انار بۇلت/ شينجياڭ گازەتىنىڭ ءتىلشىسى جاڭ جىلي
توك جولدارىن تەكسەرۋ، وڭاي بۇزىلاتىن زاپچاستى اۋىستىرۋ، تۇقىم سەبۋ جۇيەسىن جۋىپ تازالاۋ... 4 - ايدىڭ 9 - كۇنى قاھار مامۇت ۇستازىنىڭ وسىمدىك قورعاۋ ۇشقىش اپپاراتىن كۇتىمدەۋىنە زەر سالا قاراپ تۇردى.
اقسۋ ايماعىنداعى 7 ميلليون مۋدان استام ماقتا اتىزىندا ىركەس - تىركەس ەگىس جۇمىسى باستالعاننان كەيىن، اقسۋ قالاسى جياڭنان ساۋدا بازارى ماشينا - ەلەكتر جابدىقتارى اۋماعىندا ۇشقىش اپپاراتىن كۇتىمدەۋگە كەلەتىن قاريدارلاردىڭ اياعى ءار كۇنى ۇزىلمەيدى. قاھاردىڭ ۇستازى، اقسۋ تەمان ۇشقىش اپپارات وسىمدىك قورعاۋ قىزمەت وتەۋ شەكتى سەرىكتەستىگىنىڭ تەحنيگى لياڭ دا - ۋي بىلاي دەدى: 2020 - جىلى اقسۋ ايماعىندا 1000نان استام ۇشقىش اپپاراتى ساتىلدى؛ بيىل ۇعىسا كەلگەن، ۇشقىش اپپارات ساتىپ العان شارۋا وتباسىلاردىڭ ءباز - باياعىداي اياعى ۇزىلگەن جوق.
”وسىمدىك قورعاۋ ۇشقىش اپپاراتى ءىرى كولەمدەگى ەگىستىك جۇمىستارىنا ۇيلەسەدى. بۇرىن ءبىزدىڭ قاريدارلارىمىز تۇگەلدەي شارۋالاردىڭ كاسىپتىك سەلبەستىك كووپەراتيۆتەرى مەن ەگىمشىلىك ءىرى وتباسىلار بولاتىن، وسى 2 جىلدا ماقتا ءوندىرىسىنىڭ شوعىرلانۋ، ماشينالانۋ ورەسىنىڭ جوعارىلاۋىنا ىلەسە، ماقتا ەگەتىن كەيبىر جاي شارۋالار دا جەردى اينالىمعا سالعاننان كەيىن، ۇشقىش اپپارات ساتىپ الىپ، ۇشقىش اپپاراتپەن وسىمدىك قورعاۋ قىزمەت وتەۋى ارقىلى كىرىسىن ارتتىرىپ بايىدى“، - دەدى اقسۋ تەمان ۇشقىش اپپارات وسىمدىك قورعاۋ قىزمەت وتەۋى شەكتى سەرىكتەستىگىنىڭ جاۋاپتىسى جاڭ جينلۇڭ.
جاڭ جينلۇڭنىڭ ارت جاعىنداعى ۇشقىش اپپارات كورمە اۋماعىندا قارىز اقشا الۋ جوباسى جاپسىرىلۋلى تۇر: شارۋا وتباسى العاشقى تولەنەتىن قاراجات ءۇشىن ％20ىن تولەسە بولعانى، ۇشقىش اپپاراتتى الىپ قايتۋعا بولادى. وسىمدىك قورعاۋ ۇشقىش اپپاراتىن ساتىپ السا، اۋىل شارۋاشىلىعى ماشينالارىن ساتىپ الۋ قوسىمشا قاراجاتىنان دا يگىلىكتەنەدى، داجياڭ T30 ۇشقىش اپپاراتىن مىسالعا الساق، ءاربىرىنىڭ باعاسى 55 مىڭ يۋان، شارۋا وتباسى 12 مىڭ يۋان قوسىمشا قاراجاتتان يگىلىكتەنگەن سوڭ، تەك 43 مىڭ يۋان تولەسە بولعانى.
قاھار ۇشقىش اپپاراتقا ءبىر تيىن دا تولەگەن جوق. ول ءاسىلى ونسۋ اۋدانى شاعىراق اۋىلى شاعىراق قىستاعىنداعى كەدەي وتباسى بولاتىن، بىلتىر قىستاق ”ەكى كوميتەتى“ 2 ۇشقىش اپپارات ساتىپ الىپ، تومەن باعادا قاھار قاتارلى جاس كەدەي وتباسىلاردىڭ ىستەتۋىنە كوتەرتىپ بەردى.
ۇشقىش اپپاراتپەن ماقتاعا ءدارى شاشقاندا، ءار مۋ جەردىڭ ءار رەتكى قىزمەت وتەۋ اقىسى 5 يۋان اينالاسىندا بولادى، بۇل قاھاردى قاتتى شاتتاندىردى.
