۇراقتاندىردى. جۇڭگومەن ءداستۇرلى دوستىق قارىم - قاتىناسىن دامىتۋ جانە كۇشەيتۋ ەجەلدەن ۆيەتنام پارتياسى مەن مەملەكەتىنىڭ ەڭ ماڭىزدى، الدىمەن ويلاساتىن باعىتى، ۆيەتنام جاق جۇڭگونىڭ ىندەتتەن ساقتانۋ - تىزگىندەۋ جانە ەكونوميكانىڭ دامۋىن قالپىنا كەلتىرۋ جاعىندا قول جەتكىزگەن تابىستارىنا وسكەلەڭ باعا بەرەدى، جۇڭگونىڭ ءبىرىنشى 100 جىلدىق كۇرەس نىساناسىن تابىسپەن ورىنداعاندىعىن قۇتتىقتايمىز. قازىرگى حالىقارالىق جاعدايدىڭ كۇردەلى وزگەرىسى جونىنەن العاندا، ۆيەتنام مەن جۇڭگو ەكى پارتياسىنىڭ، ەكى ەلدىڭ، ەكى ەل حالقىنىڭ دوستىق سەلبەستىك قارىم - قاتىناسىن بەكەمدەۋ جانە دامىتۋ اسا ماڭىزدى بولىپ وتىر. ۆيەتنام جاق جۇڭگو جاقپەن ساياسي جاقتاعى ءوزارا سەنىمدىلىكتى تەرەڭدەتىپ، پارتيالار ارا بارىس - كەلىستى كۇشەيتىپ، ەكى جاقتىڭ ناقتى سەلبەستىك كەلىسىمدەرىن تياناقتاندىرۋدى جەدەلدەتىپ، ۆيەتنام - جۇڭگو جاپپاي ستراتەگيالىق سەلبەستىك سەرىكتەستىك قارىم - قاتىناسىنىڭ ۇزدىكسىز اقاۋسىز، ورنىقتى دامۋىن ىلگەرىلەتىپ، ءوز ءوڭىرىنىڭ جانە دۇنيە ءجۇزىنىڭ بەيبىتشىلىگىنە، ورنىقتىلىعىنا، سەلبەستىگىنە، دامۋىنا ۇلەس قوسۋدى قالايدى. ۆيەتنام جاق جۇڭگو كوممۋنيستىك پارتياسىنىڭ پارتيا قۇرىلعاندىعىنىڭ 100 جىلدىعىن قارسى العاندىعىن قۇتتىقتايدى، شي جينپيڭ جولداستى ۇيتقى ەتكەن جۇڭگو كوممۋنيستىك پارتياسى ورتالىق كوميتەتىنىڭ باسشىلىعىندا، جۇڭگونىڭ جاپپاي سوتسياليستىك وسىزاماندانعان مەملەكەت قۇرۋدىڭ جاڭا ساپارىندا تىڭ دا اناعۇرلىم زور تابىستارعا قول جەتكىزەتىندىگىنە كامىل سەنەدى.
شي جينپيڭ مەن رۋان فۋجۇڭ كوكتەم مەرەكەسىنە بايلانىستى ءوزارا سالەم جولداپ، ەكى ەل حالقىنىڭ باقىتتى، ساۋ - سالامات بولۋىن تىلەدى.
