تيانشان تورى   ›   جاڭالىقتار   ›   شينجياڭ حابارلارى

ءۇيدىڭ ماڭايىندا ساۋدا ىستەدى، قىستاقتان شىقپاي - اق اقشا تاپتى

□ انار بۇلت / شينجياڭ گازەتىنىڭ تىلشىلەرى ءرايدا، ءپاريزات ابدۇل

     پوسكام التىن توراڭعى مەملەكەتتىك ورمان باقشاسى (4 - ايدىڭ 11 - كۇنى ۇشقىش اپپاراتپەن تۇسىرىلگەن). التىن توراڭعى مەملەكەتتىك ورمان باقشاسى اۋدان قالاشىعىنىڭ باتىس وڭتۇستىگىندەگى 40 كيلومەتر جەرگە ورنالاسقان، توراڭعى، تۇنىق سۋ، جاسىل القاپ، قۇبا ءشولدى ءبىر تۇلعالاندىرعان بولىپ، كوپتەگەن ساياحاتشىنى تولاسسىز كەلۋگە باۋرادى.

  □ سۋرەتتى انار بۇلت / شينجياڭ گازەتىنىڭ ءتىلشىسى جوۋ پىڭ تۇسىرگەن

  4 - ايدىڭ 11 - كۇنى ”جوعارى جىلدامدىقتى تاس جولدى بويلاپ شينجياڭعا نازار سالۋ بويىنشا“ قىزىلسۋ وبلىسىنان حوتانعا دەيىنگى بولىگىندەگى نەگىزگى تاقىرىپتىق تىلشىلىك ىستەپ حابارلاۋ قيمىلىنىڭ 5 - كۇنى، انار بۇلت /شينجياڭ گازەتىنىڭ جالپىلىق اقپارات قۇرالدارىنىڭ حابارلاۋ توبى اۆتوموبيلمەن تۇرپان - حوتان جوعارى جىلدامدىقتى تاس جولىن (G3012) بويلاپ پوسكام اۋدانىنا كەلدى.

  اۋدان قالاشىعىنان 10 كيلومەترگە جەتەر - جەتپەس جەردەگى ياركەن وزەنى الابى ساياحات توپتاۋ - تاراتۋ ورتالىعى − پوسكام اۋدانىنداعى تۇتاس وڭىرلىك ساياحاتتىڭ ءبىرىنشى قاقپاسى. بۇل توپتاۋ - تاراتۋ ورتالىعىنىڭ كورىنىسى وزگەشە، يقۋاتى تولىق، ساياحاتشىلاردى ساياحاتتىق كەڭەس بەرۋ، زات ساتىپ الۋ، دەمالۋ، مادەنيەت ايگىلەۋ سياقتى قىزمەت وتەۋلەرمەن قامداي الادى.

  ياركەن وزەنى الابى ساياحات توپتاۋ - تاراتۋ ورتالىعىنان اتتانىپ، اۆتوموبيلمەن باتىس وڭتۇستىككە قاراي 30 نەشە كيلومەتر جول جۇرگەندە ياركەن وزەنىنىڭ تۇنبا قايراڭىنىڭ جوعارى جيەگىنە ورنالاسقان مەملەكەتتىك 5A دارەجەلى ساياحات كورىنىس ءوڭىرى − پوسكام التىن توراڭعى مەملەكەتتىك ورمان باقشاسىنا جەتەسىز.

  تابيعي كورىنىسى وزگەشە پوسكام التىن توراڭعى مەملەكەتتىك ورمان باقشاسى توراڭعى، سۋ، شۇرات، قۇبا ءشول ءبىر تۇلعالانعان، ادامدارعا شەكارا وڭىردەگى توتىدايىن تۇرلەنگەن وزگەشە اسەم كورىنىستى ايشىقتاپ، جەر - جەر ساياحاتشىلارى پوسكامعا ساياحاتتاي كەلگەندە، ءسوزسىز، بارۋعا ءتيىستى ينتەرنەتتەگى ايگىلى كورىنىس وڭىرىنە اينالدى.

