تيانشان تورى
تيانشان تورى   ›   جاڭالىقتار   ›   ماڭىزدى حابارلار

شي جينپيڭ گەرمانيانىڭ زۇڭليى مەركەلمەن تەلەفوندا سويلەستى

  شينحۋا اگەنتتىگىنىڭ 4 - ايدىڭ 7 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 4 - ايدىڭ 7 - كۇنى ۇسىنىس بويىنشا گەرمانيانىڭ زۇڭليى مەركەلمەن تەلەفوندا سويلەستى.

  شي جينپيڭ بىلاي دەپ باسا دارىپتەدى: بىلتىر ءبىز كوپ رەت پىكىرلەسىپ، جۇڭگو - گەرمانيا، جۇڭگو - ەۆروپا قارىم - قاتىناسىنىڭ دامۋىندا ماڭىزدى جەتەكشىلىك رول اتقاردىق. جۇڭگو مەن گەرمانيا، جۇڭگو مەن ەۆروپا سەلبەستىكتى كۇشەيتسە، ءماندى دە ۇلكەن ىستەردى تىندىرا الادى. گەرمانيا جاقتىڭ، ەۆروپا جاقتىڭ جۇڭگو جاقپەن بىرگە بەلسەنە قۇلشىنىپ، جۇڭگو - گەرمانيا، جۇڭگو - ەۆروپا سەلبەستىگىنىڭ اقاۋسىز، ورنىقتى دامۋىن قورعاپ جانە ىلگەرىلەتىپ، قۇبىلمالى دۇنيە ءجۇزى ءۇشىن اناعۇرلىم كوبىرەك تۇراقتىلىق پەن ورنىقتىلىق ۇستەۋىن ءۇمىت ەتەمىن.

  شي جينپيڭ بىلاي دەپ اتاپ كورسەتتى: جۇڭگو مەن گەرمانيانىڭ ناقتى سەلبەستىگى جاڭا تيپتى ايدارشا ۆيرۋس وكپە قابىنۋ ىندەتىنىڭ ىقپالىن جانە باسقا دا فاكتورلاردىڭ كەدەرگىلەرىن جويىپ، ورنىقتىلىق بارىسىندا ىلگەرىلەدى، جۇڭگو ۇدايى 5 جىل گەرمانيانىڭ الەمدەگى ەڭ ۇلكەن ساۋدا سەرىگى بولىپ، جۇڭگو - گەرمانيا سەلبەستىگىنىڭ سەرپىمدىلىگى مەن كومەسكى كۇشىن ايگىلەدى. ەكى جاقتىڭ ءوزارا قۇرمەت ەتۋ، ءبىر - بىرىنە پايدا جەتكىزىپ تەڭ يگىلىككە كەنەلۋ رۋحىن ۇستانا وتىرىپ، جۇڭگو مەن گەرمانيانىڭ ءار سالاداعى سەلبەستىكتەرىن ءبىر تۇتاس جوسپارلاپ ىلگەرىلەتۋىن ءۇمىت ەتەمىن، بۇل جۇڭگو - ەۆروپا سەلبەستىگى مەن دۇنيە ءجۇزى ەكونوميكاسىن قايتا سەرپىلتۋ ءۇشىن سەنىم جانە قوزعاۋشى كۇش ۇستەۋگە ءتيىمدى. جۇڭگو جاق جاڭا دامۋ ارناسىن بەلسەنە قالىپتاستىرۋ ۇستىندە، ءوز كۇشىنە سۇيەنىپ دامۋمەن بىرگە، سىرتقا ەسىك اشۋعا تاباندى بولىپ، حالىقارالىق جۇمىس ءبولىسى سەلبەستىگىنە بەلسەنە ات سالىسىپ كەلەدى. جۇڭگو جاق گەرمانيا كاسىپورىندارىن قامتىعان ءار ەل كاسىپورىندارىنىڭ جۇڭگونىڭ جاڭا كەزەكتى ەسىك اشۋى، دامۋى اكەلگەن ورايدان بىرگە يگىلىكتەنۋىن قالايدى. گەرمانيا جاقتىڭ اشىقتىقتى ساقتاپ، ەكى ەل كاسىپورىندارىنىڭ ءوزارا ءتيىمدى سەلبەستىكتى كەڭەيتۋى ءۇشىن اناعۇرلىم كوپ قولايلىلىق ازىرلەۋىن ءۇمىت ەتەمىن. ەكى جاق كەلەر جىلى كەلەتىن جۇڭگو مەن گەرمانيانىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعىن جانە بەيجيڭ قىسقى وليمپياداسىن وراي ەتىپ، عىلىم - تەحنيكا، وقۋ - اعارتۋ، مادەنيەت، دەنە تاربيە سياقتى سالالارداعى اۋىس - كۇيىستى ىلگەرىلەتۋى ءتيىس.

