بۇكىل پارتيادا پارتيا تاريحىن ۇيرەنۋ تاربيەسى ورىستەتىلەدى
شينحۋا اگەنتتىگىنىڭ 2 - ايدىڭ 26 - كۇنى بەيجيڭنەن بەرگەن حابارى. جۋىردا جۇڭگو كوممۋنيستىك پارتياسى ورتالىق كوميتەتى «بۇكىل پارتيادا پارتيا تاريحىن ۇيرەنۋ تاربيەسىن ورىستەتۋ جونىندەگى حابارلاندىرۋدى» باسىپ تاراتىپ، پارتيا تاريحىن ۇيرەنۋ تاربيەسىن ورىستەتۋ جونىندە ورنالاستىرۋ جاسادى.
«حابارلاندىرۋدا» مىنالار اتاپ كورسەتىلدى: 2021 - جىل جۇڭگو كوممۋنيستىك پارتياسى قۇرىلعاندىعىنىڭ 100 جىلدىعى. پارتيانىڭ 100 جىلدىق ۇلى كۇرەس بارىسىنان العا ىلگەرىلەۋدىڭ اقىل - پاراساتى مەن كۇش - قۋاتىن قابىلداپ، شي جينپيڭنىڭ جاڭا ءداۋىر جۇڭگوشا سوتسياليزم يدەياسىن ىشكەرىلەي ۇيرەنىپ، دايەكتىلەندىرىپ، ”اۋەلگى ماقساتتى ۇمىتپاۋ، بورىشتى ەستە بەرىك ساقتاۋ“ نەگىزگى تاقىرىپتىق تاربيەسىنىڭ جەتىستىكتەرىن بەكەمدەپ، تەرەڭدەتىپ، بۇكىل پارتيانى، بۇكىل ەلدەگى ءار ۇلت حالقىن جاپپاي سوتسياليستىك وسىزاماندانعان مەملەكەت قۇرۋدىڭ جاڭا ساپارىنا كوكىرەك كەرنەگەن سەنىممەن قادام تاستاۋعا جىگەرلەندىرۋ ءۇشىن، پارتيا ورتالىق كوميتەتى بۇكىل پارتيادا پارتيا تاريحىن ۇيرەنۋ تاربيەسىن ورىستەتۋدى ۇيعاردى.
«حابارلاندىرۋدا» مىنالار اتاپ كورسەتىلدى: جۇڭگو كوممۋنيستىك پارتياسىنىڭ جۇڭگو حالقىنا باسشىلىق ەتىپ باسىپ وتكەن 100 جىلدىق بارىسى داڭقتى دا شۇعىلالى 100 جىل ءارى توتەنشە ماشاقاتتى 100 جىل؛ شارۋاشىلىق قۇرىپ، نەگىز قالاعان 100 جىل ءارى كەلەشەك اشقان 100 جىل. 100 جىلدىق ۇزدىكسىز كۇرەس جۇرگىزۋ بارىسىندا پارتيا حالىققا باسشىلىق ەتىپ ۇلى تاريح جاراتىپ، ۇلى رۋح سومداپ، قىمباتتى تاجىريبەلەر قالىپتاستىرىپ، جۇڭحۋا ۇلتىن ەڭسە كوتەرۋدەن، بايۋدان قۇدىرەتتەنۋگە دەيىنگى ۇلى شارىقتاۋعا يە ەتىپ، جۇڭحۋا ۇلتىنىڭ دامۋ تاريحىنداعى، ادامزات قوعامىنىڭ العا باسۋ تاريحىنداعى ۇلى كەرەمەتتى جاراتتى. پارتيامىز دۇنيە جۇزىندەگى ۇزاق ۋاقىت بيلىك جۇرگىزگەن ەڭ ۇلكەن ساياسي پارتيا رەتىندە، جالپاق جۇرتقا پارتيانىڭ وتكەنىن، قازىرگىسىن، كەلەشەگىن انىقتاپ ءتۇسىندىرىپ، كادرلار مەن بۇقارانى پارتيانىڭ تاريحىن ويداعىداي ۇيرەنۋگە، ويداعىداي قورىتىندىلاۋعا، ويداعىداي جالعاستىرۋعا، ويداعىداي اسقاقتاتۋعا جەتەكتەۋدە ەڭ تولىمدى، ەڭ سەنىمدى.
