− مەملەكەتتىك ساياسي كەڭەس 13 - كەزەكتى كوميتەتى 4 - ءماجىلىسىنىڭ جابىلۋىنان ەستەلىك
□ شينحۋا اگەنتتىگىنىڭ تىلشىلەرى جياڭ لين، جىڭ ميڭدا، حۋ لۋ
كوكتەم كەلىپ، كۇن جىلىندى، ماگنوليا گۇلى بۇرشىك جاردى.
3 - ايدىڭ 10 - كۇنى تۇستەن كەيىن حالىق سارايى ايبىندى دا اسقاق كورىنىپ، جەلبىرەگەن قىزىل تۋلار مەن مەملەكەت گەربى جايناپ جاراسىم تاۋىپ تۇر. مەملەكەتتىك ساياسي كەڭەستىڭ 2000نان استام مۇشەسى ىلگەرىندى - كەيىندى كەلىپ، مەملەكەتتىك ساياسي كەڭەس 13 - كەزەكتى كوميتەتى 4 - ءماجىلىسىنىڭ جابىلۋ جيىنىنا قاتىناستى.
حۋاجۇڭ عىلىم - تەحنيكا داشۋەسىنە قاراستى شيەحى شيپاحاناسىنىڭ باستىعى مۇشە حۋ يۇي شيراقى جۇرىسپەن سارايدىڭ شىعىس قاقپاسىنا كەلىپ، باسپالداقپەن ورلەي جونەلدى.
بىلتىر وسى ساتتە، جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانعان شەشۋشى ساتتە، ول قىزمەتتەستەرىمەن بىرگە ىندەتكە قارسى اتتانۋدىڭ ءبىرىنشى شەبىندە تاباندىلىقپەن شايقاس جاساپ جاتقان ەدى.
”بيىلعى ءماجىلىس مەزگىلىندە باس شۋجي شي جينپيڭنىڭ ساياسي كەڭەس ماجىلىسىنە قاتىناسقان شيپاگەرلىك، دارىگەرلىك، دەنساۋلىق ساقتاۋ سالاسىنداعى، وقۋ - اعارتۋ سالاسىنداعى مۇشەلەردىڭ بىرىككەن گرۋپپا جيىنىنداعى ماڭىزدى ءسوزىن سول جەردىڭ وزىندە تىڭداپ، بارىنشا شابىتتاندىم، سونداي - اق جاۋاپكەرشىلىگىمنىڭ اۋىر ەكەنىن تەرەڭ سەزىندىم“. مۇشە حۋ يۇي: بەلسەندىلىكپەن ىسكەرلىك كورسەتىپ، اناعۇرلىم دالمە - ءدال، ءونىمدى ساقتانۋ - تىزگىندەۋدى كۇش سالا ويداعىداي يگەرىپ، ۇكىمەتتىك شيپاحانالاردىڭ جوعارى ساپالى دامۋىن ىلگەرىلەتۋ كەرەك، - دەدى.
بۇل ءبىر رەتكى كوپ پاراساتىن مولىنان جيناپ، تاماشا ساياسات كوزدەگەن ءماجىلىس بولدى −
ءماجىلىس جيىنى 5913 ۇسىنىس جوبا تاپسىرىپ الدى. 6 جارىم كۇن ۋاقىت ىشىندە، كەڭەستىك ءتارتىپ لىق تولىپ، شىندىققا جۇگىنىپ، ناقتى جۇمىس تىندىردى. ءبىر - بىرلەگەن تالقى، ءبىر - بىرلەگەن كەڭەس، ءبىر - بىرلەگەن تەكسەرۋ، ءبىر - بىرلەگەن ۇسىنىس، ساياسي كەڭەس مۇشەلەرىنىڭ مەملەكەت ءۇشىن مىندەت اتقارىپ، حالىق ءۇشىن جاۋاپكەرشىلىكتى ادا ەتۋ سىندى جاۋاپكەرشىلىك ارقالاپ، ىسكەرلىك كورسەتۋىن تولىق ايگىلەپ، كەڭەستىك دەموكراتيانىڭ ومىرشەڭدىگى مەن تىرشىلىك تىنىسىن اڭعارتتى.
سىچۋاننان كەلگەن مۇشە يشي داۋا وسى بىرنەشە كۇندەگى ءماجىلىس الاڭىن ەسكە العاندا ەستەن كەتپەس اسەرىن سەزىندى. ”گرۋپپالار تالقىسى كەزىندە، كوپشىلىك جابال لەبىز ءبىلدىردى، ىشكەرىلەي تالقىلاۋ جانە ءوزارا تارتىس بارىسىندا، كوپتەگەن تاماشا شارالار جارىققا شىقتى“.