  شي جينپيڭ بىلاي دەپ باسا دارىپتەدى: كەزەكتە جۇڭگو - ەۆروپا قارىم - قاتىناسى جاڭا دامۋ ورايىنا ءدوپ كەلۋمەن بىرگە، ءتۇرلى سىن - سايىستارعا دا تاپ بولىپ وتىر. باستىسى، جۇڭگو - ەۆروپا قارىم - قاتىناسى دامۋىنىڭ ۇلكەن بەتالىسى مەن نەگىزگى ارناسىن ستراتەگيالىق تۇرعىدان مىقتاپ يگەرىپ، ءوزارا قۇرمەت ەتىپ، كەدەرگىلەردى جويۋ كەرەك. جۇڭگونىڭ دامۋى ەۆروپا وداعى ءۇشىن وراي سانالادى، ەۆروپا وداعىنىڭ دەربەس تۇردە دۇرىس تۇجىرىم جاساپ، ستراتەگيادا ءوز - وزىنە قوجايىن بولۋدى شىن مانىندە جۇزەگە اسىرۋىن ءۇمىت ەتەمىن. جۇڭگو جاق ەۆروپا جاقپەن بىرگە قۇلشىنىپ، كەلەسى كەزەڭدەگى ءبىرسىپىرا ماڭىزدى ساياسي كەڭەستىك تارتىپتەردى اقىلداسا وتىرىپ ويداعىداي ىستەپ، ءتۇرلى سالالارداعى ناقتى سەلبەستىكتى تەرەڭدەتىپ جانە كەڭەيتىپ، كليمات وزگەرىسى سياقتى الەمدىك جونگە سالۋ ماسەلەلەرىندە پىكىرلەسۋدى كۇشەيتىپ، كوپ جاقتىلىقتى امالياتتا بىرگە ايگىلەۋدى قالايدى.

  شي جينپيڭ بىلاي دەپ اتاپ كورسەتتى: ۆاكسينا اۋرۋدىڭ الدىن الۋعا، ادامدى قۇتقارۋعا قولدانىلۋى ءتيىس، جۇڭگو جاق ۆاكسينانى ساياسيلاندىرۋعا نەمەسە ”ۆاكسينا ۇلتشىلدىعىمەن“ اينالىسۋعا قارسى تۇرادى، گەرمانيا جاقتى قامتىعان حالىقارالىق قوعاممەن بىرگە ۆاكسينانىڭ ءادىل، ۇيلەسىمدى ءبولىنۋىن جەبەپ، قالىڭ وركەندەپ كەلە جاتقان ەلدەردىڭ ۆاكسيناعا قول جەتكىزۋىنە قولداۋ كورسەتىپ جانە كومەكتەسىپ، ادامزاتتىڭ ىندەتتى بىرگە ەرتەرەك جەڭىپ شىعۋى ءۇشىن ۇلەس قوسۋدى قالايدى.

  مەركەل مىنالاردى ءبىلدىردى: ەۆروپا جاق سىرتقى قارىم - قاتىناس جاعىندا ءوز - وزىنە قوجايىن بولۋعا تاباندى بولادى. قازىر دۇنيە ءجۇزى كوپتەگەن ماسەلەلەرگە جانە سىن - سايىستارعا ءدوپ كەلىپ وتىر، بۇل گەرمانيا مەن جۇڭگونىڭ، ەۆروپا مەن جۇڭگونىڭ سەلبەسە وتىرىپ توتەپ بەرۋىنە اناعۇرلىم مۇقتاج. ەۆروپا مەن جۇڭگونىڭ تىلدەسۋدى، سەلبەسۋدى كۇشەيتۋى ەكى جاقتىڭ مۇددەسىنە ۇيلەسىپ قانا قويماي، دۇنيە ءجۇزى ءۇشىن دە ءتيىمدى، گەرمانيا جاق بۇل ءۇشىن بەلسەندى رول اتقارۋدى قالايدى. گەرمانيا جاق جۇڭگونىڭ ”14 - بەسجىلدىق“ جوباسىنا ءمان بەرەدى، ونىڭ گەرمانيا - جۇڭگو، ەۆروپا - جۇڭگو سەلبەستىگى ءۇشىن تىڭ، ماڭىزدى وراي اكەلۋىن كۇتەدى. گەرمانيا جاق جۇڭگو جاقپەن بىرگە جاڭا كەزەكتى گەرمانيا مەن جۇڭگونىڭ ۇكىمەت ارالىق كەلىسسوزگە جاقسى دايىندالىپ، ادامدار ارا بارىس - كەلىستى جەدەل قالپىنا كەلتىرىپ، ىندەتكە قارسى اتتانۋ، كليمات وزگەرىسى، ورگانيزمدەردىڭ الۋان تۇرلىلىگى سياقتى سالالارداعى اۋىس - كۇيىس پەن سەلبەستىكتى كۇشەيتۋدى قالايدى، ۆاكسينانىڭ ءادىل ءبولىنۋى، ءوزارا كۋالاندىرۋ سياقتى ماسەلەلەردە جۇڭگو جاقپەن پىكىرلەسۋدى ساقتاۋدى ءۇمىت ەتەدى. گەرمانيا جاق كۇنميڭ ورگانيزمدەردىڭ الۋان تۇرلىلىگى جينالىسىنىڭ تابىستى بولۋى ءۇشىن ۇلەس قوسۋدى قالايدى.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.