  ”مەن قاشقاردا 3 كۇن تاماشالاپ، بۇگىن ەرتەمەن جوعارى قارقىندى تاس جولدى بويلاپ پوسكامعا كەلدىم. بۇل ارانىڭ كورىنىسى ەرەكشە كوركەم ەكەن، اۋىل تىنىسى تىم قويۋ، شارۋالار شاتتىعى ساياجايىنىڭ تاماعى دا ەرەكشە ءدامدى ەكەن، بۇل، راسىندا، ولجالى ساپار بولدى“، - دەدى شاڭحايلىق ساياحاتشى سۇڭ شينمين.

  ساياحات كاسىبىنىڭ دامۋى الا كەلگەن پايدانى اۋىزعا العاندا، التىن توراڭعى مەملەكەتتىك ورمان باقشاسى كورىنىس ءوڭىرى ىشىندەگى ۇزاق جاسايتىندار سالت - سانا، مادەنيەت قىستاعىنىڭ ەڭ سويلەۋ ۇقىعى بار.

  ۇزاق جاسايتىندار سالت - سانا، مادەنيەت قىستاعىنا سەرۋەندەي بارساڭىز، تاس تاقتالى جولدىڭ ەكى جاعىنداعى قىزىل كەرپىشتى بەيقۇت ۇيلەردەن باياعىنىڭ سارىنى ەسەدى، ءبىر - بىرلەگەن شاعىن اۋلالار ءارى قىستاق تۇرعىندارىنىڭ ءۇيى، ءارى شارۋالار شاتتىعى ساياجايى، شاعىن ءتۇرلى بۇيىمدار ماگازينى، ساياحات ەستەلىك بۇيىمدار ماگازينى ەكەن.

  ياركەن وزەنى قايراڭى شارۋالار شاتتىعى ساياجايىنا بارعانىمىزدا، ايەل قوجايىن نۇرچيمان تۇرىپ قوناق قابىلداۋمەن ابىگەر بولىپ ءجۇر ەكەن. 2013 - جىلى التىن توراڭعى كورىنىس ءوڭىرىن باسقارۋ كوميتەتىنىڭ جەتەكشىلىگىندە، نۇرچيمان قىستاقتا 1 - توپتا شارۋالار شاتتىعى ساياجايىن اشقان شارۋا وتباسىنا اينالدى. ”بۇرىن كىرىسىمىز دەرلىك ءۇيىمىزدىڭ 13 مۋ جەرىنە سۇيەنەتىن، ءبىر جىلدا 20 مىڭ يۋان دا تابا الماۋشى ەدىك. وسى جىلدارى كورىنىس وڭىرىنە كەلەتىن ساياحاتشىلار بارعان سايىن كوبەيدى، شارۋالار شاتتىعى ساياجايىنىڭ ارقاسىندا ءبىر جىلداعى تيجارات سومامىز 300 مىڭ يۋاننان استى، ەڭ كوپ بولعاندا، ءبىر كۇندە 30 نەشە مىڭ يۋان تاپتىق“، - دەدى تاڭەرتەڭ ەرتەمەن الدەنەشە لەك ساياحاتشىنى قابىلداعان ول كىرىسىن اۋىزعا العاندا ءماز - ءمايرام بولىپ.

  ۇزاق جاسايتىندار سالت - سانا، مادەنيەت قىستاعى تابيعي قىستاق نەمەسە اكىمشىلىك قىستاق ەمەس، قايتا پوسكام اۋداندىق مەملەكەت يەلىگىندەگى ورمان الاڭى التىن توراڭعى مەملەكەتتىك ورمان باقشاسى كورىنىس ءوڭىرىن تايانىش ەتىپ ءتۇيىندى تۇردە تۇلعالاعان وزەكتى كورىنىس وڭىرلەرىنىڭ ءبىرى. قىستاق تۇرعىندارى ورمان الاڭىنىڭ جۇمىسشى - قىزمەتكەرلەرى، ورمان الاڭىندا 86 وتباسى، 386 ادام بار.