ۇزاق جىل ماقتا ەككەن قاھارعا ايان، ماقتانى ەگۋدەن جيناعانعا دەيىن ءدارى شاشۋ وسىمدىك قورعاۋداعى ءبىرشاما ۇزاق بارىس: جاپىراق بەتىنە تىڭايتقىش سەبۋ، ءدارى شاشىپ دەرت - دەربەزدىڭ، زياندى جاندىكتەردىڭ الدىن الۋ، وسىمدىكتەردىڭ ءوسۋىن رەتتەۋ ءدارىسىن شاشىپ، ماقتانىڭ قاۋلاپ ءوسىپ كەتۋىنەن ساقتانۋ...
”ءدارى شاشقىش اسپاپپەن ءبىر ادام ءبىر كۇندە ەڭ كوپ بولعاندا 20 نەشە مۋ جەرگە ءدارى شاشا الادى. تراكتورمەن ءدارى شاشقاندا، ماقتا مايساسىن وڭاي باسىپ - جانشىپ كەتەدى، ونىڭ ۇستىنە جاڭا سۋارىلعان جەرگە تراكتور كىرۋىنە بولمايدى. سونىمەن بىرگە، ءدارى شاشۋ ەرەكشە جاپالى بولادى“، - دەدى قاھار.
قاھار ۇشقىش اپپاراتتىڭ ماقتاعا ءدارى شاشاتىنىن 2017 - جىلدىڭ 9 - ايىندا تۇڭعىش ەستىگەن بولاتىن، سول كەزدە ءبىر ۇشقىش اپپاراتپەن 2 كۇندە 400 مۋ جەردەگى ماقتاعا جاپىراق ءتۇسىرۋ ءدارىسى شاشىلعان ەدى.
جاڭ جينلۇڭنىڭ ەسكە الۋىنشا، وسىمدىك قورعاۋ ۇشقىش اپپاراتى ەڭ العاش وڭتۇستىك شينجياڭدا قولدانىلا باستاعان كەزدە كوپتەگەن شارۋا وتباسى سەنبەپتى، ولار تەگىن ءدارى شاشىپ سىناق كورسەتكەن ەكەن. كەيبىر ماقتا ەگەتىن ءىرى وتباسىلار ۇشقىش اپپاراتتىڭ ءدارى شاشۋ ونىمدىلىگى ادام كۇشىنەن نەشە ەسە جوعارى بولاتىنىن، سونداي - اق ءدارىنىڭ بىركەلكى شاشىلاتىنىن بايقاپ، ساتىپ الۋ ويىنا كەلەدى.
2017 - جىلى اقسۋ ايماعىندا قولدانىلعان ۇشقىش اپپاراتقا نەبارى 10 كيلوگرام اۋىل شارۋاشىلىعى ءدارىسىن سالۋعا بولاتىن، جەردە 2 ادامنىڭ سەلبەسىپ جۇمىس جۇرگىزۋىنە تۋرا كەلەتىن. قازىر جەرگىلىكتى ۇشقىش اپپاراتقا 30 كيلوگرام اۋىل شارۋاشىلىعى ءدارىسىن سالۋعا بولادى، ءبىر ۇشقىش اپپارات ءبىر كۇندە 1500 مۋ جەردە جۇمىس جۇرگىزە الادى.
ونسۋ اۋداندىق شينچۇن اۋىل شارۋاشىلىعى، شارۋالار كاسىپتىك سەلبەستىك كووپەراتيۆىنىڭ جاۋاپتىسى حۋاڭ چۇنتاڭ بىلاي دەپ قارادى: ماقتانىڭ ساپاسىن جوعارىلاتىپ، ونىمدىلىگىن ارتتىرۋدا، ۇشقىش اپپارات كەلەلى رول اتقاردى. قازىر بۇل سەلبەستىك كووپەراتيۆى 6 ۇشقىش اپپارات ساتىپ الدى.
”اقسۋ ايماعى مەملەكەت دارەجەلى ساپالى تاۋار ماقتا بازاسى بولىپ قالماستان، سونداي - اق تارىم ويپاتىن وراعان ەڭ ۇلكەن ساپالى جەمىس ونىمدەرىن ءوندىرۋ بازاسى، ۇشقىش اپپارات وسىمدىك قورعاۋ قىزمەت وتەۋى بازارىنىڭ دامۋ كەڭىستىگى زور، سەرىكتەستىگىمىز اۋدان - قالالاردا تۇگەلدەي ۇشقىش اپپارات جۇرگىزۋ باۋلۋى مەن ساتۋدان كەيىنگى قىزمەت وتەۋ پۋنكتىن قۇرىپ وتىر، بيىل 700 ۇشقىش اپپارات ساتۋ مىندەتىن ورىندايمىز“، - دەدى جاڭ جينلۇڭ.