ءماجىلىس كەزىندە، مۇشە يشي داۋا اۋىل - قىستاقتا قارتتاردى كۇتىمدەۋ ماسەلەسىن تەكسەرۋ - زەرتتەۋ دوكلاتىن الا كەلىپ، كوپتەگەن تاراۋلاردىڭ نازارىن اۋداردى. بۇل ونىڭ سەنىمىن ەسەلەپ ارتتىردى: ”ۇكىمەت شىندىققا جۇگىنىپ، ناقتى جۇمىس تىندىرادى، اۋىل - قىستاقتا قارتتاردى كۇتىمدەۋدىڭ تاماشا جولىن، ءسوز جوق، تابا الادى“.
بۇل ءبىر رەتكى جۇرت تىلەگىن جۇمىلدىرىپ، جاڭا باستاما اشقان ءماجىلىس بولدى −
ءماجىلىس كەزىندە، پارتيا مەن مەملەكەتتىڭ دامۋ ۇلى جوسپارىن ارقاۋ ەتىپ، مۇشەلەر ۇكىمەت قىزمەتىنەن باياندامامەن، ”14 - بەسجىلدىق“ جوبامەن جانە 2035 - جىلعا دەيىنگى بولاشاقتىق نىسانا باعدارلاما جوباسىمەن تىعىز بايلانىستىرىپ، نازاردى جوعارى ساپالى دامۋدى ىلگەرىلەتۋ، جاڭا دامۋ ارناسىن قالىپتاستىرۋ، حالىق تۇرمىسىنىڭ ىرىس - قۇتىن ارتتىرۋ سياقتى ءتۇيىندى مىندەتتەرگە شوعىرلاندىرىپ، بەلسەنە ۇكىمەت ىسىنە اقىل - كەڭەس بەرىپ، جاپپاي ورتاق تانىم ۇيىستىردى.
تۇستەن كەيىن ساعات 2 مولشەرىندە، حالىق سارايىنىڭ اقپار جاريالاۋ زالىندا، مەملەكەتتىك ساياسي كەڭەس 13 - كەزەكتى كوميتەتى 4 - ءماجىلىسىنىڭ ەڭ سوڭعى ءبىر ”مۇشەلەر ارناسى“ اشىلدى. مەملەكەتتىك ساياسي كەڭەستىڭ 8 مۇشەسى ينتەرنەتتىك بەينەبايلانىس ارقىلى قوعامنىڭ ءجىتى قاداعالاعاندارىنا جاۋاپ قايتارىپ، دامۋدىڭ تاماشا شارالارىن اقتارىلا ايتتى.
”كەدەيلىكتەن ارىلتىپ، كەدەيلىك قالپاعىن الىپ تاستاۋ سوڭعى مارە ەمەس، قايتا جاڭا تۇرمىس، جاڭا كۇرەستىڭ باستاماسى. كەدەيلەردى سۇيەمەلدەۋ بويىنشا كوشىرۋ دە جاي عانا جۇرت جاڭالاۋ ەمەس، تاعى دا جاقسى جول سالۋ، كوشىرىلگەن بۇقارانىڭ تۇراقتى تۇرۋىنا، جۇمىستانا الۋىنا، بىرتىندەپ بايي الۋىنا شىنايى كەپىلدىك ەتۋ كەرەك“؛
”ۇلتتار ىنتىماعى − ەلىمىزدەگى ءار ۇلت حالقىنىڭ جانى، بەينە كۇن شۋاعى، اۋا جانە سۋ سياقتى، يگىلىگىن كورگەنمەن سەزىلە بەرمەيدى، ايرىلساق ءومىر ءسۇرۋ قيىن“...
مۇشەلەردىڭ ”تاماشا ءۇنى“ حالىق سارايىنان بۇقارا اراسىنا جەتتى، مەملەكەت ءىشى - سىرتىنا تارادى.
ءۇش رەتكى ”مۇشەلەر ارناسىنان“ اقپار جاريالاۋ ماجىلىسىنە دەيىن، كوپ رەتكى سالالىق كەڭەس ماجىلىسىنەن 24 مۇشەنىڭ ماجىلىستە لەبىز بىلدىرۋىنە دەيىن... سانسىز تەرەزە سىپەتتى، دۇنيە جۇزىنە جۇڭگو حالقىنىڭ ءبىر نيەتپەن جۇمىلىپ، ارمانعا ۇمتىلعان اسقاق بەينەسىن كورسەتتى.
