شينحۋا اگەنتتىگىنىڭ 3 - ايدىڭ 11 - كۇنى بەيجيڭنەن بەرگەن حابارى. 13 - كەزەكتى مەملەكەتتىك حالىق قۇرىلتايى 4 - ءماجىلىسىنىڭ ءتوراعالار القاسى 3 - ايدىڭ 11 - كۇنى تۇستەن بۇرىن حالىق سارايىندا 4 - رەتكى جيىن وتكىزدى.
ءتوراعالار القاسىنىڭ تۇراقتى ءتوراعاسى لي جانشۋ جيىندى باسقاردى.
جيىنعا قاتىناسۋعا ءتيىستى 174 ادام، قاتىناسقانى 170 ادام، 4 ادام قاتىناسا المادى، قاتىناسقان ادام سانى زاڭدا بەلگىلەنگەن ادام سانىنا ۇيلەسەدى.
3 - ايدىڭ 11 - كۇنى تۇستەن بۇرىن ۋاكىلدەر ۇيىرمەلەرى 13 - كەزەكتى مەملەكەتتىك حالىق قۇرىلتايى 4 - ءماجىلىسىنىڭ ۇكىمەت قىزمەتىنەن باياندامانى، ”14 - بەسجىلدىق“ جوبا جانە 2035 - جىلعا دەيىنگى بولاشاقتىق نىسانا باعدارلاماسىن، 2020 - جىلعى حالىق شارۋاشىلىعى مەن قوعامدىق دامۋ جوسپارىنىڭ اتقارىلۋ جاعدايى جانە 2021 - جىلعى حالىق شارۋاشىلىعى مەن قوعامدىق دامۋ جوسپارى، 2020 - جىلعى ورتالىق پەن جەرگىلىكتى ورىن مەجە ەسەبىنىڭ اتقارىلۋ جاعدايى جانە 2021 - جىلعى ورتالىق پەن جەرگىلىكتى ورىن مەجە ەسەبى، مەملەكەتتىك حالىق قۇرىلتايى تۇراقتى كوميتەتىنىڭ قىزمەت بايانداماسى، ەڭ جوعارى حالىق سوتى مەكەمەسىنىڭ قىزمەت بايانداماسى، ەڭ جوعارى حالىق پروكۋراتۋراسىنىڭ قىزمەت بايانداماسى جونىندەگى 7 قاۋلى جوبانى مۇقيات قاراپ، ءماجىلىس جالپى جيىنىنىڭ داۋىسقا سالۋىنا ۇسىنۋعا ءبىر اۋىزدان قوسىلدى. ءتوراعالار القاسىنىڭ تۇراقتى ءتوراعالارى ۋاكىلدەر ۇيىرمەلەرىنىڭ قاراۋ پىكىرىنە نەگىزدەلىپ، قاۋلى جوبالاردى داۋىسقا سالۋ نۇسقاسىن ءماجىلىس جالپى جيىنىنىڭ داۋىسقا سالۋىنا تاپسىرۋدى ۇسىنىس ەتتى.
ءتوراعالار القاسىنىڭ جيىنى جەكە - جەكە داۋىسقا سالۋ ارقىلى جوعارىداعى قاۋلى جوبالاردىڭ داۋىسقا سالىناتىن نۇسقالارىن ءماجىلىستىڭ جالپى جيىنىنىڭ داۋىسقا سالۋىنا ۇسىنۋدى ۇيعاردى.
ءتوراعالار القاسىنىڭ تۇراقتى ءتوراعالارى ۋاڭ چىن، ساۋ جيانميڭ، جاڭ چۇنشيان، شىن يۋەيۋە، جي بيڭشۋان، ەركىن يمىرباقى، ۋان ىشياڭ، چىن جۋ، ۋاڭ دۇڭميڭ، بايما چىلين، ديڭ جۇڭلي، حاۋ ميڭجين، ساي دافىڭ، ۋ ۋيحۋا، ياڭ جىن - ۋ جيىنعا قاتىناستى.