«حابارلاندىرۋدا» مىنالار اتاپ كورسەتىلدى: تاريحتى ۇيرەنۋ بولاشاققا ويداعىداي جول الۋ ءۇشىن. كەزەكتە ەلىمىز جۇڭحۋا ۇلتىنىڭ ۇلى گۇلدەنۋىن جۇزەگە اسىرۋدىڭ شەشۋشى مەزگىلىندە تۇر، دۇنيە ءجۇزى 100 جىلدا بولماعان زور وزگەرىستى باستان كەشىرۋدە. وسىنداي ءبىر ەلەۋلى تاريحي ساتتە، پارتيا تاريحىن ۇيرەنۋ تاربيەسىن ورىستەتۋدى ۇيىمداستىرۋ تاريحي تاجىريبەلەردى قورىتىندىلاۋ، تاريح زاڭدىلىعىن تانۋ، تاريحتىڭ ىرىقتىلىعىن يگەرۋ جونىنەن، قىزىل گەندى جالعاستىرۋ، اۋەلگى ماقساتتى، بورىشتى ەستە بەرىك ساقتاۋ، دۇرىس بەتالىسقا تاباندى بولۋ جونىنەن، شي جينپيڭنىڭ جاڭا ءداۋىر جۇڭگوشا سوتسياليزم يدەياسىن ىشكەرىلەي ۇيرەنىپ، ءتۇسىنىپ، يدەيانى ىشكەرىلەي بىرلىككە كەلتىرىپ، ەرىك - جىگەردى بىرلىككە كەلتىرىپ، ارەكەتتى بىرلىككە كەلتىرىپ، اناعۇرلىم قۇدىرەتتى ماركسيزمدىك ساياسي پارتيا قۇرىپ، جاڭا تاريحي باستامادا جاڭا داۋىردەگى جۇڭگوشا سوتسياليزمنىڭ ۇلى جەڭىسىن قايراتتانا قولعا كەلتىرۋ جونىنەن كەلەلى دە تەرەڭ مانگە يە.
«حابارلاندىرۋدا» مىنالار اتاپ كورسەتىلدى: پارتيا تاريحىن ۇيرەنۋ تاربيەسىن ورىستەتۋدە باس شۋجي شي جينپيڭنىڭ پارتيا تاريحى جونىندەگى ماڭىزدى بايىمداۋلارىن ىشكەرىلەي ۇيرەنىپ، ءتۇسىنىپ، پارتيانىڭ جاسامپاز نازارياسىن جەتە ۇيرەنۋدى، جەتە يگەرۋدى، شىنايى تياناقتاندىرۋدى مىقتاپ ارقاۋ ەتىپ، تاريحتى ۇيرەنۋ ارقىلى قاعيدانى ءتۇسىنۋدى، تاريحتى ۇيرەنۋ ارقىلى سەنىمدى ارتتىرۋدى، تاريحتى ۇيرەنۋ ارقىلى ءمورالدى اسقاقتاتۋدى، تاريحتى ۇيرەنۋ ارقىلى ۇمتىلا ىستەۋدى ورىنداپ، قالىڭ پارتيا مۇشەلەرىن، كادرلاردى ”ءتورت سەنىمدى“ كۇشەيتىپ، ”ءتورت تانىمدى“ بەكەمدەپ، ”ەكىنى قورعاۋدى“ ورىنداپ، ساياسي تۇجىرىمداۋ قابىلەتىن، ساياسي ءتۇسىنۋ قابىلەتىن، ساياسي اتقارۋ قابىلەتىن ۇزدىكسىز جوعارىلاتىپ، جاپپاي سوتسياليستىك وسىزاماندانعان مەملەكەت قۇرۋ، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋ جولىندا قاجىماي - تالماي كۇرەس جاساۋعا جەتەكتەۋ كەرەك.