  ”بۇرىن ورمان الاڭىنىڭ جۇمىسشى - قىزمەتكەرلەر تۇراتىن قىستاعى ەرەكشە توزىڭقى ەدى، كوپ ساندى وتباسىلار تەك بار بولعانى بىرنەشە مۋ ەگىستىك جەرگە سۇيەنىپ تىرشىلىگىن ەپتەپ - سەپتەپ وتكىزىپ كەلە جاتقان - تۇعىن. 2003 - جىلدان بەرى پوسكام اۋدانى قاشقار ايماعى ساياحات كاسىبىن دامىتقان تاماشا ورايدى مىقتى يگەرىپ، كورىنىس ءوڭىرى اۋىل - قىستاق ساياحاتىن، ەكولوگيالىق اۋىل شارۋاشىلىعىن تاماشالاۋ ساياحاتىن، توراڭعى ساياحاتىن زور كۇشپەن دامىتۋدى ورتاعا قويىپ، ۇزاق جاسايتىندار سالت - سانا، مادەنيەت قىستاعىن بار كۇشپەن قۇردى. قازىر قىستاقتاعى 8 وتباسى تۇرعىنى اس - سۋ كاسىبىمەن، 100 نەشە ادام ساياحاتپەن تىكەلەي شۇعىلدانىپ وتىر“. پوسكام اۋداندىق مەملەكەت يەلىگىندەگى ورمان الاڭى پارتيا ياچەيكاسىنىڭ شۋجيى، التىن توراڭعى مەملەكەتتىك ورمان باقشاسى كورىنىس ءوڭىرىن باسقارۋ ورتالىعىنىڭ مەڭگەرۋشىسى تيان لەي بىلاي دەدى: ساياحات كاسىبىنىڭ دامۋىنا ىلەسە، بۇل كۇندەرى قىستاق تۇرعىندارى ”ەسىك الدىندا وتىرىپ ساۋدا ىستەپ، قىستاقتان شىقپاي - اق اقشا تاباتىن“ تاماشا تۇرمىس كەشىرۋدە. جىلدىق ادام باسىنا تۋرا كەلەتىن تازا كىرىس 2002 - جىلعى 800 يۋانعا جەتپەۋدەن 2020 - جىلى 14 مىڭ يۋانعا جەتتى.

  بۇل كۇندەرى پوسكام اۋدانى تۇرپان - حوتان جوعارى جىلدامدىقتى تاس جولىنىڭ، قاشقار - حوتان تەمىر جولىنىڭ، مەملەكەت تاس جولى 315 - لەنياسىنا سۇيەنىپ قاشقار 3 ساعاتتىق ەكونوميكالىق شەڭبەرىنە كىرگىزىلدى. ”قولايلى قاتىناس كورىنىس ءوڭىرىنىڭ دامۋىنا قوزعاۋشى كۇش قوستى. بۇرىن ساياحاتشىلار قاشقاردان پوسكامعا دەيىن اۆتوموبيلمەن 4 ساعات اينالاسىندا جۇرەتىن، ال قازىر نەبارى 2 ساعاتتاي ۋاقىت كەتەدى“، - دەدى تيان لەي.

  بيىل التىن توراڭعى مەملەكەتتىك ورمان باقشاسى كورىنىس ءوڭىرىن باسقارۋ كوميتەتى قىزمەت وتەۋ ورەسىن اناعۇرلىم جوعارىلاتىپ، ساياحاتتىق قىزمەت وتەۋ نىساندارىن كەڭەيتەدى. ”ءارقايسى جوعارى جىلدامدىقتى تاس جولدىڭ جانە ساياحات لەنيالارىنىڭ اشىلۋىنا ىلەسە، بولاشاقتا بۇل جەردىڭ ءتىپتى دە كوپ ساياحاتشىنى قابىلدايتىنىنا سەنەمىز. ءبىز ۇزاق جاسايتىندار قىستاعى تۇرعىندارىنىڭ ءار وتباسىن ءبىر - ەكى حالىقتىق تۇسەلحانا اشۋعا جەتەكتەۋدى جوسپارلاپ وتىرمىز، حالىقتىق تۇسەلحانانى دامىتۋ ارقىلى كىرىستى ءتىپتى دە ارتتىرامىز“، - دەدى تيان لەي.

ءتىلشى ەستەلىگى

كوركەم كورىنىس جولىمىزدا باقىت تابانىمىز استىندا

□ ءپاريزات ابدۇل

  4 - ايدىڭ 11 - كۇنى انار بۇلت/ شينجياڭ گازەتى جالپىلىق اقپارات قۇرالدارى حابارلاۋ توبى مەملەكەتتىك 5A دارەجەلى ساياحات كورىنىس ءوڭىرى − پوسكام التىن توراڭعى مەملەكەتتىك ورمان باقشاسىنا كەلدى. كورىنىس وڭىرىندە جۇرگەندە توراڭعى، سۋ، جاسىل القاپ، قۇبا ءشول ءبىر تۇلعالانعان وزگەشە تارتىمدىلىق بىردەن كوز تارتادى.