تۇستەن كەيىنگى ساعات 3 مولشەرىندە، جابىلۋ ءماجىلىسى باستالدى. شي جينپيڭ قاتارلى پارتيا مەن مەملەكەت باسشىلارى قاتىناستى.
10 مىڭ ادامدىق ۇلكەن زالدىڭ ءىشى قىزۋ مەرەيگە شومدى.
ساياسي كەڭەس تۇراقتى كوميتەتىنىڭ قىزمەت بايانداماسى جونىندەگى قاۋلى، ۇسىنىس جوبا قىزمەتى جاعدايى بايانداماسى جونىندەگى قاۋلى، ۇسىنىس جوبالاردى قاراپ تەكسەرۋ جاعدايى بايانداماسى، ءماجىلىستىڭ ساياسي قاۋلىسى... دوعاشا توبەدەگى جارقىراعان شامدار استىندا مۇشەلەر داۋىس بەرۋ قۇرىلعىسىن بايىپپەن باستى.
”ماڭىزدى شەپتى مىقتى ساقتاپ، جۇڭگو كوممۋنيستىك پارتياسىنىڭ باسشىلىعىنا اۋىتقىماستان تاباندى بولۋ جانە كۇشەيتۋ“؛
”ماڭىزدى تۇعىردى بەكەمدەپ، شىن مانىندە پارتيانىڭ جاسامپاز نازارياسى ارقىلى ورتاق يدەيا - ساياسي نەگىزدى بەكەمدەۋ“؛
”ماڭىزدى ارنانى ىركىلىسسىزدەندىرىپ، جاڭا ساپارعا ەكپىندەي ىلگەرىلەۋدىڭ بىرىككەن كۇشىن جاپپاي ۇيىستىرۋ“؛
...
مەملەكەتتىك ساياسي كەڭەستىڭ ءتوراعاسى ۋاڭ ياڭ ءسوز سويلەدى، ءماجىلىس الاڭىنان اۋىق - اۋىق شاپالاق ءۇنى ەستىلدى.
جاڭا تاريحي توعىسۋ تۇيىنىندە اشىلعان ساياسي كەڭەس ءماجىلىسىنىڭ ءمانى وزگەشە ەكەندىگى داۋسىز.
”شارۋالاردىڭ عىلىم - تەحنيكا، مادەنيەت ساپاسىن جوعارىلاتىپ، اۋىل - قىستاقتى دارىندىلارمەن كوركەيتۋدى ىلگەرىلەتۋ − ”14 - بەسجىلدىق“ جوبا باعدارلاماسى جوباسىنداعى ايقىن تالاپ. ءبىز اناعۇرلىم كوپ جەرگىلىكتى دارىندىلاردى قۇلشىنا باۋلىپ، بولاشاق دامۋعا تىرەك ازىرلەيمىز“. كەدەيلىككە قوش ايتىپ، اۋىل - قىستاقتى گۇلدەندىرۋدىڭ داڭعىل جولىنا تۇسكەن گۇيجوۋ ولكەسى پانجوۋ قالاسى يۇيني اۋىلى يانبو قىستاعى پارتكومىنىڭ شۋجيى، مۇشە يۇي ليۋفىننىڭ نىساناسى ايقىن.
ءماجىلىس الاڭىنان شىققان مۇشەلەردىڭ بەينەسى ارىندى، جىگەرلى ەدى.
”مىندەت اتقارۋ قابىلەتىن كۇشەيتىپ، مەملەكەتتى جونگە سالۋ جۇيەسى مەن جونگە سالۋ قابىلەتىن وسىزامانداندىرۋعا اناعۇرلىم ويداعىداي قىزمەت كورسەتۋ“؛
”وتاننىڭ ءۇمىتىن اقتاۋ جىگەرىن، حالىققا قىزمەت ەتۋ نيەتىن جانە مىندەت اتقارۋ قابىلەتىن اناعۇرلىم ويداعىداي ۇشتاستىرىپ، جاڭا ساپار بارىسىندا ساياسي كەڭەس مۇشەلەرىنىڭ جاڭا جاۋاپكەرشىلىك ارقالاۋىن ايگىلەۋ“؛
...
جاڭا ساپاردىڭ كەرنەيى تارتىلدى. كوكتەمنىڭ ىرعاعىمەن باسىپ، مول تابىسپەن، جۇدىرىقتاي جۇمىلىپ، كۇش - قۋات ۇيىستىرىپ، ارمانعا قاراي اتتانامىز.
(شينحۋا اگەنتتىگىنىڭ 3 - ايدىڭ 10 - كۇنى بەيجيڭنەن بەرگەن حابارى)