«حابارلاندىرۋدا» مىنالار اتاپ كورسەتىلدى: پارتيا تاريحىن ۇيرەنۋ تاربيەسىن ورىستەتۋدە قالىڭ پارتيا مۇشەلەرىن جۇڭگو كوممۋنيستىك پارتياسىنىڭ 100 جىل كۇرەس جاساعان شۇعىلالى بارىسىن ەستە تەرەڭ دە بەرىك ساقتاۋعا، جۇڭگو كوممۋنيستىك پارتياسىنىڭ مەملەكەت پەن ۇلت ءۇشىن قوسقان ۇلى ۇلەسىن تەرەڭ تانۋعا، جۇڭگو كوممۋنيستىك پارتياسىنىڭ حالىق ءۇشىن ىستەۋ اۋەلگى ماقساتىنان، باس ماقساتىنان باستان - اياق بۇلجىماعاندىعىن تەرەڭ ۇعىنۋعا، جۇڭگو كوممۋنيستىك پارتياسىنىڭ ماركسيزمنىڭ جۇڭگوشالانۋىن ىلگەرىلەتە وتىرىپ قالىپتاستىرعان كەلەلى نازاريالىق جەتىستىكتەرىن جۇيەلى يگەرۋگە، جۇڭگو كوممۋنيستىك پارتياسىنىڭ ۇزاق ۋاقىت كۇرەس جۇرگىزۋ بارىسىندا سومداعان ۇلى رۋحىن ۇيرەنۋگە، جالعاستىرۋعا، جۇڭگو كوممۋنيستىك پارتياسىنىڭ توڭكەرىستى، قۇرىلىستى، رەفورمانى ءساتتى ىلگەرىلەتۋدەگى قىمباتتى تاجىريبەلەرىن تەرەڭ تۇسىنۋگە جەتەكتەۋ كەرەك.
«حابارلاندىرۋدا» مىنالار باسا دارىپتەلدى: ءار دارەجەلى پارتكومدار (پارتيا باسشىلىق گرۋپپاسى) پارتيا تاريحىن ۇيرەنۋ تاربيەسىن ورىستەتۋدى كەلەلى ساياسي مىندەت ەتىپ، وسكەلەڭ ءمان بەرۋى، دەن قويا ۇيىمداستىرۋى كەرەك. پارتيا تاريحىن ۇيرەنۋدى، يدەيانى ءتۇسىنۋدى، ناقتى ءىس ىستەۋدى، جاڭا جاعداي اشۋدى كورنەكتىلەندىرىپ، كۇندەلىكتى ۇيرەنۋگە كىرىستىرۋگە، ۇدايى يگەرۋگە ءمان بەرىپ، تۇتاس پارتيا مۇشەلەرىن بەتكە الىپ، اۋدان، باسقارما دارەجەلىدەن جوعارى باسشى كادرلاردى ءتۇيىن ەتىپ ۇيرەنۋ تاربيەسى امالياتىن ورىستەتۋ كەرەك. ماركسيزمدىك تاماشا ۇيرەنۋ سالتىن اسقاقتاتىپ، دۇرىس باعداردى مەڭگەرىپ، قۋزاۋدى، جەتەكشىلىك ەتۋدى كۇشەيتىپ، قويۋ قوعامدىق پىكىر رايىن قالىپتاستىرىپ، پارتيا تاريحىن ۇيرەنۋ تاربيەسىنىڭ تىڭعىلىقتى ونىمدىلىككە قول جەتكىزۋىنە شىنايى كەپىلدىك ەتۋ كەرەك.