  ”تىلمەن بەينەلەۋ قيىن - اق، سۇلۋسىڭ نەتكەن تاماشا، المايدى كوكتەم دە كوركىڭە تالاسا، سىمباتىڭ تىم ەرەك؛ بولەكشە شىرايىڭ، گۇل بىتكەن شەندەسپەي تۇرادى ءمۇلايىم... كەلبەتىڭ تاۋسىلماس جىر ما ەكەن، سىمباتىڭ سارقىلماس كۇي مە ەكەن“. توراڭعىنى جىرلايتىن وسىناۋ جىر جولدارى باقشاداعى كوركەم ياركەن وزەنىنىڭ، ءتىلسىم بايىرعى توراڭعى ورمانىنىڭ بەت پەردەسىن اشقانداي.

  ەركە سۇلۋ توراڭعى ورمانى، ماساتىداي قۇلپىرعان جاسىل جايلاۋ، ارقىراپ اققان اساۋ وزەن، كوركەم سازدىق، كول... وسى بايلىقتار پوسكامعا ”پوسكام ىلعالدى، شىنار اعاشىنىڭ سايران باعى“ دەگەن داڭقتار اكەلدى. پوسكام اۋدانى ىلگەرىندى - كەيىندى ۇلتتار ىنتىماعى، العاباسارلىعىنداعى مەملەكەتتىك وزات ورىن، مەملەكەتتىك باۋ - باقشالى اۋدان قالاشىعى سياقتى داڭقتارعا يە بولىپ، مەملەكەت بويىنشا 10 ءىرى سەيىل - سەرۋەن قالاشىعى اتاعىن ءۇرتىس يەلەنىپ كەلەدى، 2020 - جىلى 9 - ايدا ءساتتى تۇردە اۆتونوميالى رايون دارەجەلى تۇتاس وڭىرلىك ساياحاتتان ۇلگى كورسەتۋ ءوڭىرى بولىپ قۇرىلدى.

  ەگەر تۇرپان - حوتان جوعارى جىلدامدىقتى تاس جولى، قاشقار - حوتان تەمىر جولى، مەملەكەت تاس جولى 315 - لەنياسى سياقتى كۇن سايىن كەمەلدەنگەن نەگىزدىك قۇرىلعىلارعا سۇيەنبەگەن بولسا، پوسكام التىن توراڭعى مەملەكەتتىك باقشاسىنىڭ بۇگىنگىدەي ماندىك دامۋى بولماس ەدى، ۇزاق جاسايتىندار سالت - سانا، مادەنيەت قىستاعىنىڭ بۇگىنگىدەي دوڭگەلەك داۋلەتتى تۇرمىسى دا بولماس ەدى.

  ۇزاق جاسايتىندار سالت - سانا، مادەنيەت قىستاعى شىجياجۋاڭ شارۋالار شاتتىعى ساياجايىنىڭ قوجايىنى پاشاگۇل سامەت جوعارى جىلدامدىقتى تاس جولدان كەلگەن باقىتتى تۇرمىسقا كەنەلۋدىڭ ەڭ جاقسى دالەلى. پوسكام اۋدان قالاشىعىندا تىگىنشىلىك دۇكەنىن اشاتىن ول ساياحات دامۋىنىڭ ورايىنان پايدالانىپ، ۇزاق جاسايتىندار سالت - سانا، مادەنيەت قىستاعىنا ورالىپ، شارۋالار شاتتىعى ساياجايىن اشتى، قازىر جىلدىق تيجارات كىرىسى 150 مىڭ يۋاننان اسادى.

  جوعارى جىلدامدىقتى تاس جولدار بۇقارانىڭ دوڭگەلەك داۋلەت جولى، مۇنان دا ماڭىزدىسى، باقىت جولى. جول تابان استىندا، مىزعىماستان العا ىلگەرىلەسەك، باقىتتى تۇرمىسقا قادام تاستايتىن جولىمىز بارعان سايىن داڭعىل بولا تۇسەدى.

جاۋاپتى رەداكتور : نۇربولات قابىل

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.